Ottawa, Ontario – July 12, 2021
Inuit Nunanganni Niqigijaksaminnik Pisimaliqattarunnarnirmut Parnautiit (INFSS), saqqitaulauqtut ullumi Inuit Tapiriikkunnit Kanatami aaqqiisimalirutiuvut tunngavviuniaqtunik isulitittisimaliriarnirmut kaaluaqattarniujunik Inuit Nunanganni, Inuit nunagijatuqanganni Canadami. Sivummugiaqtittisimajut Inungnit pilirianguliqtitausimallutik aaqqiigiarutiujunnaqtunik piusigiaqtitausimaliqullugit niqigijaksaminnik pisimaliqattarunnarnirnut ammalu pigiaqtitsisimalirajarnirmut kajusiinnaqtitaujunnarlutik niqilirinirmi pilirijjutiuniaqtunik Inuit Nunanganni.
Niqigijaksaminnik pisimaliqattarunnannginniujut inungni taimaunginnaujaqtuuninga ilagijauqataummat akuniuniqpaulluni kikkutuinnait aanniaqaliqtailimavanninginnut tuaviurnaqsisimalluni piliriangusimaliriaqarniujunit Canadami. Aktuqtausimaniqaqłuni amisurlaullutik atavvigiturauttunit pijjutiusimajunit, ilaqaqtillugit akłulualiqsimaniujunik, annaumanasuarutiksait akitujummariuninginnit, silaup asijjiqpallianinganit, naammanngiluarninginnit piliriaqarviksaujut taimaulianikłutik ammalu pilirijjutitigu uviniqatiginngitaminnik akiraqtuivanniujunik.
Taakkua INFSS-qutiit pitaqaliqtittisimavut piliriangusimajunik asijjiivallianiksami niqigijaksanik pitaqaqtittisimalirniksamut turaangajunik ikajurutiullariktunik niqigijaksaminnik pisimaliqattarungnannginniujunut. Angijukallammariullutik niqigijauvaktut inungnit usijaullutik akjaqtauvangmata amisukallaujunik kilometre-nik qangatasuutigut ammalu umiarjuaqtigut, angijukallaujullu niqiit aviktuqsimaniujumit aullaqtitauvaktillugit kiinaujaliurutiksaullutik niuvrutaulutik.
Parnautiit tiliurisimangmata aaqqiksuangusimajutigut piliriniqaliqujillutik ammalu kiinaujanik qiturngiuqtitsiliqujillutik tamakkua naliqqariinnginniujut piliriangusimaliqullugit, ikajuqtuiniqtigut angunasuaqłutik piliriniuvaktunik ammalu Inuit uumajulirinirmi aulatsinirnut isumaliurutiuvaktunik, kiinaujatigut ikajurutiuvaktunik ammalu aulatsiniujunik maligatigut niqinik akjaqtuniuvaktunut, piusigiaqtitsinirnut niqilirinirmi pilirivviujunik nunaliujuni, ammalu ikajuqtuinikkut aviktuqsimanirni niqiliriniujunik aaqqiksuisimalirniqtigut nunaliujuni niqinik niuviaksaqaqpakhlutik niuvirvingnik.
Nalunaijaisimavut qaujigiaqtaujunnaqłutik turaarviksaqutigijaujunik tallimaujut sivulliqpautitaksait iluaniittunik: qaujisainiuvaktut ammalu sapujjigiarniuvaktut, niqilirijjutinut pilirijjutiit ammalu qanuinngitsiarunnarniq; maligarjualiriniq ammalu maligaliriniq; piliriangujut ammalu pijitsirarutiksait; ammalu qaujimaniujut ammalu ajunnginnirijaujut. Atuliqtitausimalirniaqtut ikajuqtigiiglutik aaqqiumaningitigut Inuit Canadami Gavamakkut Piliriaqaqatigiiktit Katimajiralaanginit, taakkutiguunaq niqigijaksaminnik pisimalirunnaqattarnirnut pijjutiqaqtut amiqqarutiulluni sivulliqpautitaksanngulaurmata taimannganit ICPC-kut pigiaqtitausimalilaurtillugit 2017-mi.
Taakkua parnautiit aaqqiksuangulauqtut Inuit Tapiriikkunnit Kanatami (ITK), piliriqatigillugit Inuvialuit Aviktuqsimanirmi Kuapuriisangat, Nunavut Tunngavik Timiqutingat, Makivik Kuapuriisangat ammalu Nunatsiavut Gavamangat, ilagiqataullugit Nunavuk Aviktuqsimanirmi Aanniaqsiuqtilirijit Katimajingit ammalu Inuusilirijingit, Inuit Ukiuqtaqtumi Katimajingit Canadami, Pauktuutit Arnait Inuit Canadami ammalu Canadami Makkuktut Inuit Katimajirjuangit.
Uqausiusimajut
“Quttiniqpauningit niqigijaksaminnik pisimaliqattarungnannginniujut Inungni Canadami naammanngillaringmata. Inuit Nunanganni Niqiginiaqtaminnik Pisimaliqattarunnarnirmut Parnautiit iluliqaqput pilirianguvalliallutik asijjiivalliajjutinik piliriangujunik piliriangulirutik atautsikkuuqtitausimalutik nalunaittumik aktuisimalirniarmata tumatuminga tuaviurnaqsisimaniujumik. nalunaijaisimavut qanuq ikajuqtuiniqalirunnarnirmi aaqqiksuinirnut Inuit Nunanganni niqilirinirmi pilirijjutinik piliriniqalirniujunut ikajuqtuillutik Inuit qanuigitsiaqtitauqullugit ammalu takuksautittisimalutik qanuillaringniujunut, sivulliqpautitaksanut ammalu inuusirijattinnik Inuktigut.
Natan Obed – Angijuqqaaq, Inuit Tapiriit Kanatami
“Inuvialuit Aviktuqsimaningani Kuapuriisangat (IRC) quviasugutiqaqput saqqitausimalirningita Inuit Nunanganni Niqigijaksaminnik Pisimaliqattarunnarnirmut Parnautinik. Taakkua aaqqiksugausimaningit Parnautiit ilaqaqtittisimammata Inuvialuit pijjutiqaqtinginik ammalu maliksimatitaullutik IRC-kut niqigijaksaminnik pisimaliqattarunnarnirmut piliriangujunut. IRC-kut Nuvagjuarnaq-19-mut kiujjutigisimaliriaqsugit pilirinirijangitigut, niqigijaksaminnik pisimaliqattarunnarniq ISR-mi piusigiaqtitausimalirmata pitaqaqtittisimaniqtigut Inuvialunnut sanarrutiksanginik ammalu angunasuarutiksanginnut ammalu tuqquaqaqattarviksanut Inungnit niqigijauvaktunik, tukimuaktittijiunirmut niqinik amiqqaqatiqaqpannirnut Inuvialunnut pisimaliriaqaqtunut, ammalu piusigiaqtitsinirmi qanuinngittiaqtitauqullugit Inuvialuit Inungit ammalu Inuvialuit piusituqangatta. Taakkua nutaangullutik parnautiit nalunaiqsisimajjutiuvut Canadami Gavamakkut piliriaksaqalirningita atuliqtittiniarnirmik inungnik sivuliqtiqaqlutik parnautiliangusimajunik ammalu piusigiaqtitsijjutiksanik Inuvialuit inuusinginnik.”
Duane Ningaqsiq Smith – Iiksivautaq/Allavingmi Isumataq, Inuvialuit Aviktuqsimaningani Kuapuriisangat
“Nunavummi Inunginnut, angunasuaqpanniq, niqilirivanniq ammalu niqiqaqpanniq Inuit niqigivaktanginni angijualungmik atavviqarmata nunaqqatigiit pitsiaqturautivanninginnut ammalu Inuit kinauninginnut. Inuuqatigiingujutigut qanuinngittiaqtuuniksattinnik qaujimagiaqpannivut ammalu piruqtittisimaliriarnivut Inuuqatittinnik piliriqatiqaqpannittigut ammalu asinginik nunaqqatigijattinnik taimautitaujariaqarmata ammalu ilagijaullarikhlutik Inuit piusituqanginnut. asijjiqtisimaliriaqaqtavut isumavannivut pijjutiqaqtut niqigijaksaminnik pisimaliqattarunnarnirnit niqilirinirni aulatsijiunirnut. Niqilirinirni aulatsijiuniq tigusisimalirutiummat maligalirinirmi pilirijjusiujunut taimaujariaqaqtunut piliriniqarniarluni takuksaunatik pijjutiuliqsimajunik aktuisimaniqaqtunik Inungnik ammalu kiusimalirunnarnittinnik piliriaqaliriarluta nangminiq pisimaliriaqaqtattinnik aanniarniqaliqtailimajulirinirni, piusituqakkut naammaktunik, ammalu piusituqattinni niqigivaktattinnut. Tamanna tukiqarmat Inungnik pijunnautitaaqtittisimalirnirmut nangminiq nunaqqatigijaminnik niqigijaksaqaqtittijunnarninginnut.”
Aluki Kotierk – Angijuqqaaq, Nunavut Tunngavik Timiqutinga
“Ullaakkut tupakkuni qanuq iglumiuqatimita nirijaksauniaqtanginik saamut iliuqqaijunnarajariaq Inuup isumaalugutigiqqaariaqanngitaraluanga, kisianili taimanna amisut Inuit inuusiqarpammata Inuit Nunalilimaanginni. Tamakkununga turaangajunik pitaqanngitjutijausimajugut Nunavingmi pijjutigillugu angiqatigiigasuarutiqaqsimanittinnit kiinaujaqutiksaulirajaqtunik akiliutauvanniarlutik 6-ngujunut annaumajjutiksait akituluarninginnut mikigligiarutiksaulirunnaqtunik ikajuqtuijjutiuliqtunik pilirianut pitaqaqtitsijjutiuvaktunut Inutuqanut ikajuqtaujjutiksanik, Inuit niqigivaktanginut ikajurutiksanik, iglumiuqatigiit sunaqutiksanginnut ammalu angunasuarutiksaullutik sanarrutinut, niqinut, gasaliiksanut asinginullu pisimajauvagialiqutinut. Tamakkua akigijauvaktunut mikigligiarutiksaujut ikajurniqammarikkaluaqtillugit inuuqatigiit amisuuninginnut sivulliqpaamik piliriaqariaqsimaniummata annaumajjutiksanut akigijauvaktut Nunavimmiunut naliqqauliqtitauqullugit asinginut Canadamiungujunut nunaqaqtunut Qallunaat nunanganni. Inuit Nunanganni Niqiginiaqtaminnik Pisimaliqattarunnarninginnut Parnautiliangusimajut aaqqiisimalirutiummata nalunaijaisimallutik pilirianguvalliajuksanut piliriangujariaqaqtunik taimanna saqqitausimaliqullugit Inungnut.”
Pita Aatami – Angijuqqaaq Makivik Kuapuriisangat
“Niqigijaksaminni Pisimaliqattarungnannginniujuq Canadamiut Inunginni kikkutuinnait aanniaqaliqtailimajulirinirnut tuaviurnaqsisimalirutiuvut. ilaalu tamanna amisuilingajuulluni pivalliajuliriniugaluaqtillugu, Inuit Nunanganni Niqigijaksaminnik Pisimaliqattarunnarnirmut Parnautiit naammatsiaqtuulluni tunngavviqutiliangusimangmat nanisisimaliriarnirni aaqqiisimalirutiksanut tamakkununga naammannginniujunut. Niriungniqaqpunga taakkua parnautiit aaqqiksuangusimalirniksangita ammalu naammaktutigut aktuisimalirajarningita Inuit inuusinginni Nunatsiavummiunut ammalu Inuit Nunangannirmiunut.”
Johannes Lampe – Angijuqqaaq, Nunatsiavut
“Pilirianguliriaqarningit niqigijaksaminnik pisimaliqattarunnannginniujut nunaligijattinni sivulliqpautitaujariaqartut pijjugillugu ilauqatauningita timikkut ammalu isumakkut qanuinngitsiaqtitaujariaqarningita inulimaat. Inuit ajurnanngittutigut atuinsaulirviujariaqarmata niqittiavannik, niuvirvingnit niuvianguvaktunut ammalu Inuit niqinginnut. Ikajuqtigiikluta piliriaqarnivut taakkuninga pilirianguliqsimajunut, ikajuqtuiniqaratta atuinnautitaulutik, piusituqarmut naammaktunut aaqqigiaqtausimallutik niqiginiaqtaminnik pisimaliqattarunnarnirmut parnautinik.”
Minnie Grey – Allavvingmi Isumataq, Nunavik Aviktuqsimaningani Aanniaqsiuqtilirijikkut ammalu Inuusilirijikkut
“Akunialuk taakkua parnautiit piliriangusimalirsutik quvianarmat saqqitausimajunnalirmata asuilaak ammalu sarimagivaqput kingullirpaamik pitaqalirunnaqtitauningit. Ajurnanngittuulluni piliriaksaulaunngimmat pijjutigillugu amisuilingajuullutik niqigijaksaminnik pisimaliqattarunnannginniujut iluliqarningita ammalu nanisisimalirasunnirmi amiqqarutiulluni naukkut sivummugiaqtitausimalirajarninginni. Pilirianguvalliasimajut Inuit Niqigijaksaminnik Pisimaliqattarunnarnirmut Piliriaqaqtinginit ilautitsijunnalaurmata ammalu tunngasuktitsisimallutik atuliqtitauqujaullutik isumaliurutinik ammalu isumagijaujunik aviktuqsimaniujunit ammalu katujjiqatigiigijaujunit ammalu aksururutigillugu pilirinirisimajangit piliriniqarunnatsiarningillu ilitarijausimajariaqaqput. Qularinngitavut piliriangujuksat nalunaiqtausimallutik parnautini mikigligiaqtittisimalirniarningita quttingtummariullutik taimaunginnaujarningita niqiginiaqtaminnik pisimaliqattarunnannginniujunut inungni Inuit Nunalilimaanginni ammalu arnait surusiujullu tamatumanngat aktuqtausimaniqallariktuullutik. Canadami Inuit Niqiginiaqtaminnik Pisimaliqattarunnarninginnut Parnautiit pimmariullutik tikitausimalirniujunut nalunaikkutaummata pisimalirasuarnirmik niqiginiaqtanik aulatsijiujunnarnirmut ammalu piusigiaqtitausimalirniksangita niqiginiaqtaminnik pisimaqattalirunnarningita Inuit. Ammaluttauq Pauktuutikkut Timingat aaqqiksimalirvigingmagu itiniqsaujumik piliriniqarviqalirunnarnirmut niqigijaksaminnik pisimaliqattarunnarnirmut parnautinut turaangaluaqtillugit arnanginnut Inuit. Niriungniqaqpugut ikajuqtuilirniksattinnik atuliqtitausimalirviksangita.
Rebecca Kudloo – Angijuqqaaq, Pauktuutit Arnait Inuit Canadami
“ukiuqtaqtumiut isumajjusingitigut quviasukpugut taakkua parnautiit saqqitausimalirninginnik,” uqaqłuni inuit ukiuqtaqtumi katimajinginnit kanatami angijuqqaangat maanika ial-kanajuq. “amisummariujut pivalliajuliriniujut piliriangusimammata parnautini. suurlu, niqigijaksaminnik pisimaliqattarunnanngginniujut piluammariktumik kikkutuinnait aanniaqaliqtailimajulirininginni pivalliajuliriniummata pijjutigillugu atavviqallattaaqtuuningita kinatuinnaup inuup tamaitigut aanniaqaliqtailimavanninginut ammalu qanuinnggitariaqarninginut. Inuit niruaqłijariaqarajuktitaungmata niqittiavannik uvvaluunniit qanutigi niqigijaksaminnik niqiqaqpagiaqarnirminnut pisimajunnarniarmangaarmiik, taimalu naammagungniiqsimalirutiuvakłutik aanniaqaliqtailimajunnarningit. Taakkua parnautiit ikajurutiulirniarmata tamanna naammanngginniujuq aaqqiktausimalirniksanganut.”
Maanika Ial-Kanajuq – Angijuqqaaq, Inuit Ukiuqtaqtumi Katimajingit Kanatami
“Angijualungmik taimaunginnaqtuujunnarniujut makkuktungini Inuit Inuit Nunalilimaanginni suli, ammalu kajusiinnaqsimallutik, naqitiqtausimaningita qanuillattaarniujunit taimaujariaqallariktuullutik piruqtittivalliajunnarnirnut aanniaqanngitsiartunik ammalu quviasuttiarlutik inuusiqaliqtitauniksanginnut pitaqanngititaugajungmata, ilaqaqtillugit naammaktunik niqigijaksaminnik pisimaliqattarunnannginniujunik. Ullumi, niriungniqallariliqsimavunga niqiginiaqtaminnik pisimaliqattarunnarnirmut naammanngijjutiuliqsimajut makkuktunginni Inuit piluarungniiqtitaunialirningata, mikigligiaqtitausimalirniarninngikkutik, saqqiisimalirniqtigut Inuit Nunanganni Niqiginiaqtaminnik Ppisimaqattalirunnarninginnut Parnautiit.”
Brian Pottle – Angijuqqaaq, Canadami makkuktut Inuit katimajirjuangit
“Kinatuinnaq Inuk isumaalugutiqaqtitaujariaqanngimmat nakit qanuq nirijaksaminnik pisimalirungnarniarmangaarmiik. Ilitarisimavara pivalliajuliriniujut niqigijaksaminnik pisimaliqattarunnarnirmut piliriangujut akunialummarik sivulliqpautitaksausimalirmata Inungnut, ammalu piliriaksaqaliqsimagama piliriqatiqarniarninnut Inuit Tapiriikkunginnik Kkanatami ammalu Gavamatuqakkunni iqqanaijaqatigijannik piuniqpaatigut ikajuqtuisimalirniksamut Inuit Tapiriikkunnik Kanatami atuliqtittivallianinginni nangminiq aaqqigiarutiksaujunut niqigijaksaminnik pisimaliqattarunnarniujunut Inuit Nunanganni.”
Minister Marc Miller – Minister-gijaujuq Nnunaqaqqaarsimajulirijikkunni
“Niqigijaksaminnik pisimaliqattarungnannginniit aktuisimaniqallaringmata amisunut nunaligijaujunit Inuit Nunalilimaanginni pijjutigillugit ungasiktumiunguluarningit, akituluartuuningit annaumajjutiksait, ammalu avatiujup asijjiqpallianingata. Kajusitittisimavugut piliriqatiqatsiarnittinnik piliriaqaqatigiiktuni, ilaqaqtillugit Inuit Tapiriikkut Kanatami ammalu Inuit Niqiginiaqtaminnik Pisimaliqattarunnarninginnut Piliriaqaqtigijaujut, sivummugiaqtitausimaliqullugit aaqqiigiarutiksaujut ikajuqtuisimaniqaqsutik ammalu takuksautitsisimajunik Inuit sivulliqpautitauqujanginnik. Tamakkua ilaqaqput aaqqiksuiqatigiiksimallutik Angunasuktiit Ikajuusiaqtaanguvaktunut Kiinaujaqutiksanginik Ikajurutiksautitaullutik akituluaqpangningita piusituqaq malikhlugu angunasuaqattarniujunut ammalu angunasukpanniujunut ammalu aaqqiksuisimalirnirmut angigligiaqtitausimaliqullugit atuinnautitauvaktunut Inuit niqigivaktanginnik. Kajusitittisimaniaqtugut sivummugiaqtitsinirmi ikajuqtigiikluta piliriqatigiingniujunik, piliriaqaqatigiinnirnik, ammalu tamarmiullutik gavamaujuni pilirianguliqsimaningitigut, piusigiaqtitausimaliqullugit niqigijaksaminnik pisimaliqattarniujunut Inuit Nunanganni. Qujannamiirumavakka Inuit Tapiriikkut Kanatami kajusiinnaqtittisimaninginnik sivuliqtiunirminnut ammalu aksururutigillugit aaqqiisimalirninginnut taakkuninga Inuit Nunanganni Niqigijaksaminnik Ppisimaqattalirunnarnirnut Parnautinik.”
Minister Daniel Vandal, P.C., M.P. – Ukiuqtaqtumiulirijikkunnut Minister-gijaujuq