ITK President Natan Obed speaks to the CBC’s Rosemary Barton following the release of Budget 2021.
ITK President Natan Obed speaks to the CBC’s Rosemary Barton following the release of Budget 2021.
April 19, 2021 – Ottawa, Ontario
2021-mi gavamatuqakkut kiinaujaqutiksarijauniaqtunik sanirvaivallianingit ilaqaqtitauvut niriunatsiaqtuullutik taisisimalilaurninginnik Nunaqaqqaaqsimajunut turaangatitaullutik kiinaujaqutiksaqaqtitsiniarnirminnut ammalu piliriniqarviuniarningita gavamatuqakkut kiinaujanik atuqpalliarningita Inungnut turaangajunik tuaviurnaqsisimallutik piliriangujunut suurlu ilinnialisaaqtulirinirni ammalu pairivvilirinirni piliriani, iqqanaijarviujunut aaqqiumaniqaqtunut ammalu niqigijaksanik pisimalirunnarnirmut pilirianut.
“Angijummaringmik taakkunanngat gavamatuqakkut kiinaujaqutiksalirininginnit ikajuqtugausimaniqaratta. Qulanngilangalu qanutigi kiinaujanik qiturngiuqtitsisimaniarningita turaangatitaujunik Inungnut, Iqqilingnut ammalu Allangajunut,” uqaqhluni Inuit Tapiriikunnut Kanatami Angijuqqaangat Natan Obed. “Kisianilu utaqqiuriaqarniaratta ullunik amisunik uvvaluunniit pinasuarusirnik qaujimalilauqqaarata qanuillaringniarmangaata Inungnut taakkua kiinaujaqutiksauniaqtut pitjutigillugit.”
Asingit Nunaqaqqaaqsimajunut turaangallutik tusagaksaujuni, Inuit Tapiriikkut Kanatami tusaqpallianginnaujaqtut ammalu tukisiumaliqpallianginnaujaqsuningit makununga turaangajunik:
Ilinnialisaaqtuliriniq ammalu Pairivviliriniq: $30 billion atuqtaujuksat ukiut tallimat atuqpallianinginni atainnaqtitaulutik kiinaujaqutiksaqaqtitauniaqtunut piutsiaqtunik kiinaujjaksanasuaratik pairivvingnut, ilaqaqtillugit piliriaqaqtiujunnarnirnik piruqtitsivallianirnut ammalu inuusilirinirmi ammalu iqqanaijarviqaqtitsinirnut kiinaujanik qiturngiuqtitsinirnut. Parnautiit turaangatitausimavut mikigligiaqtitauqullugit akigijauvaktuni aulatauniqaqsutik pairivviliriniuvaktuni 50%-luanguvaktunut, ukiunga 2022-mut tikillugu, tikisimaliqtitsigiarnirmi $10-turpakluni ullumut atausirmut aaqqiktausimaniqaqpanningagut tikisimaliqpat ukiunga 2026 (silataani Quebec).
Iqqanaijarviit: $4.3 billion Nunaqaqqaaqsimajut Nunaligijanginni Iqqanaijarviujunit Kiinaujaqutiksat.
Piliriangujuq Asiujijausimajunut ammalu Inuaqtausimajunut Nunaqaqqaaqsimajuni Arnait ammalu Niviaqsiat (MMIWG): Kiinaujaqutiksanik ilajauniaqtut $2.2 billion-nik atuqtaujuksauniaqtunik ukiut tallimat atuqpallianinginni, pigiartitaulutik 2021-22-mi, ammalu $160.9 million-nik atainnaqtitaullutik piliriniujunut kiujjutiusimallutik pinirluaqititausimaningita Asiujijausimajut ammalu Inuaqtausimajut Nunaqaqqaarsimajuni Arnait ammalu Niviaqsiat ikajurutiksauniarlutik piruqtitsisimalirnirmut qanuinnanngittumiillutik, sannginiqatsiaqtuni, ammalu ilagijauqatautsiaqlutik inuuqatigiiktuni.
Nuvagjuarnaq-19: Ilagiaqtausimajut $1.2 billion-nik ukiungani 2021-22 atuliqtitausimainnarniaqtut ikajurutiksaqaqtitsinirnut Nuvagjuarnaq-19mik piliriaqarutiksanut Nunaqaqqaaqmajuit nunaligijanginni.
Qaujisainiq: $1.2 billion-nik kiinaujaqutiksaqaqtitauniaqtut qaujisaijjutiksanik, sunatuinnanik qaujisainiuvaktunut, ammalu qaujisainirnut piliriangujunut ammalu piliriangulirumajunut turaangajunut, ilagiaqsimalugit $4 million-nik ukiut pingasut (3) atuqpallianinginni atuqtaujuksanik ikajurutiksaullutik aaqqiksuinirmut Inuit tukisigiarviqutiksanik parnautiliurutinginni.
Isumakkut Qanuinngitsiarniq: $597.6 million-nik atuqtaujuksauniaqtunik ukiut pingasut (3) atuqpallianinginni, pigiaqtitaulutik 2021-22 ukiungani, ajjigijaunnginninginut tunngavviqaqtitausimallutik isumakkut aanniaqaliqtailimajulirinirni ammalu qanuinngitsiarnilirinirni parnautilianut Iqqiliit, Inuit, ammalu Allangajut Inuuqatigiiktuni.
Uqausiliriniq ammalu Piusituqaliriniq: $460 million-nik t atuqtaujuksauniaqtunik ukiut tallimat (5) atuqpallianinginni ikajurutiksauniarlutik Nunaqaqqaaqsimajuit uqausinginik ammalu piusituqanginik uummaqtittigiakkannirnirmi ammalu satuqtausimaliriarninginni.
Silattuqsaqvingmi Ilinniarniliriniq: $177 million-nik atuqtaujuksauniaqtunik ukiuk marruuk (2) atuqpallianinginni ikajurutiuniarlutik Nunaqaqqaaqsimajunit ilinniaqtunik ammalu ilinniarvinnik ilagijauqataujunut silattuqsaqvingmi ilinniarnilirinirnut pijariiqsimaliqtitauqullugit ilinniarutiminnik nuvagjuarnamik atuliqsimatilluta silarjualimaami.
Niqigijaksanik Pisimalirungnariaqarniq: $164 million-nik atuqtaujuksauniaqtunik ukiut pingasut (3) atuqpallianinginni piliriqatiqarnirni Nunaqaqqaaqsimajunik, ilagilugit Inuit Nunangannirmiut, angigligiaqtitausimaliqullugit Niqittiavait Ukiuqtaqtungani Canada-up Piliriangujut.
United Nation-kut Nalunaiqsijjutingit: $ million-nik atuqtaujuksauniaqtunik ukiuk marruuk (2) atuqpallianinginni ikajurutiuniarlutik aaqqiksuiqatigiingnirnut piliriangujunut parnautiliurnirmi atuliqtitauqullugit maligarjuaqutiit United Nation-kut Nalunaiqsijjutinginik Nunaqaqqaaqsimajuit Pijungnautiqarninginnut.
Silaup Asijjiqpallianinga: $22.7 million-nik atuqtaujuksauniaqtunik ukiut tallimat (5) atuqpallianinginni, pigiaqtitaulutik 2021-22 ukiungani, ikajurutiksaullutik Inuit ammalu Iqqiliit aulatsininginnik aanniaqaliqtailimajuliriniujut aktuqtausimaningitta silaup asijjiqpallianinganit, suurlu niqigijauvaktutuqanik pisimaliriaqpannirnut atuinnautitaujunut, aktuqtausimaniujut piluaqtumik silaup qanuilingaliqpanninganit, ammalu isumakkut aanniaqaliqtailimaningit aktuqtausimalirningita makkuktut silaup asijjiqpallianinganit.
Inuit Tapiriikkut Kanatami sapujjigiaqsimavut atuliqtitauniksangata Inuit Nunangannirmiunut turaangatitaullutik piliriniulirajaqtunut gavamatuqakkut kiinaujanik atuqpalliavanninginni. Atuliqtitauningit Inuit Nunanganni kiinaujalirinnaup ukiungani maligaqutiujut gavamatuqakkunnit kiisaujaqutiksarijauvaktuni aaqqiksuisimaliqullugit tukisinatsiaqtunik, aturniqaqtunik, akituluanngittunik, ammalu tagvakautigi ikajurutiksanik Inungnut, taimalu Canadamiulimaat ikajuqtausimalirutiginajaqtanginik.