Skip to main content
AnnouncementsPublicationsTusaqtitsijjutiit

Inuit nalunaijaisimavut imavingmi maligaqutinik sivulliutijauqujaujunik Inuit Nunanganni

By November 22, 2023 No Comments

March 9, 2023 – Ottawa, Ontario

Inuit Tapiriit Kanatami saqqiisimaliqtut Canadami Inuit ilingannirijanginnut titiraqtausimajunik tukimuagutiksauniaqtunik sivunirmi maligaqutiulirajaqtunut ammalu pilirianik aulatsitjutaunajaqtunut tariup avatigijajanginnut Inuit Nunanganni.

Imarjuat Atuqtainnavut: Inuit Nunangat Tariurmi Atuagaq Sivulliutijauqujaujut ammalu Piliriqujausimajunit  saqqititausimalirunnarmat tunngavvigilugit Inuit Tapiriit Kanatami 2020-2023 Qanuqtuurutiliurutigillugit Parnautingit ammalu Piliriangujunut Parnautit ammalu pijjutiqaqsutik angijumik qaujisainiulauqtunut ammalu qaujigiarniriqattaqsimajanginnut Canadami Inuit Tariulirinirmi Katimajiralaanginnit.

Taakkua ilinganniujunut titiraqsimajut nalunaijaisimammata tariulirinirmi pivalliajuliriniujunut aktuiniqaqsutik Inuit nunaligijanginnik, ilaqaqtillugit umiarjuatigut usiqattarniujunut aktuisimalirninginik, qanuinngitsiaqtittijariaqarnirmut ammalu mianirijausimaninginnut, tariumi piliriniqarviuliqtuksanut amigaqsiniujunut ammalu qaujisainiuvaktunut ammalu nautsiqtuiniuvaktunut. Nalunaijaisimavut Inuit maligalirinirmi ilingannirijanginik ammalu piliriqujausimajunik tunngavvigilugit pijunnautiqarnivut isumaliuqtiujunnarnirmik sivuniriniaqtattinnut tariurmiutaulluta.

“Maannaujuq piliriniqaliriaqaqtugut mianirijauliqullugit ammalu kajusiinnaqtitaujunnarlutik aulatsiniqalirluta tariutta sigjaqutigijanginik ammalu tariut avatigijanginik ammalu pilirianguliqullugit naammagungniiqtitaullariksutik aktuqtausimalirninginik taimaunatik tariulirinirmi piliriniqarviuliqtuksat tamakkua asitjiqpallialirninginni,” uqaqsuni Natan Obed, Angijuqqaaq Inuit Tapiriit Kanatami.

“Inuit nunalirinirmi angirutingit, United Nation-kut Nalunaiqsiningit Pijunnautiqarningita Nunaqaqqaaqsimajuit ammalu Inuit Nunangani Maligaqutingit – ilitaqsisimammata nunagijatuqarigattigu ajjiqarani aviktuqsimaniujumiittuq anginiqaqsuni ungatataanuaqsimajumik 70%-ngata Canadaup nunarjuangani tariut sigjagijanginniittunik – tamarmik nalunairutiummata tunngavvigiturauttuunittinnik tariut avatigijanginnut amma ilitarijausimaliriaqallaringmata ammalu mianirijausimalirlutik miksiqattiaqtutigut tariulirinirmi isumaliurutiliurutitigut, tunngavviqaqtitausimalutik saimmaqatigiiksimalirnirmut tunngavviqutiksaujunut.”

Tusagaksalirijjutinut Apiqqutiksaqaqtut:

[email protected]