December 8, 2022, Toronto, Ontario – Ukiuqtamaat, ilagijauqataujut Ukiuqtaqtumik Tukisiniaqatigiikkut Inuit Qaujisainirmi Aulatsijiujut Katimajiralaangit ilitaqsisimavammata Inuulluni niruagaksannguqtitausimajunit miksiqattiaqtutigut inungnik ilauqatautittisimaninganut Ukiuqtaqtumi qaujisainiujunut. Tavvani ukiumi ilitarijaujjutit tunijaulauqput Jean Allen-mut Iqalungnirmiutamut.
Allen, ilitarijaujjutinik tunijausimalilaurpuq ammalu saalaksautitaarillunigit kiinaujanik Ukiuqtaqtumik Tukisiniaqatigiikkut Arraagutamaat Sunatuinnanik Qaujisainilirinirmut Katimaniqaqtut quviasuqatigiiktitautillugit December 8-mi, Isumataulluni Qaujisainilirinirmut Uqaujjuigiaqtigijauvuq Nunavut Tunngavikkut Timinganni. Iqqanaijaarijamini qaujisainirmut piliriniqaqsimavuq sivummugiaqtitsisimaniksamut amisukallaullutik kikkutuinnait aanniaqaliqtailimaninginnut turaangallutik piliriangukainnaqtunik, piluaqtumik akuniiqtumut uqaujjuigiaqtiuqattaqsimalirsuni ammalu maligalirinirmut ikajurutiksaqaqtittivaksuni Ukiuqtaqtumiut Tuqunnaqtulirinirmut Piliriangujumut.
Allen piliriaksarijaminik Inuit nangminiq isumaliurutiurunnarninginnut qaujisainiuvaktunut tukimuagutigiqattarisimavangit inuusirmini piliriarijaminut. Aaqqiksuisimaliriarnirmik nutaangullutik pilirianguvallianiujuksanik ammalu piliriniuvanniaqtunik qaujisaiqattarnilirinirmi ujjirusugiaqarnarmat piviksaqarmangaarmii ammalu nani piliriniqaruni aaqqiksuisimalirajarnirmik, upigusutsiariaqarnirmik ammalu taimaujunik aturunnariaqarnirmik qaujimajariaqarnarmata. Uqaujjurutiksangit ammalu qaujimaningit malitsiaqtitausimavammata amisuilingallutik ujisainilirinirmi maligaqutiliriniujunut. Amisuuningit naammaktuutitausimaninginnut piruqtittisimagiaqpaksuni sivuliqtiujunnarniqarmat qaujimajauttiaqsunilu piusugijaarutiginaniuk saqqijaaqtittiluaranilu imminik qularinngittuuninganik, tamakkinnik aturluni Inuit piusituqangatigut ammalu qallunaat piusingatigut qaujisainiuvaktunut piliriniqarunnaqsuni.
“Jean Allen pilirinirivaktangit sivummuktittigiarnirmut inungnut turaangatitausimallutik qaujisainiujunut tunirrutiksausimammata Inuit Nunangannirmiungujunut ammalu kanatamiungujunut,” uqaqsuni Inuit Tapiriit Kanatami Angijuqqaangat Natan Obed. “Qujagijavut piliriarisimajanginnut, piusigiaqtittisimajjutiksanut kisianituangunngittuq aanniaqaliqtailimajulirinirmi ammalu qanuinngittiariaqarningita Inuit, kisianiluttauq asijjiisimalirninganut maligaqutiujunik ammalu piliriaqaqpallianiuvaktunik Inuit sivulliqpautiqujangit nalunaiqtausimaliqtigiaqmagit ammalu pijausimalirasugungnaqullugit. quviasugutivaqput Jean Allen tamatumunga ilitarijaujjutiksaqtaartitauninganut.”
Allen amisuujunik ikajurutiqaqsimaningit ammalu pijariiqsimajanginnut pijjutiqaqtut amisukallammariuvut ammalu amisuilinganiqaqtuullutik. lagijauqatauvuq aaqqiksuinirmi Inuit Tapiriit Kanatami Canadami Inuit Parnautiliarisimajanginnik Qaujisainirmut, Qanuippitaa? Canadami Inuit Aanniaqarnanngittulirinirmut Qaujisainingat, Nunavummiunik Sivuliqtiqaqsutik Canadamiut Iqqanaijarvingat Aanniaqarnanngittulirinirmi Qaujisainiujunut (CIHR) kiinaujaqutiksanik pititaulaurninginnut Niqittiavangnik Niqiqaqattaqujinirmut Pilirianut, Niqigijaksanik Pisimaliriaqarnirmut Pilirianut ammalu Silaup Asijjiqpallianinganut Piliriani, ammalu CIHR-kut Parnautiliarisimajangit Aanniarviliaqsimajunut Turaangatitaullutik Qaujisainiujunut Nunavummi.
“Piliriaqarluaqsimaninga Inuit qanuinngitsiaqtitaujariaqarninginnut ammalu akhluittuuliqtitauniksanginnut takuksaruqsimainnaqpaktut piliriarijanginni. Ilagijauqatauninga Inungnut ammalu nunaqqatigiiktunut angijualungmik ikajuqsimaliqtut Inuit nangminiq aulatsiniqarunnarninginnut qaujisainiuvaktut piruqpalliatitauninginni,” uqaqsuni James Bolt, Nunavut Tunngavikkut Timingani Inuit Qaujisainirmut Uqaujjuijiulaurtuq.
“Jean sapujjigiaqtiunginnaqattaqsimavuq aulatjagiaqtitauniksanginut aktuiniqaqsimalutik Inungnut turaangatitausimallutik qaujisainirmi maligaqutiliriniujunut,” uqaqsuni Jenn Parrot, Nutaatigut Piliriniujunut Isumataujuq, Inuvialuit Sunatuinnanik Qaujisainilirijikkunnut ammalu Silaup Asijjiqpallianinganut piliriaqaqtingini Inuvialuit Aviktuqsimaningani Kuapuriisanganni. “Ikajuqtuiniqaqsimavuq amisukallaujunik piliriniulirumajunik amma sannginiqsaujukkut Inuit tusaqsauniqaliqtitaujjutigillugit ammalu angijualungmik naliqqauliqtittiniujunut Inuit Nunaluktaarijanganni. Ikpisuguttiaqtuulluni pilirinirivaktangit ammalu sulillariktumik pilirinirivaktangit saqqiisimalirutiummata nalunaittummarikmik asijjiriaqtitausimalirningita ukiuqtaqtumi qaujisainiujunut pilirianguvaktuni.”
Inuit Qaujisainirmi Aulatsiniujunut Katimajiralaangit tuniuqqaivammijut Ukiuqtaqtumiuni Qangattautiksanik ikajurutiksauniaqtunik akituluaqtuullutik qangattautinik Inuit qangattautinik akiliivanninginnut Inuit Nunangannirmiut ilagijauqataujumajut Ukiutamaat Sunatuinnanik Qaujisaivangnirmut Katimaniqaqtunut. Tavvani ukiuttinni ukua saalaksautitaaqtitaulauqput:
- Richard Maggo, Nain, Nunatsiavut
- David Wolfrey, Rigolet, Nunatsiavut
- Ricky Moorehouse, Inukjuaq, Nunavik
- Jimmy Jararuse, Kangiqsualujjuaq, Nunavik
- River Autut, Iqaluit, Nunavut
- Jessica Norris, Inuvik, Inuvialuit Aviktuqsimaninganit
- Celina Wolki, Paulatuk, Inuvialuit Aviktuqsimaninganit
Ilitarijaujjutitaalauqsimajunut ukua ilagijauqatauvut Inuit Ilitarijaujjutinginnik:
- 2021 Frank ammalu Nellie Pokiak, Inuvialuit Aviktuqsimaningani, ammalu Elizabeth (Liz) Pijogge, Nunatsiavut
- 2020 Saalaksautitaaqtuqalaunngittuq Nuvagjuarnaq-19 atuqtilluta
- 2019 Robert Way, Nunatsiavut
- 2018 Michelle Wood, Nunatsiavut
- 2017 Lucassie Arragutainaq, Nunavut
- 2016 Inez Shiwak, Nunatsiavut
- 2015 Doug Esagok, Inuvialuit Aviktuqsimaninganit
- 2014 Joey Angnatok, Nunatsiavut