ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᐊᕐᕌᒍᑕᒫᖅᓯᐅᑎᒧᓪᓗ ᑲᑎᒪᒋᐊᖅᑐᖅᓯᒪᔪᑦ ᑲᑎᓚᐅᖅᑐᑦ ᐃᖃᓗᓐᓂ ᓯᑎᐱᕆ 28ᒥ 30-ᒧᑦ ᓯᕗᓪᓕᖅᐹᕆᓪᓗᒍ ᓇᔫᑎᓂᒃᑯᑦ ᑲᑎᒪᓪᓗᑎᑦ ᑕᐃᒪᙵᓂᒃ ᒫᑦᓯ 2020. ᐊᑦᑕᓇᖅᑐᒦᖁᓇᒋᑦ ᐃᓚᐅᔪᓕᒫᑦ, ᐃᓚᖏᑦ ᐃᓚᐅᔪᑦ, ᐃᓚᐅᓪᓗᓂ ᐊᑕᐅᓯᖅ ᑲᑎᒪᔨ ᖃᑦᓯᒐᓚᐅᓪᓗ ᑲᑎᒪᒋᐊᖅᑐᖅᓯᒪᔪᑦ, ᐃᓚᐅᖃᑕᐅᓚᐅᖅᑐᑦ ᐊᔾᔨᓕᐅᕈᑎᒃᑯᑦ ᓴᖅᑭᔮᖅᑐᑎᑦ ᐊᖏᕐᕋᒥᓐᓃᑦᑐᑎᑦ.
ᑲᑎᒪᔩᑦ ᑲᔪᓯᑎᑦᓯᓚᐅᖅᑐᑦ ᖃᑦᓯᒐᓚᓐᓂᒃ ᐱᖁᔨᕗᖔᕈᑕᐅᓯᒪᔪᕐᓂᒃ, ᐱᖃᑕᐅᓪᓗᒍ ᐃᓄᐃᑦ ᓄᓇᖓᓐᓂ ᓄᓇᑖᒃᓂᕐᒧᑦ ᑎᒥᖁᑎᐅᔪᑦ ᑎᑎᖅᑕᐅᓯᒪᓂᐊᖅᑐᑦ ᓄᓇᓕᓐᓄᑦ ᐊᑖᓂ ᐋᓐᑎᐅᕆᔫ ᓄᓇᖅᑲᓄᑦ, ᒪᒃᑯᑦᑐᓄᑦ ᐃᓚᒌᑦᑐᓄᓪᓗ ᐱᔨᑦᓯᖅᑕᐅᓂᖏᓐᓄᑦ ᒪᓕᒐᕐᒥ, ᑕᐅᖅᓯᖅᑕᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ, ᑎᒍᒥᐊᖅᑎᐅᓯᒪᓚᐅᖅᑐᖅ ᑕᐃᒪᙵᓂᒃ ᔪᓚᐃ 1, 2019. ᐃᓄᐃᑦ ᑕᐃᕇᑦ ᑲᓇᑕᒦᒃᑯᑦ ᑐᑭᓯᖃᑦᑕᖏᓐᓇᕐᓂᐊᖅᑐᑦ ᑐᑭᓯᒋᐊᕈᑎᑦᓴᕐᓂᒃ ᖃᐅᔨᒪᔨᑕᐅᓂᕐᒥᓪᓗ, ᑭᓯᐊᓂ ᑕᒪᓐᓇ ᐊᓯᔾᔨᕐᓂᐅᔪᖅ ᐊᑐᕆᐊᖅᑐᖅ ᐊᑐᕈᒪᓯᒪᔭᐅᔪᓂᒃ ᐱᔾᔪᑎᓯᒪᔪᓂᓪᓗ ᒐᕙᒪᑐᖃᒃᑯᑦ ᒪᓕᒐᖓᓐᓂ. ᐱᑦᓯᐊᕐᓂᖅ ᐊᓪᓚᓂᒃ, ᐃᓄᓐᓂᒃ, ᐊᓪᓚᖓᔪᓂᓪᓗ ᓄᑕᖅᑲᓂᒃ, ᒪᒃᑯᑦᑐᓂᒃ ᐃᓚᒌᑦᑐᓂᓪᓗ, ᒫᓐᓇ ᐊᑐᓕᖅᑎᑕᐅᓯᒪᓕᖅᑐᖅ.
ᑲᑎᒪᔩᑦ ᐊᖏᕈᑎᖃᓚᐅᖅᑐᑦ ᐃᓚᐅᒍᑎᖃᓂᕐᒧᑦ ᓄᑖᕐᒥᒃ ᐃᓄᐃᑦ ᑐᑭᓯᓴᕐᓂᕐᒧᑦ ᐱᑦᓯᐊᕋᓗᐊᕐᒪᖔᑕ ᑲᑎᒪᔨᕋᓛᒃᓄᑦ ᕿᒥᕐᕈᒋᐊᕐᓂᐊᖅᑎᓪᓗᒍ ᓯᕗᓪᓕᖅᐹᖓᓐᓂ ᐱᓕᕆᐊᓂ ᖃᓄᐃᑉᐱᑖ?-ᒥ ᑲᓇᑕᓕᒫᕐᒥ ᐃᓄᐃᑦ ᐃᓗᓯᓕᕆᓂᕐᒧᑦ ᐊᐱᖅᓲᑎᖃᒃᑯᑦ. ᑐᑭᓯᓴᕐᓂᖅ ᐃᓄᐃᑦ ᓄᓇᖓᓐᓂ ᕿᒥᕐᕈᔭᐅᒋᐊᖅᐸᓚᐅᖅᑑᒐᓗᐊᑦ ᐱᑦᓯᐊᕋᓗᐊᕐᒪᖔᑕ ᑲᑎᒪᔨᕋᓛᕐᓄᑦ ᐃᓄᓐᓂᒃ ᐃᓚᐅᑎᑦᓯᓯᒪᙱᑦᑐᓂ, ᐃᓄᐃᓪᓗ ᓄᓇᖓᑕ ᓯᓚᑖᓃᑦᑐᓂ. ᐃᓄᐃᑦ ᑐᑭᓯᓴᕐᓂᕐᒧᑦ ᐱᑦᓯᐊᕋᓗᐊᕐᒪᖔᑕ ᑲᑎᒪᔨᕋᓛᑦ ᓯᕗᓪᓕᖅᐸᖑᔪᖅ ᑲᓇᑕᒥ. ᐃᓚᐅᖃᑕᐅᓂᖅ ᑎᒃᑯᐊᖅᑕᐅᕙᒃᑲᓗᐊᖅᑎᓪᓗᒍ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᓐᓄᑦ, ᑲᑎᒪᔨᕋᓛᑦ ᐃᒻᒥᓂᖅᓱᖏᓐᓇᕐᓂᐊᖅᑐᑦ ᑐᑭᑖᕈᓐᓇᕐᓗᑎᑦ ᑎᒥᐅᓂᒃᑯᑦ.
ᑐᑭᑖᓚᐅᖅᑐᑦ ᐅᖓᒡᕙᕆᐊᖅᑕᐅᖁᓪᓗᒍ ᓇᓂᓚᕗᑦ ᐱᒋᐊᖅᑎᑕᐅᓯᒪᔪᖅ ᐊᕐᕌᒍᕐᓄᑦ ᑕᓪᓕᒪᓄᑦ ᑎᑭᓪᓗᒍ 2026 ᑐᓂᑎᐅᖅᑲᕐᓗᒍᓗ ᐊᒥᐊᒃᑯᖓ $19.25 ᒥᓕᔭᓐ ᑮᓇᐅᔭᖃᖅᑎᑕᐅᓂᐅᓯᒪᔪᖅ ᒐᕙᒪᑐᖃᒃᑯᓐᓄᑦ ᒪᓕᓪᓗᒍ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑐᓂᑎᐅᖅᑲᐃᓂᕐᒧᑦ ᑮᓇᐅᔭᓕᕆᓂᕐᒧᑦ ᐋᖅᑭᑦᓯᒪᓂᖓ. ᓇᓂᓚᕗᑦ ᐱᖓᓱᓂᒃ ᐊᕐᕌᒍᕐᓂᒃ ᐱᔭᕇᕐᕕᑦᓴᖃᖅᑎᑕᐅᓚᐅᖅᑑᒐᓗᐊᑦ ᑭᓯᐊᓂᓕ ᐱᒍᓐᓇᖅᓯᓚᐅᙱᑦᑐᑦ ᐊᑕᖏᕐᓗᒋᑦ ᒪᒥᐊᓐᓂᖅ, ᐃᖅᑲᓇᐃᔭᖅᑎᑖᕐᓂᖅ ᐱᓕᒻᒪᑦᓴᐃᓂᕐᓗ ᐱᓕᕆᐊᑦᓴᓂᒃ ᐊᐅᓚᑦᓯᔨᑦᓴᓂᒃ ᓄᓇᓂ ᐊᕕᑦᑐᖅᓯᒪᔪᓂ ᐱᓕᕆᐊᕆᓗᒋᓪᓗ ᑐᕌᒐᕆᔭᖏᑦ ᐱᓕᕆᐊᑦᓴᐅᑉ ᐃᓗᐊᓂ ᐱᕕᑦᓴᖃᖅᑎᑕᐅᓂᕐᒧᑦ. ᖃᓂᒪᓐᓇᑐᒃᑰᕐᓂᕗᑦ ᑭᖑᒡᕙᕆᐊᖅᑎᑦᓯᓯᒪᔪᖅ ᐊᐅᓪᓚᕐᕕᑦᓴᕐᓂᒃ ᐃᓗᕕᖃᕐᕕᓐᓄᑦ ᐃᖅᑲᐅᒪᑦᓯᓂᕐᒧᓪᓗ ᐱᓕᕆᐊᖑᒋᐊᓕᓐᓂᒃ ᐊᕐᕌᒍᕆᓚᐅᖅᑕᑦᑎᓐᓂ. ᐱᖓᓲᔪᖅᑐᐃᑦ ᐅᑕᖅᑭᔪᖅ ᐊᐅᓪᓚᖅᓯᖅᑐᑎᑦ ᐊᑦᑕᓇᕈᓐᓃᖅᐸᑦ ᐊᒥᓱᙳᕆᐊᖅᓯᒪᓕᖅᑐᑎᓪᓗ ᕿᓂᖁᔨᔪᑦ ᐊᐅᓪᓚᕈᓐᓇᕐᓂᖅ ᒪᑐᐃᖅᐸᓪᓕᐊᒃᑲᓐᓂᖅᓯᒪᓕᖅᑎᓪᓗᒍ.
ᑲᑎᒪᔩᑦ ᑐᑭᒧᐊᑦᑎᑦᓯᓚᐅᕐᒥᔪᑦ ᐃᓄᐃᑦ ᑕᐱᕇᑦ ᑲᓇᑕᒦᒃᑯᓐᓂᒃ ᐃᓚᐅᖁᔨᓪᓗᑎᑦ ᒐᕙᒪᑐᖃᒃᑯᑦ ᐱᓕᕆᐊᖓᓐᓂ ᓄᓇᖃᖅᑳᖅᓯᒪᔪᐃᑦ ᐃᖅᑲᖅᑐᐃᕕᓕᕆᓂᕐᒧᑦ ᖃᓄᖅᑑᕈᑎᒥᒃ ᒐᕙᒪᑐᖃᒃᑯᓐᓂ ᐱᖃᓯᐅᓪᓗᒋᑦ ᐊᓪᓚᐃᑦ ᐊᓪᓚᖓᔪᐃᓪᓗ ᐱᓕᕆᖃᑎᐅᔪᑦ. ᑐᑭᑖᓚᐅᖅᑐᑦ ᑮᓇᐅᔭᐃᑦ ᑐᓂᑎᐅᖅᑲᖅᑕᐅᓗᑎᖅ $527.8 ᒥᓕᔭᓐ ᐃᓄᐃᑦ ᑐᓂᔭᐅᔾᔪᑎᒋᓯᒪᔭᖏᑦ ᐊᑖᓂ ᓄᓇᖃᖅᑳᖅᓯᒪᔪᐃᑦ ᓄᓇᓕᖏᑦᑕ ᓱᓇᒃᑯᑖᖃᕆᐊᕐᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ, ᐱᔭᕇᖅᑕᐅᓪᓗᑎᓪᓗ ᐃᓗᓕᖏᑦ ᐊᑐᐊᒐᕐᒧᑦ ᑲᓇᑕᓕᒫᕐᒥ ᐃᓄᐃᑦ ᑕᕆᐅᓕᕆᓂᕐᒧᑦ ᑲᑎᒪᔨᕋᓛᕐᓄᑦ.
ᐊᕐᕌᒍᑕᒫᖅᓯᐅᑎᒥ ᑲᑎᒪᓂᖃᖅᑎᓪᓗᒋᑦ ᐱᓇᓱᐊᕈᓯᖓᓂ, ᐃᓚᐅᖃᑕᐅᑎᓪᓗᒋᑦ ᑲᑎᒪᔨᖏᑦ ᐃᓄᐃᑦ ᑕᐱᕇᑦ ᑲᓇᑕᒥ ᐃᓚᓪᓗᑎᑦ ᒪᕐᕉᓐᓂᒃ ᑲᑎᒪᔩᓐᓂᒃ ᐊᕕᑦᑐᖅᓯᒪᔪᓃᙶᖅᑐᓂ ᐃᓄᐃᑦ ᓄᓇᖓᓐᓂ, ᐃᓚᐅᖃᑕᐅᔪᑦ ᑐᓴᖅᑎᑕᐅᓚᐅᖅᑐᑦ ᓄᑕᐅᓯᓕᕆᐊᖅᓯᒪᔪᕐᓂᒃ ᓱᓇᒐᓚᓐᓂᒃ, ᐱᖃᓯᐅᓪᓗᓂ ᒪᓕᒐᖅ ᐊᖏᖅᑕᐅᓚᐅᖅᑐᖅ ᑭᖑᓂᑦᑎᓐ ᒐᕙᒪᒃᑯᑦ ᑲᑎᒪᓂᖃᓚᐅᖅᑎᓪᓗᒋᑦ, ᓄᓇᔾᔪᐊᕐᓇᖅ-19, ᐃᓄᐃᑦ ᓄᓇᖓᑦ ᓂᕿᖃᑦᓯᐊᕐᓂᕐᒧᑦ ᖃᓄᖅᑑᕈᑎ, ᐃᓄᐃᑦ ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ, ᐊᓕᖅᑯᓯᖃᑎᒌᙱᑦᑐᓄᑦ-ᑐᕌᖓᓂᖃᖅᑐᓂᒃ ᓱᓇᒃᑯᑖᖃᕆᐊᕐᓂᕐᒧᑦ ᑮᓇᐅᔭᖃᖅᑎᑕᐅᓂᖅ ᐊᒻᒪᓗ ᐃᓄᐃᑦ ᓄᑕᖅᑲᑦ ᓯᕗᓖᑦ ᐱᒋᐊᖅᑎᑕᐅᓯᒪᔪᖅ.
ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ, ᓴᐅᒥᐊᓂᒃ: ᕗᕋᐃᔭᓐ ᐹᑐᓪ (Brian Pottle), ᐊᖏᔪᖅᑳᖅ ᑲᓇᑕᓕᒫᕐᒥ ᒪᒃᑯᑦᑐᓄᑦ ᑲᑎᒪᔨᓄᑦ; ᐅᓖᐱᑲ ᑲᓪᓗᒃ (Rebecca Kadloo), ᐊᖏᔪᖅᑳᖅ ᐸᐅᒃᑑᑏᑦ ᐊᕐᓇᐃᑦ ᑲᓇᑕᒥ ᑲᑎᒪᔨᓄᑦ; ᒫᓂᑲ ᐃᐅᓪ-ᑲᓇᔪᖅ (Monica Ell-Kanayuk), ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᑕᐅᖃᑎᒌᑦ ᑲᑎᒪᔨᓄᑦ ᑲᓇᑕᒥ; ᔪᕼᐋᓇᔅ ᓛᒻᐱ (Johannes Lampe), ᐊᖏᔪᖅᑳᖅ ᓄᓇᑦᓯᐊᕗᑦ ᒐᕙᒪᒃᑯᖏᓐᓄᑦ; ᐊᓗᑭ ᑰᑦᑎᖅ (Aluki Kotierk), ᐊᖏᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖁᑎᐊᓄᑦ; ᐲᑕ ᐋᑕᒥ (Pita Aatami), ᐊᖏᔪᖅᑳᖅ ᒪᑭᕕᒃ ᑯᐊᐸᕇᓴᒃᑯᓐᓄᑦ, ᓇᑖᓐ ᐅᕙᑦ (Natan Obed), ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ. [ᐱᑕᖃᙱᑦᑐᖅ: ᑐᐃᓐ ᓯᒥᑦ (Duane Smith), ᐃᑦᓯᕙᐅᑕᖅ ᑐᑭᒧᐊᑦᑎᑦᓯᔨᒻᒪᕆᐅᓪᓗᓂᓪᓗ ᐃᓄᕕᐊᓗᐃᑦ ᓄᓇᖁᑎᖓᓐᓂ ᑯᐊᐸᕇᓴᓐᑯᓐᓂ]
2021 ITK AGM participants, from left (back row): Aluki Kotierk, President of Nunavut Tunngavik Incorporated; Rebecca Kudloo, President of Pauktuutit Inuit Women of Canada; Johannes Lampe, President of Nunatsiavut; Natan Obed, President of Inuit Tapiriit Kanatami; Pita Aatami, President of Makivik Corporation; Maggie Emudluk, Vice-President Economic Development of Makivik Corporation; Kono Tattuinee, President of the Kivalliq Inuit Association. (Front row): Brian Pottle, President of the National Inuit Youth Council; Tyler Edmunds, First Minister of Nunatsiavut; Lisa Koperqualuk, Vice-President International of Inuit Circumpolar Council Canada; George Berthe, Treasurer of Makivik Corporation. (Missing: Duane Smith, Chair and CEO of Inuvialuit Regional Corporation; Gerald Inglangasuk, Vice-Chair of Inuvialuit Regional Corporation; Lucy Kuptana, Director of Operations of Inuvialuit Regional Corporation; Stanley Anablak, President of Kivalliq Inuit Association; Gerald Asivak, Nunatsiavut Minister of Health and Social Services.)