November 29, 2022 – Montreal, Quebec
Inuit Tapiriit Kanatami katimajingit katimaniqalauqput November 28-ngutillugu Montreal-mi. Sivuliqtiit uqallausiqalauqtut piliriangujut sivummugiaqtitauqujillutik aaqqiksuiqatigiiksutik gavamatuqakkut ajjigiinngittuuniujunut tunngavviqaqłutik Nunaqaqqaaqsimajut aanniaqsiuqtilirinirmut maligaqutingit sivummugiaqtitauniksanginnut ammalu naukkut piuniqpaatigu tusaqtittisimalirunnarnirminnik Inungnut turaangatitaullutik piliriangujut ikajurutiqaqtittijunnarmangaata, nalunairiaqsimalugu nangminiq isumaliurutiurunnarningit.
Inuit Tapiriit Kanatami piliriniqaqatigiiksutik katimajjutaujuksanik piliriniqaliqsimavut, ilaqaqhlugit atuliqtitaujunnaqtuullutik aanniaqsiurtilirinirmut gavamatuqakkunnit, puraavinsiujunit ammalu aviktuqsimaniujunit maligaqutiit qimirrujauniksanginnik, qaujisainirmut aanniarviliaqtunut turaangatitausimallutik aanniaqsiurtilirijjutit pitaqaqtitauvanninginnik isumagillugit Inuit Nunaqaqtut ammalu silataanirmiungujut Inuit nunangannit, qimirrujauningita aanniaqsiutilirinirmi tunisisimaliqpannirnut angirutinik ammalu aviktuqsimajunut kiinaujaqutiksarijauvaktunik, ammalu qimirruiniq qaujigiarnirlu atuliqtitaujunnaqtuni ilakuuniqarviujunut pitaqaliqtitsivannirni aanniaqsiurtilirinirmi pijitsirarutiksanik. Amisurlaullutik turaangavviqaqtitaujunik uqallausiqalauqput aaqqiksuisimaliriamut niriungniqarvigijaujunik aaqqiksuiqatigiiklutik piliriniulirunnaqtunut pigiaqtitausimalirniarningita atulisaaqtillugu 2023.
Ilagijaujut uqallausiqalaurmijut Kiinaujaqutiksait 2022-mi tunijausimalirniaqtunut $300-million-nik ukiut tallima atuqpalliatillugit aaqqiksuiqatigiilirutiksaullutik Nunaqaqqaaqsimajut Inugiaktunirmiut ammalu Ukiuqtaqtumiut Iglulirinirmut Pilirianginik. Katimajiit sannginiqsaujutigut piliriniqaliqullugit pijjutigisimaniarlugit Inuit aaqqiksuiqatigiingniujunu pilirianguvalliatillugit pitaqaqtitausimatitaujjutiksangita ajjigiinngittuuniujunut tunngavviqaqtitaullutik parnautiliangusimajunik.
Katimajinut ilagijaujut niruaqłiniqalauqtut sanirvaisimalirniarnirminnik ungataanuaqsimajunik $750,000-nit gavamatuqakkunnit kiinaujaqutiksarijauniaqtunik sitamaullutik aviktuqsimanirni Inuit katujjiqatigiinginnut aaqqiksuiqatigiigutiksanik ajjigiinngittuuniujunut tunngavviqaqtitaullutik akuniiqtumut ammalu mianirijauvvingnut aanniarviliaqsimajunut piliriniqarviulirunnaqtunik Inuit pijjutigillugit. Inuit Tapiriit Kanatami piliriqatiqaqattaqsimavut Nunaqaqqaaqsimajulirijinginik Canadami aaqqiksuiqatigiiksimalirajarnirmut akuniiqtumut mianirijauvviksanik aanniaqsiurtilirinirmi ammalu inuuqatigiiktulirinirmi pijitsirarutiksaujunut inungnut naniiliraluaqpata inuusirminni, ilaqaqtihlugit inutuqaujunik, Inungnik timimiktigut isumamiktigullu ajulirutiqaqsimajunuk ammalu tuqujjutigijunnaqsugit aanniarniqaqtunut, ammalu asinginnut.
Ilagijaujut niruaqhliniqalaurmijut naammaksaisimanirminnik atiliuqsimaliriamut piliriangulirajarningita aaqqiksuisimaliriarnirmut kanatalimaami Inuit Kinaunirminnut Nalunaikkutarijaksanginik Auktajuungulutik. Nutaangullutik Canadami Inuit Kinaunirminnut Nalunaikkutalirijingita Katimajiralaangit katujjiqatigiit iluani piliriqatiqarniaqput sitamaullutik Inuit aviktuqsimaninginni katujjiqatigiingujunik, piliriqatigilugit gavamatuqakkut ammalu pilirijunnautitigut piliriaqaqtiulirunnaqtut. Turaarviksaqaqtitauvut aaqqiisimalirajarnirmut gavamatuqakkunnit ilitarijausimalutik Kinaunirmut Inungnut Nalunaikkutaulirajaqtunik isumagiqatausimalugit tuluqtarviulirajaqtut niuviqsimalirajarnirnut asinginik nalunaikkutarijauvagunnaqtunit.