Inuit Tapiriit Kanatamikkut arraagutamaaqsiutimik katimatillugit Iqalunni Sitipirimi, Inuit Tapiriit Kanatamikkut Katimajingit tunisiqattalauqtut arraagutamaat atuqtauvattumi Inuit Tapiriit Kanatami Ilitaqsigutinginni ajunngittullariujunut inunnut Inuit Nunanganni. Ilitaqsijjutiit tunijaugajuttut nunaqarviujumut avittuqsimajuni katimaviujumi arraagutamaaqsiutimik, katimanitsaqalauraluaqtut Nunavimmi. Ilitaqsijjutigilugu tunngasuttitaunirilauqtattinni Iqalunni, Katimajiit ilitaqsiniqalauqtut atausirmik Nunavimmiumik piliriaqatsiaqsimaninganut Inunnik arraagurnik aniguqtuni.
Ilitaqsijjutiit ilaqaqtut Inuit Iliqkusituqarnik Utiqtitsigiarnirmut Ilitaqsijjuti, tunijaulauqtuq tagvani arraagurmi sitamagijauliqtuni pigialauqsimammanik 2017mi. Taanna ilitaqsijjuti saqkitaulauqtuq Inuit Tapiriit Kanatamikkunnut ilitarijjutaulluni piliriangugiaqarninga atuqtauqattaqsimaningita iliqkusituqattinnuungajut ittarnisaillu. Piliriangulauqtuq kiujjutaulluni isumaaluutauvalliatuinnarninganik iliqkusituqattinnuungajut atuqtauvalliatuinnarninginni kanatami nunarjualimaarmillu, ilitaqsijjutiullunillu piliriangujunik nunattinni utiqtitauqullugit pigijavut. Tagvuuna ilitaqsijjutikkut niriuppugut tukisimaniqsauliqullugit qanuq piliriagunnarmangaat iliqkusituqarnuungajut atuqtauvanningit asinginnut, piliriqatigillugit Inuit.
Inuit Tapiriit Kanatamiikkut qujannamiiqtut ilitarijaujjutitaalauqtulimaarnik ikajuqtuisimaninginnut nunanginni Inutuinnalimaarnillu.
Tunijaujuq Aluki Kotierkmut, Nunavut Tunngavik Timiqutaa
Inuit Tapiriit Kanatami Sivumuagiaqtitsiniq Aanniaqarnanngittulirinirmi Ilitaqsijjuti
Ooleepika Ikkidluak
Ooleepika niruaratsaliangulauqtuq Nunavut Tunngavik Timiqutaanut piliriaqatsialaurninganut Nuvagjuarnaq-19 qanimannaqtukkuuqtilluta. Saqkijaaqattainnalauqtuq aanniaqarnanngittulirijikkut tusaqtitsigutinginnik pijunik Sivuliqtinganik Nunavut ammalu Aanniaqarnanngittulirijimmarimmi, tusaqtitsinginnapattuni tusaqtaugialinnik Inuktitut atsururnaqtukkuuqtilgit kikkulimaat. Piliriaqarnirilauqtanga pimmariulauqtuq angiqsimagiarnirmut aanniaqarnanngittulirijikkut malittauqujanginnik inunnuungajunik, pimmarimmillu piliriaqalauqtuni qanuiqunagit attanaqtumiiqunagillu nunavummiut. Ooleepika tusaajiusimaliqtuq arraagurnut 30nut saqkijaatsiaqattaliqtunillu aanniaqarnanngittulirijikkunnut saqkijaaqtitaujuni. Inuit Tapiriit Kanatamiikkut qujannamiiqtut qaujimajitarijauninganut Inuktitut piliriaqallarinninganullu qanuiqunagit nunaqkatingit.
Tunijaujuq Pita Aatamimut, Makivik Kuapariisakkut
Inuit Tapiriit Kanatami Sivumuagiaqtitsiniq Inuit Iliqkusinganni ilitaqsijjuti
Johnny May Nukaqsiq
Juunia (Johnny) May qimutsiqaqsimaliqtuq taimannganik makkuttuulaurnirmini. Maanna ukiuqaliqtuq 40nginnik isuliliqtunik, Juunia uqannguaqtuq qimutsiqarasuarniariaq ukiuqaliratarluni 80nik. Qimutsiqalilauqsimajuq ivakkarianngalauqtinnagit, ivakkaqataunnginnaqattaqsimallunillu iluunnagalanginnik ivakkarniujunik, ilainnanginnik arraagurnik ivakkanngittuni. Ilagijaulauqsimajuq quliungigaqtunut ivakkariuqtunut arraaguit 21 naasimaliqtut. Qimmiqanginnarniaqtuq ivakkaqatauqattarunniiraluaruni, quviagillarimmagit. juunia kiggaqtuijitsiavaujuq kajusititsinirmik iliqkusituqarminik inutuinnaunirmik. Makivikkunnut Katimaji Elijah Ningiuruvik niruaratsaliulauqtuq Juuniamik atsuruutiqaqtuni inuusirmini piruqsailluni qimutsiqarnirmillu.
Tunijaujuq Pita Aatamimut, Makivik Kuapariisakkut
Mary Joanne Kauki
Inuit Tapiriit Kanatami Sivumuagiaqtitsiniq Inuit Uqausinginnik Ilitaqsijjuti
Mary Joanne ilisaijiusimaliqtuq amisunik, amisummarinnik arraagurnik. Quviagijaqallarittuq ilisaijiunirmini inuusirminillu tunisisimalluni makkuttunut ilisaigutiqaqtuni uqausittinnik. Atsuruutiqarninga ilinniaqtinut qaangiutiqattaqsimajuq atuqtaugajuttumik 9-mi 5-mut iqkanaijaqtunut. Piliriaqaqsimajuq namminiq iqkanaijarnautinnagu ilinniaratsaliuqpattuni iliqullugit ilisaqtangit. Mary Joanne nipiqaqtiummijuq nalimugiinnginniujunut iqkanaijarvinni namminirlu ilisaigutiqaqsimaliqtuq timiujunut asittinnut aulatausimanirmi unikkaarutiqaqattaqsimallunillu pijjutiqaqtunik asittinnut aulataunirmi. Makivikkut Katimajinga Vinnie Baron niruaratsaliulauqtuq Mary Joannemik ilitarillu atsuruutiqaqsimaninga ilisaijiunirmik namminirlu pilirigiarutiqaqsimaninganut taavungagiakkanniq ilinniaqtiqutiminut.
Tunijaujuq Pita Aatamimut, Makivik Kuapariisakkut
Innatuqaq Joseph Nassak
Inuit Tapiriit Kanatami Sivumuagiaqtitsiniq Qaujimajitaunirmut Ilitaqsijjuti
Joseph Nassak ilauqatausimaliqtuq aulatsivik makkuttunik aujakkut pilirititsinirmik ilisaijiunikkut. Makivikkunnut Katimaji Etua Kaukai ammalu Kangirsurmut Maija Noah Eetook niruaratsaliulauqtuuk Josephmik ilitarillugu ilisaiqattaqsimaninga Kangirsumiut makkuttunginnik iliqkusituqalirinirmik piqkusituqalirinirmillu, annaumagunnarnirmik nunami imavimmillu, qanuittukkut sila aturatsaummangaat aturatsaunngimmangaarlu sunaillu nirijatsait annaumajjutaugunnarmangaata. Naalautikkuuqpammijuq uqausiqaqtuni Inuit pinnarijanginnik ilauqatauvattunillu Inuit pinnguarusituqanginnik quviasugviuliraimmat takujaugunnaqpakkilluni inngititsitillugu quviasugvimmi.
Tunijaujuq Pita Aatamimut, Makivik Kuapariisakkut
Paulusie Novalinga
Inuit Tapiriit Kanatami Sivumuagiaqtitsiniq Inuit Qaujimajitaunirmut Ilitaqsijjuti
Paulusie niruaratsaliungulauqtuq Makivikkunnut Katimajimut Kulu Tukalakmut taqalauqsimagani saqkijaaqtitsivanninganut piqkusituqattinnik amisunik, amisummarininni arraagurnut. Ilagijaulauqsimajuq sivulirnikkut pigiaqtitsilluni Nukaqsiit Unataqtitsanik Nunavimmi, quviagijaullariliqsimalluni tamanna Kanatalimaarmi. Aulatsisimaliqtuq aujakkut ilisaivattuni makkuttunik arraaguit 20 ungataanut nunami piliriangugialinnik. Tamanna innarnik aturiaqtitsisimaliqtuq iliqkusituqarminni. Annaumagasuarnirmik ilisaiqattaqsimaliqtuq silakammautillugu, atuqtuni piqkusituqainnakasannik. Ilangit ilisaqsimajangit ilisaijiuqattaqsimaliqtut Inunnik asinginnillu ungasittumiittunik. Paulusie piliriaqaqsimallarimmijuq utiqtitsigiarnirmik Inuit qimmituqanginnik, sivunituqangagut Ivakkarniq atulauqtinnagu. Qimutsiqalaqiliqsutik amisuit puvirniqturmi nunavimmilluja
Tunijaujuq Pita Aatamimut, Makivik Kuapariisakkut
Inuugunniiqtuq Putulik Papigatuk
Inuit Tapiriit Kanatami Sivumuagiaqtitsiniq Avittuqsimajurni Pinailutaqarnirjunut Ilitaqsijjuti
Inuugunniilauqtuq Putulik Papigatuk atiliuqtiuqataulauqsimajuq tamakkiinnik James Bay Nunataarnirmut Angiqatigiinniujumi ammalu Nunavimmi Inuit Nunataarnirmut Angiqatigiinniujumi, inuusilimaarmini katimajiunirmik piliriaqaqsimalluni, nipigijaulluni iliqkusituqarnuungajunik iliqkusituqarnuungajunullu pinailutaujunut piliriatsanullu, nunalimmini avittuqsimajunillu. Ilauqataullarilauqsimajuq nunamik tigumiaqtikkunnut ammalu uumajurniaqtikkut timiqutinginni, piqataullugit avatilirinirmut katittaqtut. Niruaratsaliangulauqtuq Makivikkunnut Katimajimut Aatami Alakumut iqqaumagillugit inuusilimaangani piliriarisimajangit taavungalimaarlu attuiniqaqsimaninganik kinguvaanginnut.
Tunijaujuq Pita Aatamimut, Makivik Kuapariisakkut
Josepi Padlayat
Inuit Tapiriit Kanatami Sivumuagiaqtitsiniq Avittuqsimajurni Pinailutaqarnirjunut Ilitaqsijjuti
Josepi pigiaqtitsijisajuq Tusaqtuliriutinut Qanuqtuurnirmik Nunavimmi, piqasiullugu pigiaqtitausimaninga Tarramiut Nipingakkunni. Ilauqataulauqsimajuq pigiaqtitautillugit naalautikarviit nunalinni avittuqsimajunillu naalautiqarvinni, pivaalliriaqtitauninginnillu naalautikkuurutiit Nunavimmi. Josepi tigumiaqattaqsimaliqtuq sivuliqtiunirmi tamakkiinnik Avataq Iliqkusilirivimmi ammalu Nunavimmi Ilusilirijikkut Katimajinginnut. Niruaratsaliangulauqtuq Makivikkunnut Katimajimut Aatami Alakumut pijitsiqsimaninganut Nunavimmut Nunavimmiunullu.
Tunijaujuq Pita Aatamimut, Makivik Kuapariisakkut
Inuugunniiqsimaliqtuq Noah Qumak
Inuit Tapiriit Kanatami Sivumuagiaqtitsiniq Avittuqsimajuni Pinailutaujunut Ilitaqsijjuti
Noah Qumak niruaratsaliangulauqtuq Makivikkunnut Katimajimut Aatami Alakumut ammalu Salluit Maijangannut Paulusie Papigaturmut ikajuqsimanirijanganut gavamalirinirmut aaqkitsimaniujunik ullumiujuq Nunavimmi. Ilagijaulauqsimajuq sivulliqpaarnut Inunnut ilaulluni nunalinni, avittuqsimajuni Kanatamillu Inuit ilauliqsutik gavamalirinirmi. Ilagijaulluni angutiulluni nunavimmiingaaqsimajuq katiqatiqaqsimalluni silataaniingaaqtunik Nunaviup avittuqsimajunik, tapiriiliqtitsilauqsimajuq inunnik atausirmik nipiqaliqtillugit. Noah ilaullarilauqsimajuq saqkiqtitautillugu Inuit Tapiriitsat Kanatami (asijjilauqsimajuq Inuit Tapiriit Kanatamimut Noah ilautillugu 1971mi) kiggaqtuilauqsimajuq Sallurnik Nunavimmillu katimaqatiqaqtillugit laavatuamiunik nunatsiarmiunillu. Ungasittunut aullaqattalauqsimajuq suurlu Quebec Citymut ammalu Qurluqtuurmut saqkijaaqtitsigiaqtuqsuni namminiqsurnirmik gavamalirinikkut tapiriiliqtitsillunillu inunnik piqasiullugit katimajiit inugianngaminirnut pijunnautilinnut, pigiaqtitausimaninga Inuit Tapiriit Kanatamikkut pigiaqtitausimallutillu tallimait timiujut kiggatuqtut inunnik, piqasiullugit: Nunavimmi Inuit Katujjiqatigiit, Labradormi Inuit Katujjiqatigiit, Kitikmeot Inuit Katujjiqatigiit, Kivallirmi Inuit Katujjiqatigiit ammalu Qikiqtani Inuit Katujjiqatigiit.
Tunijaujuq Natan Obedmut, Inuit Tapiriit Kanatami
Avataq Iliqkusituqalirigvik
Inuit Tapiriit Kanatami Sivumuagiaqtitsiniq Utiqtitsigiarnirmut Ilitaqsijjuti
Avataq Iliqkusituqalirigvik tunijaujuq ilitaqsijjutimut ilausimaninganut utiqtitsinirmik piulitsigiarnirmillu Nunavik Inuit iliqkusituqanginnik avittuqsimajunginnik Kanatalimaarmillu. Piliriarisimajangit ilaqaqtut Avatakkut piliriarisimajangat utiqtitsinirmik timivinirnik piijaqtaulauqtuvinirnik ittarnisaqsiuqtinut 1967ngutillugu Inuit iliviqarvinginnit akunninganik Umiujaullu Kuujjuaraapiullu. Kinguvaangit ittarnisaqsiuqtiup utiqtitsilauqtut timiminirnik 2009mi. Avataq piliriaqaqsimammijuq pimmarinnik ittarnisarnik piulitsigiarnirmi Nunavik nunalinginnik, piqasiullugit piliriangusimajut inukjuarmi 2012mi saggaqtutit sanarrutivinirnik sakkuvinirnillu tunivinirnik, tuniviniit sivullivininginnik, ammalu Inuit atuqsimajanginnik. Amisuullutik piliriarisimajangit, Avataq sivumuagiaqtitsigasuaqtut Qajaqtalimmi sanannguaqtausimajut qanigijaani Kangiqsuup saputijauqullugit ilitarijausimalutit nunarjualimaarmi ittarnisaqarvinnut. Ujaralaangulluni qikiqtaq sanannguagaqaqtuq 170 kiinannguarnik sanasimallutit ukkusitsarmi takiniqaqtumi 120-uuttuutiit qajannguangulluni qatsinninga.

Natan Obed, Angijuqqaaq Inuit Tapiriit Kanatamikkunni, ammalu Aluki Kotierk, Angijuqqqaaq Nunavut Tunngavik Timiqutaanut, tunisijut Inuit Tapiriit Kanatamikkut Sivumuagiaqtitsinirmut Ilusilirinirmut Ilitaqsijjutimik Uliipika Ikilluarmut (qitinganiittuq) Iqalunni.