June 29, 2022 — Inuvik, Inuvialuit Aviktuqsimaningani
Inuit Tapiriit Kanatami (ITK) Katimajingit katimalauqtut qaritaujatigut June 23-ngutillugu amma June 28-29-mi inuuvingmi, katimaniqaqsimaliqtillugit Inuit-Canadami Gavamanganit Piliriqatigiiktut Katimajiralaangit June 27-mi. Katimajit niruaqłisimalilauqput Pingatsirmi sanirvaisimaniarnirminnut $843-million-nik gavamatuqakkut kiinaujaqutiksaqaqtitsiningannik Canadami Gavamanganit-Nunaqaqqaaqsimajulirijit ammalu Ukiuqtaqtumiulirijingit Canadami tusaqtittisimalilaurningannit Kiinaujait Aulatsijjutiksat 2022-mut ikajurutiksauniarningita iglulirinirmut piliriangujunut Inuit Nunaluktaanganni, tuniuqqaivallianirmiktigut kiinaujaqutiksarijauniaqtunik atunit sitamaullutik aviktuqsimanirijaujunut.
Katimajinut ilagijaujuit niruaqłiniqalaurmijut sanirvaisimaliriamut $21 million-nik kiinaujalirinnaup ukiunga 2022-23-mi gavamatuqakkunit kiinauqujaqutiksaujunit Canadami Iqqanaijarnilirijit ammalu Inuusilirijikkunnit ikajurutiksauniaqtunik Inuit Ilinnialisaaqtuliriniq ammalu Pairivvilirijikunnut (IELCC.) Taakkua kiinauqutiksait sanirvaqtausimaniaqtut Inuit nunalirinirmi katujjiqatigiinginnut isumaliurutiuniaqsutik qanuq kiinaujaqutiksaujut tuniuqqagauvallianiarninginnut, turaarviksaqaqtitaullutik Inuit ilagiingujut atuinnauvviuliqullugit quttingniqpaatigut, akituluanngittunik ilinnialisaaqtunut ammalu pairivvilirinirmi piliriangujunut nanirmiutaugaluaqpataluunniit.
Katimajiit angiqatigiiksimalilauqtut sanirvaisimaliriamik ungataanuaqtunik $47 million-nit gavamatuqakkunnit kiinaujaqutiksaqtaarijausimajunik Canadami Gavamangat-Nunaqaqqaaqsimajulirijit ammalu Ukiuqtaqtumiutalirijinginit Canadami aaqqiksuangusimajumit angigligiaqtitausimaliqullugit Angunasuktiinut Ikajurutiksanik Kiinaujaqutitaaqpanniujunut ammalu nutaangulluni pilirianguliqsimajumut taijaulluni Nunaliujumi Niqigijaksalirinirmi Pilirianut Kiinaujaqutiksanik (CFPF) 2022-2024 ukiungit atuqtillugit.
Kingullirmikli, Katimajiit isumaliuqsimalilauqtut isumaliurutiqaqsimaniarnirminnut Minister-gijaujumut Iqalliqijikkut ammalu Tariurmiutalirijikkunnut ammalu Canadami Umiarjuaqtigut Nautsiqtuijikkunnut marruungnik (2) atirijaulirunnaqtunnik nutaangullutik ukiuqtaqtumi umiarjuanut: Appatuuk, atsiqsimalugu
Akpatok Qikiqtanga Ungava Tariunganiittuq, ammalu Imnaryuaq, tukiqaqłuni “imnaaluk” Sallirmiutitut uqarusiq Inuvialuktun.
Katimajinut ilagijaujuit tusaaniqalauqtut maannamut tikitsugit pilirinirisimajanginnik Inuit Tapiriit Kanatami nalunaiqtausimalirumallutik sapujjijiunirminnut taima Iqqaqtuivvigjuakkut tusaaniqaliqpata sangunniarutiujunut pijjutigillugit maligarjuatigut sulillariktuuningata Maligaqutit Upigusuqattariaqarnirmik Iqqiliit, Inuit ammalu Allangajut Surusinginik, Makkuktunginik ammalu Ilagiingujunik. Maligaqutit piluaqtumik turaarviksaqarmata quvvaqtittisimaliriamut tunngvviqutigijaujunik angijualungmik naliqqariiktitaujariaqarningita Nunaqaqqaarsimajulimaat Canadalimaami turaangutitaullutik saimmaqatigiigutausimaliqullugu Canadami taimanganituqaq aanniqtiriqattaqsimaniujunut gavamaqausiqtaaqtitsillutik katisimaliqtitsinirmut maligaqutiulilauqtunit suruqpalliajjutiullutik Nunaqaqqaaqsimajuit uqausinginnut, piusituqanginnut ammalu kinauninginnut ammalu nalunaimmariktumik kinguvaariikpalliajunut aksururnaqtukkuurutiuvaliqtunit ammalu naammanngittutigut aktuisimaniujunik tamainnik Iqqilingnik, Allangajunik ammalu Inungnik, taimalu ungatiluanganut pijjutiqaqsutik iliriniuliqsimajunut Nunaqaqqaaqsimajuit surusinginnut ammalu makkuktunginnut surusilirinirmi pilirijjutiujutigut taimalu asiujivalliajjutiulikkanniqtunut uqausituqanginnik, piusituqanginnik ammalu kinauninginnik. Kisianilu, takuksaunani pijjutiuliqsimaningata Quebec sangunniarutiqarningata Maligaqutini uqaqtausimajut maligarjuanik malinnginniraqsunijjuk tuluqtarviulikkannituinnarmat saimmaqatigiiksimaliqujinirmut turaarviutitaujunut Maligaqutiujumi. Tuksirautiusimajut tusaajauniaqtut September-mi.
Aippirmi ammalu Pingatsirmi katimaniqaqsutik, Katimajinut ilagijaujuit tusaaniqalaurmijut maannamut tikitsugit piliriniujunut makuninga:
- nutaangulluni Niqittiavannik Niqiqaqattarniliriniq Ukiuqtaqtungani Canada Malitsiaqtitauningit ammalu Kiinaujalirijjutinik Qimirruijit Katimajiralaangit, ilaqaqsutik sitamaullutik Inuit pijjutiqaqtigijanginik piliriaksaqaqtitausimajunik qaujigiaqtiunirmut saqqiijunnatsiaqtuunirnut isumaalugutiqarviujunut kiinaujatigut ikajuusiaqtaartitauvaktunit gavamatuqakkut pilirianganni
- aaqqiksuiniq Canadami Inuit Tariulirinirmut Ilingannirijanginnut Titiraqtausimajunik, turaangatitausimallutik qimirruiniarlutik tariulirinirmi aulatsiniujunik, piliriniqarviujunit pijausimaliriaqaqtunut, qaujisaiqattarnirni ammalu Ukiuqtaqtumik aulatsijiunirmut
- Inuit Tapiriit Kanatami (ITK) maannamut tikitsugit tuksirautiusimajunut kiinaujaqutiksaqtaarumallutik gavamatuqakkunnit sivurngani 2023-mi kiinaujaqutiksaqtaarpannirnik aulatsijjutiksauniaqtunik, qiniliqsimanirmut kiinaujaqutiksanik iluikkaullugu kiinaujaqutiqaqtitausimalirutiksanik piliriniqarniminnut nungutitausimaliqullugu Inuit puvagluliqattarningat 2030 ukiungata sivurngani
- Qanuippitaa? Canadami Inuit Aanniaqsiurtilirinirmi Qaujisainingat. Tukisigiarviksaqutit katiqsuanguvalliajut Inuvialuit Aviktuqsimaningani pijariiqtausimaliqtut, amma qaujisainiujuq pigiaqtitausaalauqtilluguli Nunatsiavummini
Inuit Tapiriit Kanatami Katimajingit katimaniqakkannirumaaqtut September 2022-mi.