Inuit Tapiriikkut Kanatami Kajusititsiinnaqput Sivummugiaqtitauqullugit Iluikkaujukkut Atuliqtitausimaliqullugit Asiujijausimajut Inuaqtausimajullu Nunaqaqqaarsimajuit Arnait Niviaqsiallu pijjutigillugit Tiliurijjutiusimalilauqtut Ikajuqsigausimaliqullugit
June 3, 2020 – Ottawa, Ontario – Nalliunisiurutiqarningini saqqitausimalilauqtunut kingulliqpaaqsiutinik unikkaaliangusimalilauqtunut ammalu 231-ngujunit Tiliurutigijausimaliqlauqtanginut Ikajuqsigausimaliqullugit Canada-mi Killisiniaqtikkut Tukisigiarutiqaqtiujut Asiujijausimajunut ammalu Inuaqtausimajunut Nunaqaqqaarsimajuit Arnait ammalu Niviaqsiat pijjutigillugit (MMIWG), Inuit Tapiriikkut Kanatami (ITK) suli piliriaksaqarmata iluikkaujukkut atuliqtitausimaliqullugit piliriangusimaliqtut, ammalu aaqqiksuiqatigiiksimalirlutik Canada-mi piliriangujunut parnautinik piliriqatigisimalugit Inuit sivuliqtigijangit, Canada-mi Nunaqaqqaarsimajuit Katujjiqatigiingit, Canada-mi Angijuqqaarjuaq, ammalu Canada-mi Government-gijaujut.
Amisuplaullutik 231-ngujunit Tiliurutigijausimalilauqtut Iikajuqsigausimaliqullugit turaangajut kikkutuinnait ammalu nunaqaqqaarsimajut pijunnautinginnut ammalu government-ngujuni piliriaksarijaujut, ilaqaqtillugit tiliurisimajjutinik government-gijaujut atuliqtittikautigiqullugit pijunnautilirinirmi sanarrutiksauniaqtunik suurlu United Nation-kut Nalunaiqsisimajjutinginik Pijunnautiqarningita Nunaqaqqaarsimajuit. Inuit Tapiriikkut Kanatami (ITK) suli sapujjigiarutiqaqput Tiliurisimajjutinik Ikajuqsigausimaliqujinirmut 1.7-mik atuliqtitausimaliqullugit, pijjutiqaqtunik aaqqiisimalirniksamut Canada-mi Nunaqaqqaarsimajuit ammalu Kikkutuinnait Pijunnautiqarningita Naammagijaunngijjutiujunut Kiggaqtuqtigijaujumik ammalu Canada-mi Nunaqaqqaarsimajut Kikkutuinnait Pijunnautinginnut Naalangniqaqtiujunik, ammalu tiliurisimajjutinik tamakkua piliriniuliqtut ilijausimaliqullugit maligarjuaqutinut atuliqtitausimajjutiuniarlutik United Nation-kut Nalunaiqsisimajjutinginik Canada-mi.
Inuit Tapiriikkut Kanatami (ITK) piliriaksaqaliqsimavut atuliqtittigiaminnik tamainik Tiliurisimajjutiujunik Ikajuqsigausimaliqujinirmut, piqasiutillugit 46-ngullutik Inunnut Turaangallutik tiliurisimajjutinik, tukitaarutiliangusimajutigut Inuit Tapiriikkunnut Kanatami Katimajinginit, ammalu Inuit-Government-tuqakkut piliriaqaqatigiinnirmut Katimajiralaangitigut (ICPC), Inuit sivuliqtigijangit, Canada-mi Angijuqqaarjuaq ammalu government-tuqakkunnut ministarijaujut tamarmiullutik turaarviksaqalirunnaqullugit atuliqtittisimaliriaminnik amiqqarutigillugu pilirinirijaujumajunut. March 2020-mi , ICPC-kunnut ilagijaujuit katinniqalauqput Ottawa-mi katingmaqatigiinniaqsutik iksivautaqaqsutik Inuit Tapiriikkunnut Kanatami Angijuqqaamik ammalu Canada-mi Angijuqqaarjuamik, ammalu angiqsimaqatigiililauqsutik ilijausimaqatauniarningita atuliqtitausimaliqujijjutit Tiliurisimajjutinik Ikajuqsiqtausimaliqujinirmi piluaqtumik sivulliqpautitaujuksaqutiminnut piliriaksaminni.
Katujjiqatigiingujut qutsingningatigut, ITK-kut 2020-2023-mi Pparnautingit ammalu Pilirianguqujaullutik Parnautingit, saqqitausimalilauqtut May-ngutillugu, piliriaksaqaliqtittijjutiukkanniqtut atuliqtitausimaliqullugit 98%-mik qaliriiliqsimaniqaqtut saqqitausimalirunnaqtuqutiujunut ammalu 46-ngullutik Inunnut Turaangatitaullutik Tiliurisimajjutiujunut Ikajuqsigausimaliqujijjutiujunut. Aaqqiisimalirutiummata pijausimalirumajunut amisurlaullutik maligalirinirmut turaangajunik atavviqallariktuullutik Tiliurisimajjutinut Ikajuqsigausimaliqujinirmut, ilaqaqtillugit pilirianguliriaqaqtunut mikilligiaqtitausimaliqullugit akłuluaqtuuninginnut Inuit, ilaqaqsutik amisuruqpalliatitsiniujunut inuusilirinirmi akigijauvaktunut turaangallutik akłuluarniujunut Inuit Nunanganni ammalu sivummugiaqtittigiarnirmik akłuluarniujuq mikilligiaqtitausimaliqullugu sapujjigiaqsimalirnirmut piliriangujut; sivummugiaqtittisimalirnikmik Inunnut turaangatitaullutik aanniaqarnanngittulirinirmut ammalu inuusilirinirmi pivalliajulirinirnut maligaqutiujunik, pilirianik ammalu piliriangulirumajunik, ilaqaqtitaullutik nalunaiqtausimallutik uqaqtausimajunik ikajuqtugausimaliqujinirmut atuliqtitausimaliqullugitTiliurisimajjutit Iikajuqsigausimaliqujinirmut; ammalu ikajuqtuinirmut Inuktut uqausiup uummaqtitaugiakkannirninganut ammalu quvvaqtitausimaliriarningata.
Angijualummik aktugausimanaqtuulluni nalliunisiurutiqarnirmi, Inuit Tapiriikkut Kanatami (ITK) qujannamiikkanniqput ilagiingujunut, aanniqtirtauqattarsimanirmi annagutiqaqsimajunut, inutuqaujunut, ammalu qaujimajimmariujunut matuinngattiaqtuullutik uqallausiqalaurninginnut sulijuqutiminnik ungataanuuliqtuq ukiuk marruuk kanatalimaami kikkutuinnanik naalangniqaqattalaurnirmit ammalu nalunaiqsijjutinik katiqsuiniqaqpallianirmit pijunnautitaaqsimaliqtitauqullugit sivuniuniaqtumi inuuqatigiilirumaaqtut. 231-ngullutik Tiliurutigijausimaliqlauqtanginut Ikajuqsigausimaliqujijjutiit turaangatitausimavut government-ngujunut, sanavvinnut, inuusilirinirmi iqqanaijarvinnut, sanavvinnut ammalu tamainnut Canada-miungujunut.”
“Tavvani ullurmi atuqtumi ammalu qautamaat uvannut nangminiq nalunaiqsivattunga piliriaksaqarninnik pijariiqsimaliriaqarakkit piliriaksarijakka sapujjigiarniarninnut ammalu sivummugiaqtittiniarnirmut piliriaksaujut atuliqtitauqullugit Tiliurisimajjutit Ikajuqsigausimaliqujinirmut. ITK-kut taassumingatsainnaq nalunaiqsisimavut tiliurisimajjutiusimajunik ilagiingujunit ammalu Canada-mi Kiglisiniaqtikkunnit angijualummik naliqqauliqtitauqullugit nunaqaqqaarsimajuit arnangit ammalu niviaqsiangit, ammalu aaqqiisimalirutiksanik tunngavviqaqtitausimalutik nangminiq isumaliurutiliurunnarnirmut ammalu nangminiq aulatsiniqarunnarnirmut takuksautittisimalutik nalunaittumik piliriqatigiinningita Inuit ammalu Government-tuqakkunni government-gijaujuit. Tamanna ajjiqanngittuulluni Canada-limaami piliriniqarviulirunnarmat asijjiivalliatitsilirajarnirmut, ammalu aquiqtuivunga Canada-up Government-ngat ungasiktualummut sivummugiaqsimaliqullugit pilirianguvalliajutigut ilaakkut alluriaqpalliajjutigijamiktigut, piliriqatiqarnirminni Inunnik, asijjiqtausimalirutiksait saqqitausimaliqullugit tamatta pisimaliriaqaqtavut,” uqaqsuni Natan Obed, Angijuqqaaq Inuit Tapiriikkunnut Kanatami.
Kingulliqpaarsiutiullutik unikkaaliarisimajangita Canada-mi Kiglisiniaqtikkut nalliunisiurutiuniarmat June 3-mi sannginiqaqtualuuluni iqqaumajaqartillugit ammalu iqqaumaniqaqtillugit, kingulliqpaamik unikkaaliarisimajaujuni Canada-mi Kiglisiniaqtikkunnut tunisisimalilauqtillugit ukiunguliqtuni tallimani June 2-ngutillugu, government-tuqakkut mamiajjutiqaqtillugit ilinniariaqpalauqsimajunut saqqiisimalilaurningata 12-nguliqtut ukiut June 11-ngutillugu, ammalu akunningani amisukallaujut naammaksanngijjutiqaliqsimatillugit inugiaqtunirmiut nunalipaujangini Canada-mi ammalu America-miuni nuqqaqtitausimaliqullugu akiraqtuiniqaqpanniujut uviniqatiginngitaminnut. Inuit Tapiriikkut Kanatami nangiqatauvut inuuqatigiiktunut ajjigiiktumut turaagaqatigiiktunut makigiarutiqaqsutik uviniqatiginngitaminnik aanniqtirivanniq ammalu akiraqtuivanniq nuqqaqtitausimaliqullugu Canada-mi, America-miuni ammalu silarjualimaami.
Taakkua miksaanut tusaqtitaugiakkannirumajunut:
Inuit Tapiriikkut Kanatami Tusagassaliriningit
[email protected]; 613-292-4482
