AnnouncementsUncategorized @ius

ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᑕ ᑲᑎᒪᖃᑎᒌᓐᓂᖏᑦ ᑕᕐᕆᔭᐅᑎᕐᓚᒃᑎᒍᑦ

ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᑕ ᑲᑎᒪᖃᑎᒌᓐᓂᖏᑦ ᑕᕐᕆᔭᐅᑎᕐᓚᒃᑎᒍᑦ

ᐃᓚᒋᔭᐅᖃᑕᐅᔪᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᓐᓄᑦ ᑲᑎᖖᒐᓂᖃᓚᐅᖅᐳᑦ ᑕᕐᕆᔭᐅᑎᕐᓚᒃᑎᒍᑦ ᑕᓪᓕᒪᖓᐅᑎᓪᓗᒍ ᐋᖅᑭᒃᑕᐅᕙᒌᖅᓯᒪᓪᓗᓂ ᑲᑎᒪᖃᑎᒌᓐᓂᕆᓂᐊᖅᑕᒥᓐᓄᑦ ᒪᓕᒃᓱᒍ.  ᑎᓯᐱᕆ 2019-ᖑᑎᓪᓗᒍ ᑭᖑᓪᓕᕐᒥᒃ ᑲᑎᖕᒪᓂᖃᓚᐅᕐᒪᑕ. ᑲᑎᒪᔨᐅᔪᑦ ᐅᖃᓪᓚᐅᓯᖃᓚᐅᖅᑐᑦ ᒐᕙᒪᑐᖃᒃᑯᑦ ᒪᓕᒐᖖᒍᖅᑎᑦᑎᕙᓪᓕᐊᓂᖓᓐᓂᒃ ᐊᑐᓕᖅᑎᑕᐅᖁᓪᓗᒋᑦ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᖓᓐᓂᒃ ᓄᓇᖃᖅᑳᕐᓯᒪᔪᐃᑦ ᐱᔪᓐᓇᐅᑎᖃᕐᓂᖏᓐᓄᑦ ᐊᒻᒪᓗ ᐊᑐᓕᖅᑎᑕᐅᖁᓪᓗᒋᑦ ᐃᑲᔪᖅᑐᒐᐅᓯᒪᓕᖁᔨᓂᕐᒧᑦ ᑎᓕᐅᕆᓯᒪᓕᕈᑎᐅᔪᑦ ᑲᓇᑕᒥ ᖃᐅᔨᒋᐊᕈᑎᒋᓪᓗᒋᑦ ᓈᓚᖕᓂᖃᓚᐅᕐᓂᕐᒥᑦ ᐃᓄᐊᖅᑕᐅᓯᒪᔪᑦ ᐊᒻᒪᓗ ᐊᓯᐅᔨᔭᐅᓯᒪᔪᓄᑦ ᓄᓇᖃᖅᑳᕐᓯᒪᔪᐃᑦ ᐊᕐᓇᖏᓂᑦ ᓂᕕᐊᖅᓯᐊᖏᓐᓂᓪᓗ.

ᐅᖃᓪᓚᐅᓯᖃᓚᐅᕐᒥᔪᑦ ᐱᓕᕆᐊᖑᔪᑦ ᑲᔪᓯᑎᑕᐅᓯᒪᖁᓪᓗᒋᑦ ᑲᓇᑕᐅᑉ ᖁᑦᓯᖕᓂᖓᒍᑦ ᓱᕋᒃᑎᖅᑕᐅᓯᒪᓕᖁᓪᓗᒋᑦ ᐱᓕᕆᔾᔪᑎᑎᒍᑦ ᑭᒡᓕᖃᓕᕈᑎᐅᕙᒃᑐᑦ ᐊᑭᕋᖅᑐᐃᓂᖅᑕᖃᓕᕈᑎᐅᕙᒃᓱᑎᒃ ᐃᓄᓐᓂᒃ, ᓄᓇᖃᖅᑳᕐᓯᒪᔪᓂᒃ ᐊᒻᒪᓗ ᕿᕐᓂᕐᑐᐊᓗᓐᓂᒃ.

“ᖁᕕᐸᓱᒃᐳᖓ ᐃᓄᐃᑦ ᓯᕗᓕᖅᑎᒋᔭᖏᑦ ᑲᑎᓐᓂᖃᕈᓐᓇᓚᐅᕐᒪᑕ ᑕᕐᕆᔭᐅᑎᕐᓚᒃᑎᒍᑦ, ᐱᔾᔪᑎᖃᖅᑎᒋᔭᐅᔪᐃᑦ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᒋᔭᖏᑦ ᐃᓚᒋᔭᐅᖃᑕᐅᓪᓗᑎᒃ ᐊᕕᒃᑐᖅᓯᒪᓂᕆᔭᒥᓐᓂᑦ ᐃᓄᐃᑦ ᓄᓇᖓᓐᓂᑦ. ᑖᓐᓇ ᑲᑎᖕᒪᓂᕆᓚᐅᖅᑕᖓᑦ ᓯᕗᓪᓕᖅᐸᐅᒻᒪᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᓂᑦ ᑲᑎᖕᒪᖃᑎᒌᓐᓂᖏᑕ ᑕᕐᕆᔭᐅᑎᕐᓚᒃᑎᒎᖅᓱᑎᒃ ᐊᒻᒪᓗ ᖁᕕᐸᓱᒃᐳᖓ ᑲᔪᓯᑎᑦᑎᒋᐊᕈᓐᓇᓚᐅᕐᕋᑦᑕ ᓯᕗᒻᒧᑎᑦᓯᒋᐊᕐᓂᑦᑎᓐᓂᒃ ᐱᓕᕆᐊᑦᑎᓐᓂᒃ ᖃᖓᑕᓲᒃᑯᑦ ᐃᖏᕐᕋᔪᓐᓇᕐᓂᐅᔪᑦ ᑭᒡᓕᖃᓕᖅᑎᑕᐅᓯᒪᒐᓗᐊᖅᑎᓪᓗᒋᑦ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᒥᒃ ᐊᑐᓕᖅᓯᒪᓂᖃᕐᓂᕐᓂᑦ ᓄᓇᓕᒋᔭᕗᑦ ᖃᓄᐃᖖᒋᑦᓯᐊᖅᑎᑕᐅᖁᓪᓗᒋᑦ,” ᐅᖃᖅᓱᓂ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖓᑦ ᓇᑖᓐ ᐆᐱᑦ.