ᑎᓯᐱᕆ 14, 2021 – ᐋᑐᕚ, ᐋᓐᑎᐅᕆᔫ
ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑲᑎᓚᐅᖅᑐᑦ ᓵ ᑲᑎᒪᕕᐊᓗᒻᒥ ᐋᑐᕚᒥ, ᐃᑭᐊᖅᑭᕕᒃᑯᑎᒍᓪᓗ, ᑎᓯᐱᕆ 13ᒥ ᐊᒻᒪᓗ 14ᒥ, ᑲᑎᖃᑎᖃᕇᓚᐅᖅᑎᓪᓗᒋᑦ ᒐᕙᒪᑐᖃᒃᑯᑦ ᒥᓂᔅᑕᐅᑎᖏᓐᓂᒃ ᐃᓚᒋᔭᐅᓪᓗᓂ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᓐᓄᑦ ᑲᑎᒪᔨᕋᓛᕐᓄᑦ.
ᑲᑎᒪᔩᑦ ᐅᖃᐅᓯᖃᓚᐅᖅᑐᑦ ᐱᓕᕆᐊᕆᓪᓚᕆᑦᑕᒥᓐᓂ ᐊᑦᓱᕉᑎᒋᓯᒪᔭᖏᑕ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐱᓕᕆᐊᖏᓐᓄᑦ ᑕᒪᑐᒪᓂ ᐊᕐᕌᒍᑦᑎᓐᓂ. ᐊᑦᑕᓇᖅᑐᒦᑦᑎᑦᓯᑦᑕᐃᓕᓂᕐᒧᑦ ᐃᓄᓐᓂᒃ ᓄᕙᒡᔪᐊᕐᓇᖅ-19ᒥ, ᑲᑎᒪᔩᑦ ᑐᑦᓯᕋᐅᑎᖃᓚᐅᖅᑐᑦ ᑲᔪᓰᓐᓇᖁᓪᓗᒍ ᐱᓕᕆᖃᑎᒌᓐᓂᖏᑦ ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᓂᓪᓗ ᒐᕙᒪᐃᑦ ᓴᙱᓕᕆᐊᖅᑕᐅᖁᓪᓗᒍ ᑲᐱᔭᐅᑎᑦᓯᒪᒐᓱᐊᕐᓂᖅ. ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᓕᖅᑎᖏᑦ ᑐᑦᓯᕋᐅᑎᖃᐃᓐᓇᖅᑐᑦ ᐃᓄᓐᓄᑦ ᑐᕌᖓᓂᖃᖅᑐᓂᒃ ᑲᓇᑕᓕᒫᕐᒥ ᐊᐅᓪᓚᖃᑦᑕᕈᓐᓇᕐᓂᕐᒧᑦ ᑲᐱᔭᐅᓯᒪᔪᓄᑦ ᐊᑐᓕᖅᑎᑕᐅᒪᔪᒥ.
ᑲᑎᒪᔩᑦ ᑐᓴᓚᐅᖅᑐᑦ ᓄᑕᐅᓯᓕᒋᐊᖅᓯᒪᔪᓂᒃ ᒪᑯᓂᖓ:
- ᐱᓕᕆᐊᖑᓂᖓ ᐊᑐᓕᖅᑎᑕᐅᖁᓪᓗᒍ ᓄᓇᕐᔪᐊᒥᐅᑕᐅᖃᑎᒌᑦᑐᑦ ᐅᖃᓯᖃᖅᓯᒪᓂᖓᑦ ᐱᔪᓐᓇᐅᑎᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᐃᑦ ᒪᓕᒐᖅ. ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᓇᓗᓇᐃᖅᓯᒪᔪᑦ ᑕᒪᓐᓇ ᑐᕌᖓᓂᖃᕆᐊᖃᕆᐊᖓ ᐃᓕᖅᑯᓯᖃᑎᒌᙱᓐᓂᕗᑦ ᐃᓱᒪᒋᔭᐅᓯᒪᓗᓂ ᐊᖅᑯᓯᐅᕈᑕᐅᓗᓂᓗ ᐊᑐᓕᖅᑎᑕᐅᖁᓪᓗᒍ ᐃᓗᓕᖓ 5, ᐊᑐᕆᐊᖃᖅᑎᑦᓯᒐᔭᖅᑐᖅ ᒐᕙᒪᑐᖃᒃᑯᑦ ᑲᓇᑕᐅᑉ ᒪᓕᒐᖏᓐᓂᒃ ᐊᔾᔨᒌᓕᖅᑎᑦᓯᓗᓂ ᒪᓕᒐᕐᔪᐊᖏᓐᓂᒃ ᓄᓇᕐᔪᐊᒥᐅᑕᐅᖃᑎᒌᑦᑐᑦ ᐅᖃᓯᖃᖅᓯᒪᓂᖓᑦ ᐱᔪᓐᓇᐅᑎᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᐃᑦ.
- ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐃᓄᒃᑐᑦ ᐊᑭᖃᕐᓂᖓᓄᑦ ᐊᑐᕋᑦᓴᖅ, ᑮᓇᐅᔭᖃᖅᑎᑕᐅᓂᕐᒧᑦ ᓯᕗᓂᑦᓴᑎᓐᓂ ᓇᓚᐅᑦᓵᕈᑦ ᐊᑐᓕᖅᑎᑕᐅᓗᑎᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᑦᓴᐃᑦ ᐃᓄᐃᑦ ᓄᓇᖓᓐᓂ ᐊᕐᕌᒍᓄᑦ 15ᓄᑦ ᐊᒡᒋᖅᑐᓄᑦ.
- ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐱᓕᕆᐊᖑᔫᑉ ᕿᑎᐊᓂ ᕿᒥᕐᕈᒋᐊᕐᓂᖓ ᐃᓄᐃᑦ ᓄᑕᖅᑲᑦ ᓯᕗᓪᓖᑦ ᐱᓕᕆᐊᖅᒥ. 2019ᒥᓂᑦ, ᐱᓕᕆᐊᖑᔪᖅ ᑮᓇᐳᔭᖃᖅᑎᑦᓯᓯᒪᓕᖅᑐᖅ ᒥᑦᓵᓃᑦᑐᓂᒃ $80 ᒥᓕᔭᓐᓂᒃ ᓱᓇᒃᑯᑖᕐᓄᑦ ᐱᔨᑦᓯᕋᐅᑎᓄᓪᓗ ᐃᓄᐃᑦ ᓄᓇᖓᓐᓂ. ᐊᑕᑲᐃᓐᓇᖅᑐᖅ ᐊᐅᓪᓗᕆᐊᕈᑕᐅᒍᓐᓇᖅᑐᓂ ᐱᕙᓪᓕᐊᑎᑕᐅᓗᓂ ᐊᑕᐃᓐᓇᖅᑐᒥᒃ ᑮᓇᐅᔭᖃᖅᑎᑦᓯᓂᖅ ᓇᓕᒧᒌᓕᖅᑎᓪᓗᒋᑦ ᐃᓄᓐᓄᑦ ᓄᑕᖅᑲᓄᑦ.
- ᓴᖅᑭᑕᐅᓯᒪᓂᖓ ᐃᓄᐃᑦ ᑐᑭᓯᒋᐊᕈᑎᑦᓴᓂᒃ ᑲᑎᖅᓱᐃᓂᕐᒧᑦ ᖃᓄᖅᑑᕈᑎ ᐱᓕᕆᐊᖑᓂᐊᓂᓪᓗ ᐱᕚᓪᓕᕆᐊᖁᓪᓗᒍ ᐃᓄᐃᑦ ᑐᑭᓯᒋᐊᕈᑎᑦᓴᓂᒃ ᑲᑎᖅᓱᐃᒍᓐᓇᕐᓂᖏᑦ, ᐱᒋᐊᖅᑎᑕᐅᓯᒪᔪᖅ ᑐᓂᔭᐅᓯᒪᓪᓗᓂ $4 ᒥᓕᔭᓐᓂᒃ ᑮᓇᐅᔭᖃᖅᑎᑕᐅᓂᕐᒥ 2021ᒥ.
ᐃᓱᓕᓐᓂᖃᑦᑎᓪᓗᒋᑦ ᑕᒡᕙᓂ ᐱᓇᓱᐊᕈᓯᑦᑎᓐᓂ ᑲᑎᒪᓂᖏᓐᓂ, ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑲᑎᖃᑎᖃᓚᐅᖅᑐᑦ ᑯᐃᓐ ᑭᒡᒐᖅᑐᐃᔨᕐᔪᐊᖓᓂᒃ ᒥᐊᓕ ᓴᐃᒪᓐᒥᒃ ᕇᑑ ᐃᓪᓗᐊᓗᖓᓂ – ᓯᕗᓪᓕᖅᐹᕆᓪᓗᓂᐅᒃ ᑲᑎᓐᓂᖓᑦ ᐃᓄᐃᑦ ᓯᕗᓕᖅᑏᑦ ᑯᐃᓐ ᑭᒡᒐᖅᑐᐃᔨᕐᔪᐊᖓᓂᒃ ᐃᓕᔭᐅᓚᐅᖅᑎᓪᓗᒍ ᑕᒡᕙᓂ ᐊᕐᕌᒍᑦᑎᓐᓂ.