Ottawa – June 16, 2021
Inuit Tapiriikkut Kanatami ammalu Mastercard Kiinaujaqutiksaqaqtitsijiuvaktut ullumi tusaqtitsilauqtut piliriqatigiilirnirminnik ikajuqtuijjutiuniartumik parnautiliurnirmi ammalu niriungniqarvigijaujunut silattuqsaqvingmik Inuit Nunanganni aaqqiisimaliriamut, Inuit nunatuqanganni Canadami, tautturiniaqtanga ammalu saqqitausimalirniaqtumik Inuit piusituqarijangit ammalu aturniqaqtitangit isumagisimalugit.
Piliriqatigiingniqat ikajuqtuisimaniartuq piliriqatauniksanginik Inuit, aviktuqsimanirni sivuliqtigijaujunik, ilisaijinik, makkuktunik ammalu qaujimajimmarigijaujunik ukiunnut marruungnut piliriniqarninginni ammalu ungataanut. Qaujigiarviqaqattarningit nunaqaqqaaqsimajuni ilisaijinit, ilinniarnilirinirmi pilirianik aaqqiksuijiullutik piliriaqaqatigijaujunit, ammalu qaujisainirmut qaujimajimmaringnik Inuit Nunangata iluanit ammalu silarjualimaami sivulliqpautitaksaulutik.
June 16, 2011-mi, Inuit Tapiriikkut Kanatami saqqiilauqsimammata Canadami Inuit Ilinniarnilirinirmut Parnautinik, uqaqsimajunik pilirianguvalliajariaqarniaqtunik satuqsisimaliriamik ilinniarnilirinirmi pilirijjutigivaktattinnik. Parnautiit taakkua nalunaijaisimavut pigiaqtitsisimalirniq silattuqsaqvingmik Inuit Nunanganni taimaujariaqallariktuulluni ilagijaungmat angigligiaqtitsisimalirajarnirmik ingirratsiarniuvaktunut silattuqsaqvingmi ilinniariaqsimavaktunit. Taanna piliriqatigiingningat Mastercard Kiisaujaqutiksaqaqtitsijiuvaktunik nalunaittumik piliriangusimaliqtunut nalunaiqsijjutiuninganit, 10-nut ukiunut Parnautiit saqqitausimalilauvingannit.
“Taanna piliriqatigiingnivut quvianallariktuulluni sivummugiarutigigattigu tikisimaliriarnittinnut pigiaqtitsisimalirniksamut Inuit Nunangannit Silattuqsaqvingmik. Ikajuqtuiningatigut Mastercard Kiinaujaqutiksaqaqtitsijiit Timingata piviksaqarvigilirniarmagu Inuit nani, qanuq akuniutigijumik ammalu kiinaujaqutiksanik isumaliurutigilirniarlugit qanuq piuniqpaujutigut sivuliqtiulirajarnirminnut ammalu parnautiliurniksamut nutaangulluni pitaqallattaalirajarningata qutsingniqsanik ilinniarutiqaqpalirninginnut Inuit Inuit Nunanganni. Inuit Tapiriikkut Kanatami ammalu Mastercard Kiinaujaqutiksaqaqtitsijiuvaktut Timinga parnaksimalirmata taakkuninga piliriaksanik sivummugiaqtitsisimaliriaksaminnut ammalu pilirianguvalliajuksat pigiaqtitausimaliqullugit nutaamik pitaqallattaaliqtitsiniksamut Inuit isumaliurutigisimajanginik ilinniarnilirinirmut pilirianik,” Natan Obed, Angijuqqaaq, Inuit Tapiriit Kanatami.
Inuit Tapiriikkut Kanatami piliriqatiqarniaqtut piliriaqaqtimmariujunik pigiaqtitausimallutik pijjutiqaqtigijaujunit Inuvialuit Aviktuqsimaninganit, Nunavut Tunngavikkut Timiqutingannit, Makivik Kuapuriisangannit ammalu Nunatsiavut Gavamangannit ammalu ikajuqtugausimalutik Inuit Tapiriikkut Kanatami Inuit Ilinniarnilirinirmut Katimajiralaanginit Canadami. Piliriaqaqtimmariujut tukimuaktitsijiulutik nipigijauniaqtut aaqqiksuivallianirmi pilirianguvallianilimaangani ammalu kamajiuniaqsutik pigiaqtitsisimalirniksamik parnautiliuqpalliallutik piliriliuliqtunut.
“Taanna piliriangujuq sivuliqtiutillugit Inuit Tapiriikkut Kanatami niriunnirijaullariktuulluni nalunaiqtausimaniqarmat ammalu pitaqaliqtitsijunnarninga quttiktummariummat asijjiisimalirajarnirmut quttingniqsanik ilinniarutiqaqsimalirunnarningita makkuktungita Inuitammalu ilinniaqtuit ukiuqtaqtulimaami. Makkuktungit Inuit sannginiqammariktuulutik pilirijiulirunnarmata asijjiisimaliqtitsigiarnirmut nunaligijamingni ammalu Canadalimaami. Mastercard Kiinaujaqutiksaqaqtitsijingita Timingat qujaliniqammarikput ammalu sarimagusuksutik ikajuqtuisimaliriaminnik taassuminga nutaatigut piliriniqarviuliqsimajumik quttingniqsanik ilinniaqsimaliqtitsigiarnirmut piliriangujunik tunngavviqaqtitausimallutik niriungnirijaujunut, aturniqaqtitaujunut, ammalu uqausingatigut Inuit, piruqtitsigiarviqaqsutik angijualungmik silatuniqarvigijaujutuqanit ammalu aaqqiisimaliriaqsutik nalunaittuutitaulluni aqqutigijaulirajaqtumut naammatsiaqtumik sivuniksaqaliqujinirmi,” Jennifer Brennan, Isumataq, Canadami Piliriangujut, Mastercard Kiinaujaqutiksaqaqtitsijit Timingat.
