April 7, 2022 –Ottawa, Ontario
Inuit quviasugutiqaqtut Kiinaujat Atuqtuksaqutinik 2022 ukiungani qiturngiuqtitausimaniaqsutik $845 million-nik iglulirinirmut atuqtaujunnarniaqłutik 7 ukiut atuqpalliatillugit nuit nunalilimaanginnit. Kiinaujat atuqtuksat pingasuiqtarunnaqput amisuunirilauqtanginit kiinaujat atuqtuksaulauqtunit 2018-mi $400 million-nik sanirvaqtaulauqtunit atuqtaujuksaullutik ukiut qulit (10) atuqpallianinginnit amma pigiaqtitsijjutiullutik nutaatigu iglulirinirmut qiturngiuqtitaujunnarniaqtunit Inungnut.
“Canadalimaami igluqutitaarijaujungnaqtut amigalualiqsimangmata, kisianilu Inungnut iglulirinirmut tuaviurnaqsisimaniujuq tamakkitigut ajjiqanngittumik pilualiqsimangmat akunialuk taimannaisimaliqhluni,” uqalaurpuq Inuit Tapiriit Kanatami Angijuqqaangat Natan Obed. “Taakkua kiinaujanik qiturngiuqtitaujungnarniaqtut nalunaittumik sivummugiarutiujungnarniarmata naammaktukkut piusigiaqtitauqullugit asiruqpallianiujuni igluqutiujunut amma amisuuluaqłutik iglumiuqatigiiliqsimanirnut inungni inuit nunanganni taimannainningillu aksurulualiqsimaniujunut timikkut, inuusikkut amma isumakkut aanniaqaliqtailimanirnut ilagijauqataullutik.”
Inuit Tapiriit Kanatami (ITK) quviasugutiqarmijut kiinaujanik $227.6 million-nik pititausimalirniarmigamik atuqtaujuksanik ukiuk marruk atuqpallianinginni Nunaqaqqaaqsimajunit sivuliqtiqarlutik isumakkut aanniaqaliqtailimajuliriniullutik pilirianut amma aaqqiksuiqatigiingnirmi pilirianut ajjigiinnginniujunut tunngavviqaqtitaullutik isumakkut aanniaqaliqtailimajulirinirmi parnautiujunut. Ikajurutiksaukkannirniaqtunik atuliqtitauniksanginut ITK-kut nalunaiqtausimajunut tunnga-viqaqtunik amma Inungnut turaangallutik imminiiqattaqujinnginnirmut parnautinut, Canadami Inuit Imminiqaattaqujinnginnilirinirmut Parnautingit saqqitausimalilauqtut 2016-mi, piliriangulikautigijunnarniarmata amma ikajurniqaqtuulutik aktuisimaniqalirutiulutik Inungnut.
Amisurlaullutik asingit ikajurutiksanik pisimaliqtitaujariaqarivut Inuit sivulliqpautitauqujanginni. Ilaalu nalunaiqtausimallutik Inungnut sanirvaqtausimaninginni pitaqanngikkaluaqtillugu, quviasugutigivaqput tamakkua kiinaujaqutinut qiturngiuqtitsiniuniaqtunut tunijausimaninginnut amma niriungniqaqtugut anginiqsamik nalunaiqtausimalirniksangita pinasuarusiuniaqtuni amma taqqiuniaqtuni sivunittinni.
- $10.6 billion- luat atuqtaujuksat pilirijjutiulutik aanniqtiqtauqattaqsimaninginut Nunaqaqqaaqsimajuit, ikajurutiuniarlutik qanuinngitsiaqtunik nunaliqalirutiksanut amma sivummugiarutiulutik nangminiq isumaliurutiliurunnarniujunut.
- $209.8 million atuqtaujuksat ukiut tallimat atuqpallianinginni angigligiaqtitausimaliqullugit ikajuqtuiniujut nunaliujunut nanisisimalirunnaqullugit amma iqqaumajauliqullugit iluviqtaujuviniit ilinniariarviuvamauqtuni.
- $29.6 million atuqtaujuksat ukiut pingasut atuqpallianinginni ikajurutiksaullutik Nunaqaqqaarsimajut sivulliqpautitauqujanginnut silaup asijjiqpallianinganut qanuiliqpallianiujut piluarungniiqtitaugiaqullugit amma aaqqiumavviulirutiksanut asijjiqsimalirniujunut. Nunagijatuqarut nalunainniqpaujumik avatinga asijjiqpallianiqaliqsimammat silarjuarmiulimaanit amma Inuit aaqqiisimaliriaqarmata piliriangujuksauniaqtunik qanutuinnaq aaqqiumalirutiujuksanut parnautiliursimalirniksamut amma maligaqutinik Inuit Nunaluktaanganni.
Parnautiusimajut aaqqiksuisimaliriamut Canadami Ilinniarvingni Nirijaksaqaqtitsivangnirmut Maligaqutinik tusaqtausimalirumatsiarmijut. Piliriaqaqatigiingningit Inuit amma gavamaujuit upigusutsiarlutik amma ikajuqtuilutik Inuit nangminiq isumaliurutiurunnarninginnik amma inuit niqiginiaqtaminnik aulatsijiuninginnut taimauliriaqarmata niqigijaksaminnik pisimalirungnarnirnut piliriangujut ikajurniqarniaqpata. Inuit Nunanganni Niqigijaksaminnik Pisimalirungnarnirmut Parnautit saqqitausimalilauqtut July 2021-mi, tiliurisimangmata aaqqiksuisimaliqujillutik Inuit Nunanganni ilinniarvingni nirijaksaqaqtitsivannirmut piliriamik amma suli tamakkuninga piliriaqaqpugut piliriqatigillutigu gavamatuqakkut Inuit Gavamatuqakkut Piliriaqaqatigiingninginnut Katimajiralaangujutigut.
ITK-kut kajusitittisimavut sapujjigiaqtiunirminnut Inuit Nunangannut turaangatitausimallutik piliriniqarniujunut gavamatuqakkut kiinaujait atuqtuksanut sanirvaivangniujunut. atuliqtitsiniq Inuit Nunanganni kiinaujalirinnaup ukiunga atuqtillugu maligaqutiujut gavamatuqakkut kiinaujanik atuqtuksaqutinginnut pitaqalirutiungmata naammatsiaqtutigut, akituluanngittutigut, amma maannakautiginiqsamik naammaktutigut aktuisimalirutinajaqtunik amma ikajurutiksauniaqtunik Inungnut taimalu tamainnut Canadamiunut ikajurutiulirajaqłutik. Pilirinivut kajusitisimajaqput piusigiaqtitausimallutik gavamatuqakkut kiinaujaqutiksanut parnautiqaqsimaliqullugit tusaqtitausimalutik Inuit Gavamatuqakkut Piliriaqaqatigiingninginnut Katimajiralaangujunit.