Tisipiri 14, 2021 – Ottawa, Ontario
Inuit Tapiriit Kanatami Katimajingit katilauqtut Shaw Katimavialummi Ottawami, ikiaqqivikkutigullu, Tisipiri 13mi ammalu 14mi, katiqatiqariilauqtillugit gavamatuqakkut Ministautinginnik ilagijaulluni Inuit-Gavamatuqakkut Piliriqatigiinninginnut Katimajiralaarnut.
Katimajiit uqausiqalauqtut piliriarillarittaminni atsuruutigisimajangita Inuit Tapiriit Kanatamikkut pilirianginnut tamatumani arraaguttinni. Attanaqtumiittitsittailinirmut Inunnik NUVAGJUARNAQ-19mi, Katimajiit tutsirautiqalauqtut kajusiinnaqullugu piliriqatigiinningit gavamatuqakkut, avittuqsimajunillu gavamait sanngiliriaqtauqullugu kapijautitsimagasuarniq. Inuit Tapiriit Kanatami sivuliqtingit tutsirautiqainnaqtut Inunnut turaanganiqaqtunik kanatalimaarmi aullaqattarunnarnirmut kapijausimajunut atuliqtitaumajumi.
Katimajiit tusalauqtut nutausiligiaqsimajunik makuninga:
- Pilirianguninga atuliqtitauqullugu Nunarjuamiutauqatigiittut Uqasiqaqsimaningat Pijunnautiqarninginnik Nunaqaqqaaqsimajuit Maligaq. Inuit Tapiriit Kanatamikkut nalunaiqsimajut tamanna turaanganiqariaqarianga iliqqusiqatigiinnginnivut isumagijausimaluni aqqusiurutaulunilu atuliqtitauqullugu ilulinga 5, aturiaqaqtitsigajaqtuq gavamatuqakkut Kanataup maliganginnik ajjigiiliqtitsiluni maligarjuanginnik Nunarjuamiutauqatigiittut Uqasiqaqsimaningat Pijunnautiqarninginnik Nunaqaqqaaqsimajuit.
- Inuit Tapiriit Kanatamikkut Inuktut Akiqarninganut Aturatsaq, kiinaujaqaqtitaunirmut sivunitsatinni nalautsaarut atuliqtitaulutit uqausilirinirmut piliriatsait Inuit Nunanganni arraagunut 15nut aggiqtunut.
- Inuit Tapiriit Kanatamikkut piliriangujuup qitiani qimirrugiarninga Inuit Nutaqqat Sivulliit Piliriaqmi. 2019minit, piliriangujuq kiinapujaqaqtitsisimaliqtuq mitsaaniittunik $80 milijannik sunakkutaarnut pijitsirautinullu Inuit Nunanganni. Atakainnaqtuq aulluriarutaugunnaqtuni pivalliatitauluni atainnaqtumik kiinaujaqaqtitsiniq nalimugiiliqtillugit Inunnut nutaqqanut.
- Saqqitausimaninga Inuit Tukisigiarutitsanik Katiqsuinirmut qanuqtuuruti piliriangunianillu pivaalliriaqullugu inuit tukisigiarutitsanik katiqsuigunnarningit, pigiaqtitausimajuq tunijausimalluni $4 milijannik kiinaujaqaqtitaunirmi 2021mi.
Isulinniqattillugit tagvani pinasuarusittinni katimaninginni, Inuit Tapiriit Kanatami Katimajingit katiqatiqalauqtut Kuin Kiggaqtuijirjuanganik Mary Simonmik Rideau Illualungani – sivulliqpaarilluniuk katinningat Inuit sivuliqtiit Kuin Kiggaqtuijirjuanganik ilijaulauqtillugu tagvani arraaguttinni.