ᐋᑐᕙ, ᐋᓐᑎᐊᕆᐅ – ᒫᔾᔨ 24, 2022
ᐊᖏᔪᖅᑳᖑᔪᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ (ITK), ᓇᐃᑖᓐ ᐆᐱᑦ, ᐊᒻᒪᓗ ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ ᒥᓂᔅᑕᕆᔭᐅᔪᖅ, ᐹᑎ ᕼᐋᔾᑑ, ᐅᓪᓗᒥ ᒪᑯᓂᖓ ᓇᓗᓇᐃᖅᓯᖃᑎᒌᓚᐅᖅᑐᒃ:
“ᓯᓚᕐᔪᐊᓕᒫᒥ ᐳᕙᒡᓗᓕᖃᑦᑕᕐᓂᕐᒧᑦ ᐅᓪᓗᕆᔭᖓᓂ 2022, ᐃᓕᑕᕆᓯᒪᒐᑦᑎᒍ ᐳᕙᒡᓗᓕᖃᑦᑕᕐᓂᐅᔪᖅ (TB) ᓱᓕ ᐅᖓᑎᓗᐊᒻᒪᕆᐊᓄᑦ ᐊᒃᑐᐃᓯᒪᓂᖃᖃᑦᑕᕐᒪᑦ ᐃᓄᐃᑦ ᓄᓇᓕᒋᔭᖏᓐᓂ ᑲᓇᑕᓕᒫᒥ. ᐱᓕᕆᓂᖃᕐᓂᐊᕐᓂᑦᑎᓐᓂᒃ ᓇᓗᓇᐃᖅᓯᕗᒍᑦ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐋᓐᓂᐊᖃᓕᖅᑕᐃᓕᒪᓂᖏᑦ ᐃᓄᐃᑦ ᐃᓄᐃᑦ ᓄᓇᖓᓐᓂ ᐳᕙᒡᓗᓕᖃᑦᑕᕐᓂᐅᔪᑦ ᒥᑭᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᐊᒻᒪᓗ ᐳᕙᒡᓗᓕᖃᑦᑕᕐᓂᐅᔪᑦ ᓄᖑᑎᑕᐅᓯᒪᓕᖁᓪᓗᒋᑦ ᐱᓕᕆᐊᑦᑎᓐᓂ ᑐᕌᕐᕕᒃᓴᖁᑎᒋᔭᑦᑎᒍᑦ.
ᐳᕙᒡᓗᓕᖅᓱᑎᒃ ᐋᓐᓂᐊᖃᓕᖃᑦᑕᖅᑐᑦ ᖁᑦᑎᒃᑐᒻᒪᕆᐅᓂᖏᑦ ᐃᓄᐃᑦ ᓄᓇᓕᓕᒫᖏᓐᓂ ᓇᓗᓇᐃᖅᓯᔾᔪᑎᐅᖕᒪᑕ ᐋᓐᓂᐊᖃᓕᖅᑕᐃᓕᒪᔪᓕᕆᓂᐅᔪᓂ ᐃᓚᑰᓂᖃᕐᕕᐅᔪᓄᑦ ᐃᓄᖕᓂᑦ ᐊᓯᖏᓐᓂᓪᓗ ᑲᓇᑕᒥᐅᖑᔪᓂᑦ, ᐃᓚᖃᖅᑎᓪᓗᒋᑦ ᐃᓄᒋᐊᓗᐊᖅᓱᑎᒃ ᐃᒡᓗᒥᐅᖃᑎᒌᒃᓂᐅᔪᓂᒃ, ᓂᕿᒃᓴᕆᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᕐᓄᑦ, ᐋᓐᓂᐊᖅᓯᐅᕐᑎᓕᕆᔨᒃᑯᓐᓂ ᑐᓗᖅᑕᕐᕕᐅᕙᒃᑐᓂᑦ ᐊᒻᒪᓗ ᐊᒃᖢᓗᐊᕐᓂᐅᔪᓄᑦ. ᐅᑭᐅᖏᑦ 2015 ᐊᒻᒪᓗ 2019 ᐊᑯᓐᓂᖏᓂ, ᐅᓂᒃᑳᓕᐊᖑᓯᒪᔪᑦ ᓇᓗᓇᐃᖅᓯᓯᒪᓚᐅᕐᒪᑕ ᖁᑦᑎᖕᓂᕆᔭᐅᔪᑦ ᐳᕙᒡᓗᓕᖃᑦᑕᖅᓱᑎᒃ ᐋᓐᓂᐊᖃᓕᖅᐸᖕᓂᖏᑦ ᐃᓄᐃᑦ ᐃᓄᐃᑦ ᓄᓇᖓᓐᓂ 300-ᖏᖅᑕᕈᓐᓇᖅᓱᑎᒃ ᖁᑦᑎᖕᓂᖅᓴᐅᓂᖏᑕ ᑲᓇᑕᒥ ᐃᕐᓂᐊᖑᓯᒪᓪᓗᑎᒃ ᓄᓇᖃᖅᑳᖅᓯᒪᔫᖖᒋᑦᑐᑦ ᖁᑦᑎᖕᓂᕆᔭᖏᓐᓂᑦ. ᒫᓐᓇᓵᖑᓚᐅᖅᑐᒥ ᐅᓂᒃᑳᓕᐊᕆᔭᐅᓯᒪᔪᑦ ᐱᔾᔪᑎᒋᓪᓗᒍ ᐳᕙᒡᓗᓕᖃᑦᑕᕐᓂᐅᔪᓂᑦ ᐃᓄᖕᓂ ᓇᓗᓇᐃᖅᓯᓯᒪᓕᓚᐅᕐᒪᑕ ᒥᑭᒡᓕᒋᐊᖅᓯᒪᓕᕐᒪᑦ 61%-ᒥᒃ ᐅᑭᐅᖏᑦ 2015 ᐊᒻᒪᓗ 2019 ᐊᑯᓐᓂᖏᑦ ᐊᑐᖅᐸᓪᓕᐊᑎᓪᓗᒋᑦ.
ᑭᓯᐊᓂᓗ, ᓄᕙᒡᔪᐊᕐᓇᖅ-19ᒥᒃ ᐋᓐᓂᐊᖃᓕᕈᓐᓇᕐᓂᖅ ᐃᓚᖏᓂᒃ ᐱᓕᕆᓂᕆᔭᑦᑎᓐᓄᑦ ᐊᓯᔾᔩᓯᒪᓕᓚᐅᕐᒪᑦ ᖃᐅᔨᒋᐊᕈᑎᒋᕙᒃᑕᑦᑎᓐᓄᑦ, ᓴᖅᑮᓯᒪᓕᖅᐸᓐᓂᑦᑎᓐᓄᑦ ᐊᒻᒪᓗ ᓇᑭᑦ ᐋᓐᓂᐊᕐᓇᖃᓕᕐᕕᐅᔪᓂᒃ ᓇᓗᓇᐃᖅᓯᓯᒪᓕᕆᐊᖅᐸᓐᓂᑦᑎᓐᓄᑦ ᐊᓯᖏᓐᓂ ᐊᐃᑦᑐᕐᓗᒍᑎᐅᔪᓐᓇᖅᓱᑎᒃ ᐋᓐᓂᐊᖃᓕᖅᓂᐅᕙᒃᑐᓂᑦ, ᐃᓚᒋᓪᓗᒍ ᐳᕙᒡᓗᓕᖃᑦᑕᕐᓂᐅᔪᓄᑦ. ᐳᕙᒡᓗᓕᖃᑦᑕᕐᓂᕐᓄᑦ ᐱᔨᑦᓯᕋᕈᑎᒃᓴᐅᔪᑦ ᐱᓕᕆᓂᖃᕐᕕᐅᖏᓐᓇᕋᓗᐊᖅᑎᓪᓗᒋᑦ ᓄᕙᒡᔪᐊᕐᓇᒥᒃ ᐊᑐᓕᖅᓯᒪᑎᓪᓗᑕ, ᓱᓕ ᖃᐅᔨᓯᒪᑦᓯᐊᓕᕈᓐᓇᖖᒋᓐᓇᑎᒍ ᐃᓗᐃᒃᑲᐅᑎᓐᓂᐊᕐᓗᒍ ᐊᒃᑐᐃᓯᒪᓂᕆᔭᖓᑕ ᓄᕙᒡᔪᐊᕐᓇᖅ-19ᒧᑦ ᐱᔾᔪᑎᖃᖅᑐᓂᒃ ᖃᓄᐃᓕᕐᓂᖓᓄᑦ ᐱᓕᕆᓂᖃᖅᐸᓪᓕᐊᓂᑦᑎᓐᓂ ᐳᕙᒡᓗᖃᑦᑕᕐᓂᐅᔪᑉ ᓄᖑᑎᑕᐅᓯᒪᓕᖁᓪᓗᒍ ᑐᕌᕐᕕᒋᓇᓱᐊᖅᑕᑦᑎᓐᓂ. ᑕᐃᒪᓕ, ᐱᒻᒪᕆᐅᓗᐊᕐᒪᑦ ᑲᔪᓯᑎᑦᑎᓯᒪᔭᕆᐊᖃᕐᓂᕗᑦ ᓇᐅᑦᓯᖅᑐᐃᓂᐅᔪᓂᒃ ᐳᕙᒡᓗᓕᖃᑦᑕᕐᓂᐅᔪᓄᑦ ᐃᓄᖕᓂ ᐊᑯᓃᖅᑐᒧᑦ ᖃᓄᐃᓕᖓᓕᖅᐸᓐᓂᐅᔪᓂᒃ ᐱᓯᒪᓕᕈᓐᓇᕐᓂᐊᖁᓪᓗᑕ ᓯᕗᓂᑦᑎᓐᓂ ᐅᑭᐅᖑᓂᐊᖅᑐᓂ.
2018 ᐅᑭᐅᖓᓂ, ᑲᓇᑕᒥ ᒐᕙᒪᖓᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᑲᑐᔾᔨᓪᓗᑎᒃ ᐱᓕᕆᓂᖃᕐᓂᐊᕐᓂᕐᒥᓐᓂᒃ ᓇᓗᓇᐃᖅᓯᓯᒪᓕᓚᐅᖅᑐᑦ ᓄᖑᑎᑕᐅᓯᒪᓕᖁᓪᓗᒍ ᓯᕗᕐᖓᓂ 2030-ᐅ ᐳᕙᓪᓗᓕᖃᑦᑕᕐᓂᐅᔪᖅ ᐃᓄᐃᑦ ᓄᓇᖓᓐᓂ. ᑲᓇᑕᒥ ᒐᕙᒪᖓᑕ ᓯᕗᓪᓕᕐᒥᒃ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓂᐊᕈᑎᖏᑦ $27.5-ᒥᓕᐊᓐᑖᓚᓂᒃ ᑐᕌᖅᑎᑕᐅᓯᒪᖕᒪᑕ ᐳᕙᒡᓗᓕᖃᑦᑕᕐᓂᐅᔪᒥᒃ ᓄᖑᑎᑦᓯᓯᒪᓕᕆᐊᒧᑦ ᐱᓕᕆᐊᖑᓕᖅᑐᒃᓴᓂᒃ ᐸᕐᓇᐅᑎᓕᐅᕈᑎᒃᓴᓄᑦ ᐊᑐᓂ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᕆᔭᐅᔪᓂ ᐃᓄᐃᑦ ᓄᓇᖓᓐᓂ. ᑕᒪᒃᑯᐊ ᐱᓕᕆᓂᐅᔪᑦ ᐃᓚᖃᖅᑐᑦ ᐳᕙ’ᓕᕐᓂᖃᕆᐊᒃᓴᓄᑦ ᖃᐅᔨᒋᐊᕈᑎᐅᓪᓗᑎᒃ ᐱᓕᕆᓂᐅᕙᒃᑐᓂᒃ, ᓄᓇᓕᐅᔪᓄᑦ ᐃᑲᔪᕈᑎᒃᓴᖅᓯᐅᕐᓂᕐᓂᒃ, ᐱᓕᒻᒪᒃᓴᐃᓂᕐᒧᑦ ᓄᓇᓕᐅᔪᒥ ᐋᓐᓂᐊᖅᓯᐅᕐᑎᓕᕆᓂᕐᒧᑦ ᐱᓕᕆᔨᓂᒃ, ᐃᓄᖕᓄᑦ ᑐᕌᖓᑎᑕᐅᓪᓗᑎᒃ ᖃᐅᔨᓴᐃᓂᐅᔪᓂᒃ ᐊᒻᒪᓗ ᖃᐅᔨᒋᐊᖅᑕᐅᓂᖏᑕ ᐊᑕᕝᕕᒋᑐᕋᐅᓐᓂᖃᕐᒪᖔᑕ ᐳᕙᒡᓗᓕᖃᑦᑕᖅᓱᑎᒃ ᐋᓐᓂᐊᖃᓕᖅᐸᖕᓂᐅᔪᓄᑦ ᐊᒻᒪᓗ ᓄᕙᒡᔪᐊᕐᓇᖅ-19ᒥᒃ ᐋᓐᓂᐊᖃᓕᖅᐸᖕᓂᐅᔪᓂ.
ᐳᕙᒡᓗᖕᓕᖃᑦᑕᕐᓂᖅ ᐋᓐᓂᐊᖃᓕᖅᑕᐃᓕᒪᔾᔪᑎᐅᔪᓐᓇᕐᒪᑦ ᐊᒻᒪᓗ ᐋᖅᑭᒃᑕᐅᓯᒪᓕᕈᓐᓇᖅᑑᓪᓗᓂ ᐋᓐᓂᐊᕐᓇᖃᓕᖅᓯᒪᔪᓄᑦ. ᐱᓕᕆᐊᖑᔪᑦ ᐊᒻᒪᓗ ᐱᓕᕆᓂᖃᕐᕕᐅᓕᖅᓯᒪᔪᑦ ᑕᐃᒪᐅᔭᕆᐊᖃᕐᒪᑕ ᑕᐃᒪᐅᖏᓐᓇᐅᔭᕐᓂᖓᑕ ᐳᕙᒡᓗᓕᖃᑦᑕᕐᓂᐅᔪᑉ ᓄᖅᑲᖅᑎᑕᐅᓯᒪᓕᖁᓪᓗᒍ ᐃᓄᐃᑦ ᓄᓇᓕᓕᒫᖏᓐᓂ. ᑕᒪᑐᒧᖓ, ᐃᓄᐃᑦ ᑕᐱᕇᑦ ᑲᓇᑕᒥ ᐃᓱᒪᓕᐅᖅᓯᒪᓕᖅᑐᑦ ᑮᓇᐅᔭᖁᑎᒃᓴᐃᑦ $141-ᒥᓕᐊᓐᑖᓚᓂᒃ ᐃᓚᔭᐅᓯᒪᓕᕆᐊᖃᕐᒪᑕ ᐅᑭᐅᓄᑦ 8-ᓄᑦ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᓕᖃᑦᑕᕐᓂᐅᔪᑉ ᐱᓕᕆᐊᖃᕈᑎᒃᓴᓂᒃ ᐃᓄᐃᑦ ᓄᓇᓕᖏᓐᓂ.
ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᓄᑦ ᖃᓄᐃᓕᖓᓕᖅᓯᒪᔪᐅᔪᓄᑦ ᐱᑕᖃᓕᕆᐊᖃᖅᑐᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ, ᐳᕙᒡᓗᓕᖅᓯᒪᖖᒋᓪᓗᑎᒃ ᐃᓄᐃᑦ ᓄᓇᓕᒋᔭᖏᓐᓂ, ᐃᒪᓐᓇ ᐱᓕᕆᓂᖃᕆᐊᖃᖅᑐᒍᑦ:
- ᐃᓕᑕᕆᓯᒪᓕᕐᓗᑎᒍ ᐅᐱᒋᑦᓯᐊᖅᓯᒪᓗᒋᓪᓗ ᐊᔾᔨᖃᕋᑎᒃ ᐊᑐᖅᑕᐅᓯᒪᓂᐅᔪᑦ ᐊᒻᒪᓗ ᐅᐱᒋᓗᑎᒍ ᐊᑐᖅᑕᐅᓯᒪᓂᐅᔪᑦ ᐊᒻᒪᓗ ᐊᒃᑐᐃᓯᒪᓂᖏᑦ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᓯᒪᓂᐅᓚᐅᖅᑐᓄᑦ ᐃᓄᖕᓂ ᑲᔪᓯᑎᑦᓯᓯᒪᓂᑦᑎᒍᑦ ᐃᑲᔪᖅᑐᐃᓂᐅᔪᓂᒃ ᒪᒥᓴᐃᓂᖃᕐᓂᐅᓪᓗᑎᒃ ᐱᓕᕆᓂᐅᓕᖅᓯᒪᔪᓂ ᓲᕐᓗ ᓇᓂᓚᕗᑦ ᐱᓕᕆᐊᖑᔪᑦ, ᐃᑲᔪᕈᑎᐅᕙᒃᑐᑦ ᐃᓄᐃᑦ ᐃᓚᒌᖑᔪᑦ ᓇᓂᓯᓯᒪᓕᕆᐊᖃᑦᑕᕐᓂᖏᓂᒃ ᐃᓚᒋᔭᒥᖕᓂᒃ ᐳᕙᒡᓗᒃᓱᑎᒃ ᐃᓅᔪᖕᓃᓚᐅᖅᓯᒪᔪᓂᒃ ᐊᐅᓪᓚᖅᓯᒪᓪᓗᑎᒃ ᐋᓐᓂᐊᕐᕕᖕᓂ ᐅᑭᐅᖏᑦ 1940 ᐊᒻᒪᓗ 1960 ᐊᑯᓐᓂᖏᓂ.
- ᐃᓅᓯᓕᕆᓂᕐᒥ ᖃᓄᐃᓕᖓᓕᖅᓯᒪᓂᐅᔪᓂ ᐃᓚᑰᓂᖃᕐᕕᐅᔪᓄᑦ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᓂᖏᓐᓂ ᐱᓕᕆᐊᖑᓯᒪᓕᕐᓗᑎᒃ, ᐱᖃᓯᐅᑎᓗᒋᑦ ᐃᒡᓗᓕᕆᓂᐅᔪᓄᑦ, ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᓄᑦ ᐊᒻᒪᓗ ᓂᕿᑦᑎᐊᕙᓐᓂᒃ ᓂᕿᖃᕆᐊᖃᖅᐸᓐᓂᕐᓄᑦ, ᐃᓱᒪᒃᑯᑦ ᖃᓄᐃᖖᒋᑦᓯᐊᕐᓂᓕᕆᓂᕐᓄᑦ, ᓇᓕᖅᑲᐅᑎᑕᐅᓗᑎᒃ ᐊᒻᒪᓗ ᐱᐅᓯᑐᖃᒥ ᓈᒻᒪᒃᑐᓄᑦ ᐃᓕᓐᓂᐊᕐᓂᓕᕆᓂᐅᔪᓄᑦ ᐱᔾᔪᑎᖃᖅᑐᓂᒃ, ᐊᒻᒪᓗ ᐊᑐᐃᓐᓇᐅᑎᑕᐅᕙᓪᓂᖏᑕ ᐱᐅᓯᑐᖃᓕᕆᓂᕐᒥ ᖃᓄᐃᖖᒋᑦᓯᐊᕈᓐᓇᖅᑎᑦᓯᓪᓗᑎᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᓂ, ᑕᐃᒪᐅᖏᓐᓇᐅᔭᖅᓯᒪᓂᐅᔪᓄᑦ ᐳᕙᒡᓗᓕᖃᑦᑕᕐᓂᐅᔪᓂ ᐃᓄᐃᑦ ᓄᓇᓕᖏᓐᓂ.
- ᐱᓕᕆᐊᕆᓯᒪᓕᕐᓗᒋᑦ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒥ ᑕᐃᒪᐅᓕᐊᓂᒃᑐᓂ ᐃᓚᑰᓂᖃᕐᕕᐅᔪᑦ ᐊᖏᔫᓪᓗᑎᒃ ᓄᑖᖑᓪᓗᑎᒃᓗ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᕐᓂᖅᑎᒍᑦ ᑕᐃᒪᐅᓕᐊᓂᒃᑐᓄᑦ, ᐃᓚᖃᖅᑎᓪᓗᒋᑦ ᐋᖅᑭᒃᓱᐃᓯᒪᓕᕐᓂᕐᒥᒃ ᐃᓄᐃᑦ ᓄᓇᖓᓐᓂ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓂᐅᓪᓗᑎᒃ ᑮᓇᐅᔭᖁᑎᒃᓴᓂᒃ, ᓱᒃᑲᓕᕆᐊᕈᑎᐅᓇᔭᖅᑐᓂᒃ ᑐᓂᐅᖅᑲᖅᑕᐅᕙᓐᓂᖏᑕ ᑮᓇᐅᔭᖁᑎᒃᓴᐃᑦ ᐱᔭᐅᓯᒪᓕᕆᐊᖃᖅᑐᑦ ᐱᓕᕆᓂᖃᕐᕕᐅᓕᐊᓂᒃᑐᓂ ᐃᓚᑰᓂᖃᕐᕕᐅᔪᑦ ᐃᓗᐃᒃᑲᕈᖅᑎᑕᐅᓯᒪᓕᖁᓪᓗᒋᑦ ᐊᒻᒪᓗ ᑲᔪᓯᑎᑦᓯᓯᒪᓂᕐᓂᒃ ᑲᓇᑕᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐱᓕᕆᐊᒃᓴᕆᔭᐅᔪᓂ.
- ᐊᒃᖢᓗᐊᕐᓂᐅᔪᒥᒃ ᒥᑭᒡᓕᒋᐊᖅᑎᑦᓯᓯᒪᓕᕐᓗᑕ ᐋᖅᑭᒃᓱᐃᓯᒪᓂᒃᑯᑦ ᐱᓕᕆᐊᖃᕈᑎᒃᓴᓂᒃ ᑮᓇᐅᔭᓕᐅᕈᑎᐅᕙᒃᑐᓄᑦ ᑐᖖᒐᕝᕕᐅᓂᐊᖅᑐᓂᒃ ᐱᓕᕆᖃᑎᒋᓯᒪᓗᑎᒍᑦ ᐃᓄᐃᑦ, ᑐᕌᖅᑎᑕᐅᓯᒪᓇᔭᖅᑐᓂᒃ ᑕᐃᒃᑯᓄᖓ ᐊᒃᖢᓗᐊᖅᑑᓪᓗᑎᒃ ᐅᕝᕙᓘᓐᓃᑦ ᐅᖓᑎᓗᐊᖓᓄᑦ ᐊᒃᖢᓗᐊᕐᓂᐅᔪᒥ ᓇᓗᓇᐃᖅᓯᒪᔾᔪᑎᓂᑦ ᐃᓅᓯᖃᖅᑐᓄᑦ ᐋᖅᑭᒃᑕᐅᓯᒪᓪᓗᑎᒃ ᐊᑐᖅᓱᒋᑦ ᐊᕕᒃᑐᖅᓯᒪᓂᐅᔪᒥ ᐊᒻᒪᓗ ᓄᓇᓕᒋᔭᐅᔪᓂ ᐊᓐᓇᐅᒪᓇᓱᐊᕈᑎᑦ ᐊᑭᒋᕙᒃᑕᖏᑦ ᐊᒻᒪᓗ ᑮᓇᐅᔭᓕᐅᕐᓂᕐᓄᑦ ᓇᓗᓇᐃᖅᓯᔾᔪᑎᑦ.
- ᒥᑭᒡᓕᒋᐊᖅᑎᓯᒪᓕᕐᓗᒋᑦ ᐊᖏᔫᑎᐅᓪᓗᑎᒃ ᑐᑭᓯᒋᐊᕐᕕᒃᓴᖁᑎᐅᔪᓂ, ᖃᐅᔨᓴᐃᓂᕐᓂ ᐊᒻᒪᓗ ᒪᓕᒐᖁᑎᓂ ᐃᓚᑰᓂᖃᕐᕕᐅᔪᑦ ᐃᓄᐃᑦ ᓄᓇᓕᓕᒫᖏᓐᓂ, ᐱᓗᐊᖅᑐᒥᒃ ᑕᐃᒃᑯᐊ ᐊᒃᑐᐃᓂᖃᖅᓯᒪᔪᓂ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒧᑦ ᐊᒻᒪᓗ ᐱᔾᔪᑎᒋᓗᐊᕐᓗᒍ, ᐳᕙᒡᓗᓕᖃᑦᑕᕐᓂᐅᔪᓄᑦ, ᐃᑲᔪᖅᑐᐃᓂᖅᑎᒍᑦ ᐃᓄᖕᓂᑦ ᓯᕗᓕᖅᑎᖃᕐᓗᑎᒃ ᑐᑭᓯᒋᐊᕐᕕᒃᓴᖁᑎᓕᕆᓂᕐᒥ ᐱᓕᕆᐊᖃᖃᑎᒌᖕᓂᐅᔪᓄᑦ.
ᑲᓇᑕᒥ ᒐᕙᒪᖓᑦ ᐱᓕᕆᓂᖃᓪᓚᕆᓕᖅᓯᒪᕗᑦ ᐱᓕᕆᐊᖃᖃᑎᒋᓪᓗᓂᒋᑦ ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᐃᑦ ᓄᓇᓕᒋᔭᖏᑦ ᐊᒻᒪᓗ ᑲᑐᔾᔨᖃᑎᒌᖑᔪᑦ, ᐊᕕᒃᑐᖅᓯᒪᓂᕐᓂ ᒐᕙᒪᒋᔭᐅᔪᑦ, ᐊᒻᒪᓗ ᐊᓯᖏᑦ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᕐᕕᐅᔪᑦ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐳᕙᒡᓗᓕᖃᑦᑕᕐᓂᐅᑉ ᓄᖑᑎᑕᐅᓯᒪᓕᕐᓂᒃᓴᖓᓄᑦ. ᐃᑲᔪᖅᑎᒌᒃᓱᑎᒃ ᐱᓕᕆᐊᖃᖃᑎᒋᓪᓗᒋᑦ ᐊᔾᔨᒌᖖᒍᐅᖅᑐᑦ ᐃᓄᐃᑦ ᐱᓕᕆᐊᖃᖃᑎᒋᔭᐅᔪᑦ, ᐸᕐᓇᐅᑎᑦ ᐱᓕᕆᓂᖃᕐᓂᕐᒥ ᐊᒻᒪᓗ ᐸᕐᓇᐅᑎᓕᐊᖑᓯᒪᔪᑦ ᐋᖅᑭᒃᓱᐊᖑᓕᖅᐳᑦ ᐃᓱᒪᒋᖃᓯᐅᑎᓯᒪᓪᓗᒋᑦ ᐃᓄᐃᑦ ᐃᓅᓯᖏᑦ, ᐃᓕᖅᑯᓯᑐᖃᖏᑦ ᐊᒻᒪᓗ ᐱᐅᓯᑐᖃᖏᑦ.
ᐃᓄᐃᑦ ᐊᑐᖅᓯᒪᔭᖏᑦ ᐊᒻᒪᓗ ᓂᐱᖏᑦ ᐱᓕᕆᓂᕆᔭᑦᑕ ᓯᕗᓂᐊᓃᑎᑦᓱᒋᑦ, ᑲᔪᓯᑎᑦᑎᓯᒪᕗᒍᑦ ᐃᑲᔪᖅᑐᐃᓂᑦᑎᓐᓂᒃ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᐅᔪᓂᒃ ᐃᓄᐃᑦ ᓄᓇᓕᖏᓐᓂ. ᑲᑐᔾᔨᓂᖃᖅᓗᑕ ᐱᓕᕆᐊᒃᓴᕆᔭᕗᑦ ᐅᖓᑖᓄᐊᖅᑎᑕᐅᓯᒪᕗᑦ ᐳᕙᒡᓗᓕᖃᑦᑕᕐᓂᐅᔪᓂᒃ ᒥᑭᒡᓕᒋᐊᖅᑎᑦᓯᓯᒪᓕᕐᓂᒃᓴᒥᑦ ᐊᒻᒪᓗ ᓄᖑᑎᑕᐅᓯᒪᓕᕐᓂᒃᓴᖓᓂᑦ ᐃᓄᐃᑦ ᓄᓇᖓᓐᓂᑦ; ᑲᑐᔾᔨᓂᖃᖅᓱᑕ, ᐃᓄᐃᑦ ᐊᒃᖢᐃᑦᑑᓕᖅᑎᑕᐅᓂᒃᓴᖓᓐᓂᒃ ᑕᒪᐃᓐᓂ ᐊᕕᒃᑐᖅᓯᒪᓂᐅᔪᓂ ᐱᑕᖃᓕᖅᑎᑦᓯᓇᓱᒃᑐᒍᑦ.”