Pingatsiq June 2, 2021 – Ottawa, Ontario
6 ukiut ullumi naasimaliqput, Canadami Killisiniaqtikkut (TRC) tusaqtittisimalilaurvingatta saqqiisimalirnirminnut 94-nik Pilirianguliqullugit Tiliurisimajjutiminnik tusaqtitausimanirminnit amisukallammariullutik tausantinginniittunit aniguisimajuvinirnit ilinniariaqpalaurnirminnit. Tusaalauqtut saqqiilaurmata uqausiksaminnik pijjutiqaqsutik taikkuninga nangminiq uqausiksaminnik saqqiijunnanngittunik.
Tavvani pinasuarusirmi, nunarjuarijattinni saqqiisimalirviulilaurmijugut tusarninngimmariktuullutik sulillutik ilinniariaqpalauqtut atuqsimajavininginik tusaqtitaugatta kanatami qanuinniulauqtuvinirnut 215-nit surusiit iluvinginik nanijaummata nalunaikkutaqaqtitaunatik amisukallaullutik iluvingit silataani TK’emlups te Secwepemc Iqqiliit nunaqarvigijanganit British Columbia-mi.
Uummatittinni angijualummik nagligusungnirmik ikpinniavigivaqput inuaqtaujuviniit, ilagijangillu ammalu nunaqqatigiiktut. Inuit Nunangannirmiulimaat ammalu Canadamiut Inungit qiksaaqatiqaliqsimavut nutaangulluni qiksaarutiqaliqsimaningita Iqqiliit ammalu Allangujut tamatuminga naammanngillariluaqtunik saqqitausimalilauqtunut piluammariktuulluni takuranninngittutigut nalunaijaqtausimajunit.
Taakkuninga tusaqtitausimalirnirnit amisut Inuit aanniarutigijatuqaminnik suurlu kiliqsimaniviningit angmaqtitaukkannirutinik atuliqsimaqataummata. Qiksaarutiqarniq inuusirmi atuqtauvammat tamainnit. Suurluptauq ninngagutiqaqsimaniq atuqtauvammijuq. Sulillaringninganit tamatuminga aktuqtausimajariaqarmijugut. Asijjiqsimalirutigijariaqaqtavut. Canadaup nunarjuangattauq asijjiqsimaliriaqarmijuq maliklugit qaujimajavut. Inuit ammalu tamarmik nunaqaqqaaqsimajut tamatuminga sulijumik qautamaat inuusirminni atuqpangmata. Kajusilluta ingirravalliavugut pisuksuta saimmaqatigiiksimalirniksamut kisianilu aturiamik ajurnaqtummarialuuvuq.
Sukkaittuugaluaqsuni tamakkununga piliriarijattinnik sivummukpallianiqaqtitsivugut.
Nunatsiavummit Inuit ilagijauqataulaunngimmata nunalirinirmi angirutigijausimajunut tunngavviutitaullutik Canadami Kiglisiniaqtikkut Ttimingannut, uvvaluunniit mamiavviulauqsimaningita aniguutisimajut 13-nguliqtut ukiut tavvani taqqimi naasimanialiqtunit. Taimannatsainnaq atulauqsimajattinnik Canadalimaami aniguisimanittinnit atuqsimaqataummata kisianilu aksururnarniqsaknik akuniuniqsamiklu pilirianguliqullugittauq tuksirautiqariaqalauqtut. 2017-mi, ilanganik ilitarijausimalilauqtut aannirnaqtunik atuqtitausimanivininginnut taima Canadami Angijuqqaarjuaq mamiavviqarmat Nunatsiavummiunut aniguisimajunut ilinniariaqpalaursimammijunut.
Inuit kajusititsisimavut saimmaqatigiiqsimalirviksamik piliriangujarialiit sivulliqpautitausimaqullugit piliriaqarniujuni Inuit Gavamatuqakkut Piliriaqaqatigiingninginnut Katimajiralaatigut. sivummugiaqsimalirumagatta gavamaqausiuvalauqsimajunit ammalu akiraqtuinikkut maligaqutigijanginnit Canadaup Gavamangannit asiruijjutausimajunit Inuqutittinni, ammalu piliriniqalirumaqujilluta ammalu quvvaqtitaugiaqsimaliqullugit anginiqsaujumik ilinniaqtitsiniuvaktut Canadamiulimaani.
Qanittukuluuliratta tikisimalirviksattinnut pisimalirniarlugit Canadami Kiglisiniaqtikkut Tiliurijjutigisimajanganut Piliriangujuksat 43-mut – iluikkaujukkut tigusisimalirniksamik ammalu atuliqtitsisimaniksamik United Nation-kut Nalunaiqsisimajjutinganik Nunaqaqqaaqsimajuit Pijungnautiqarninginnut. Maligaksaq C-15 maannaujuq Canadami Minister-ngujut katimajitiguuqpalliatitaungmata.
Ammaluttauq tavvanitsainnaq pinasuarusirmi, tikisimalirniaratta angijuutiulluni Piliriangusimalirniujumut Tiliurijjutiusimalluni Pilirianguliqullugit Piliriangujuksat 41-mik – Canadalimaami Tukisiumalirasuarsutik Qaujisainiujunut Asiujijausimajut ammalu Inuaqtausimajut Nunaqaqqaarsimajuit Arnangit ammalu Niviaqsiangit (MMIWG) saqqitautillugit Canadami Piliriangujunut Parnautiit Aatuliqtitauqullugit 231-ngujut MMIWG-nut Tiliurisimajjutit Ikajuqtugausimaliqujillutik, piqasiutillugit 46-ngujut Inungnut Turaangallutik Tiliurisimajjutit Ikajuqtugausimaliqullugit.
Canadami Kiglisiniaqtikkut Tiliurisimajjutingit Pilirianguliqullugit ammalu MMIWG-nut Canadami Tukisiumaliriarutit Qaujisainiujunit Tiliurisimajjuti Ikajuqtugausimaliqujillutik pigianngarviqarmata atuqtausimajunut ammalu aniguisimajut uqausirisimajanginnut, aanniqtausimajunut ammalu ilagiingujunut, ammalu iluikkaulugit atuliqtitaujariaqarmata piruqtittiniarutta ukpirituraunnirmik, ikajuqtuisimaniarutta kikkutuinnat pijungnautinginnik, ammalu sivummugiaqtitauniaqpata saimmaqatiqaqsimalirniksat nunaqaqqaarsimajunik.
Suli tikisimavviginngitavut. suli piliriaqaqatigiingniujuksanik piruqtittivalliagatta uvattinnut ikajurutiulirniaqtunik sivummugiarviksattinnut piliriaqaqatigiingniqtigut ammalu upigiturautsiarniqtigut. Suli tiliurijugut pilirianguliqujilluta. Tamarmik Canadamiungujut piliriarijauliqulugit tiliurisimajariaqarmijut.
Ikajuqtiksait atuinnauvut ikajuqtiqariaqaruvit
Canadami Iqqiliit Ilinniariaqpalauqsimajut Tuaviurnaqtuqaqpat Uqaalavviksaq uvani 1-866-925-4419 (24/7)
Qanuinngitsiaqujiniq Niriungniqatsiaqujillutik Uqaalavviksaq uvani 1-855-242-3310 (24/7) – Inuktitut uqallakviujunnaqtunik pitaqaqtittijut