Sitipiri 29, 2022 − Kuujjuaq
Inuit Tapiriit Kanatami katimajingit katimalauqtut tamatumani pinasuarusirmi Kuujjuarmi Sitipiri 27−mi. Tamanna katimaniujuq pijariirmat katimagialilauqtut Inuit Tapiriit Kanatami arraagutamaaqsiutimik Sitipiri 28 ammalu 29−mi.
Inuit Tapiriit kanatami katimajingit angilauqtut Inuit Nunangani nirijaksaqattiaqainnarnimut turaagaup atuliqtitauvallianingata parnautinganik, turaagaq saqqititauqqaalauqtuq Julai 2021−mi. Atuliqtittinirmut parnauti nalunaiqsisimajuq pinnguqtitaujumajunik kamagijaqarniaqtunik piliriarijaujariaqaqtunik turaagarmi nirijaksaqattiaqainnarasuktittiluni ammalu saqqitittiluni taimaunginnarajaqtumik nirijaksalirinirmik Inuit Nunangannit.
Katimajit katimajjutiqalauqtut Inuit Nunangannilimaaq ilisarvingnit nirijaksaqaqtittiniup qanuinnajarninganik ammalu akiginajaqtangani, sivulliutisimatitauqataujuq iluani Inuit Nunangani Nirijaksaqattiaqainnarnimut Turaagaup. Kiinaujat turaangajut tamainnut atuliqtittinirmut parnautimut ammalu Inuit Nunangani ilisarvingnit nirijaksaqaqtittinirmut ilagijaujut Inuit Tapiriit Kanatami 2023 gavamatuqakkunnut kiinaujaqturuksanginnut tunijausimajumi.
Katimajit katimajjutiqalaurmijut kisunik pijungnarmangaataa aaqqiksuqtautillugu Inungnuungajuq Juatan Pimmarigijangit piliriqatiqaqhlutik Nunaqaqqaaqtulirijikkut Kanatami.
Katimajit angilauqtut parnautimik turaaqtittijumajumik $23 milijannik Nunaqaqqaaqsimajut uqausinginnut ilagijanganik Inungnuungajumi kiinaujaqaqtittinirmik aturlutik Inuit Tapiriit Kanatami−kkut aviktuqsimajunut kiinaujaqaqtittijjutinganik 2023-24 kiinaujaksariniaqtanginnik. Inungnuungajuq ilangat aulataulauqtuq Piqqusitituqalirijikkunnut Kanatami.
Katimajit katimajjutiqalaurmijut qanuq sivummuaktitaujungnarmangaat Inuit illinialisaanik quttingnilirmut 12 tikillugu sivulliutitausimajut, ammalu ikaaqtittillutik piqujivungaarutimik piliriqatiqattiarumanirmik ammalu Inungnuungajunik kiinaujaqaqtittinirmik kamagijaqarniallutik quliujunik kamagijaujuksanik kiinaujaqaqtitaugiaqaqtunik iluani 2011 Kanatami Turaagaq Inuit Ilinniarninganut.
Inuit Tapiriit Kanatami katimajingit isumaksaqsiulauqtut qanuq saqqitittijungnarmangaataa piuniqsanik Inungnuunganiqsaujuniglu pijunnautinik iluani aanniaqtulirijaunirmut akiliksaqaqtittittailimajjutimi kamagijaqarniarlutik isumaalugutausimajunik Inungnut Inuit Nunanganni silataanilu atuinnaqattiaqattanginninginnik. Katimajit tuksiraqtut Inungnut sivuliqtitaujumik piliriqatiqarlutik gavamatuqakkunnik ammalu sitamaujunik Inuit aviktuqsimajuqutinginnik saqqitittigasuglutik angirutaunajaqtumik maligaliurvigjuarmi aaqqiisigiarnirmik aanniaqtulirijaunirmut akiliksaqaqtittittailimajjutiup pijariaqaqtanginnik ammalu pijittirnirmik Inungnik, ilagijauluni maanna aaqqiksuqtaujumik ajjiqanngittunuungajumik Nunaqaqqaaqsimajut aanniaqaqtailimanirmut maligaksarmik.
Inuit Tapiriit Kanatami katimajingit arraagutamaaqsiutimik katimatillugit, katimajit nirualauqtut ikajuqtuqhlutik nutaarmik qaujisarniusimajumik naasaqsimajumik qanutigi ungasiktigingmangaat Inuit nunangani sigga ammalu nunallattaaq. tamanna qaujisarniusimajuq nalunaiqsijuq Inuit nunangat sigjanga 72% ungataani anginilik ammalu nunallattaanga 40%−nik anginilik kanatalimaaq tautukhlugu, tamakkua anginiqsammariujut atuqtauqattalauqtunik 50%−nguniraillutik sigjanganik ammalu 35% nunallattaaq.
katimajit tusaqtitaulaurmijut qanuilirmangaataa makua:
- Inuit Nunangani silattuqsarvigjuarmut parnautit, ilagillugu sivullirmit pimmariujut atuqtaujariaqaqtut saqqitittiniarnirmik silattuqsarvigjuarmik Inuit Nunanganni aulataujumik Inuit uqausinginnut, iliqqusinginnut ammalu pimmariutigijanginnut.
- Sivummuaktitausimaninga Qanuippita? Kanatami Inuit Qanuilirninginnik Qaujisarniq. Tukisigiarutit katiqsuqtausimaliqtut Inuvialuit Nunangannit, ammalu qaujisarniq pigialilaaqtuq Nunatsiavutmi U Tamainnik Nunavut ammalu Nunavik katiqsuqpallialilaaqtut tukisigiarutiksanik 2023 ukiaksaanguliqpat.
- Inuit Tapiriit Kanatami Makkuktunik Sivuliqtiksanik Piliriangat, iqqanaijaqtittilauqtut 6−nik makkukturnik tisamanik taqqirnik pilirilauqhlutik Inuit Tapiriit Kanatami allagvingani aujautillugu 2022−mi. Marruuk ilinniaqtiik iqqanaijaqtiuliqtuuk isulivviqanngittunik atuagalirinirmik, pingajungat ilainnakkut iqqanaijaqtuq Inuit Tapiriit Kanatami allagvingani ilinniarutinginnik pijariiqsigasuktillugu.
Arraagutamaaqsiutimik katimatillugit, Inuit Tapiriit Kanatami saqqijaaqtittilauqtut nutaarmik Inuktut Qaliujaaqpaimut nuutirijjutitaasaanganik, tamanna naliangnituinnaq Inuktut titirausirnik nuutirijungnaqtuq Inuktut Qaliujaaqpaimut, kikkutuinnarnut atuqtaujungnaqtuq Inuktut titirausiq angiqtaulauqsimajuq Inuit Tapiriit Kanatami timiqutinginnut 2019−mi, ammalu nuutirijungnaqhluni Inuktut Qaliujaaqpaimit naliangnutuinnaq Inuit Inuktut titirausinginnut.
Kingulliqpaami, Inuit Tapiriit Kanatami saqqitittijut arraagutamaaqsiut unikaanganik, ilaqaqtumi qaujisaqtausimajunik kiinaujaqturnirisimajanginnik ammalu unikkaaqsimajunik Tapiriikkut piliriarisimajanginnik ammalu piliqatiqarnirisimajanginnik Inuit Gavamatuqakkullu Piliriqatigiiktut Katimajingitigut.
Inuit Tapiriit Kanatami 2023−mi arraagutamaaqsiutimik katimalaaqtut Nunatsiavutmi.