April 28, 2022 – Ottawa, Ontario
Katimaqatigiigaanikkamik December 2021-mi Commissioner Brenda Lucki, Royal Canadian Mounted Police-kunnut (RCMP/Paliisikkut) amma Angijuqqaaq Natan Obed, Inuit Tapiriit Kanatami (ITK), tamarmiullutik katujjiqatigiingujuuk aaqqiksuisimaliqtuk amiqqarutigilunitjuk pilirianguniaqtunik ikajurutiksaullutik piusigiaqtitausimaniksangita piliriqatigiikpanniujunut Inuit nunaligijanginnit amma Paliisikkunnit (RCMP).
Parnautiliurningat pigiarviuvuq katujjiqatigiikłutik piliriqatigiilirniarningita Paliisikkut (RCMP) amma Inuit Canadaup qutsingningagut piliriangusimaliqullugit ilakuuniqarviujut amma sivulliqpautitaksaujut paliisiqaqpangnilirinirni, turaarviksaqaqtitaullutik piruqtitsisimaliriamingnut takuksautsiaqtutigut amma ukpiriturautsiarungnarninginik.
Amisut piliriangulirialiit saqqititausimavut atuliqujaullutik isumaliurutiusimalilauqtunit Canadami Inuit Pilirianguliqtuksanut Parnautiliarisimajanginit pijjutigillugit Asiujijausimajut ammalu Inuaqtausimajut Inuit Arnait, Niviaqsiat ammalu 2SLGBTQQIA+-ngullutik Inuuqatigiiktuit, ilaqaqtitsisimallutik Inuit sivulliqpautitauqujanginik Ikajuqtugausimaliqullugit Tiliurijjutiusimajut atuliqtitauqullugit Canadami Tukisisimaliriarniulauqtunit Qaujisainiqtigut Asiujijausimajunut ammalu Inuaqtausimajunut Nunaqaqqaaqsimajuit Arnanginit ammalu Niviaqsianginit. Tamakkua piliriangujut maliktitaungmijut gavamatuqakkut piliriariniarniraqsimallugit nalunaiqsimajanginik maliktitaullutik Gavamatuqakkut Naukkuurviksaqutinginni piliriangusimaliqullugik Asiujijausimajut ammalu Inuaqtausimajunut Nunaqaqqaaqsimajuit Arnangit, Niviaqsiangit amma 2SLGBTQQIA+-ngullutik Inuuqatigiiktuit.
Paliisikkut (RCMP) piliriqatiqarniaqtut Inuit Tapiriikkunnik Kanatami (ITK) makununga turaaqtitausimajunut:
- tukisigirviksaqutiminnik amiqqarutiqarniarnirmut ingminiiqłutik tuqujjutiqaqsimajunut, imminiiqhlutik tuqujjutiqarasuksimajunut amma imminiirumanirmut isummiqsimaqattaqsimajunut
- pijariaqaqtitaullutik piusituqalirinirmut pilimmaksajausimajariaqarningita paliisiujut iqqanaijaaqaqtunut Inuit nunanganni
- amisuruqtitausimalirniksangita inungnut pijjutiqaqtiujunut Paliisikkut (RCMP) pilirivvingita iluani amma piusigiaqtitausimalirlutik inuktut uqallagungnaqtunik iqqanaijaqtiqarunnarningita
- katujjiqatigiiklutik piliriqatauninginnik turaangajunut gavamatuqakkut nunaqaqqaaqsimajuit iqqaqtuivvilirinirmi parnautilianginnut sivuliqtiqarlutik Canadami iqqaqtuivvilirijirjuakkunginnik.
Ilagijauqataulluni piliriangujuksaullutik parnautinut, Paliisikkut (RCMP) piliriniqaqattarniarnirminnik nalunaiqsisimavut qaujigiarviqaqattarniarnirminnut Inuit sivuliqtigijanginnit nautsiqtuinirmingni pilirianguliqsimajunik. Tamarmik katujjiqatigiingujuuk piliriaksaqarmatik amiqqarutiqaqattarniarnirminnut tusagaksaqutimingnik ammalu katujjiniqarlutik piliriniqaqpangniarnirmingnut saqqippalliallutik pivalliajuliriniujunik.
“Inuit akunialuk ilainnaaqtitauqattaqsimaliqput, pitsiaqtaunngiqattaqsimaliqsutik amma aanniqtigauqattaqsimaliqsutik pirajaksimajunut iqqaqtuivvilirinirmi pilirijjutiuvaktut iluani. Nunaligijattinni piliriniuqattaqsimajut paliisikkunnik aksururnaqtuuqattaqsimallutik. taakkutiguunaq nutaangullutik piliriangujuksaullutik parnautitigut niriungniqtaqalirmat piruqtittisimaliriamik nutaangujutigut piliriqatigiikpanniuniaqtunik tunngavviqaqtitausimallutik upigiturautsiarnirnut ammalu ukpiriturautsiarungnarnirnut.”
ITK-kunnut Angijuqqaaq Natan Obed
“Tamattaulluta ukpiriturautsiarungnarniq, upigiturautsiarungnarniq amma ikpigiturautsiarungnarniq pitaqariaqarmata piruqtitsivallianittingni naammatsiaqtutigut piliriqatigiilirungnarningita Paliisikkut amma Inuit nunaligijanginirmiut. Paliisikkut (RCMP) piliriqatiqarniaqtut Inuit Tapiriikkunginik Kanatami (ITK) atuliqtitsinirmi taakkuninga piliriangujuksaullutik parnautinik aaqqiksugausimaliqullugit, piruqtitausimalikkanniqullugit amma piusigiaqtitausimaliqullugit piliriqatiqaqpangnivut nunaligijaujunik Inuit Nunanganni.”
RCMP-kunnut Commissioner Brenda Lucki
ITK-kut Canadami pijjutiqaqtigijaujuullutik katujjiqatigiigijauvut Inungnut Canadami. Inuit Nunangat sitamaujunut aviktuqsimaniqarpuq: Inuvialuit (Nunatsiaq), Nunavut, Nunavik (Quebec Taqranga) amma Nunatsiavut (Newfoundland ammalu Labrador.)
Paliisikkut (RCMP) pitaqaqtitsijiuvakput paliisiqaqtitsivangnirnut ungataanuaqtunik 70 pursantinganit Inuit nunaligijangini Inuit Nunaluktaangani, ilaqaqłutik Nunavut, Nunatsiavut amma Inuvialuit Aviktuqsimaningani.
Inuit Tapiriit Kanatami: [email protected]
Paliisikkut (RMCP): [email protected]