ᐃᓄᐃᑦ ᓄᓇᖓᓐᓂ ᖃᐅᔨᓴᐃᓂᕐᒧᑦ ᐱᓕᕆᐊᖅ

ᐃᓄᓐᓂᒃ ᖃᐅᔨᓴᐃᔨᖃᕐᓂᖅ, ᐃᓄᐃᑦ ᐱᔾᔪᑎᒋᓪᓗᒋᑦ

ᐃᓄᐃᑦ ᓄᓇᖓᓐᓂ ᖃᐅᔨᓴᐃᓂᕐᒧᑦ ᐱᓕᕆᐊᖅ (INRP) ᐃᓄᓐᓂᒃ ᓯᕗᓕᖅᑎᖃᖅᓱᑎᒃ ᐱᓕᕆᐊᓄᑦ ᐃᓚᒋᔭᐅᕗᖅ ᐅᑯᓄᖓ ᐅᑭᐅᖅᑕᖅᑐᖅ ᐅᑭᐅᖅᑕᖅᑐᒥᐅᓂᑦ, ᐱᓕᕆᐊᒥᑦ ᐊᐅᓚᑕᐅᓪᓗᓂ ᐅᑭᐅᖅᑕᖅᑐᒥᒃ ᑐᑭᓯᓂᐊᖅᑎᒃᑯᑦ ᖁᑦᑎᖕᓂᖅᐹᑎᒍᑦ ᐃᖅᑲᓇᐃᔭᕐᕕᖓᓐᓂᑦ. ᐊᑕᐅᑦᓯᒃᑰᖃᑕᐅᓪᓗᑎᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐱᓕᕆᐊᖓᓐᓄᑦ ᑲᓇᑕᒥ ᐃᓄᐃᑦ ᖃᐅᔨᓴᐃᓂᕐᒧᑦ ᐸᕐᓇᐅᑎᖏᑕ (NISR) ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ, ᐃᓄᐃᑦ ᓄᓇᖓᓐᓂ ᖃᐅᔨᓴᐃᓂᕐᒧᑦ ᐱᓕᕆᐊᖅ (INRP) ᓯᕗᒻᒧᒋᐊᖅᑎᑦᓯᕗᑦ ᐃᓄᐃᑦ ᓇᖕᒥᓂᖅ ᐊᐅᓚᑦᓯᔨᐅᔪᓐᓇᕐᓂᖏᓂᒃ ᖃᐅᔨᓴᐃᓂᖃᕐᓂᕐᓂ ᐋᖅᑮᓯᒪᓕᕐᓂᒃᑯᑦ ᐱᓕᕆᓂᖃᕐᕕᒃᓴᖏᓂᒃ ᐃᓄᐃᑦ ᑕᐅᑦᑐᕆᓂᐊᖅᑕᖏᓂᒃ ᖃᐅᔨᓴᐃᓂᐅᓪᓗᑎᒃ ᐱᓕᕆᐊᓂᒃ ᐋᖅᑭᒃᓱᐃᓗᑎᒃ, ᐋᖅᑮᓯᒪᓕᖅᑎᑦᑎᓗᑎᒃ ᐃᑲᔪᖅᑎᒌᒡᓗᑎᒃ ᐱᓕᕆᖃᑎᒋᔭᐅᓂᐊᖅᑐᓂᒃ ᐱᓕᕆᐊᖃᕈᓐᓇᕐᓂᕐᓂᒃ ᐱᕈᖅᑎᑦᓯᕙᓪᓕᐊᓂᕐᓂ ᐊᒻᒪᓗ ᓴᖖᒋᒃᑎᑦᓯᒋᐊᕐᓂᕐᓂ ᐊᒃᑐᐃᓯᒪᓂᐅᔪᓂᒃ ᐊᒻᒪᓗ ᐊᑐᕐᓂᖃᖅᑐᑎᒍᑦ ᐃᓄᐃᑦ ᓄᓇᖓᓐᓂ ᐃᓄᐃᑦ ᐱᔾᔪᑎᒋᓪᓗᒋᑦ ᖃᐅᔨᓴᐃᓂᐅᔪᓄᑦ .

ᑖᒃᑯᐊ INRP-ᖑᓪᓗᑎᒃ ᐱᓕᕆᐊᑦ ᑮᓇᐅᔭᖁᑎᒃᓴᖃᖅᑎᑕᐅᕗᑦ $900,000-ᓗᐊᓂᒃ ᐅᑭᐅᑕᒫᑦ ᐅᑭᐅᖑᓂᐊᖅᑐᓄᑦ ᓯᑕᒪᓄᑦ (4) ᐱᓕᕆᓂᖃᖅᑎᓪᓗᒋᑦ. ᐱᓕᕆᐊᒥ ᐃᓱᒪᒃᓴᖅᓯᐅᕈᑎᖃᕐᓂᐊᖅᐳᑦ ᖃᓄᖅ ᑮᓇᐅᔭᖁᑎᒃᓴᕆᔭᐅᓂᐊᖅᑐᑦ ᐋᖅᑭᒃᓱᒐᐅᓯᒪᓂᐊᕐᒪᖔᑕ ᐅᑭᐅᖏᓂ 1-2-ᓄᑦ ᐃᓚᖃᖅᑎᓪᓗᒋᑦ ᐃᓱᒪᓕᐅᕈᑎᓂᒃ ᐱᓯᒪᓕᖅᑎᑕᐅᔪᒪᔾᔪᑎᓂᒃ ᑐᒃᓯᕋᐅᑎᖃᒃᑲᓐᓂᕐᓂᐊᖅᑎᓪᓗᒋᑦ ᐱᔭᕆᐊᖃᓕᕌᖓᒥᒃ.

ᖃᐅᔨᓴᒐᐅᓯᒪᓕᕈᓐᓇᖅᑐᓂᒃ ᐃᓱᒪᓕᐅᕈᑎᓂᒃ ᐱᑎᑕᐅᖃᑦᑕᓕᕈᒪᓂᖅ

ᐃᓄᐃᑦ ᓄᓇᖓᓐᓂ ᖃᐅᔨᓴᐃᓂᕐᒧᑦ ᐱᓕᕆᐊᖃᖅᑎᐅᔪᑦ ᐱᑎᑕᐅᖃᑦᑕᓕᕈᒪᕗᑦ ᖃᐅᔨᓴᒐᐅᓯᒪᓕᕈᓐᓇᖅᑐᓂᒃ ᐃᓱᒪᓕᐅᕈᑎᓂᒃ ᑮᓇᐅᔭᓕᕆᓐᓇᐅᑉ ᐅᑭᐅᖓ 2020-2021 ᐊᑐᖅᑎᓪᓗᒍ.

ᐊᐅᓚᑦᓯᔨᐅᓂᖅ

ᑖᒃᑯᐊ INRP-ᖑᓪᓗᑎᒃ ᐱᓕᕆᐊᑦ ᐊᐅᓚᑕᐅᕗᑦ ᐃᓄᓐᓂᑦ ᐃᓄᐃᑦ ᐅᖃᐅᔾᔪᐃᒋᐊᖅᑎᐅᓪᓗᑎᒃ ᑲᑎᒪᔨᕋᓛᖏᓐᓂᑦ (IAC), ᐃᖅᑲᓇᐃᔭᕐᕕᓐᓂᑦ ᑲᑐᔾᔨᓪᓗᑎᒃ ᐃᑲᔪᖅᑎᖃᖅᑎᑕᐅᓪᓗᑎᒃ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ ᐊᒻᒪᓗ ᐅᑭᐅᖅᑕᖅᑐᒥᒃ ᑐᑭᓯᓂᐊᖅᑎᒃᑯᑦ ᑲᑎᒪᔨᕋᓛᖏᓐᓂᑦ ᐱᔾᔪᑎᖃᖅᑐᓄᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓐᓂᒃ, ᒪᑭᕕᒃ ᑯᐊᐳᕇᓴᖓᓐᓂᒃ, ᑲᑎᕕᒃ ᐊᕕᒃᑐᖅᓯᒪᓂᕐᒥ ᒐᕙᒪᖓᓐᓂᒃ, ᓄᓇᕗᑦ ᑐᖖᒐᕕᒃᑯᑦ ᑎᒥᖓᓐᓂᒃ, ᓄᓇᑦᓯᐊᕗᑦ ᒐᕙᒪᖓᓐᓂᒃ, ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᖏᓂ ᑲᑎᒪᔨᖏᓂᒃ-ᑲᓇᑕᒥ.

ᑐᕌᕐᕕᒃᓴᖁᑎᖏᑦ

ᑖᒃᑯᐊ INRP-ᖑᓪᓗᑎᒃ ᐱᓕᕆᐊᖅ ᐱᒋᐊᖅᑎᑕᐅᓚᐅᕐᒪᑦ ᐱᐅᓯᒋᐊᖅᑎᑕᐅᖁᓪᓗᒋᑦ ᐃᓄᐃᑦ ᖃᐅᔨᓴᐃᓂᕆᕙᒃᑕᖏᑦ ᐱᔾᔪᑎᒋᓯᒪᓪᓗᒋᑦ ᐃᓄᐃᑦ, ᐱᕈᖅᑎᑕᐅᓯᒪᓕᖁᓪᓗᒋᑦ ᖃᐅᔨᓴᐃᓂᕐᒥ ᐱᓕᕆᔨᐅᔪᓐᓇᕐᓂᖏᑦ ᓄᓇᓕᒋᔭᑦᑕ, ᐱᓕᕆᐊᖑᓕᖁᓪᓗᒋᑦ ᓄᓇᓕᐅᔪᓂ ᐃᓱᒫᓗᒍᑎᖃᕐᕕᐅᔪᑦ, ᐊᒻᒪᓗ ᐃᑲᔪᕈᑎᒃᓴᓂᒃ ᐱᑕᖃᓕᖅᑎᑦᓯᖃᑕᐅᖁᓪᓗᒋᑦ ᐃᓄᐃᑦ ᐊᒃᖢᐃᓕᖅᑎᑕᐅᓂᒃᓴᖏᓐᓄᑦ ᐱᑕᖃᖅᑎᑦᓯᓯᒪᓂᖅᑎᒍᑦ ᐃᓄᓐᓄᑦ ᑐᓴᒐᒃᓴᓂᒃ, ᓴᓇᕐᕈᑎᒃᓴᓂᒃ ᐊᒻᒪᓗ ᑮᓇᐅᔭᖁᑎᒃᓴᓂᒃ ᐱᓯᒪᓕᕆᐊᖃᖅᑕᑦᑎᓐᓂᒃ ᓈᒻᒪᑦᓯᐊᖅᑐᑎᒍᑦ ᐃᓱᒪᓕᐅᕈᑎᓕᐅᖅᐸᖁᓪᓗᑕ ᐃᓚᖃᖅᑎᓪᓗᒋᑦ ᑐᓴᐅᒪᓕᖅᑎᑦᑎᒋᐊᖅᐸᓐᓂᑦᑎᓐᓂᒃ ᒪᓕᒐᖁᑎᐅᔪᓂᒃ ᐊᒻᒪᓗ ᐱᓕᕆᐊᓂᒃ ᐃᑲᔪᕈᑎᐅᓇᔭᖅᑐᓂᒃ ᐊᓐᓇᐅᒪᔾᔪᑎᒃᓴᕆᔭᑦᑎᓐᓄᑦ ᐱᐅᓯᒋᐊᖅᑎᑦᑎᓯᒪᓕᕐᓂᕐᒧᑦ.

ᐱᐅᓯᒋᐊᖅᑎᑕᐅᖁᓪᓗᒋᑦ ᐃᓄᐃᑦ ᖃᐅᔨᓴᐃᓂᕆᕙᒃᑕᖏᑦ

ᐱᕈᖅᑎᑕᐅᓯᒪᓕᖁᓪᓗᒋᑦ ᖃᐅᔨᓴᐃᓂᕐᒥ ᐱᓕᕆᔨᐅᔪᓐᓇᕐᓃᑦ

ᐱᓕᕆᐊᖑᓕᖁᓪᓗᒋᑦ ᓄᓇᓕᐅᔪᓂ ᐃᓱᒫᓗᒍᑎᖃᕐᕕᐅᔪᑦ

ᐃᑲᔪᕈᑎᒃᓴᓂᒃ ᐱᑕᖃᓕᖅᑎᑦᓯᖃᑕᐅᖁᓪᓗᒋᑦ ᐃᓄᐃᑦ ᐊᒃᖢᐃᓕᖅᑎᑕᐅᓂᒃᓴᖏᓐᓄᑦ

ᖃᓄᖅ ᑐᒃᓯᕋᐅᑎᖃᕋᔭᕐᓂᖅ

ᐱᓕᕆᐊᖅ ᑖᓐᓇ ᒪᑐᐃᖖᒐᑎᑕᐅᕗᖅ ᑕᒪᐃᓐᓄᑦ ᐃᓄᐃᑦ ᓄᓇᓕᒋᔭᐅᔪᓄᑦ ᐊᒻᒪᓗ ᑲᑐᔾᔨᖃᑎᒌᖑᔪᓄᑦ.

ᑖᒃᑯᐊ INRP-ᖑᓪᓗᑎᒃ ᐱᓕᕆᐊᖅ ᐃᓕᑕᖅᓯᓯᒪᓂᐊᕐᒥᔪᑦ ᑕᐃᒪᐅᓕᐊᓂᒃᓱᑎᒃ ᐱᓕᕆᖃᑎᒌᖕᓂᐅᔪᓂᒃ ᖃᓪᓗᓈᑦ ᓄᓇᖓᓐᓂᑦ ᖃᐅᔨᓴᖅᑎᐅᔪᑦ ᐊᒻᒪᓗ ᐃᓄᐃᑦ ᓄᓇᓕᖏᓐᓂᑦ, ᐱᓕᕆᐊᖑᔪᑦ ᓯᕗᓕᖅᑎᐅᖃᑕᐅᑐᐊᖅᐸᑕ ᐃᓄᐃᑦ ᐊᒻᒪᓗ ᓇᓗᓇᐃᖅᓯᓯᒪᑐᐊᖅᐸᑕ ᑕᒪᐃᑎᒍᑦ ᒪᑯᓂᖓ:

  • ᐃᓄᓐᓂᒃ ᐃᓚᒋᔭᐅᑎᑦᑎᓯᒪᓪᓗᑎᒃ ᑕᒪᐃᑎᒍᑦ ᐱᓕᕆᐊᖑᑲᐃᓐᓇᖅᑐᑦ ᐱᓕᕆᐊᖑᕙᓪᓕᐊᓂᖏᓐᓂ;
  • ᐃᓱᒪᓕᐅᕈᑏᑦ ᐋᖅᑭᒃᓱᐊᖑᓯᒪᓪᓗᑎᒃ ᐱᓕᕆᖃᑎᒋᓯᒪᓪᓗᒍ ᐃᓅᓪᓗᓂ ᐱᓕᕆᐊᖃᖃᑎᒋᔭᑎᒃ ᐅᕝᕙᓘᓐᓃᑦ ᐃᓄᐃᑦ ᓄᓇᖓᓐᓂᑦ ᐱᓕᕆᐊᖃᖃᑎᒋᔭᒥᓐᓂᒃ;
  • ᓈᒻᒪᒃᑐᑎᒍᑦ ᐸᕐᓇᐅᑎᓂᒃ ᐃᓕᓯᓯᒪᓕᐊᓂᒃᓱᑎᒃ ᑐᓴᐅᒪᖃᑦᑕᐅᑎᓂᐅᔪᑦ ᑲᔪᓰᓐᓇᖅᑎᑕᐅᓯᒪᖁᓪᓗᒋᑦ ᐱᓕᕆᐊᖑᑲᐃᓐᓇᖅᑐᑉ ᐱᓕᕆᐊᖑᓂᖓᓂ;
  • ᐃᓄᓐᓂᒃ ᐱᓕᕆᐊᖃᖅᑎᐅᔪᓐᓇᕐᓂᖏᓂᒃ ᐱᕈᖅᑎᑦᑎᓯᒪᓕᕆᐊᕐᓱᑎᒃ; ᐊᒻᒪᓗ
  • ᑮᓇᐅᔭᖁᑎᒃᓴᐅᓂᐊᖅᑐᓂᒃ ᑐᕌᖅᑎᑦᑎᓯᒪᔪᓂᒃ ᓄᓇᓕᐅᔪᒥ ᐱᓕᕆᐊᖃᖃᑎᒋᔭᒥᓐᓄᖔᖅ ᖃᓪᓗᓈᑦ ᓄᓇᖓᓐᓂ ᖃᐅᔨᓴᖅᑎᒨᖖᒋᑦᑐᖅ.

ᖃᕆᑕᐅᔭᑎᒍᑦ ᐅᕙᓂ [email protected] ᑐᓴᖅᑎᓯᒪᓕᕐᓗᒋᑦ. ᐅᖃᐅᓯᕆᓗᒋᑦ ᐅᖃᐅᓯᕐᓂᒃ ᐃᖢᐊᕆᔭᕐᓄᑦ, ᒪᑯᓂᖓ ᐱᔾᔪᑎᖃᖅᑐᓄᑦ:

  • ᖃᐅᔨᓴᐃᓂᕐᒧᑦ ᑐᕌᖓᓪᓗᑎᒃ ᐊᐱᖅᑯᓯᒃᓴᕐᓂᒃ ᐅᕝᕙᓘᓐᓃᑦ ᖃᐅᔨᓴᐃᓂᕐᓄᑦ ᐱᔾᔪᑎᖃᖅᑐᓂᒃ
  • ᓇᓂ ᐱᓕᕆᓂᖃᕐᓂᕐᓄᑦ ᖃᐅᔨᓴᐃᓗᑎᒃ
  • ᖃᖓ ᐱᒋᐊᕐᕕᖃᕐᓗᑎᒃ ᐱᓕᕆᐊᑦ ᐊᒻᒪᓗ ᐃᓱᓕᕝᕕᒃᓴᖓᓂᒃ
  • ᑭᒃᑯᑦ ᖃᐅᔨᓴᐃᔨᐅᓂᐊᖅᐸᑦ?
  • ᖃᓄᖅ ᖃᐅᔨᓴᐃᓂᕐᒧᑦ ᐊᐱᖅᑯᓯᐅᔪᖅ ᑭᐅᓯᒪᓕᕐᓂᐊᖅᐱᐅᒃ?
  • ᓄᓇᓕᐅᔪᒥ ᐱᓕᕆᐊᖃᖃᑎᒋᔭᐅᔪᑦ

ᐊᑏ ᖃᐅᔨᑎᓐᓂᐊᖅᐸᑦᑎᒍᑦ ᐊᓯᐊᒍᑦ ᐃᑲᔪᖅᑕᐅᔭᕆᐊᖃᕐᓂᐊᕐᓂᕈᕕᑦ ᐃᓱᒪᓕᐅᕈᑎᓐᓂᒃ ᐋᖅᑭᒃᓱᐃᓂᕐᓂ ᖃᐅᔨᓴᖅᑕᐅᓯᒪᓕᖁᓪᓗᒋᑦ ᐃᓱᒪᒋᔭᑎᑦ ᓈᒻᒪᒋᔭᐅᓯᒪᓕᕋᔭᖅᐸᑕ.

ᐃᓱᒪᒋᔭᕐᓂᒃ ᐅᖃᐅᓯᖃᖔᕈᒪᒍᕕᑦ ᐅᖄᓚᐅᑎᑎᒍᑦ, ᐅᖃᐅᓯᕐᒥᒃ ᐊᑐᕈᒪᔭᕐᓂᒃ ᐊᑐᕐᓗᑎᑦ, ᐅᖄᓚᐅᑎᑎᒍᑦ ᐅᖃᓛᕝᕕᐅᔪᒪᓂᕋᕐᓗᑎᑦ ᕿᒪᐃᔪᓐᓇᖅᐳᑎᑦ ᐊᑭᖃᖖᒋᑦᑐᒃᑯᑦ ᐅᕙᓂ: 1-866-262-8181. ᐊᑏᑦ, ᓇᓪᓕᐊᒃᑯᑦ ᖃᐅᔨᑎᑦᓯᓯᒪᓕᕈᒪᓂᕐᓄᑦ (ᐅᖄᓚᐅᑎᒃᑯᑦ, ᖃᕆᑕᐅᔭᑎᒍᑦ), ᐊᒻᒪᓗ ᑐᓴᖅᑎᑦᓯᔾᔪᑎᒃᓴᕐᓂᒃ ᐅᖃᐅᓯᖃᕐᓗᑎᒃ ᖃᐅᔨᓴᐃᓂᕐᒥ ᐊᐱᖅᑯᑎᒃᓴᕆᔭᕐᓄᑦ ᐅᕝᕙᓘᓐᓃᑦ ᐱᔾᔪᑎᒋᔭᕐᓄᑦ ᐅᖄᓚᐅᑎᒃᑯᑦ ᕿᒪᐃᓯᒪᓕᕐᓗᑎᑦ ᐅᖃᐅᓯᕆᓗᒋᑦ.

ᑕᐃᒪᓗ INRP-ᑯᑦ ᖃᐅᔨᓴᖅᑕᐅᓯᒪᓕᖁᓪᓗᒋᑦ ᐃᓱᒪᒋᔭᕐᓂᒃ ᐱᓯᒪᓕᖅᐸᑕ ᕿᒥᕐᕈᔭᐅᓕᕋᔭᖅᑐᑦ ᐃᓄᐃᑦ ᐅᖃᐅᔾᔪᐃᒋᐊᖅᑎᐅᓪᓗᑎᒃ ᖃᐅᔨᓴᐃᓂᕐᒧᑦ ᑲᑎᒪᔨᕋᓛᖏᓐᓂᑦ (IAC) ᑕᐃᒪᓗ ᕿᒥᕐᕈᐃᕌᓂᒃᑯᒥᒃ ᐃᓱᒪᓕᐅᕈᑎᖃᓕᕋᔭᖅᑐᑦ ᐊᑕᐅᓯᕐᒥᒃ ᒪᑯᓇᖖᒐᑦ ᐱᓕᕆᓂᐅᔪᓐᓇᖅᑐᓂᑦ:

  • ᖃᐅᔨᓴᖅᑕᐅᓯᒪᓕᖁᔭᐅᔪᑦ ᓈᒻᒪᒋᔭᐅᓂᖏᑦ: ᐊᑏ ᐃᓗᐃᒃᑲᐅᑎᓪᓗᒋᑦ ᐃᓱᒪᓕᐅᕈᑎᓂᒃ ᐋᖅᑭᒃᓱᐃᓯᒪᓕᕐᓗᑎᑦ (ᑕᑯᓗᒋᑦ ᐃᓱᒪᓕᐅᕈᑎᓕᐅᕐᓂᕐᒥ ᑐᑭᒧᐊᒍᑎᒃᓴᑦ)
  • ᖃᐅᔨᓴᖅᑕᐅᓯᒪᓕᖁᔭᐅᔪᑦ ᐃᑲᔪᖅᑐᒐᐅᓂᖏᑦ: ᐊᓯᒃᑲᓐᓂᖏᓂᒃ ᑐᓴᒐᒃᓴᓂᒃ ᐱᓯᒪᓕᕆᐊᖃᖅᑐᑦ
  • ᖃᐅᔨᓴᖅᑕᐅᓯᒪᓕᖁᔭᐅᔪᑦ ᕿᐱᓗᒃᑕᐅᓂᖏᑦ: ᖃᐅᔨᓴᖅᑕᐅᓯᒪᓕᖁᔭᐅᔪᑦ ᕿᐱᓗᒃᑕᐅᓯᒪᓕᕈᓐᓇᖅᐳᑦ ᐊᒥᓱᕐᓚᐅᔪᓂᒃ ᐱᔾᔪᑎᖃᕐᓗᑎᒃ. ᐆᒃᑐᕋᐅᑎᐅᔪᓐᓇᖅᑐᑦ ᐃᓚᖃᖅᐳᑦ, ᑮᓇᐅᔭᑎᒍᑦ ᐊᑭᖃᕋᔭᕐᓂᖏᑦ ᐱᔭᕇᖅᑕᐅᓯᒪᓕᖁᓪᓗᒍ ᐱᓕᕆᐊᖑᑲᐃᓐᓇᕐᑐᖅ ᐅᖓᑖᓄᐊᖅᓯᒪᔪᓐᓇᕐᒪᑕ ᑮᓇᐅᔭᖁᑎᒃᓴᐅᔪᑦ ᐊᑐᐃᓐᓇᐅᑎᑕᐅᔪᓂᑦ, ᖃᐅᔨᓴᖅᑕᐅᓯᒪᓕᖁᔭᐅᔪᑦ ᐊᓯᖏᓂᑦ ᖃᐅᔨᓴᖅᑎᐅᔪᓂᑦ ᐱᓕᕆᐊᖑᐊᓂᒃᓯᒪᓕᕐᒪᑕ, ᐅᕝᕙᓘᓐᓃᑦ ᐃᒻᒪᖄ ᐱᓕᕆᐊᖑᑲᐃᓐᓇᕋᔭᕐᑐᖅ ᐱᓕᕆᐊᖑᓇᔭᖅᐸᑦ ᐊᓯᖏᓐᓂᑦ ᓴᓇᕝᕕᓐᓂᑦ ᓈᒻᒪᖕᓂᖅᓴᐅᓇᔭᕐᓂᖓᓄᑦ. ᑲᑎᒪᔨᕋᓛᓄᑦ ᐃᓚᒋᔭᐅᔪᓂᑦ ᐃᓱᒪᒋᓯᒪᔭᕐᓄᑦ ᑐᓴᖅᑎᑕᐅᓯᒪᓕᕐᓂᐊᖅᐳᑎᑦ ᐊᒻᒪᓗ ᑭᒃᑯᓐᓄᑦ ᐃᑲᔪᖅᑎᒋᓕᕈᓐᓇᖅᑕᕐᓄᑦ ᓇᓗᓇᐃᖅᓯᕝᕕᐅᓗᑎᑦ.
ᐃᖅᑲᐅᒪᒋᐊᕐᓗᑎᑦ: ᖃᐅᔨᓴᖅᑕᐅᓯᒪᓕᖁᓪᓗᒋᑦ ᐃᓱᒪᒋᔭᑎᑦ ᓈᒻᒪᒋᔭᐅᓇᔭᖅᐸᑕ ᑐᒃᓯᕋᕈᓐᓇᖅᑎᑕᐅᒐᕕᑦ ᐃᑲᔪᖅᑕᐅᔪᒪᓂᕋᕐᓗᑎᑦ ᐱᓕᕆᓂᐅᓕᕆᐊᖃᖅᑐᓄᑦ, ᐋᖅᑭᒃᓱᐃᓂᕐᒥ ᐃᓱᒪᓕᐅᕈᑎᓂᒃ. ᐃᓱᒪᓕᕈᑎᓄᑦ ᐱᔾᔪᑎᖃᖅᑐᑦ ᓴᖅᑭᑕᐅᓯᒪᓕᑲᐅᑎᒋᓂᐊᖅᑐᑦ.

ᐊᑲᐅᓈᕐᓂᖅᐹᕐᒥᒃ ᑕᑕᑎᕆᔾᔪᑎᒋᓗᒍ ᐃᓄᐃᑦ ᓄᓇᖓᓐᓂ ᖃᐅᔨᓴᕐᓂᕐᒧᑦ ᐱᓕᕆᐊᕐᒧᑦ, ᒥᓇᕐᓗᒍ ᐃᓕᓗᒍᓗ Adobe Acrobat Reader DC, ᐊᑐᓕᕐᓗᒍᓗ ᐊᐅᓚᑦᑎᔾᔪᑦ ᐋᖅᑭᒋᐊᕐᓗᒍ ᑕᑕᑎᒐᖅ.

ᒥᓇᕐᓗᒍ Acrobat Reader

ᒥᓇᓕᕈᕕᐅᒃ ᑕᑕᑎᒐᖅ, ᔭᒐᒡᔭᐃᕆᐊᕐᓗᒍ ᓇᒦᖕᓂᖓ ᓇᐃᐱᒌᖕᓇᐅᑎᒋᐊᕐᓗᒍ ᐅᕙᒃᓯᐊᕉᓂᐊᖅᑐᒧᑦ, ᒪᒃᐱᖔᙱᓪᓗᒍᓪᓕ ᑕᑕᑎᒐᖅ ᐃᑭᐊᖅᑭᕕᒃᑰᕈᑎᒃᑯᑦ. ᔭᒐᒡᔭᐃᕆᐊᖅᓯᒪᓕᕈᕕᐅᒃ ᓱᓇᒃᑯᑖᕐᓄᑦ, ᒪᒃᐱᕐᓗᒍ ᐊᑐᕐᓗᒍ Adobe Acrobat ᐋᖅᑭᒋᐊᓕᕐᓗᒍᓗ.

ᒥᓇᕐᓗᒍ ᐱᔫᒥᓵᕈᑎ ᑕᑕᑎᒐᖅ

ᐃᓄᐃᑦ ᓄᓇᖓᓐᓂ ᖃᐅᔨᓴᕐᓂᕐᒧᑦ ᐱᓕᕆᐊᕐᒧᑦ ᐱᔫᒥᓵᕈᑦ ᒪᒃᐱᖅᓯᒪᓕᕈᕕᐅᒃ Adobe Acrobat-ᒥ, ᐋᖅᑭᒋᐊᕈᓐᓇᖅᑕᐃᑦ ᑕᑕᑎᒐᖅ, ᔭᒐᒡᔭᐃᕆᐊᕐᓗᒋᑦ ᐋᖅᑭᓱᖅᓯᒪᔭᑎᑦ, ᐅᒃᑯᐊᕐᓗᒍᓗ ᑎᑎᖅᑲᖅ ᔭᒐᐃᙱᓪᓗᒍ ᐋᖅᑭᓱᖅᑕᐃᑦ. ᐅᖓᓕᐊᓂ ᒪᒃᐱᒃᑲᓐᓂᕈᓐᓇᖅᑕᐃᑦ ᑎᑎᖅᑲᖅ – ᐊᓪᓛᓘᓐᓃᑦ ᐊᐅᓪᓚᖅᑎᒍᓐᓇᖅᑕᐃᑦ ᐃᕐᖐᕐᓈᖅᑕᐅᑎᒃᑯᑦ ᐱᓕᕆᖃᑎᓐᓄᑦ, ᒪᒃᐱᕈᓐᓇᕐᓗᓂᐅᒃ – ᐱᒋᐊᒃᑲᓐᓂᕐᓗᓂ ᓄᖅᑲᕐᕕᒋᓯᒪᔭᕐᓂᒃ. ᑕᑕᑎᖅᓯᒪᔭᓕᒫᓯ ᐱᓕᕆᖃᑏᓪᓗ ᑭᖑᓂᐊᒍᑦ ᑕᑕᑎᕇᖅᓯᒪᓂᐊᖅᑐᑦ, ᔭᒐᒡᔭᐃᕆᐊᖅᑕᐅᓯᒪᒍᑎᑦ.

ᑐᓴᖅᑎᑦᓯᔾᔪᑏᑦ ᑐᓂᓯᓯᒪᓕᖁᔨᓂᕐᒧᑦ ᖃᐅᔨᓴᐃᓂᖃᕈᒪᓂᕐᒧᑦ ᐃᓱᒪᒋᔭᒥᓐᓂᒃ ᒪᑐᐃᖖᒐᓕᖅᑐᑦ. ᑐᒃᓯᕋᐅᑏᑦ ᑖᒃᑯᓄᖓ ᓯᕗᓪᓕᖅᐸᐅᓪᓗᑎᒃ ᑐᓂᓯᓯᒪᓕᖁᔨᓪᓗᑎᒃ ᐃᓱᒪᓕᐅᕈᑎᒥᓐᓂᒃ ᑐᓂᔭᐅᓯᒪᓕᕆᐊᖃᖅᑐᑦ ᐅᓪᓗᖓᑕ ᑎᓯᐱᕆ 14, 2020 ᐃᓱᐊᓂ.

ᑮᓇᐅᔭᖁᑎᒃᓴᓂᒃ ᐱᑕᖃᖅᑐᐃᓐᓇᕐᓂᖅᐸᑦ ᐊᑐᐃᓐᓇᐅᔪᓂᒃ ᑖᒃᑯᐊ ᓯᕗᓪᓕᖅᐸᐅᓪᓗᑎᒃ ᑐᒃᓯᕋᐅᑎᐅᔪᑦ ᑐᓂᓯᓯᒪᓕᖁᔨᓂᕐᒧᑦ ᑭᖑᓂᐊᓂ, ᒪᑐᐃᖅᓯᓯᒪᓕᒃᑲᓐᓂᕐᓂᐊᖅᑐᒍ ᑐᓴᖅᑎᑦᓯᔾᔪᑎᓂᒃ ᖃᐅᔨᓴᐃᓂᕐᒧᑦ ᐃᓱᒪᒋᔭᐅᔪᓂᒃ ᑐᓂᓯᓯᒪᓕᖁᔨᓗᑕ ᐊᐅᔭᖓᓂ 2021.

ᑎᓕᐅᕆᓕᖅᐳᒍᑦ ᐃᓕᑦᓯᓐᓂᒃ ᐅᕙᑦᑎᓐᓂᑦ ᖃᐅᔨᒋᐊᖁᓪᓗᓯ ᐅᕙᓂ [email protected] ᐅᕝᕙᓘᓐᓃᑦ ᖃᐅᔨᒋᐊᕐᕕᒋᓗᒋᑦ ᓇᓕᑐᐃᓐᓇᖏᑦ ᐊᕕᒃᑐᖅᓯᒪᓂᕐᒥ ᐃᓄᐃᑦ ᖃᐅᔨᓴᐃᓂᕐᒧᑦ ᖃᐅᔨᒪᔨᒋᔭᖏᓐᓂᑦ (ᑕᑯᓗᒋᑦ ᖃᐅᔨᒋᐊᕐᕕᐅᔪᓐᓇᖅᑐᑦ).

ᖃᐅᔨᒋᐊᕐᕕᒃᓴᐃᑦ

ᖃᕆᑕᐅᔭᑎᒍᑦ: [email protected]
ᐅᖄᓚᐅᑎᒃᑯᑦ: 1 866 262 8181

ᓄᓇᑦᓯᐊᕗᑦ

ᑳᕐᓚ ᐸᒻᒪᒃ

ᐃᓄᐃᑦ ᖃᐅᔨᓴᐃᓂᕐᒧᑦ ᐅᖃᐅᔾᔪᐃᒋᐊᖅᑎᖓᑦ
ᓄᓇᑦᓯᐊᕗᑦ ᒐᕙᒪᖓᑦ
  • P.O. Box 70
    Nain, NL A0P 1L0

ᓄᓇᕕᒃ

ᓘᓯ ᒍᕇ

ᐃᓄᐃᑦ ᖃᐅᔨᓴᐃᓂᕐᒧᑦ ᐅᖃᐅᔾᔪᐃᒋᐊᖅᑎᖓᑦ
ᑲᑎᕕᒃ ᐊᕕᒃᑐᖅᓯᒪᓂᖓᓂ ᒐᕙᒪᖓᑦ
  • P.O. Box 9
    Kuujjuaq, J0M 1C0

ᓄᓇᕗᑦ

TBD

ᐃᓄᐃᑦ ᖃᐅᔨᓴᐃᓂᕐᒧᑦ ᐅᖃᐅᔾᔪᐃᒋᐊᖅᑎᖓᑦ
ᐃᓅᓯᓕᕆᔨᒃᑯᑦ ᐊᒻᒪᓗ ᐱᐅᓯᑐᖃᓕᕆᔩᑦ
ᓄᓇᕗᑦ ᑐᖖᒐᕕᒃ ᑎᒥᖓᑦ

ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᑦ

ᑭᓐᑐᕋ ᑎᖕᒥᐊᖅ

ᐃᓄᐃᑦ ᖃᐅᔨᓴᐃᓂᕐᒧᑦ ᐅᖃᐅᔾᔪᐃᒋᐊᖅᑎᖓᑦ
ᓱᓇᑐᐃᓐᓇᓂᒃ ᖃᐅᔨᓴᐃᔨᑦ, ᓄᑖᑎᒍᑦ ᐱᓕᕆᐊᖃᖅᑎᑦ, ᐊᒻᒪᓗ ᓯᓚᐅᑉ ᐊᓯᑦᔨᖅᐸᓪᓕᐊᔪᓕᕆᔨᖏᑦ
ᐃᓄᕕᐊᓗᐃᑦ ᑯᐊᐳᕇᓴᖓᑦ
  • Bag Service #21
    Inuvik, NT, X0E 0T0

ᑮᓇᐅᔭᖁᑎᒃᓴᑦᑐᑦ ᐊᑐᐃᓐᓇᐅᑎᑕᐅᓯᒪᔪᑦ

ᑖᔅᓱᒧᖓ ᐱᓕᕆᐊᒧᑦ ᑮᓇᐅᔭᖁᑎᒃᓴᐃᑦ ᐊᒥᓲᓗᐊᖖᒋᑦᑎᐊᕐᒪᑕ. ᑖᒃᑯᐊ INRP-ᓄᑦ ᐱᓕᕆᐊᖅ ᑮᓇᐅᔭᖁᑎᒃᓴᖃᖅᑎᑕᐅᒻᒪᑦ ᐅᑭᐅᑕᒫᑦ $900,000-ᓗᐊᓂᒃ ᐅᑭᐅᓄᑦ ᓯᑕᒪᐅᓂᐊᖅᑐᓄᑦ. ᑮᓇᐅᔭᖁᑎᒃᓴᕆᔭᐅᔪᑦ ᓯᐊᒻᒪᒃᑎᖅᑕᐅᓯᒪᓕᕐᓂᐊᖅᑐᑦ ᐊᔾᔨᒌᒃᑎᑕᐅᒋᐊᖅᓯᒪᓗᑎᒃ ᖃᔅᓯᐅᓂᖏᑦ ᐃᓄᐃᑦ ᓄᓇᖓᓐᓂ. ᐱᓕᕆᐊᖑᑲᐃᓐᓇᖅᑐᑦ ᒥᑭᓂᖅᓴᐅᔪᓂᒃ ᑮᓇᐅᔭᖁᑎᒃᓴᖃᖅᓱᑎᒃ ᐃᑲᔪᖅᑐᒐᐅᓯᒪᕗᑦ ᑐᒃᓯᕋᖅᓯᒪᓕᖁᔭᐅᓪᓗᑎᒃ.

ᐱᓕᕆᐊᒧᑦ ᑮᓇᐅᔭᖁᑎᒃᓴᕆᔭᐅᔪᑦ ᑐᕌᖓᑎᑕᐅᔪᓐᓇᖅᐳᑦ ᒪᑯᓄᖓ ᓲᕐᓗ:

  • ᐃᖅᑲᓇᐃᔭᖅᑎᑦ ᑮᓇᐅᔭᓕᐅᕈᑎᖏᓄᑦ ᐊᒻᒪᓗ ᐊᑭᓕᐅᑎᒃᓴᓄᑦ ᐱᓕᕆᔨᓄᑦ;
  • ᖃᖓᑦᑕᐅᑎᑦ (ᓄᕙᒡᔪᐊᕐᓇᖅ 19 ᑭᒡᓕᖃᓕᖅᑎᑦᑎᓯᒪᔪᓐᓇᕐᑐᖅ);
  • ᐱᓕᒻᒪᒃᓴᐃᓂᖅ ᐊᒻᒪᓗ ᑲᑎᒪᖃᑎᒌᒃᑎᑦᑎᓂᖅ;
  • ᐃᖅᑲᓇᐃᔭᖅᑎᒻᒪᕇᑦ ᐊᑭᓕᐅᓯᐊᖏᑦ (ᖃᐅᔨᓴᖅᑏᑦ, ᐱᓕᕆᕝᕕᒃᓴᑦ, ᐊᓯᖏᓪᓗ);
  • ᑐᓴᐅᒪᖃᑦᑕᐅᑎᓕᕆᔾᔪᑎ;
  • ᐊᐅᓚᑦᓯᓂᕐᒥ ᐊᑭᒋᔭᐅᕙᒃᑐᑦ; ᐊᒻᒪᓗ
  • ᐊᓪᓚᕝᕕᖕᒥ ᐱᖁᑏᑦ;
  • ᐊᒻᒪᓗ ᓴᓇᕐᕈᑎᒃᓴᐃᑦ ᐱᓕᕆᐊᖑᑲᐃᓐᓇᖅᑐᒧᑦ ᐊᑐᖅᑕᐅᔪᒃᓴᑦ.

ᐊᐱᖅᑯᓯᐅᓯᒪᔪᑦ ᐊᒻᒪᓗ ᑭᐅᔾᔪᑏᑦ

ᐊᐱᖅᑯᓯᒃᓴᖃᖅᐱᑦ? ᐅᖃᖃᑎᖃᕈᒪᕕᑦ ᖃᐅᔨᓴᖅᑎᒥᒃ? ᐃᑲᔪᕈᓐᓇᖅᑕᑦᑎᒋᑦ. ᐊᑦᑕᑕᖅᓯᒪᓂᖃᕋᑦᑕ ᐱᐅᓪᓚᕆᒃᑑᓪᓗᑎᒃ ᖃᐅᔨᓴᖅᑎᐅᔪᓄᑦ ᐃᑲᔪᕈᓐᓇᑐᐃᓐᓇᕆᐊᓕᓐᓄᑦ ᐃᓕᓐᓂᒃ ᖃᐅᔨᓴᐃᓂᕐᒧᑦ ᐊᐱᖅᑯᓯᒃᓴᕆᔭᕐᓄᑦ, ᐅᕝᕙᓘᓐᓃᑦ ᐃᑲᔪᖅᑎᐅᔪᓐᓇᖅᑐᓂᒃ ᐋᖅᑭᒃᓱᐃᓂᕐᓂ ᐃᓱᒪᒋᓯᒪᔭᕐᓄᑦ ᑐᕌᖓᑎᓪᓗᒋᑦ ᐋᓐᓂᐊᖃᓕᖅᑕᐃᓕᒪᓂᕐᒧᑦ, ᐆᒪᔪᓕᕆᓂᕐᒧᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᒻᒪᓗ ᐊᓯᒃᑲᓐᓂᖏᓐᓄᑦ. ᖃᓄᑐᐃᓐᓇᖅ ᐊᐱᖅᑯᑎᒃᓴᖃᕐᓂᕈᕕᑦ ᐊᐱᕆᑦᑕᐃᓕᖖᒋᓪᓗᑎᑦ, ᐊᖏᔫᒃᐸᑕ ᒥᑭᔫᐸᑕᓘᓐᓃᑦ.

ᐅᖃᐅᓯᒃᓴᓂᒃ ᐱᑎᑕᐅᔪᒪᓂᖏᑦ ᐱᔾᔪᑎᒋᓪᓗᒍ ᐱᓕᕆᐊᖅ

ᓂᕆᐅᖕᓂᖃᐃᓐᓇᖅᐸᒃᑐᒍᑦ ᐱᐅᓯᒋᐊᖅᑎᑦᓯᔾᔪᑎᒃᓴᑦᑎᓐᓂᒃ ᐱᓕᕆᐊᒧᑦ ᖃᓄᑐᐃᓐᓇᖅ ᑖᒃᑯᓄᖓ ᐅᖃᐅᓯᒃᓴᖃᕐᓂᕈᑦᓯ, ᐃᓱᒪᓕᐅᕈᑎᒃᓴᖃᕈᑦᓯ, ᐅᖃᐅᔾᔪᐃᔾᔪᑎᒃᓴᖃᕈᑦᓯ ᐱᐅᓯᒋᐊᕈᑎᐅᔪᓐᓇᖅᑐᓄᑦ ᐱᓕᕆᐊᒧᑦ ᐊᑏ ᑐᓴᖅᑎᓚᐅᖅᑎᒍᑦ [email protected] ᐅᕝᕙᓘᓐᓃᑦ

ᓄᓇᑦᓯᐊᕗᑦ
ᑳᕐᓚ ᐸᒻᒪᒃ
(709) 922-2380
ᓄᓇᕕᒃ
ᓘᓯ ᒍᕇ
(819) 964-2961
ᓄᓇᕗᑦ
ᔩᓐ ᐋᓚᓐ
(867) 975-4950
ISR
ᑭᓐᑐᕋ ᑎᖕᒥᐊᖅ
(867) 777-7026

ᑲᓇᑕᓕᒫᒥ ᐊᒻᒪᓗ ᓯᓚᕐᔪᐊᓕᒫᒥᑦ ᐃᑲᔪᖅᑎᒃᓴᐃᑦ

ᐃᓄᐃᑦ ᑕᐱᕇᑦ ᑲᓇᑕᒥ
ᐃᐊᕆᒃ ᓗᐊᕆᖕ
ᐃᓄᐃᑦ ᐅᑭᐅᖅᑕᖅᑐᖏᓂ ᑲᑎᒪᔨᖏᑦ
ᓯᑎᕙᓂ ᒦᑭᓐ