Skip to main content
Tusaqtitsijjutiit

Inuit Tapiriit Kanatami ammalu Nunaqaqqaaqisimajulirijikkut Canadami piliriniqaqput nungutitausimaliqullugu puvagluliqattarniq Inuit nunanganni 2030 ukiunga atuliqpat

By March 24, 2024 No Comments

March 24, 2024 – Ottawa, Ontario 

Angijuqqaangat Inuit Tapiriit Kanatami, Natan Obed, ammalu Minister Nunaqaqqaaqsimajulirijikkunnut, Patty Hajdu, ullumi imanna uqaqsimajamingni saqqiisimalilauqpuuk:

“Puvagluliqattarniq aanniarnaq (TB) nungutitausimalirunnarmat katujjilutik piliriaqarniqtigut ammalu piliriqatigiingningitigut Inuit sivuliqtigijangita, Inuit nunaligijangita, ammalu gavamatuqakkunnit, puraavinsiujunit, ammalu aviktuqsimaniujunit gavamagijaujunit. Inuit Tapiriit Kanatami (ITK), Canadalimaami Inungnut pijjutiqaqtigijaullutik katujjiqatigiingujut Canadami, ammalu Canadami Gavamangat kajusitittisimavut pilirinirijaminnik Puvagluliqattarniq nungutitausimaliqullugu Inuit Nunanganni 2030 ukiunganut tikisimalirutta.

Puvagluliqattarniq aanniaqarnaq (TB) ungatiluammarianut aktuisimalirmat Inungnik ammalu Inuit nunaligijanginni. Ukiungit 2015 ammalu 2019 akunningini, unikkaaliangusimajut nalunaiqsisimaqattalaurningat qanuq quttingniqaqtiginingata puvagluliqsimallutik aanniaqaliqpanniujunik Inungnut nunaqaqtunit Inuit Nunanganni 300-ngiqtarunnaqsuni quttingniqsaulilaurningata asinginnit Canadami irniangusimajuuqataullutik, Nunaqaqqaaqsimajuunatik inuuqatigiiktunginnit.

Tamakkua quttiluammariktuullutik quttingnirijangit Puvagluliqattarsutik aanniaqaliqattarniujut Inuit Nunaluktaangani takuksautittimmata inuusilirinirmi kiinaujaliurasuarutiuvaktut ajjigiinnginniqammaringniujunik – suurlu iglumiuqatigiit inugialuaqtuuninginnik, niqigijaksanik pisimalirunnaqattannginniq, tuluqtarviqarniujunik aanniaqsiurtilirijjutinut ammalu akhluluaqtuuni – isumagilugit Inuit ammalu asingit inuuqatigiiktuit Canadami ammalu qanuilingaliqtittisimaniujut kajusiinnaqtuulluni aktuisimalirningita nangminiq aulatsiniqarunnaqtittinnginniujut aanniaqsiurtilirijjutinik.

Nuvagjuarnaq 19-mik COVID-19) silarjualimaami aanniaqaliqsimavanniq nalunaiqsisimajjutaulaurmat pimmariujuuningata aaqqigiaqtausimalirlutik Inungnit sivuliqtiqarlutik kikkutuinnait aanniaqsiurtilirijikkut sapujjigiaqtiqaliriaqarningita ammalu taimaujariaqallariktuullutik piliriaqaqtiqariaqarnirmik Inuit pijjutiqaqtigijaullutik katujjiqatigiinginnik kikkutuinnait aanniaqsiurtilirijikkut tuaviurnaqtuliriliqsimaninginni. Puvaglulirniq aanniarnaq piluaqtummariummat, kisianilu aanniaqaliqtailijjutiksatigut piliriangusimalirunnarsuni ammalu aanniarnaq aaqqiksimalirunnaqsuni.

2018 ukiungani, Canadami Gavamangat ammalu Inuit Tapiriit Kanatami piliriaksaqalilaurmata piliriqatigiingniarnirminnut nungutitausimaliqullugu Puvagluliqattarniq (TB) Inuit Nunanganni ukiunga 2030-mut tikilauqqaartinnata. Canadami Gavamangat sivulliqpaamik kiinaujanik qiturngiuqtittisimalilauqput $27.5-miliantaalanik kiinaujaqutiqaqtittillutik aaqqiksuijjutiksanik ammalu atuliqtitauniksangita Puvagluliqattarniup Nungutitausimaliqullugu piliriangulirniaqtunut parnautinik turaangatitausimaniqaqtunik atuniq sitamaullutik aviktuqsimaniujunut Inuit Nunanganni: Inuvialuit Aviktuqsimaningat, Nunavut, Nunavik ammalu Nunatsiavut.

Canadami Gavamangat ammalu Inuit Tapiriit Kanatami angirutiqaqsimalilauqtut qanulimaat piliriarijunnaqtattigut piliriniqarniarnittinnik tikiutisimalirunnaqulluta Puvagluliqattarniup nungutitausimalirviksanganut Inuit Nunanganni ukiunga 2030-mut tikilauqqaartinnata.”