September 9, 2022 – Ottawa, Ontario-mi – Ullumi, Canadami Makkuktut Inuit Katimajingit ammalu Inuit Tapiriit Kanatami katinniqarniaqtut inuusirmik Gavamakkut Maligaliurvigjuangani quviasugutiqariaqsimalutik ammalu Inuit kajusiinnarunnarninganik Silarjualimaami Imminiiqattaqujinnginnirmut Ullungani. Ukiutamaat iqqamajauvanningani September 10-mi, Silarjualimaami Imminiiqattaqujinnginnirmut Ullungani Inuit katinniqaqsutik asiujisimajattinnik iqqaumaqatigiiksutik ulluqaqtitsivaktut ammalu piliriaqalirasunnittigut qanuinngitsiaqtunik, quviasunniqsaujunik nunaliqaliqtitsigiattinnut Inuit Nunaluktaangini.
Maliktitaulutik aviktuqsimanirijaujuni quttingnirijauningita, Inuit imminiiqattarningit 5-nit 25-nut quttingniqarniqsaumata Canadamiunguqatigijaminnit quttingniujunit. tamanna taimannailaqititauvuq sukkalijummaringmik inuuqatigiingujut katinngaqatiqaqpallianinginik Inuit Nunanganni, gavamaqausiuvaktunillu, akiraqtuiniuvaktullu uviniqatiginngitaminnik, ilinniariarviuvalauqsimajunit ammalu kinguvaariiktut aksururnaqtukkuuqpalliavanninginnit.
Taimalu, Inuit – piluaqtumik makkuktungit Inuit – attanaqtumiiliqsimaningit quvvasiksiluaqsimalirmat. Canadami Makkuktut Inuit Katimajingit isumakkut aanniaqaliqtailimajulirinirmi ammalu imminiiqattaqujinnginnilirinirmi piliriaksaujunik sivulliqpaputitaksannguqtittisimaliqput, tiliurijjutigillugu Canadaup quttingninganit kiujausimaliqullugit ammalu angigligiaqtitausimaliqullugit Inuit nunaligijangita ikajuqtugaujjutiksataarivaktangit piliriarijaujunnaqsiniarmata Inungnik sivuliqtiqarlutik tamakkua aaqqiigiarutiksaulirajaqtut mikiggiaqtitausimaliqullugit imminiiqattarniuju quttingnirijangit.
“Amisuuniqsait Inuit inuusirminni imminiiqtuqaqattaqsimajunit qanitarijaminnit aktuqtausimangmata, ammalu taimali attanaqtumiilirunnarniujut quttingniqsammariulirmata,” uqaqsuni NIYC-kunnut Angijuqqaangujuq Brian Pottle. “Atii piliriqatigiililauqta piuniqsaujutigut ikajuqsugausimaliqullugit ilagiiktuqutigijavut ammalu piqatialugijavut pisimajariaqaqtaminnik atuinnaulirviuqullugit inuusinginnut ikajuutaulirunnaqtunik quviasuttiarlutik qanuinngittiaqtuulutiklu inuusiqalirunnaqullugit.”
Taakkua piliriangujut tukimuagutiksaqaliqtitauqullugit, 2016-mi Inuit Tapiriit Kanatami pigiaqtittisimalilauqtut Canadami Inuit Imminiiqattaqujinnginnilirinirmut Parnautinik, Inungnut turaangallutik parnautiliangusimajunik piliriangusimaliqullugit taimaunginnaujaqtuulluni kikkutuinnat aanniaqsiurtilirinilirni imminiiqattarniliriniujuq tuaviurnaqsisimaningata Inungni.
Taakkua parnautiliangusimajut turaarviksaqarmata atuinnauliqtitausimaqullugit isumakkut qanuinngittiarnilirinirmut pijitsirarutiksait taimaunginnaqtitauqullugit Inungnut, mamisarutiusimaliqullugu aksururnaqtukkuursimaniujunit ammalu qiksaarutiqainnaqsimaniujunit taimaunginnaujaqsimajunit, ammalu pilirijjutiksaujut Inuit qaujimajatuqangit kajusiinnariarunnarnirmut ammalu imminiiqattaqujinnginnilirinirmu atuliqtitausimaqullugit.
Isummiqsimanniruvit imminiirumallutit ammalu ikajuqtaujariaqaruvit, atii uqaalavvigilaukkit Qanuinngitsiaqujilirinirmut uqaalavviksaujut uvani 1-855-242-3310. Makkuktut ikajuqtaujarialiit uqaalajunnaqtut Surusirnut Ikajuqtiksakkut Uqaalautinganut uvani 1-800-668-6868 uvvaluunniit uqaalautialaakkut titirarvigilugit uvunga 686868.
-30-