Uncategorized @ius

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᔪᓯᑎᑦᓰᓐᓇᖅᐳᑦ ᓯᕗᒻᒧᒋᐊᖅᑎᑕᐅᖁᓪᓗᒋᑦ ᐃᓗᐃᒃᑲᐅᔪᒃᑯᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᕐᓯᒪᔪᐃᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐱᔾᔪᑎᒋᓪᓗᒋᑦ ᑎᓕᐅᕆᔾᔪᑎᐅᓯᒪᓕᓚᐅᖅᑐᑦ ᐃᑲᔪᖅᓯᒐᐅᓯᒪᓕᖁᓪᓗᒋᑦ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᔪᓯᑎᑦᓰᓐᓇᖅᐳᑦ ᓯᕗᒻᒧᒋᐊᖅᑎᑕᐅᖁᓪᓗᒋᑦ ᐃᓗᐃᒃᑲᐅᔪᒃᑯᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᕐᓯᒪᔪᐃᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐱᔾᔪᑎᒋᓪᓗᒋᑦ ᑎᓕᐅᕆᔾᔪᑎᐅᓯᒪᓕᓚᐅᖅᑐᑦ ᐃᑲᔪᖅᓯᒐᐅᓯᒪᓕᖁᓪᓗᒋᑦ

ᔫᓂ 3, 2020 – ᐋᑐᕙ, ᐋᓐᑎᐊᕆᐅ – ᓇᓪᓕᐅᓂᓯᐅᕈᑎᖃᕐᓂᖏᓂ ᓴᖅᑭᑕᐅᓯᒪᓕᓚᐅᖅᑐᓄᑦ ᑭᖑᓪᓕᖅᐹᖅᓯᐅᑎᓂᒃ ᐅᓂᒃᑳᓕᐊᖑᓯᒪᓕᓚᐅᖅᑐᓄᑦ ᐊᒻᒪᓗ 231-ᖑᔪᓂᑦ ᑎᓕᐅᕈᑎᒋᔭᐅᓯᒪᓕᖅᓚᐅᖅᑕᖏᓄᑦ ᐃᑲᔪᖅᓯᒐᐅᓯᒪᓕᖁᓪᓗᒋᑦ ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᑐᑭᓯᒋᐊᕈᑎᖃᖅᑎᐅᔪᑦ ᐊᓯᐅᔨᔭᐅᓯᒪᔪᓄᑦ ᐊᒻᒪᓗ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᕐᓯᒪᔪᐃᑦ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ ᐱᔾᔪᑎᒋᓪᓗᒋᑦ (MMIWG), ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᓱᓕ ᐱᓕᕆᐊᒃᓴᖃᕐᒪᑕ ᐃᓗᐃᒃᑲᐅᔪᒃᑯᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᐱᓕᕆᐊᖑᓯᒪᓕᖅᑐᑦ, ᐊᒻᒪᓗ ᐋᖅᑭᒃᓱᐃᖃᑎᒌᒃᓯᒪᓕᕐᓗᑎᒃ ᑲᓇᑕᒥ ᐱᓕᕆᐊᖑᔪᓄᑦ ᐸᕐᓇᐅᑎᓂᒃ ᐱᓕᕆᖃᑎᒋᓯᒪᓗᒋᑦ ᐃᓄᐃᑦ ᓯᕗᓕᖅᑎᒋᔭᖏᑦ, ᑲᓇᑕᒥ ᓄᓇᖃᖅᑳᕐᓯᒪᔪᐃᑦ ᑲᑐᔾᔨᖃᑎᒌᖏᑦ, ᑲᓇᑕᒥ ᐊᖏᔪᖅᑳᕐᔪᐊᖅ, ᐊᒻᒪᓗ ᑲᓇᑕᒥ ᒐᕙᒪᒋᔭᐅᔪᑦ.

ᐊᒥᓱᑉᓚᐅᓪᓗᑎᒃ 231-ᖑᔪᓂᑦ ᑎᓕᐅᕈᑎᒋᔭᐅᓯᒪᓕᓚᐅᖅᑐᑦ ᐃᑲᔪᖅᓯᒐᐅᓯᒪᓕᖁᓪᓗᒋᑦ ᑐᕌᖓᔪᑦ ᑭᒃᑯᑐᐃᓐᓇᐃᑦ ᐊᒻᒪᓗ ᓄᓇᖃᖅᑳᕐᓯᒪᔪᑦ ᐱᔪᓐᓇᐅᑎᖏᓐᓄᑦ ᐊᒻᒪᓗ ᒐᕙᒪᐅᔪᓂ ᐱᓕᕆᐊᒃᓴᕆᔭᐅᔪᑦ, ᐃᓚᖃᖅᑎᓪᓗᒋᑦ ᑎᓕᐅᕆᓯᒪᔾᔪᑎᓂᒃ ᒐᕙᒪᐅᔪᑦ ᐊᑐᓕᖅᑎᑦᑎᑲᐅᑎᒋᖁᓪᓗᒋᑦ ᐱᔪᓐᓇᐅᑎᓕᕆᓂᕐᒥ ᓴᓇᕐᕈᑎᒃᓴᐅᓂᐊᖅᑐᓂᒃ ᓲᕐᓗ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖏᓂᒃ ᐱᔪᓐᓇᐅᑎᖃᕐᓂᖏᑕ ᓄᓇᖃᖅᑳᕐᓯᒪᔪᐃᑦ. ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᓱᓕ ᓴᐳᔾᔨᒋᐊᕈᑎᖃᖅᐳᑦ ᑎᓕᐅᕆᓯᒪᔾᔪᑎᓂᒃ ᐃᑲᔪᖅᓯᒐᐅᓯᒪᓕᖁᔨᓂᕐᒧᑦ 1.7-ᒥᒃ ᐊᑐᓕᖅᑎᑕᐅᓯᒪᓕᖁᓪᓗᒋᑦ, ᐱᔾᔪᑎᖃᖅᑐᓂᒃ ᐋᖅᑮᓯᒪᓕᕐᓂᒃᓴᒧᑦ ᑲᓇᑕᒥ ᓄᓇᖃᖅᑳᕐᓯᒪᔪᐃᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᕐᓂᖏᑕ ᓈᒻᒪᒋᔭᐅᖖᒋᔾᔪᑎᐅᔪᓄᑦ ᑭᒡᒐᖅᑐᖅᑎᒋᔭᐅᔪᒥᒃ ᐊᒻᒪᓗ ᑲᓇᑕᒥ ᓄᓇᖃᖅᑳᕐᓯᒪᔪᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᓈᓚᖕᓂᖃᖅᑎᐅᔪᓂᒃ, ᐊᒻᒪᓗ ᑎᓕᐅᕆᓯᒪᔾᔪᑎᓂᒃ ᑕᒪᒃᑯᐊ ᐱᓕᕆᓂᐅᓕᖅᑐᑦ ᐃᓕᔭᐅᓯᒪᓕᖁᓪᓗᒋᑦ ᒪᓕᒐᕐᔪᐊᖁᑎᓄᑦ ᐊᑐᓕᖅᑎᑕᐅᓯᒪᔾᔪᑎᐅᓂᐊᕐᓗᑎᒃ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖏᓂᒃ ᑲᓇᑕᒥ.

ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᐱᓕᕆᐊᒃᓴᖃᓕᖅᓯᒪᕗᑦ ᐊᑐᓕᖅᑎᑦᑎᒋᐊᒥᓐᓂᒃ ᑕᒪᐃᓂᒃ ᑎᓕᐅᕆᓯᒪᔾᔪᑎᐅᔪᓂᒃ ᐃᑲᔪᖅᓯᒐᐅᓯᒪᓕᖁᔨᓂᕐᒧᑦ, ᐱᖃᓯᐅᑎᓪᓗᒋᑦ 46-ᖑᓪᓗᑎᒃ ᐃᓄᓐᓄᑦ ᑐᕌᖓᓪᓗᑎᒃ ᑎᓕᐅᕆᓯᒪᔾᔪᑎᓂᒃ, ᑐᑭᑖᕈᑎᓕᐊᖑᓯᒪᔪᑎᒍᑦ  ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᓂᑦ, ᐊᒻᒪᓗ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᓐᓂᕐᒧᑦ ᑲᑎᒪᔨᕋᓛᖏᑎᒍᑦ (ICPC), ᐃᓄᐃᑦ ᓯᕗᓕᖅᑎᒋᔭᖏᑦ, ᑲᓇᑕᒥ ᐊᖏᔪᖅᑳᕐᔪᐊᖅ ᐊᒻᒪᓗ ᒐᕙᒪᑐᖃᒃᑯᓐᓄᑦ ᒥᓂᔅᑕᕆᔭᐅᔪᑦ ᑕᒪᕐᒥᐅᓪᓗᑎᒃ ᑐᕌᕐᕕᒃᓴᖃᓕᕈᓐᓇᖁᓪᓗᒋᑦ ᐊᑐᓕᖅᑎᑦᑎᓯᒪᓕᕆᐊᒥᓐᓂᒃ ᐊᒥᖅᑲᕈᑎᒋᓪᓗᒍ ᐱᓕᕆᓂᕆᔭᐅᔪᒪᔪᓄᑦ. ᒫᔾᔨ 2020-ᒥ , ICPC-ᑯᓐᓄᑦ ᐃᓚᒋᔭᐅᔪᐃᑦ ᑲᑎᓐᓂᖃᓚᐅᖅᐳᑦ ᐋᑐᕙᒥ ᑲᑎᖕᒪᖃᑎᒌᓐᓂᐊᖅᓱᑎᒃ ᐃᒃᓯᕙᐅᑕᖃᖅᓱᑎᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᒥᒃ ᐊᒻᒪᓗ ᑲᓇᑕᒥ ᐊᖏᔪᖅᑳᕐᔪᐊᒥᒃ, ᐊᒻᒪᓗ ᐊᖏᖅᓯᒪᖃᑎᒌᓕᓚᐅᖅᓱᑎᒃ ᐃᓕᔭᐅᓯᒪᖃᑕᐅᓂᐊᕐᓂᖏᑕ ᐊᑐᓕᖅᑎᑕᐅᓯᒪᓕᖁᔨᔾᔪᑎᑦ ᑎᓕᐅᕆᓯᒪᔾᔪᑎᓂᒃ ᐃᑲᔪᖅᓯᖅᑕᐅᓯᒪᓕᖁᔨᓂᕐᒥ ᐱᓗᐊᖅᑐᒥᒃ ᓯᕗᓪᓕᖅᐸᐅᑎᑕᐅᔪᒃᓴᖁᑎᒥᓐᓄᑦ ᐱᓕᕆᐊᒃᓴᒥᓐᓂ.

ᑲᑐᔾᔨᖃᑎᒌᖑᔪᑦ ᖁᑦᓯᖕᓂᖓᑎᒍᑦ, ITK-ᑯᑦ 2020-2023-ᒥ ᐸᕐᓇᐅᑎᖏᑦ ᐊᒻᒪᓗ ᐱᓕᕆᐊᖑᖁᔭᐅᓪᓗᑎᒃ ᐸᕐᓇᐅᑎᖏᑦ,  ᓴᖅᑭᑕᐅᓯᒪᓕᓚᐅᖅᑐᑦ ᒪᐃᖑᑎᓪᓗᒍ, ᐱᓕᕆᐊᒃᓴᖃᓕᖅᑎᑦᑎᔾᔪᑎᐅᒃᑲᓐᓂᖅᑐᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ 98%-ᒥᒃ ᖃᓕᕇᓕᖅᓯᒪᓂᖃᖅᑐᑦ ᓴᖅᑭᑕᐅᓯᒪᓕᕈᓐᓇᖅᑐᖁᑎᐅᔪᓄᑦ ᐊᒻᒪᓗ 46-ᖑᓪᓗᑎᒃ ᐃᓄᓐᓄᑦ ᑐᕌᖓᑎᑕᐅᓪᓗᑎᒃ ᑎᓕᐅᕆᓯᒪᔾᔪᑎᐅᔪᓄᑦ ᐃᑲᔪᖅᓯᒐᐅᓯᒪᓕᖁᔨᔾᔪᑎᐅᔪᓄᑦ. ᐋᖅᑮᓯᒪᓕᕈᑎᐅᒻᒪᑕ ᐱᔭᐅᓯᒪᓕᕈᒪᔪᓄᑦ ᐊᒥᓱᕐᓚᐅᓪᓗᑎᒃ ᒪᓕᒐᓕᕆᓂᕐᒧᑦ ᑐᕌᖓᔪᓂᒃ ᐊᑕᕝᕕᖃᓪᓚᕆᒃᑑᓪᓗᑎᒃ ᑎᓕᐅᕆᓯᒪᔾᔪᑎᓄᑦ ᐃᑲᔪᖅᓯᒐᐅᓯᒪᓕᖁᔨᓂᕐᒧᑦ, ᐃᓚᖃᖅᑎᓪᓗᒋᑦ ᐱᓕᕆᐊᖑᓕᕆᐊᖃᖅᑐᓄᑦ ᒥᑭᓪᓕᒋᐊᖅᑎᑕᐅᓯᒪᓕᖁᓪᓗᒋᑦ ᐊᒃᖢᓗᐊᖅᑑᓂᖏᓐᓄᑦ ᐃᓄᐃᑦ, ᐃᓚᖃᖅᓱᑎᒃ ᐊᒥᓱᕈᖅᐸᓪᓕᐊᑎᑦᓯᓂᐅᔪᓄᑦ ᐃᓅᓯᓕᕆᓂᕐᒥ ᐊᑭᒋᔭᐅᕙᒃᑐᓄᑦ ᑐᕌᖓᓪᓗᑎᒃ ᐊᒃᖢᓗᐊᕐᓂᐅᔪᓄᑦ ᐃᓄᐃᑦ ᓄᓇᖓᓐᓂ ᐊᒻᒪᓗ ᓯᕗᒻᒧᒋᐊᖅᑎᑦᑎᒋᐊᕐᓂᕐᒥᒃ ᐊᒃᖢᓗᐊᕐᓂᐅᔪᖅ ᒥᑭᓪᓕᒋᐊᖅᑎᑕᐅᓯᒪᓕᖁᓪᓗᒍ ᓴᐳᔾᔨᒋᐊᖅᓯᒪᓕᕐᓂᕐᒧᑦ ᐱᓕᕆᐊᖑᔪᑦ; ᓯᕗᒻᒧᒋᐊᖅᑎᑦᑎᓯᒪᓕᕐᓂᒃᒥᒃ ᐃᓄᓐᓄᑦ ᑐᕌᖓᑎᑕᐅᓪᓗᑎᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᒥ ᐱᕙᓪᓕᐊᔪᓕᕆᓂᕐᓄᑦ ᒪᓕᒐᖁᑎᐅᔪᓂᒃ, ᐱᓕᕆᐊᓂᒃ ᐊᒻᒪᓗ ᐱᓕᕆᐊᖑᓕᕈᒪᔪᓂᒃ, ᐃᓚᖃᖅᑎᑕᐅᓪᓗᑎᒃ ᓇᓗᓇᐃᖅᑕᐅᓯᒪᓪᓗᑎᒃ ᐅᖃᖅᑕᐅᓯᒪᔪᓂᒃ ᐃᑲᔪᖅᑐᒐᐅᓯᒪᓕᖁᔨᓂᕐᒧᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᑎᓕᐅᕆᓯᒪᔾᔪᑎᑦ ᐃᑲᔪᖅᓯᒐᐅᓯᒪᓕᖁᔨᓂᕐᒧᑦ; ᐊᒻᒪᓗ ᐃᑲᔪᖅᑐᐃᓂᕐᒧᑦ ᐃᓄᒃᑐᑦ ᐅᖃᐅᓯᐅᑉ ᐆᒻᒪᖅᑎᑕᐅᒋᐊᒃᑲᓐᓂᕐᓂᖓᓄᑦ ᐊᒻᒪᓗ ᖁᕝᕙᖅᑎᑕᐅᓯᒪᓕᕆᐊᕐᓂᖓᑕ.

ᐊᖏᔪᐊᓗᒻᒥᒃ ᐊᒃᑐᒐᐅᓯᒪᓇᖅᑑᓪᓗᓂ ᓇᓪᓕᐅᓂᓯᐅᕈᑎᖃᕐᓂᕐᒥ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᖁᔭᓐᓇᒦᒃᑲᓐᓂᖅᐳᑦ ᐃᓚᒌᖑᔪᓄᑦ, ᐋᓐᓂᖅᑎᕐᑕᐅᖃᑦᑕᕐᓯᒪᓂᕐᒥ ᐊᓐᓇᒍᑎᖃᖅᓯᒪᔪᓄᑦ, ᐃᓄᑐᖃᐅᔪᓄᑦ, ᐊᒻᒪᓗ ᖃᐅᔨᒪᔨᒻᒪᕆᐅᔪᓄᑦ ᒪᑐᐃᖖᒐᑦᑎᐊᖅᑑᓪᓗᑎᒃ ᐅᖃᓪᓚᐅᓯᖃᓚᐅᕐᓂᖏᓐᓄᑦ ᓱᓕᔪᖁᑎᒥᓐᓂᒃ ᐅᖓᑖᓅᓕᖅᑐᖅ ᐅᑭᐅᒃ ᒪᕐᕉᒃ ᑲᓇᑕᓕᒫᒥ ᑭᒃᑯᑐᐃᓐᓇᓂᒃ ᓈᓚᖕᓂᖃᖃᑦᑕᓚᐅᕐᓂᕐᒥᑦ ᐊᒻᒪᓗ ᓇᓗᓇᐃᖅᓯᔾᔪᑎᓂᒃ ᑲᑎᖅᓱᐃᓂᖃᖅᐸᓪᓕᐊᓂᕐᒥᑦ ᐱᔪᓐᓇᐅᑎᑖᖅᓯᒪᓕᖅᑎᑕᐅᖁᓪᓗᒋᑦ ᓯᕗᓂᐅᓂᐊᖅᑐᒥ ᐃᓅᖃᑎᒌᓕᕈᒫᖅᑐᑦ. 231-ᖑᓪᓗᑎᒃ ᑎᓕᐅᕈᑎᒋᔭᐅᓯᒪᓕᖅᓚᐅᖅᑕᖏᓄᑦ ᐃᑲᔪᖅᓯᒐᐅᓯᒪᓕᖁᔨᔾᔪᑏᑦ ᑐᕌᖓᑎᑕᐅᓯᒪᕗᑦ ᒐᕙᒪᐅᔪᓄᑦ, ᓴᓇᕝᕕᓐᓄᑦ, ᐃᓅᓯᓕᕆᓂᕐᒥ ᐃᖅᑲᓇᐃᔭᕐᕕᓐᓄᑦ, ᓴᓇᕝᕕᓐᓄᑦ ᐊᒻᒪᓗ ᑕᒪᐃᓐᓄᑦ ᑲᓇᑕᒥᐅᖑᔪᓄᑦ.”

“ᑕᕝᕙᓂ ᐅᓪᓗᕐᒥ ᐊᑐᖅᑐᒥ ᐊᒻᒪᓗ ᖃᐅᑕᒫᑦ ᐅᕙᓐᓄᑦ ᓇᖕᒥᓂᖅ ᓇᓗᓇᐃᖅᓯᕙᑦᑐᖓ ᐱᓕᕆᐊᒃᓴᖃᕐᓂᓐᓂᒃ ᐱᔭᕇᖅᓯᒪᓕᕆᐊᖃᕋᒃᑭᑦ ᐱᓕᕆᐊᒃᓴᕆᔭᒃᑲ ᓴᐳᔾᔨᒋᐊᕐᓂᐊᕐᓂᓐᓄᑦ ᐊᒻᒪᓗ ᓯᕗᒻᒧᒋᐊᖅᑎᑦᑎᓂᐊᕐᓂᕐᒧᑦ ᐱᓕᕆᐊᒃᓴᐅᔪᑦ ᐊᑐᓕᖅᑎᑕᐅᖁᓪᓗᒋᑦ ᑎᓕᐅᕆᓯᒪᔾᔪᑎᑦ ᐃᑲᔪᖅᓯᒐᐅᓯᒪᓕᖁᔨᓂᕐᒧᑦ. ITK-ᑯᑦ ᑖᔅᓱᒥᖓᑦᓴᐃᓐᓇᖅ ᓇᓗᓇᐃᖅᓯᓯᒪᕗᑦ ᑎᓕᐅᕆᓯᒪᔾᔪᑎᐅᓯᒪᔪᓂᒃ ᐃᓚᒌᖑᔪᓂᑦ ᐊᒻᒪᓗ ᑲᓇᑕᒥ ᑭᒡᓕᓯᓂᐊᖅᑎᒃᑯᓐᓂᑦ ᐊᖏᔪᐊᓗᒻᒥᒃ ᓇᓕᖅᑲᐅᓕᖅᑎᑕᐅᖁᓪᓗᒋᑦ ᓄᓇᖃᖅᑳᕐᓯᒪᔪᐃᑦ ᐊᕐᓇᖏᑦ ᐊᒻᒪᓗ ᓂᕕᐊᖅᓯᐊᖏᑦ, ᐊᒻᒪᓗ ᐋᖅᑮᓯᒪᓕᕈᑎᒃᓴᓂᒃ ᑐᖖᒐᕝᕕᖃᖅᑎᑕᐅᓯᒪᓗᑎᒃ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᕐᒧᑦ ᐊᒻᒪᓗ ᓇᖕᒥᓂᖅ ᐊᐅᓚᑦᓯᓂᖃᕈᓐᓇᕐᓂᕐᒧᑦ ᑕᑯᒃᓴᐅᑎᑦᑎᓯᒪᓗᑎᒃ ᓇᓗᓇᐃᑦᑐᒥᒃ ᐱᓕᕆᖃᑎᒌᓐᓂᖏᑕ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᓐᓂ ᒐᕙᒪᐅᔪᐃᑦ. ᑕᒪᓐᓇ ᐊᔾᔨᖃᖖᒋᑦᑑᓪᓗᓂ ᑲᓇᑕᓕᒫᒥ ᐱᓕᕆᓂᖃᕐᕕᐅᓕᕈᓐᓇᕐᒪᑦ ᐊᓯᔾᔩᕙᓪᓕᐊᑎᑦᓯᓕᕋᔭᕐᓂᕐᒧᑦ, ᐊᒻᒪᓗ ᐊᖁᐃᖅᑐᐃᕗᖓ ᑲᓇᑕᐅᑉ ᒐᕙᒪᖓᑦ ᐅᖓᓯᒃᑐᐊᓗᒻᒧᑦ ᓯᕗᒻᒧᒋᐊᖅᓯᒪᓕᖁᓪᓗᒋᑦ ᐱᓕᕆᐊᖑᕙᓪᓕᐊᔪᑎᒍᑦ ᐃᓛᒃᑯᑦ ᐊᓪᓗᕆᐊᖅᐸᓪᓕᐊᔾᔪᑎᒋᔭᒥᒃᑎᒍᑦ, ᐱᓕᕆᖃᑎᖃᕐᓂᕐᒥᓐᓂ ᐃᓄᓐᓂᒃ, ᐊᓯᔾᔨᖅᑕᐅᓯᒪᓕᕈᑎᒃᓴᐃᑦ ᓴᖅᑭᑕᐅᓯᒪᓕᖁᓪᓗᒋᑦ ᑕᒪᑦᑕ ᐱᓯᒪᓕᕆᐊᖃᖅᑕᕗᑦ,” ᐅᖃᖅᓱᓂ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ.

ᑭᖑᓪᓕᖅᐹᕐᓯᐅᑎᐅᓪᓗᑎᒃ ᐅᓂᒃᑳᓕᐊᕆᓯᒪᔭᖏᑕ ᑲᓇᑕᒥ ᑭᒡᓕᓯᓂᐊᖅᑎᒃᑯᑦ ᓇᓪᓕᐅᓂᓯᐅᕈᑎᐅᓂᐊᕐᒪᑦ ᔫᓂ 3-ᒥ ᓴᖖᒋᓂᖃᖅᑐᐊᓘᓗᓂ ᐃᖅᑲᐅᒪᔭᖃᕐᑎᓪᓗᒋᑦ ᐊᒻᒪᓗ ᐃᖅᑲᐅᒪᓂᖃᖅᑎᓪᓗᒋᑦ, ᑭᖑᓪᓕᖅᐹᒥᒃ ᐅᓂᒃᑳᓕᐊᕆᓯᒪᔭᐅᔪᓂ ᑲᓇᑕᒥ ᑭᒡᓕᓯᓂᐊᖅᑎᒃᑯᓐᓄᑦ ᑐᓂᓯᓯᒪᓕᓚᐅᖅᑎᓪᓗᒋᑦ ᐅᑭᐅᖑᓕᖅᑐᓂ ᑕᓪᓕᒪᓂ ᔫᓂ 2-ᖑᑎᓪᓗᒍ, ᒐᕙᒪᑐᖃᒃᑯᑦ ᒪᒥᐊᔾᔪᑎᖃᖅᑎᓪᓗᒋᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᓴᖅᑮᓯᒪᓕᓚᐅᕐᓂᖓᑕ 12-ᖑᓕᖅᑐᑦ ᐅᑭᐅᑦ ᔫᓂ 11-ᖑᑎᓪᓗᒍ, ᐊᒻᒪᓗ ᐊᑯᓐᓂᖓᓂ ᐊᒥᓱᑲᓪᓚᐅᔪᑦ ᓈᒻᒪᒃᓴᖖᒋᔾᔪᑎᖃᓕᖅᓯᒪᑎᓪᓗᒋᑦ ᐃᓄᒋᐊᖅᑐᓂᕐᒥᐅᑦ ᓄᓇᓕᐸᐅᔭᖏᓂ ᑲᓇᑕᒥ ᐊᒻᒪᓗ ᐊᒥᐊᕆᑲᒥᐅᓂ ᓄᖅᑲᖅᑎᑕᐅᓯᒪᓕᖁᓪᓗᒍ ᐊᑭᕋᖅᑐᐃᓂᖃᖅᐸᓐᓂᐅᔪᑦ ᐅᕕᓂᖃᑎᒋᖖᒋᑕᒥᓐᓄᑦ. ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓇᖏᖃᑕᐅᕗᑦ ᐃᓅᖃᑎᒌᒃᑐᓄᑦ ᐊᔾᔨᒌᒃᑐᒧᑦ ᑐᕌᒐᖃᑎᒌᒃᑐᓄᑦ ᒪᑭᒋᐊᕈᑎᖃᖅᓱᑎᒃ ᐅᕕᓂᖃᑎᒋᖖᒋᑕᒥᓐᓂᒃ ᐋᓐᓂᖅᑎᕆᕙᓐᓂᖅ ᐊᒻᒪᓗ ᐊᑭᕋᖅᑐᐃᕙᓐᓂᖅ ᓄᖅᑲᖅᑎᑕᐅᓯᒪᓕᖁᓪᓗᒍ ᑲᓇᑕᒥ, ᐊᒥᐊᕆᑲᒥᐅᓂ ᐊᒻᒪᓗ ᓯᓚᕐᔪᐊᓕᒫᒥ

ᑖᒃᑯᐊ ᒥᒃᓵᓄᑦ ᑐᓴᖅᑎᑕᐅᒋᐊᒃᑲᓐᓂᕈᒪᔪᓄᑦ:

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑐᓴᒐᔅᓴᓕᕆᓂᖏᑦ
[email protected]; 613-292-4482