July 13, 2021
Inuit Tapiriikkut Kanatami Katimajingit katimaniqalauqput qaritaujatigut June 29-30 ammalu tunngasuktitsillutik Brian Pottle-mik, nutaangulluni Canadami Makkuktut Inuit Katimajirjuanginnut Angijuqqaarijauliqtumik. Katimajiit ilagijaulauqput parnautigisimallugit qimirruniujunut Inuit Tapiriikkut Kanatami Aviktuqsimaniujunut Kiinaujaqutiksauniaqtunik Sanirvaisimalirnirmut Aaaqqiksuqtausimajunik, maliglugit taima aaqqiksuangusimaliqtut naammagijausimalilaurtillugit 2019-mi. Taakkua aaqqiksuqtausimaliqtut, tunngavviqaqtitaullutik 35%-mut tunngavviqaqtittiniarnirmut ammalu 65%-nut atuni qanutigi kiinaujaliurnirijaujunut sanirvaisimalirniarnirnut, atuqtaulauqput tusaqtitausimaliqullugit Inuit isumaliurutiliuqtiuvaktut turaangajunut kiinaujaqutiksanik pititausimalilaurninginnut, ilaqaqtillugit Nuvagjuarnaq-19-mut Nunaqaqqaaqsimajuit Nunaligijangita Ikajurutiksaqtaaqtitausimaningittigut Kiinaujanik.
Katimajiit isumaliurutiqaqsimalilauqtut tukisigiarviksaqutinik katiqsuinirmut Qanuippita? piliriamut Canadami Inuit Aanniaqaliqtailimajulirinirmut Qaujisainiujunut (QNIHS) piliriangujut atautsikkuuqsimaniannginningita sitamaullutik aviktuqsimaniujuni sivulliqpaamik katiqsuiniqaqsimaliqpata tukisigiarviksaqutinik. Tamarmik Inuvialuit Aviktuqsimaningani ammalu Nunatsiavutmi piliriaqaliqsimajumavut ukiunga 2021 atuanikpallialiqtillugu, Nunaviup Aviktuqsimaningani piliriaqariarniaqtillugit 2022-mi ammalu Nunavut Aviktuqsimaninganit 2023-mi. Atautsikkuuqsimanngitsutik piliriniqarviksaujutigut piliriniqaqtitauninginnit aviktuqsimaniujut aaqqiisimalirunnaqtitauniarmata piliriniqarunnarniuniaqtunik atuliqtitsigiarnirmi taakkuninga sivulliqpaamik taimannaittunik qaujisainiqarniksaminnut. atautsikkuuqsimanatik tukisigiarviksaqutinik katiqsuiniq aviktuqsimaniujulimaanit piliriniqarvisanik pitiqaliqtittisimagivut avi4tuqsimaniujuit ilippalliavviqarunnarninginik ammalu ikajuqtigiiklutik piliriniqarunnartitaulutik sivulliqpaamik piliriniqaqtillugit QNIHS-qutinik. Aviktuqsimaniujut isumaliuqsimajut atautsikkut tukisigiarviksaqutinik katiqsuiniqarumaarnirminnut tuglirijanganik qaujisainiqarnirmi piliriniqalirmigutik.
Katimajiit ikajuqtuiniqalauqput pigiaqtittisimaliriamut Inuit Tapiriikkut Kanatami Tariulirinirmi Kkatimajiralaanguniaqtunik tusaqtitsijiuvagajaqtunik maligaqutiujunut ammalu aulatsiniujunut Ukiuqtaqtumi tariumi uumaniqaqtulirinirnut, ikajuqtuiniqaqtunut Inuit pijunnautinginik, aanniaqaliqtailimaninginnut, kiinaujaliurutiuvaktunut ammalu Katimajiralaangujut pilirijiuniaqtut Inuit katinngajiinnaulutik Canadami Iqalliqijikkut ammalu Tariurmiutalirijikkunnut ammalu Canadami Umiarjuatigut Nautsiqtuijikkut Ukiuqtaqtup Aaviktuqsimaningani katimajiralaanginnut, ammalu ilautillugu sivullirmik sivulliqpautitaksaqutiminnut, piliriniqarniaqtut kingullirmik aaqqiisimalirniksaminnut aulatsijiujulirinirmi tunngavviqutinik turaangallutik nutaangullutik ukiuqtaqtup aviktuqsimaniriliqtanganut Inuit Canadami Gavamakkut Piliriaqaqatigiinninginnut Katimajiralaangujutigut.
Kingullirmikli, Katimajiujut isumaliuqsimalilauqtut Inuit Silattuqsaqvingni ilinniariarnilirinirmut (IPSE) Aulatsinilirijiujut, pigiaqtitaulauqtut 2020-mi, iniqainnarniarmata Inuit Tapiriikkut Kanatami iqqanaijarvinganni. Aulatsinilirijiujut ilaakkuungalirlutik katujjiqatigiinnguqsimalirumaaqtut ukiunga 2022 atuliqpat piliriaksaqaqtitaulutik aulatsijiunirmut ikajurutiksaujunik Inuit ilinniaqtunut piqasiutiligit silattuqsaqvingmi pilimmaksainiuvaktunut, ikajuqtiuvannirnut, aanniaqaliqtailimanilirinirmi, ammalu inuusilirinirmi ikajuqtiuvannirnut. taimannganit, Inuit nunalirinirmut katujjiqatigiingit isumaliuqsimalilaurmata aviktuqsimaniujuni katujjiqatigiingit aulatsijiujumaarningita ammalu saqqiijiulirniarningita ilinniaqtunut ikajurutiksanik. Aulatsinilirijiujut kajusitittisimaniaqtut Canadami aaqqiksuijiullutik piliriaqaqtiunirminnik, ilaqaqtillugit aaqqiksuinirmut tukisigiarviksaqutinik aulatsijjutiksanik, ikajuqtuinirmut aviktuqsimaniujut piliriaqaqtiulirunnarninginnut aaqqiksuangujunut ammalu Canadami ilinniaqtunut ikajuliriaqtiunirmut.
Katimajiit September-mi katimaniqarumaaqput aaqqiktauvagiiqsimallugu katimaniqarnirminnut, ilaqaqtillugu Inuit Tapiriikkut Kanatami Ukiutamaat Katimavigjuarniqarningannik.