Skip to main content
Uncategorized @iuq

Inuit Tapiriikkut Kanatami Niruaqsimalirningat Atiliuriniarnirminnik Gavamatuqakkut United Nation-kut Nalunaiqsisimalirutinginik Atuliqtitauqullugit Maligaqutiksanik Isumaliurutiusimaninganut Aaqqigiaqtauqullugit

April 6, 2021 – Ottawa, Ontario

Inuit Tapiriikkut Kanatami Katimajingit qaritaujatigut pinasuarusiulauqtumi kingullirmi katimaniqalauqput ammalu kajusititsillutik atiliuriniarnirmik Maligaqutiksaq C-15 mik Maligaqutiujuq upigusuttiarnirmik United Nation-kut Nalunaiqsisimajjutinganik Nunaqaqqaaqsimajuit Pijunnautiqarutinginnik, ilaqaqtillugit isumaliurutiusimallutik aaqqigiarutiksanik sanngiktigiarutiuniarlutik maligannguqtitausimaniksanganik ilauqatautitsiniqtigut ilaakkuungallutik nautsiqtuijiujunik ammalu atuliqtitsinirmik pilirijjutiksanik ilautillugit piliriangujumallutik parnautigijausimajunut pisimaliriarnirmi turaarviunasuaqtunut Nalunaiqsisimajjutinit.

Tukitaarutitigut, Inuit suli tiliurisimavut pigiaqtitausimaliqujillutik Nunaqaqqaaqsimajut Kikkutuinnait Pijungnautilirinirmut Katimajirjuanginik, pigiarutiqarlutik gavamatuqakkut parnautingit nalunaijaisimaliqullugit piliriaksarijaujunik, kiinaujaqutiksanik, pilirijjusiuniaqtunut ammalu piliriniqarviuniaqtunut pigiaqtitsisimalirajarnirmut allavvimmik, ammalu maligannguqtitausimaninganut pilirijjutiulirniaqtunik pigiaqtitsisimalirajarnirmi qaujimajiullutik katimajiralaanik tusaqtitsijiunajaqtunik atjigiinngiunniujunut tunngavviqaqsutik tilisisimalirajarnirmik Nunaqaqqaaqsimajut Kikkutuinnait Pijungnautilirinirmut Katimajirjuanginnut.

Ilagijaujut katimajinut naammaksaisimalilaurmijut makuninga piliriniujuksanik sivummugiaqtitausimaliqullugit piliriangujut Canada-up qutsingningani:

  • Kiinaujaqutiksanik sanirvaiqattarnirmi pilirijjusiuvaktut Inuit Silattuqsaqvingmi Ilinniaqtunut Parnautinut kiinaujalirinnaup ukiungini 2021-22-mit 2025-06-mut, maliktitaulutik Inuit Tapiriikkut Kanatami Aviktuqsimajunut Kiinaujaqutiksanik Sanirvaisimaliqattarnirmut Aaqqiktausimajunik.
  • Pilirianguvallianingit Inuit ilagijauqatautitauninginnut pilirianut ammalu aaqqiksuijiuqatauniq gavamatuqakkut atjigiinnginniujunut tunngaviqaqtitsugit Nunaqaqqaarsimajut aanniaqarnanngittulirinirmut maligannguqtitauningita, ammalu naammagijausimaningit kiinaujaqutiqaqtitsinirmut pilirijjusiuvanniaqtunik taakkuninga piliriangujunik.
  • Inuit Nunangani Niqigijaksanir Pisimaliqpannirmut Parnautiit, maannaujumi kingullirmik aaqqiksugauliqsimaningit, tautturiniaqtangita aaqqiksugauliqsimaningit ammalu inuktituuliqtitauniarningit saqqitaujuksauniarlutik.
  • Pigiaqtitausimaningit Inugiaktunirmiunut Piliriaqaqtigijaukalauqtut piliriaksaqaqtitausimallutik aaqqiksuisimalirnirmik turaarviqaqsutik qaujisaiqattarnilirinirmut ammalu qanuilingalirninginnik pijjutiqaqtillugit inunnut nunaliqaqtunut silataani Inuit Nunangatta, atuni sitamaullutik Inuit aviktuqsimaningit tilisisimalirniarningita marruunnik ilagijaulirniaqtunnik ammalu atausirmik ilagijauqataujumik Inuit Tapiriikkunnit Kanatami.

Katimajiit tunngasuktitsilauqput Aluki Kotierkmik niruagaukkannirninganut Angijuqqaap ininganut Nunavut Tunngavikkut Timinganni, ammalu Pita Aatamimik niruaqtausimalilaurninganut Angijuqqaap ininganut Makivik Kuapuriisangannut February-utillugu. Aatami taijausimalilaurmijuq Inuit Tapiriikkunnut Kanatami Ttitiraqti Kiinaujalirijiulirninganut. Katimajiit tavvauvutiilauqput Crystal Martin Lapenskie-mut, Angijuqqaanguningata Canadami Makkuktut Inuit Katimajinginni, ukiumi inigijanga isulisimaliqtillugu.