August 16, 2021 – Ottawa, Ontario
Akituluanngittunik, qularnaqtuunatiklu sukkalitsiaqtunik qaritaujakkuurutitaqaliriaqarninga Inuit Nunanganni pitaqaliriaqallaringmat Inuit ilagijauqataujunnaliqullugit kiinaujaliurutigijauvaktunut inuuqatigiigijaummijunit ammalu pivalliatitsiniuvaktunut kiinaujaliurutiuvaksutik. Kisianilu, atuinnautitauningita sukkalitsiaqtunik qaritaujakkuurutit Inuit nunalinginni kinguvaqsimalluaqtitaummata isumagilugit asingini Canadami atuinnautitausimaninginnut ilagiqasiutillungit asingit Ukiuqtaqtumi aulatsiniqarviuqmijuni.
Inuit Tapiriit Kanatami nutauniqpaangullutik Qaujisainirmut Tusaumaliqtitsigiarutingit, ‘Uajamuuqtutiguuqtuni Avinniqsimajjutiujut: Qaritaujatigut Attataqsimaliqattarunnarniit Inuit Nunanganni‘, turaangatitausimavut uqaalautitigut tusaumaqattautilirijjutinut ammalu naalautikkuurutitigut attataqsimaliqattarutinut Inuit Nunanganni. Pitaqaqtitsisimavut pijjutiusimajunik qaritaujatiguurutiksanik atuinnautitaujulirinirnut Inuit Nunanganni, ammalu pilirivviksanik pitaqaliriaqarninganut ilakuuniqarviuliqsimajut uajamuuqtutigut avinniqsimajjutiujunut Inuit Nunangannirmiut ammalu Canadamiunguqatigijangita. Saqqitausimalituinnariaqaqtut silarjuarmiulimaanit pinasuarusiuvaktutigut nalunaijaqtausimavut ammalu qanuq ajjigiinnginniqarniujunik Canadami ullumiujuq attataqsimalirunnaqtitausimajunut parnautini.
Angijummaringmik tunngavviqaqattaliqsimaniit qaritaujakkuurutitigut piliriaqaqpannirni ilinnianilirinirmi ammalu iqqanaijaanut nuvagjuarnamik atuliqsimatilluta silarjualimaami Inuit pilirijjutiqarutiksanginik pitaqarviusimaningit amigaluaqattarmata angirraqsimajariaqaqtittiniujut atuliqtitausimavaktillugit ammalu ingirrajunnarningit kigliqaliqtitausimatillugit. Naalautikkuurutitigut attataqsimalirunnarniujut ikajuqtuisimavut ilinniaqsimatsialiriaqarnirnik, aulajjaigiaqtittisimallutik kiinaujaliurasugutiuvaktunik, ammalu piusigiaqtitsinajarłutik pijitsirarutiksaujut atuinnautitauvanninginnut suurlu aanniaqsiurtilirinirni apuktuqsimaniujumi pijitsirarutiksaujut ajurnaqtuuvaktillugit. Inuit Nunanganirmiut pitaqarviunngimmata piliriaqarutiksanik naalautikkuurutiksat pitaqaliqtitauqullugit Inuqutittinnut.
“Pitaqaliqtitsiniq qularnanngittunik, akituluaratiklu qaritaujakkuurutiksanik Inuit Nunanganirmiunut ullumiuliqtumi nunarjuarijattinnut piruqtittigiarutiuluni piliriaksaulirunnarmat. qaritaujakkuurutiit taimaujariaqallariktuullutik pijitsirarutiksaummata, ammalu pitaqaliqtitaujariaqaqsutik Inuit sivummugiaqsimalirutiksanginik naukkulimaakasak inuusirminniittunut, kisianilu piluaqtumik ilinniarnilirinirni, qaujisainiuvaktuni, taimautitaujariaqallariksutik pijitsirarutiksani, ammalu kiinaujaliurasugutiuvaktuni uqarniarlugit amisuunngittuugaluat sunauninginnut, uqaqsuni Inuit Tapiriikkut Kanatami Angijuqqaangat Natan Obed. “Atuinnauvviuniq qularnanngittunik qaritaujakkuurutinik iluikkaruqtitsigiarutiunajarmata nunannguatigut ungasikkuuningita Inuit Nunanganirmiut ammalu qallunaat nunanganirmiut kanatami, ammalu Inuit nunatuqattinnirmiut ilagijauqataulirlutik Canadamiunguqatiminnut.”