Skip to main content
AnnouncementsTusaqtitsijjutiit

Inuit Tapiriit Kanatami Katimajingit katimaniqaqtut Ottawa-mi, atiliurivut Inugiaktunirmiut Inuit Katimajinngasiarusinik pigiaqtittisimaliriamik

By May 31, 2024 No Comments

May 30, 2024 — Ottawa, Ontario

Inuit Tapiriit Kanatami Katimajingit niruaqłiniqalauqput May 29-mi pigiaqtittisimaliriamik nutaangullutik katimajinngasiarusiulirniaqtunik katimajinut piuniqsatigut ilaliujjisiliriamik Inuit tapiriikkut piliriniqarvigijanginnut inigijanginik Inuit nunaliqaqtunut Inuit Nunangatta silataani: Ilagijauqataujuit katimajinngasiarusiujunut takuksautittisimatitaulutik Inuit Tapiriit Kanatami Katimajinginnut ilagijauninginnik; atuni Inuit Angirutitigut Katujjiqatigiingujuit ammalu atainnaqtumik ilagijauqataujuit tilisisimaliqattarniarlutik pijjutiqaqtiuniaqtumik:

Naammaksaisimalilaurmijut pigiaqtittisimaliriamik Canadami Inuit sanauganginik niuvrutiqaqattarnilirinirmut katimajiralaanguniaqtunik; Inungnut turaangatitaullutik piliriniqarviksamik aaqqiksuivannirmi isumaliurutiuniaqtunik Inuit Tapiriit Kanatami Katimajinginnut pivalliajulirinirnut pijjutigillugit Inuit iqqanaijarnilirininginnut, sanajiuvanninginnut; ammalu ajunnginnirijanginik pivalliatittivannirnut.

Katimajiit naammaksaisimalilaurmijut gavamatuqakkut kiinaujaqutiqaqtitsijjutingit sanirvaqtausimaliqullugit makununga piliriangugiarutiksaujunik:

  • $285-million-nik kiinaujaqutiqaqtittiniarnirmik ukiut qulinut (10) Nunaqaqqaaqsimajuit Aanniaqsiurtilirinirmi Kiinauqujaqutiksaujunit tunijausimalirniarninginnut nalunaiqtausimalilauqtunit Kiinaujaqutiksaqaqtittiniarnirmut 2023-mi piliriaqarutiksanik naliqqautittilutik atuinnauliqtittigiarnirmut aanniaqsiurtilirijjutiksaujunik
  • $197.5- million-nik kiinaujaqutiqaqtittiniarnirmik 7 ukiut atuqpalliatillugit Inugiaktunirmiut; Inugianngittunirmiut; ammalu Ukiuqtaqtumi Nunaqaqqaaqsimajuit Iglulirinirmut Parnautinginnit
  • $1.3- million-nik Canadami Iqqanaijarniliriniq ammalu Inuusilirijikkunnit piruqtittigiarutiuniaqtunik iqqanaijaqtinik piliriaqaqtiqaliriamik Inuit aviktuqsimaninginni tukimuaktiuvanniaqtunik Inungnik sivuliqtiqarlutik qaujisainiuvaktunut ammalu aaqqiksuisimalirlutik inungnut turaangallutik pilimmaksainilirinirmi pilirianik atuliqtittisimaliriamik sivunirmi Inungnik qaujisaqtiuvalirajaqtunut

Katimajiit tunijausimalilauqput sivullirmik unikkaaliangusimajunik nalunaijaisimallutik ingirrattiartitausimaningita Nunaqaqqaaqsimajuit Nunaliujuni Aulatsiniqarviujunut Kiinaujaqutiksaujut; sanirvaisimalilauqtunut $517.8-miliantaalanik Inuit Angirutitigut Katujjiqatigiinginnut 2021-mi ikajurutiksanik maannakautigi aulatsiniqarviujunit pijausimaliriaqaqtunut: April 2024-mi, ukiumik atausirmut kiinaujaqutiksanginik pititauvanningit pititausimajunnaliqtillugit; 75%-ngit Inungnut turaangatitausimallutik kiinaujaqutiksaujut atuqtaujuksautitaullutik piliriangukainnaqtunut Inuit nunaligijanginni; ammalu kiinaujaqutiksaujuit taakkua tuniuqqaqtausimalilauqput ammalu aulatauniqaqsutik ikajurutiuvanniartillugit Inuit nangminiq isumaliurutiliurunnarninginnut angijuutiullutik aulatsinirniujunut pilirianguliqsimajunik: Ungataanuaqtut 120-nit piliriangukainnaqtut Inuit Nunaluktaanganni kiinaujaqutiksaqaqtitausimavut uvvaluunniit ilangagut kiinaujaqutiksaqaqtitausimallutik taakkutiguunaq kiinaujanik qiturngiuqtittiniqtigu; ilaqaqtillugit aqqutimi ikummaqutiqaqtittinirnut; sukkajutigut qaritaujakkuurutiit nutauliriaqtitauninginnut; silami pinnguarviit; pairivvingnut, siqinnirnirmit ammalu anurimit uajautiliurutinut; makkuktuit katittarvinginnut; pinnguarvingnut; ammalu amisuinit atuqtaujunnaqsutik qanuiliuriarviksaujunut.

Katimajiit ikajuqtuinirminnik nutauliriaqtittilaurmijut piliriniujunut Inuit pijunnautiqarningita ungatiluanganuaqsimallutik ammalu angigligiaqsimallutik iqsisaariniuvaliqtunut sulinngittuullutik inullattaanut ilagijauniraqpannirnut. Atuliqtitauqujijjutitigut naammaksaisimanirnut iglulirinirmi kiinaujaqutiqaqtittiniarnirmut Inugiaktunirmiut, Inugianngittunirmiut, ammalu Ukiuqtaqtumi Nunaqaqqaaqsimajuit Iglulirinirmut Parnautinginnit, Katimajiit ujjirusulilauqput ikajuqtuisimannginnirminnik sanirvaisimaliriamut nalinginnikluunniit kiinaujaqutiksanik NunatuKavut Nunaliujumi Katimajiujunut ammalu nalinginnulluunniit asinginnut sulinngittuullutik ilaakkuungajunut Inungnut ammalu katujjiqatigiingujunut sulinngitsutik Inullattaangunirarutiujunut uvvaluunniit ilagijaunirarutiusimajunut.

Katimajiit ikajuqtuiniqalaurmijut Inuit Tapiriit Kanatami kajusitittisimallutik piliriniqarninginik ikajuqtausimaliqtittigiarnirnut Iksirarjuarmiut Tuksiarvingata Inungnik aanniqtiqtausimajunut.