ᐃᓄᐃᑦ ᑕᐱᕇᑦ ᑲᓇᑕᒥ 2022-ᒧᑦ ᑮᓇᐅᔭᖅᑑᑎᒃᓴᓄᑦ ᐋᖅᑮᓯᒪᓕᓚᐅᖅᑳᕋᑎᒃ ᑐᓂᓯᒪᔭᖏᑦ ᑐᕌᖓᑎᑕᐅᕗᑦ ᐱᒻᒪᕆᐅᓗᐊᕐᓂᖏᑕ ᐊᖏᔪᒻᒪᕆᖕᒥᒃ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓂᕐᓄᑦ ᓇᓗᓇᐃᖅᑕᐅᓯᒪᓪᓗᑎᒃ ᓯᕗᓪᓕᖅᐸᐅᑎᑕᒃᓴᐅᔪᓂ ᐱᓕᕆᐊᓂᑦ ᐱᑕᖃᓕᖅᐸᓪᓕᐊᓂᖃᕐᓗᑎᒃ ᐃᑲᔪᕈᑎᒃᓴᓂᒃ ᐃᓄᓕᒫᓄᑦ ᓴᖅᑭᑉᐸᓪᓕᐊᑎᑦᓯᓕᕈᒫᖅᑐᓂᑦ. ᐃᓄᐃᑦ ᓄᓇᖓᑦ ᐊᖏᓗᐊᒻᒪᕆᒃᑐᒥᒃ ᐃᒡᓗᓕᕆᓂᕐᓂ ᑐᐊᕕᐅᕐᓇᖅᓯᓯᒪᔪᖃᕐᒪᑕ ᐊᒻᒪᓗ ᖁᑦᑎᓗᐊᖅᑐᒥᒃ ᑎᑎᕋᖅᑕᐅᓯᒪᓪᓗᑎᒃ ᓂᕿᒋᔭᒃᓴᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᖏᑦ ᑕᐃᒪᐅᖏᓐᓇᐅᔭᕐᒪᑕ ᓇᓕᑐᐃᓐᓇᖏᓂ ᓄᓇᖃᖅᑳᕐᓯᒪᔪᑦ ᐃᓅᖃᑎᒌᒃᑐᖁᑎᖏᓐᓂ ᓄᓇᖃᖅᓱᑎᒃ ᐱᕙᓪᓕᐊᑎᑕᐅᓯᒪᑦᑎᐊᖅᑐᓂ ᓄᓇᕐᔪᐊᒥ. ᑕᒪᒃᑯᐊ ᓈᒻᒪᖖᒋᑦᑐᒃᑯᑦ ᐊᒃᑐᐃᓯᒪᓕᕐᒪᑕ ᐋᓐᓂᐊᖃᓕᖅᑕᐃᓕᒪᓂᐅᔪᓄᑦ ᐊᒻᒪᓗ ᖃᓄᐃᖖᒋᑦᑎᐊᕆᐊᖃᕐᓂᕐᓄᑦ, ᐃᓕᓐᓂᐊᕐᓂᓕᕆᓂᕐᓄᑦ, ᐃᖅᑲᓇᐃᔭᕐᓂᓕᕆᓂᕐᓄᑦ, ᑮᓇᐅᔭᓕᐅᕋᓱᒍᑕᐅᕙᒃᑐᓄᑦ, ᐱᐅᓯᑐᖃᕆᔭᐅᔪᑦ ᑲᔪᓰᓐᓇᕈᓐᓇᕐᓂᖏᓐᓄᑦ ᐊᒻᒪᓗ ᑲᑐᔾᔨᓂᖃᕐᓗᑕ ᓯᕗᒻᒧᒋᐊᖅᑎᑦᓯᔪᓐᓇᕐᓂᑦᑎᓐᓄᑦ ᐊᒥᖅᑲᕐᓱᑎᒍ ᐱᓕᕆᐊᒃᓴᕆᔭᑦᑎᓐᓂᒃ ᐱᓕᕆᓂᖃᕈᓐᓇᕐᓂᑦᑎᓐᓄᑦ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᖕᓂᕐᒥᒃ ᐋᓐᓂᐊᕐᓂᖃᓕᕐᓂᐅᕙᒃᑐᒧᑦ ᐃᓄᐃᑦ ᓄᓇᖓᓐᓂ ᐅᑭᐅᖓᑕ 2030 ᓯᕗᕐᖓᓂ. 2022-2023 ᑮᓇᐅᔭᓕᕆᓐᓇᐅᑉ ᐅᑭᐅᖓᓂ, ᐃᓄᐃᑦ ᑕᐱᕇᑦ ᑲᓇᑕᒥ ᕿᓂᓕᖅᓯᒪᕗᑦ ᐃᓕᔭᐅᖃᑕᐅᓯᒪᓕᖁᓪᓗᒋᑦ ᐃᓄᖕᓄᑦ ᑐᕌᖓᑎᑕᐅᓪᓗᑎᒃ ᓯᕗᓪᓕᖅᐸᐅᑎᑕᒃᓴᐅᔪᓂᒃ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᖃᕐᑎᑦᑎᓂᖏᓐᓂ ᓯᕗᒻᒧᒋᐊᖅᑎᑦᓯᓯᒪᔪᓂᒃ ᐱᓯᒪᓕᕐᓂᕐᒧᑦ ᑐᖖᒐᕕᖁᑎᒃᓴᐅᔪᓂᒃ ᐊᒻᒪᓗ ᓯᕗᓪᓕᖅᐸᐅᑎᑕᐅᖁᔭᐅᔪᓂᒃ ᓇᓗᓇᐃᖅᑕᐅᓯᒪᓪᓗᑎᒃ ᐃᓄᐃᑦ ᓄᓇᖓᓐᓂ ᓇᓗᓇᐃᖅᓯᓯᒪᔾᔪᑎᖏᓂ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖕᓂᖏᓐᓂ.
