ᐊᐃᐱᕆ 6, 2021 – ᐋᑐᕙ, ᐋᓐᑎᐊᕆᐅ
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᑦ ᖃᕆᑕᐅᔭᑎᒍᑦ ᐱᓇᓱᐊᕈᓯᐅᓚᐅᖅᑐᒥ ᑭᖑᓪᓕᕐᒥ ᑲᑎᒪᓂᖃᓚᐅᖅᐳᑦ ᐊᒻᒪᓗ ᑲᔪᓯᑎᑦᓯᓪᓗᑎᒃ ᐊᑎᓕᐅᕆᓂᐊᕐᓂᕐᒥᒃ ᒪᓕᒐᖁᑎᒃᓴᖅ C-15 ᒥᒃ ᒪᓕᒐᖁᑎᐅᔪᖅ ᐅᐱᒍᓱᑦᑎᐊᕐᓂᕐᒥᒃ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖓᓂᒃ ᓄᓇᖃᖅᑳᖅᓯᒪᔪᐃᑦ ᐱᔪᓐᓇᐅᑎᖃᕈᑎᖏᓐᓂᒃ, ᐃᓚᖃᖅᑎᓪᓗᒋᑦ ᐃᓱᒪᓕᐅᕈᑎᐅᓯᒪᓪᓗᑎᒃ ᐋᖅᑭᒋᐊᕈᑎᒃᓴᓂᒃ ᓴᖖᒋᒃᑎᒋᐊᕈᑎᐅᓂᐊᕐᓗᑎᒃ ᒪᓕᒐᖖᒍᖅᑎᑕᐅᓯᒪᓂᒃᓴᖓᓂᒃ ᐃᓚᐅᖃᑕᐅᑎᑦᓯᓂᖅᑎᒍᑦ ᐃᓛᒃᑰᖓᓪᓗᑎᒃ ᓇᐅᑦᓯᖅᑐᐃᔨᐅᔪᓂᒃ ᐊᒻᒪᓗ ᐊᑐᓕᖅᑎᑦᓯᓂᕐᒥᒃ ᐱᓕᕆᔾᔪᑎᒃᓴᓂᒃ ᐃᓚᐅᑎᓪᓗᒋᑦ ᐱᓕᕆᐊᖑᔪᒪᓪᓗᑎᒃ ᐸᕐᓇᐅᑎᒋᔭᐅᓯᒪᔪᓄᑦ ᐱᓯᒪᓕᕆᐊᕐᓂᕐᒥ ᑐᕌᕐᕕᐅᓇᓱᐊᖅᑐᓄᑦ ᓇᓗᓇᐃᖅᓯᓯᒪᔾᔪᑎᓂᑦ.
ᑐᑭᑖᕈᑎᑎᒍᑦ, ᐃᓄᐃᑦ ᓱᓕ ᑎᓕᐅᕆᓯᒪᕗᑦ ᐱᒋᐊᖅᑎᑕᐅᓯᒪᓕᖁᔨᓪᓗᑎᒃ ᓄᓇᖃᖅᑳᖅᓯᒪᔪᑦ ᑭᒃᑯᑐᐃᓐᓇᐃᑦ ᐱᔪᖕᓇᐅᑎᓕᕆᓂᕐᒧᑦ ᑲᑎᒪᔨᕐᔪᐊᖏᓂᒃ, ᐱᒋᐊᕈᑎᖃᕐᓗᑎᒃ ᒐᕙᒪᑐᖃᒃᑯᑦ ᐸᕐᓇᐅᑎᖏᑦ ᓇᓗᓇᐃᔭᐃᓯᒪᓕᖁᓪᓗᒋᑦ ᐱᓕᕆᐊᒃᓴᕆᔭᐅᔪᓂᒃ, ᑮᓇᐅᔭᖁᑎᒃᓴᓂᒃ, ᐱᓕᕆᔾᔪᓯᐅᓂᐊᖅᑐᓄᑦ ᐊᒻᒪᓗ ᐱᓕᕆᓂᖃᕐᕕᐅᓂᐊᖅᑐᓄᑦ ᐱᒋᐊᖅᑎᑦᓯᓯᒪᓕᕋᔭᕐᓂᕐᒧᑦ ᐊᓪᓚᕝᕕᒻᒥᒃ, ᐊᒻᒪᓗ ᒪᓕᒐᖖᒍᖅᑎᑕᐅᓯᒪᓂᖓᓄᑦ ᐱᓕᕆᔾᔪᑎᐅᓕᕐᓂᐊᖅᑐᓂᒃ ᐱᒋᐊᖅᑎᑦᓯᓯᒪᓕᕋᔭᕐᓂᕐᒥ ᖃᐅᔨᒪᔨᐅᓪᓗᑎᒃ ᑲᑎᒪᔨᕋᓛᓂᒃ ᑐᓴᖅᑎᑦᓯᔨᐅᓇᔭᖅᑐᓂᒃ ᐊᑦᔨᒌᖖᒋᐅᓐᓂᐅᔪᓄᑦ ᑐᖖᒐᕝᕕᖃᖅᓱᑎᒃ ᑎᓕᓯᓯᒪᓕᕋᔭᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᑭᒃᑯᑐᐃᓐᓇᐃᑦ ᐱᔪᖕᓇᐅᑎᓕᕆᓂᕐᒧᑦ ᑲᑎᒪᔨᕐᔪᐊᖏᓐᓄᑦ.
ᐃᓚᒋᔭᐅᔪᑦ ᑲᑎᒪᔨᓄᑦ ᓈᒻᒪᒃᓴᐃᓯᒪᓕᓚᐅᕐᒥᔪᑦ ᒪᑯᓂᖓ ᐱᓕᕆᓂᐅᔪᒃᓴᓂᒃ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐱᓕᕆᐊᖑᔪᑦ ᑲᓇᑕᐅᑉ ᖁᑦᓯᖕᓂᖓᓂ:
- ᑮᓇᐅᔭᖁᑎᒃᓴᓂᒃ ᓴᓂᕐᕙᐃᖃᑦᑕᕐᓂᕐᒥ ᐱᓕᕆᔾᔪᓯᐅᕙᒃᑐᑦ ᐃᓄᐃᑦ ᓯᓚᑦᑐᖅᓴᖅᕕᖕᒥ ᐃᓕᓐᓂᐊᖅᑐᓄᑦ ᐸᕐᓇᐅᑎᓄᑦ ᑮᓇᐅᔭᓕᕆᓐᓇᐅᑉ ᐅᑭᐅᖏᓂ 2021-22-ᒥᑦ 2025-06-ᒧᑦ, ᒪᓕᒃᑎᑕᐅᓗᑎᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᕕᒃᑐᖅᓯᒪᔪᓄᑦ ᑮᓇᐅᔭᖁᑎᒃᓴᓂᒃ ᓴᓂᕐᕙᐃᓯᒪᓕᖃᑦᑕᕐᓂᕐᒧᑦ ᐋᖅᑭᒃᑕᐅᓯᒪᔪᓂᒃ.
- ᐱᓕᕆᐊᖑᕙᓪᓕᐊᓂᖏᑦ ᐃᓄᐃᑦ ᐃᓚᒋᔭᐅᖃᑕᐅᑎᑕᐅᓂᖏᓐᓄᑦ ᐱᓕᕆᐊᓄᑦ ᐊᒻᒪᓗ ᐋᖅᑭᒃᓱᐃᔨᐅᖃᑕᐅᓂᖅ ᒐᕙᒪᑐᖃᒃᑯᑦ ᐊᑦᔨᒌᖖᒋᓐᓂᐅᔪᓄᑦ ᑐᖖᒐᕕᖃᖅᑎᑦᓱᒋᑦ ᓄᓇᖃᖅᑳᕐᓯᒪᔪᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᒪᓕᒐᖖᒍᖅᑎᑕᐅᓂᖏᑕ, ᐊᒻᒪᓗ ᓈᒻᒪᒋᔭᐅᓯᒪᓂᖏᑦ ᑮᓇᐅᔭᖁᑎᖃᖅᑎᑦᓯᓂᕐᒧᑦ ᐱᓕᕆᔾᔪᓯᐅᕙᓐᓂᐊᖅᑐᓂᒃ ᑖᒃᑯᓂᖓ ᐱᓕᕆᐊᖑᔪᓂᒃ.
- ᐃᓄᐃᑦ ᓄᓇᖓᓂ ᓂᕿᒋᔭᒃᓴᓂᕐ ᐱᓯᒪᓕᖅᐸᓐᓂᕐᒧᑦ ᐸᕐᓇᐅᑏᑦ, ᒫᓐᓇᐅᔪᒥ ᑭᖑᓪᓕᕐᒥᒃ ᐋᖅᑭᒃᓱᒐᐅᓕᖅᓯᒪᓂᖏᑦ, ᑕᐅᑦᑐᕆᓂᐊᖅᑕᖏᑕ ᐋᖅᑭᒃᓱᒐᐅᓕᖅᓯᒪᓂᖏᑦ ᐊᒻᒪᓗ ᐃᓄᒃᑎᑑᓕᖅᑎᑕᐅᓂᐊᕐᓂᖏᑦ ᓴᖅᑭᑕᐅᔪᒃᓴᐅᓂᐊᕐᓗᑎᒃ.
- ᐱᒋᐊᖅᑎᑕᐅᓯᒪᓂᖏᑦ ᐃᓄᒋᐊᒃᑐᓂᕐᒥᐅᓄᑦ ᐱᓕᕆᐊᖃᖅᑎᒋᔭᐅᑲᓚᐅᖅᑐᑦ ᐱᓕᕆᐊᒃᓴᖃᖅᑎᑕᐅᓯᒪᓪᓗᑎᒃ ᐋᖅᑭᒃᓱᐃᓯᒪᓕᕐᓂᕐᒥᒃ ᑐᕌᕐᕕᖃᖅᓱᑎᒃ ᖃᐅᔨᓴᐃᖃᑦᑕᕐᓂᓕᕆᓂᕐᒧᑦ ᐊᒻᒪᓗ ᖃᓄᐃᓕᖓᓕᕐᓂᖏᓐᓂᒃ ᐱᔾᔪᑎᖃᖅᑎᓪᓗᒋᑦ ᐃᓄᓐᓄᑦ ᓄᓇᓕᖃᖅᑐᓄᑦ ᓯᓚᑖᓂ ᐃᓄᐃᑦ ᓄᓇᖓᑦᑕ, ᐊᑐᓂ ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᖏᑦ ᑎᓕᓯᓯᒪᓕᕐᓂᐊᕐᓂᖏᑕ ᒪᕐᕉᓐᓂᒃ ᐃᓚᒋᔭᐅᓕᕐᓂᐊᖅᑐᓐᓂᒃ ᐊᒻᒪᓗ ᐊᑕᐅᓯᕐᒥᒃ ᐃᓚᒋᔭᐅᖃᑕᐅᔪᒥᒃ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ.
ᑲᑎᒪᔩᑦ ᑐᖖᒐᓱᒃᑎᑦᓯᓚᐅᖅᐳᑦ ᐊᓗᑭ ᑰᑦᑎᕐᒥᒃ ᓂᕈᐊᒐᐅᒃᑲᓐᓂᕐᓂᖓᓄᑦ ᐊᖏᔪᖅᑳᑉ ᐃᓂᖓᓄᑦ ᓄᓇᕗᑦ ᑐᖖᒐᕕᒃᑯᑦ ᑎᒥᖓᓐᓂ, ᐊᒻᒪᓗ ᐲᑕ ᐋᑕᒥᒥᒃ ᓂᕈᐊᖅᑕᐅᓯᒪᓕᓚᐅᕐᓂᖓᓄᑦ ᐊᖏᔪᖅᑳᑉ ᐃᓂᖓᓄᑦ ᒪᑭᕕᒃ ᑯᐊᐳᕇᓴᖓᓐᓄᑦ ᕕᑉᕈᐊᕆᐅᑎᓪᓗᒍ. ᐋᑕᒥ ᑕᐃᔭᐅᓯᒪᓕᓚᐅᕐᒥᔪᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑎᑎᕋᖅᑎ ᑮᓇᐅᔭᓕᕆᔨᐅᓕᕐᓂᖓᓄᑦ. ᑲᑎᒪᔩᑦ ᑕᕝᕙᐅᕗᑏᓚᐅᖅᐳᑦ ᑯᕆᔅᑐᓪ ᒫᕐᑎᓐ-ᓚᐱᓐᔅᑭᒧᑦ, ᐊᖏᔪᖅᑳᖑᓂᖓᑕ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓂ, ᐅᑭᐅᒥ ᐃᓂᒋᔭᖓ ᐃᓱᓕᓯᒪᓕᖅᑎᓪᓗᒍ.