ᐋᑐᕙ, ᐋᓐᑎᐊᕆᐅ – ᒫᔾᔨ 24, 2022
ᐅᓪᓗᒥ, ᓯᓚᕐᔪᐊᓕᒫᒥ ᐳᕙᒡᓗᓕᖃᑦᑕᕐᓂᕐᒧᑦ ᐅᓪᓗᕆᔭᖓᓂ 22, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᖏᔪᖅᑳᖓᑦ ᓇᐃᑖᓐ ᐆᐱᑦ ᐊᒻᒪᓗ ᑲᓇᑕᒥ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᖃᐅᔨᓴᐃᓂᕐᓄᑦ ᐃᖅᑲᓴᐃᔭᕐᕕᐅᔪᐃᑦ (CIHR) ᐊᖏᔪᖅᑳᖓᑦ ᓘᑦᑖᖅ ᒪᐃᑯᓪ ᔩ. ᓯᑐᕌᖕ ᑭᒃᑯᓕᒫᓄᑦ ᑐᓴᖅᑎᑦᑎᓯᒪᓕᓚᐅᖅᑐᒃ ᓄᑕᐅᓕᖅᑎᑦᑎᓂᕐᒥᓐᓂᒃ ᐱᓕᕆᐊᒃᓴᕆᔭᒥᓐᓄᑦ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᓂᖏᑦ ᐊᒻᒪᓗ ᖃᓄᐃᖖᒋᑦᓯᐊᖅᑎᑕᐅᓂᖏᓐᓄᑦ, ᐃᓚᖃᖅᑎᓪᓗᒋᑦ ᐳᕙᒡᓗᓕᖃᑦᑕᕐᓂᓕᕆᓂᕐᒥ ᖃᐅᔨᓴᐃᓂᖅᑕᖃᕆᐊᖃᕐᓂᖓᓄᑦ ᐃᓄᐃᑦ ᓄᓇᖓᓐᓂ.
ᓄᕙᒡᔪᐊᕐᓇᖅ-19ᒥᒃ ᓯᓚᕐᔪᐊᓕᒫᒥᐅᑦ ᐋᓐᓂᐊᖃᓕᕈᓐᓇᕐᓂᖓᓂᒃ ᐊᑐᓕᖅᓯᒪᑎᓪᓗᑕ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᒻᒪᓗ ᑲᓇᑕᒥ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᖃᐅᔨᓴᐃᓂᕐᓄᑦ ᐃᖅᑲᓴᐃᔭᕐᕕᐅᔪᐃᑦ (CIHR) ᐱᓕᕆᐊᖃᖃᖃᑎᒌᓐᓂᕐᒥᓐᓂᒃ ᓴᖖᒋᒃᑎᒋᐊᖅᑎᑦᓯᓯᒪᓚᐅᕐᒪᑕ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᖃᐅᔨᓴᐃᓂᐅᔪᓂᒃ ᐊᒻᒪᓗ ᑐᖖᒐᕝᕕᖁᑎᓕᐅᕐᓂᕐᒧᑦ ᐃᑲᔪᕈᑎᒃᓴᓂᒃ ᐃᓄᐃᑦ ᖃᐅᔨᓴᐃᓂᕐᒥ ᓯᕗᓪᓕᖅᐸᐅᑎᑕᐅᖁᔭᖏᓐᓂᒃ, ᐃᓚᖃᖅᑎᓪᓗᒋᑦ ᐳᕙᒡᓗᓕᖃᑦᑕᕐᓂᐅᔪᑦ ᓄᖑᑎᑕᐅᓯᒪᓕᖁᓪᓗᒍ ᖃᐅᔨᓴᐃᓂᐅᔪᒥᒃ. ᑖᒃᑯᐊ ᒪᕐᕉᓪᓗᑎᒃ ᑲᑐᔾᔨᖃᑎᒌᖑᔪᑦ ᐋᖅᑭᒃᓱᐃᓯᒪᓕᖅᑐᑦ ᐃᓄᐃᑦ ᑕᐱᕇᑦ ᑲᓇᑕᒥ-ᑲᓇᑕᒥ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᖃᐅᔨᓴᐃᓂᕐᓄᑦ ᐃᖅᑲᓇᐃᔭᕐᕕᐅᑉ ᐱᓕᕆᐊᖑᔭᕆᐊᓕᖕᓄᑦ ᐸᕐᓇᐅᑎᓂᒃ (2021-2025) ᐱᓕᕆᐊᖃᕐᓂᐊᕐᓂᕐᒥᓐᓄᑦ, ᐅᑭᐅᑦ ᑕᓪᓕᒪᑦ (5) ᐊᑐᖅᐸᓪᓕᐊᓂᖏᓐᓂ, ᑕᒪᕐᒥᐅᓪᓗᑎᒃ ᐱᓯᒪᓕᕈᒪᔭᐅᔪᓄᑦ ᐊᒻᒪᓗ ᓯᕗᓪᓕᖅᐸᐅᑎᑕᐅᖁᔭᐅᔪᓄᑦ ᑲᑐᔾᔨᓂᖃᕐᓗᑎᒃ ᐃᑲᔪᖅᑐᐃᓂᕐᒥᓐᓂ ᐊᑐᓕᖅᑎᑕᐅᖁᓪᓗᒋᑦ ᑲᓇᑕᒥ ᐃᓄᐃᑦ ᐸᕐᓇᐅᑎᓕᐊᕆᓯᒪᔭᖏᑦ ᖃᐅᔨᓴᐃᓂᐅᕙᒃᑐᓄᑦ (NISR). ᓴᖖᒋᓂᖃᑦᓯᐊᖅᑑᓪᓗᓂ ᐱᓕᕆᐊᖃᒌᒍᓐᓇᕐᓃᑦ ᐱᒻᒪᕆᐅᓗᐊᖅᑑᓕᖅᓯᒪᕗᑦ ᒫᓐᓇᐅᔪᒥ ᑐᑭᓯᕙᓪᓕᐊᓂᑦᑎᓐᓂ ᓇᐅᒃᑰᕐᓗᑕ ᐱᓕᕆᓂᐅᕙᒋᐊᖃᖅᑐᓂᒃ ᓄᑖᖑᓪᓗᑎᒃ ᐋᓐᓂᐊᖃᓕᖅᑕᐃᓕᒪᔪᓕᕆᓂᐅᔪᓄᑦ ᐱᒋᐊᖅᑎᑕᐅᓯᒪᓪᓗᑎᒃ ᓄᕙᒡᔪᐊᕐᔪᖅ-19ᒥᑦ.
ᐃᑲᔪᖅᑐᕐᓯᒪᓪᓗᒍ ᐸᕙ’ᓗᓕᖃᑦᑕᕐᓂᐅᔪᑉ ᓄᖑᑎᑕᐅᓯᒪᓕᕐᓂᒃᓴᖓ ᐃᓄᐃᑦ ᓄᓇᓕᓕᒫᖏᓐᓂ, ᐊᖏᔪᖅᑳᖅ ᐆᐱᑦ ᐊᒻᒪᓗ ᐊᖏᔪᖅᑳᖅ ᓯᑐᕌᖕ ᓯᕗᓕᖅᑎᐅᖃᑎᒌᓚᐅᕐᑐᒃ ᐃᓱᒪᑕᐃᑦ ᑲᑎᒪᕐᔪᐊᕈᑎᖃᕐᓂᖓᓐᓄᑦ ᖃᐅᔨᓴᐃᓂᐅᕙᒃᑐᓄᑦ ᐃᑲᔪᖅᑐᒐᐅᓯᒪᓕᖁᓪᓗᒍ ᐳᕙᓪᓗᓕᖃᑦᑕᕐᓂᐅᑉ ᓄᖑᑎᑕᐅᓯᒪᓕᕐᕕᒃᓴᖓᓄᑦ ᐃᓄᐃᑦ ᓄᓇᓕᓕᒫᖏᓐᓂ ᕕᑉᕈᐊᕆ 2020-ᒥ. ᑖᓐᓇ ᑲᑎᒪᕐᔪᐊᕐᓂᐅᔪᖅ ᑲᑎᕝᕕᐅᓚᐅᕐᒪᑦ ᐃᓱᒪᒃᑲᕐᔪᐊᒻᒪᕆᖕᓂᑦ ᐃᑲᔪᖅᑐᒐᐅᓕᖁᓪᓗᒍ ᐃᓄᖕᓂᑦ ᐊᐅᓚᑦᓯᔨᖃᕐᓗᑎᒃ ᖃᐅᔨᓴᐃᓂᐅᕙᒃᑐᑦ ᐱᓕᕆᐊᖃᖃᑎᒌᒋᐊᖅᓯᒪᓪᓗᑎᒃ ᐳᕙᒡᓗᓕᖃᑦᑕᕐᓂᐅᑉ ᓄᖑᑎᑕᐅᓯᒪᓕᕐᕕᒃᓴᖓᓄᑦ ᐃᓄᐃᑦ ᓄᓇᖓᓐᓂ. ᐃᓛᓗ ᑕᒪᓐᓇ ᐋᓐᓂᐊᖃᓕᕈᓐᓇᕐᓂᐅᔪᖅ ᐊᑐᓕᖅᓯᒪᓂᖓᓂᑦ ᐱᓕᕆᐊᖑᔪᑦ ᑭᖑᕙᕆᐊᖅᓯᒪᓕᓚᐅᕐᒪᑕ ᓴᖅᑭᑕᐅᓯᒪᓕᕐᕕᒃᓴᖏᑕ ᕕᑉᕈᐊᕆ 2020-ᒥ ᑲᑎᒪᕐᔪᐊᕐᓂᐅᓚᐅᖅᑐᒥᑦ ᖃᓄᐃᓕᖓᓕᕐᓂᖓᓄᑦ, ᖃᐅᔨᓴᐃᓂᐅᔪᑦ ᐃᑲᔪᖅᓯᕈᑎᐅᓪᓗᑎᒃ ᐳᕙᒡᓗᓕᖃᑦᑕᕐᓂᐅᑉ ᓄᖑᑎᑕᐅᓯᒪᓕᖁᓪᓗᒍ ᐃᓄᐃᑦ ᓄᓇᓕᓕᒫᖏᓐᓂ ᓱᓕ ᓯᕗᓪᓕᖅᐸᐅᑎᑕᒃᓴᕆᔭᐅᕗᖅ ᑕᒪᒃᑭᓐᓂᑦ ITK-ᑯᓐᓂᑦ ᐊᒻᒪᓗ CIHR-ᑯᓐᓂᑦ.
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᓇᑕᓕᒫᒥ ᐱᔾᔪᑎᖃᖅᑎᒋᔭᐅᓪᓗᑎᒃ ᑲᑐᔾᔨᖃᑎᒌᒋᔭᐅᕗᑦ 65,000-ᓄᑦ ᐃᓄᖕᓄᑦ ᑲᓇᑕᒥ. ᑲᓇᑕᒥ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᖃᐅᔨᓴᐃᓂᕐᓄᑦ ᐃᖅᑲᓴᐃᔭᕐᕕᐅᔪᐃᑦ (CIHR), 13-ᖑᔪᓂᒃ ᖃᐅᔨᓴᐃᓂᕐᒥ ᐃᖅᑲᓇᐃᔭᕐᕕᖃᖅᑑᓪᓗᑎᒃ, ᑲᓇᑕᒥ ᒐᕙᒪᑐᖃᒃᑯᓐᓂᑦ ᑮᓇᐅᔭᖁᑎᒃᓴᖃᖅᑎᑦᑎᔨᐅᕙᒃᒃᓱᑎᒃ ᓴᓇᕝᕕᐅᕗᑦ ᐋᓐᓂᐊᖃᓕᖅᑕᐃᓕᒪᓂᕐᒥ ᖃᐅᔨᓴᐃᔾᔪᑎᒃᓴᓂᒃ.
ᑲᑐᔾᔨᓂᖃᕐᓗᑕ, ᐱᓕᕆᐊᒃᓴᖃᕋᑦᑕ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐋᓐᓂᐊᖃᓕᖅᑕᐃᓕᒪᓂᕐᒥ ᖃᓄᐃᓕᖓᓐᓂᐅᓕᕋᔭᖅᑐᓄᑦ ᐊᒻᒪᓗ ᐱᕈᖅᑎᑦᑎᒋᐊᖅᓯᒪᓕᕋᔭᕐᓂᕐᒥᒃ ᖃᓄᐃᖖᒋᑦᓯᐊᖅᑑᓗᑎᒃ ᓯᕗᓂᕐᒥ ᐃᓄᐃᑦ ᓄᓇᓕᒋᔭᖏᑦ ᓯᕗᓂᒃᓴᖃᓕᕈᒫᖁᓪᓗᒋᑦ.