ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᑎᓪᓗᒋᑦ ᐃᖃᓗᓐᓂ ᓯᑎᐱᕆᒥ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑲᑎᒪᔨᖏᑦ ᑐᓂᓯᖃᑦᑕᓚᐅᖅᑐᑦ ᐊᕐᕌᒍᑕᒫᑦ ᐊᑐᖅᑕᐅᕙᑦᑐᒥ ᐃᓄᐃᑦ ᑕᐱᕇᑦ ᑲᓇᑕᒥ ᐃᓕᑕᖅᓯᒍᑎᖏᓐᓂ ᐊᔪᙱᑦᑐᓪᓚᕆᐅᔪᓄᑦ ᐃᓄᓐᓄᑦ ᐃᓄᐃᑦ ᓄᓇᖓᓐᓂ. ᐃᓕᑕᖅᓯᔾᔪᑏᑦ ᑐᓂᔭᐅᒐᔪᑦᑐᑦ ᓄᓇᖃᕐᕕᐅᔪᒧᑦ ᐊᕕᑦᑐᖅᓯᒪᔪᓂ ᑲᑎᒪᕕᐅᔪᒥ ᐊᕐᕌᒍᑕᒫᖅᓯᐅᑎᒥᒃ, ᑲᑎᒪᓂᑦᓴᖃᓚᐅᕋᓗᐊᖅᑐᑦ ᓄᓇᕕᒻᒥ. ᐃᓕᑕᖅᓯᔾᔪᑎᒋᓗᒍ ᑐᙵᓱᑦᑎᑕᐅᓂᕆᓚᐅᖅᑕᑦᑎᓐᓂ ᐃᖃᓗᓐᓂ, ᑲᑎᒪᔩᑦ ᐃᓕᑕᖅᓯᓂᖃᓚᐅᖅᑐᑦ ᐊᑕᐅᓯᕐᒥᒃ ᓄᓇᕕᒻᒥᐅᒥᒃ ᐱᓕᕆᐊᖃᑦᓯᐊᖅᓯᒪᓂᖓᓄᑦ ᐃᓄᓐᓂᒃ ᐊᕐᕌᒍᕐᓂᒃ ᐊᓂᒍᖅᑐᓂ.
ᐃᓕᑕᖅᓯᔾᔪᑏᑦ ᐃᓚᖃᖅᑐᑦ ᐃᓄᐃᑦ ᐃᓕᖅᑯᓯᑐᖃᕐᓂᒃ ᐅᑎᖅᑎᑦᓯᒋᐊᕐᓂᕐᒧᑦ ᐃᓕᑕᖅᓯᔾᔪᑎ, ᑐᓂᔭᐅᓚᐅᖅᑐᖅ ᑕᒡᕙᓂ ᐊᕐᕌᒍᕐᒥ ᓯᑕᒪᒋᔭᐅᓕᖅᑐᓂ ᐱᒋᐊᓚᐅᖅᓯᒪᒻᒪᓂᒃ 2017ᒥ. ᑖᓐᓇ ᐃᓕᑕᖅᓯᔾᔪᑎ ᓴᖅᑭᑕᐅᓚᐅᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ ᐃᓕᑕᕆᔾᔪᑕᐅᓪᓗᓂ ᐱᓕᕆᐊᖑᒋᐊᖃᕐᓂᖓ ᐊᑐᖅᑕᐅᖃᑦᑕᖅᓯᒪᓂᖏᑕ ᐃᓕᖅᑯᓯᑐᖃᑦᑎᓐᓅᖓᔪᑦ ᐃᑦᑕᕐᓂᓴᐃᓪᓗ. ᐱᓕᕆᐊᖑᓚᐅᖅᑐᖅ ᑭᐅᔾᔪᑕᐅᓪᓗᓂ ᐃᓱᒫᓘᑕᐅᕙᓪᓕᐊᑐᐃᓐᓇᕐᓂᖓᓂᒃ ᐃᓕᖅᑯᓯᑐᖃᑦᑎᓐᓅᖓᔪᑦ ᐊᑐᖅᑕᐅᕙᓪᓕᐊᑐᐃᓐᓇᕐᓂᖏᓐᓂ ᑲᓇᑕᒥ ᓄᓇᕐᔪᐊᓕᒫᕐᒥᓪᓗ, ᐃᓕᑕᖅᓯᔾᔪᑎᐅᓪᓗᓂᓪᓗ ᐱᓕᕆᐊᖑᔪᓂᒃ ᓄᓇᑦᑎᓐᓂ ᐅᑎᖅᑎᑕᐅᖁᓪᓗᒋᑦ ᐱᒋᔭᕗᑦ. ᑕᒡᕘᓇ ᐃᓕᑕᖅᓯᔾᔪᑎᒃᑯᑦ ᓂᕆᐅᑉᐳᒍᑦ ᑐᑭᓯᒪᓂᖅᓴᐅᓕᖁᓪᓗᒋᑦ ᖃᓄᖅ ᐱᓕᕆᐊᒍᓐᓇᕐᒪᖔᑦ ᐃᓕᖅᑯᓯᑐᖃᕐᓅᖓᔪᑦ ᐊᑐᖅᑕᐅᕙᓐᓂᖏᑦ ᐊᓯᖏᓐᓄᑦ, ᐱᓕᕆᖃᑎᒋᓪᓗᒋᑦ ᐃᓄᐃᑦ.
ᐃᓄᐃᑦ ᑕᐱᕇᑦ ᑲᓇᑕᒦᒃᑯᑦ ᖁᔭᓐᓇᒦᖅᑐᑦ ᐃᓕᑕᕆᔭᐅᔾᔪᑎᑖᓚᐅᖅᑐᓕᒫᕐᓂᒃ ᐃᑲᔪᖅᑐᐃᓯᒪᓂᖏᓐᓄᑦ ᓄᓇᖏᓐᓂ ᐃᓄᑐᐃᓐᓇᓕᒫᕐᓂᓪᓗ.
ᑐᓂᔭᐅᔪᖅ ᐊᓗᑭ ᑰᑦᑎᕐᒧᑦ, ᓄᓇᕗᑦ ᑐᙵᕕᒃ ᑎᒥᖁᑖ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᓕᑕᖅᓯᔾᔪᑎ
ᐅᓖᐱᑲ ᐃᑭᓪᓗᐊᖅ
ᐅᓖᐱᑲ ᓂᕈᐊᕋᑦᓴᓕᐊᖑᓚᐅᖅᑐᖅ ᓄᓇᕗᑦ ᑐᙵᕕᒃ ᑎᒥᖁᑖᓄᑦ ᐱᓕᕆᐊᖃᑦᓯᐊᓚᐅᕐᓂᖓᓄᑦ ᓄᕙᒡᔪᐊᕐᓇᖅ-19 ᖃᓂᒪᓐᓇᖅᑐᒃᑰᖅᑎᓪᓗᑕ. ᓴᖅᑭᔮᖃᑦᑕᐃᓐᓇᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᖅᑎᑦᓯᒍᑎᖏᓐᓂᒃ ᐱᔪᓂᒃ ᓯᕗᓕᖅᑎᖓᓂᒃ ᓄᓇᕗᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒻᒥ, ᑐᓴᖅᑎᑦᓯᖏᓐᓇᐸᑦᑐᓂ ᑐᓴᖅᑕᐅᒋᐊᓕᓐᓂᒃ ᐃᓄᒃᑎᑐᑦ ᐊᑦᓱᕈᕐᓇᖅᑐᒃᑰᖅᑎᓪᒋᑦ ᑭᒃᑯᓕᒫᑦ. ᐱᓕᕆᐊᖃᕐᓂᕆᓚᐅᖅᑕᖓ ᐱᒻᒪᕆᐅᓚᐅᖅᑐᖅ ᐊᖏᖅᓯᒪᒋᐊᕐᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᑦᑕᐅᖁᔭᖏᓐᓂᒃ ᐃᓄᓐᓅᖓᔪᓂᒃ, ᐱᒻᒪᕆᒻᒥᓪᓗ ᐱᓕᕆᐊᖃᓚᐅᖅᑐᓂ ᖃᓄᐃᖁᓇᒋᑦ ᐊᑦᑕᓇᖅᑐᒦᖁᓇᒋᓪᓗ ᓄᓇᕗᒻᒥᐅᑦ. ᐅᓖᐱᑲ ᑐᓵᔨᐅᓯᒪᓕᖅᑐᖅ ᐊᕐᕌᒍᕐᓄᑦ 30ᓄᑦ ᓴᖅᑭᔮᑦᓯᐊᖃᑦᑕᓕᖅᑐᓂᓪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᓴᖅᑭᔮᖅᑎᑕᐅᔪᓂ. ᐃᓄᐃᑦ ᑕᐱᕇᑦ ᑲᓇᑕᒦᒃᑯᑦ ᖁᔭᓐᓇᒦᖅᑐᑦ ᖃᐅᔨᒪᔨᑕᕆᔭᐅᓂᖓᓄᑦ ᐃᓄᒃᑎᑐᑦ ᐱᓕᕆᐊᖃᓪᓚᕆᓐᓂᖓᓄᓪᓗ ᖃᓄᐃᖁᓇᒋᑦ ᓄᓇᖅᑲᑎᖏᑦ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐃᓄᐃᑦ ᐃᓕᖅᑯᓯᖓᓐᓂ ᐃᓕᑕᖅᓯᔾᔪᑎ
ᔮᓂ ᒪᐃ ᓄᑲᖅᓯᖅ
ᔫᓂᐊ (ᔮᓂ) ᒪᐃ ᕿᒧᑦᓯᖃᖅᓯᒪᓕᖅᑐᖅ ᑕᐃᒪᙵᓂᒃ ᒪᒃᑯᑦᑑᓚᐅᕐᓂᕐᒥᓂ. ᒫᓐᓇ ᐅᑭᐅᖃᓕᖅᑐᖅ 40ᖏᓐᓂᒃ ᐃᓱᓕᓕᖅᑐᓂᒃ, ᔫᓂᐊ ᐅᖃᙳᐊᖅᑐᖅ ᕿᒧᑦᓯᖃᕋᓱᐊᕐᓂᐊᕆᐊᖅ ᐅᑭᐅᖃᓕᕋᑕᕐᓗᓂ 80ᓂᒃ. ᕿᒧᑦᓯᖃᓕᓚᐅᖅᓯᒪᔪᖅ ᐃᕙᒃᑲᕆᐊᙵᓚᐅᖅᑎᓐᓇᒋᑦ, ᐃᕙᒃᑲᖃᑕᐅᙱᓐᓇᖃᑦᑕᖅᓯᒪᓪᓗᓂᓪᓗ ᐃᓘᓐᓇᒐᓚᖏᓐᓂᒃ ᐃᕙᒃᑲᕐᓂᐅᔪᓂᒃ, ᐃᓚᐃᓐᓇᖏᓐᓂᒃ ᐊᕐᕌᒍᕐᓂᒃ ᐃᕙᒃᑲᙱᑦᑐᓂ. ᐃᓚᒋᔭᐅᓚᐅᖅᓯᒪᔪᖅ ᖁᓕᐅᖏᒐᖅᑐᓄᑦ ᐃᕙᒃᑲᕆᐅᖅᑐᓄᑦ ᐊᕐᕌᒍᐃᑦ 21 ᓈᓯᒪᓕᖅᑐᑦ. ᕿᒻᒥᖃᖏᓐᓇᕐᓂᐊᖅᑐᖅ ᐃᕙᒃᑲᖃᑕᐅᖃᑦᑕᕈᓐᓃᕋᓗᐊᕈᓂ, ᖁᕕᐊᒋᓪᓚᕆᒻᒪᒋᑦ. ᔫᓂᐊ ᑭᒡᒐᖅᑐᐃᔨᑦᓯᐊᕙᐅᔪᖅ ᑲᔪᓯᑎᑦᓯᓂᕐᒥᒃ ᐃᓕᖅᑯᓯᑐᖃᕐᒥᓂᒃ ᐃᓄᑐᐃᓐᓇᐅᓂᕐᒥᒃ. ᒪᑭᕕᒃᑯᓐᓄᑦ ᑲᑎᒪᔨ ᐃᓚᐃᔾᔭ ᓂᖏᐅᕈᕕᒃ ᓂᕈᐊᕋᑦᓴᓕᐅᓚᐅᖅᑐᖅ ᔫᓂᐊᒥᒃ ᐊᑦᓱᕉᑎᖃᖅᑐᓂ ᐃᓅᓯᕐᒥᓂ ᐱᕈᖅᓴᐃᓪᓗᓂ ᕿᒧᑦᓯᖃᕐᓂᕐᒥᓪᓗ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᒪᐊᓕ ᔫᐋᓐ ᖃᐅᒃᑲᐃ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐃᓄᐃᑦ ᐅᖃᐅᓯᖏᓐᓂᒃ ᐃᓕᑕᖅᓯᔾᔪᑎ
ᒥᐊᓕ ᔫᐋᓐ ᐃᓕᓴᐃᔨᐅᓯᒪᓕᖅᑐᖅ ᐊᒥᓱᓂᒃ, ᐊᒥᓱᒻᒪᕆᓐᓂᒃ ᐊᕐᕌᒍᕐᓂᒃ. ᖁᕕᐊᒋᔭᖃᓪᓚᕆᑦᑐᖅ ᐃᓕᓴᐃᔨᐅᓂᕐᒥᓂ ᐃᓅᓯᕐᒥᓂᓪᓗ ᑐᓂᓯᓯᒪᓪᓗᓂ ᒪᒃᑯᑦᑐᓄᑦ ᐃᓕᓴᐃᒍᑎᖃᖅᑐᓂ ᐅᖃᐅᓯᑦᑎᓐᓂᒃ. ᐊᑦᓱᕉᑎᖃᕐᓂᖓ ᐃᓕᓐᓂᐊᖅᑎᓄᑦ ᖄᖏᐅᑎᖃᑦᑕᖅᓯᒪᔪᖅ ᐊᑐᖅᑕᐅᒐᔪᑦᑐᒥᒃ 9-ᒥ 5-ᒧᑦ ᐃᖅᑲᓇᐃᔭᖅᑐᓄᑦ. ᐱᓕᕆᐊᖃᖅᓯᒪᔪᖅ ᓇᒻᒥᓂᖅ ᐃᖅᑲᓇᐃᔭᕐᓇᐅᑎᓐᓇᒍ ᐃᓕᓐᓂᐊᕋᑦᓴᓕᐅᖅᐸᑦᑐᓂ ᐃᓕᖁᓪᓗᒋᑦ ᐃᓕᓴᖅᑕᖏᑦ. ᒥᐊᓕ ᔫᐋᓐ ᓂᐱᖃᖅᑎᐅᒻᒥᔪᖅ ᓇᓕᒧᒌᙱᓐᓂᐅᔪᓄᑦ ᐃᖅᑲᓇᐃᔭᕐᕕᓐᓂ ᓇᒻᒥᓂᕐᓗ ᐃᓕᓴᐃᒍᑎᖃᖅᓯᒪᓕᖅᑐᖅ ᑎᒥᐅᔪᓄᑦ ᐊᓯᑦᑎᓐᓄᑦ ᐊᐅᓚᑕᐅᓯᒪᓂᕐᒥ ᐅᓂᒃᑳᕈᑎᖃᖃᑦᑕᖅᓯᒪᓪᓗᓂᓪᓗ ᐱᔾᔪᑎᖃᖅᑐᓂᒃ ᐊᓯᑦᑎᓐᓄᑦ ᐊᐅᓚᑕᐅᓂᕐᒥ. ᒪᑭᕕᒃᑯᑦ ᑲᑎᒪᔨᖓ ᕕᓂ ᕕᐊᕋᓐ ᓂᕈᐊᕋᑦᓴᓕᐅᓚᐅᖅᑐᖅ ᒥᐊᓕ ᔫᐋᓐᒥᒃ ᐃᓕᑕᕆᓪᓗ ᐊᑦᓱᕉᑎᖃᖅᓯᒪᓂᖓ ᐃᓕᓴᐃᔨᐅᓂᕐᒥᒃ ᓇᒻᒥᓂᕐᓗ ᐱᓕᕆᒋᐊᕈᑎᖃᖅᓯᒪᓂᖓᓄᑦ ᑖᕗᖓᒋᐊᒃᑲᓐᓂᖅ ᐃᓕᓐᓂᐊᖅᑎᖁᑎᒥᓄᑦ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᐃᓐᓇᑐᖃᖅ ᔫᓯᐱ ᓇᓴᖅ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᖃᐅᔨᒪᔨᑕᐅᓂᕐᒧᑦ ᐃᓕᑕᖅᓯᔾᔪᑎ
ᔫᓯᐱ ᓇᓴᖅ ᐃᓚᐅᖃᑕᐅᓯᒪᓕᖅᑐᖅ ᐊᐅᓚᑦᓯᕕᒃ ᒪᒃᑯᑦᑐᓂᒃ ᐊᐅᔭᒃᑯᑦ ᐱᓕᕆᑎᑦᓯᓂᕐᒥᒃ ᐃᓕᓴᐃᔨᐅᓂᒃᑯᑦ. ᒪᑭᕕᒃᑯᓐᓄᑦ ᑲᑎᒪᔨ ᐄᑐᐊ ᖃᐅᒃᑲᐃ ᐊᒻᒪᓗ ᑲᖏᕐᓱᕐᒧᑦ ᒪᐃᔭ ᓄᐊ ᐃᑦᑐᖅ ᓂᕈᐊᕋᑦᓴᓕᐅᓚᐅᖅᑑᒃ ᔫᓯᐱᒥᒃ ᐃᓕᑕᕆᓪᓗᒍ ᐃᓕᓴᐃᖃᑦᑕᖅᓯᒪᓂᖓ ᑲᖏᕐᓱᒥᐅᑦ ᒪᒃᑯᑦᑐᖏᓐᓂᒃ ᐃᓕᖅᑯᓯᑐᖃᓕᕆᓂᕐᒥᒃ ᐱᖅᑯᓯᑐᖃᓕᕆᓂᕐᒥᓪᓗ, ᐊᓐᓇᐅᒪᒍᓐᓇᕐᓂᕐᒥᒃ ᓄᓇᒥ ᐃᒪᕕᒻᒥᓪᓗ, ᖃᓄᐃᑦᑐᒃᑯᑦ ᓯᓚ ᐊᑐᕋᑦᓴᐅᒻᒪᖔᑦ ᐊᑐᕋᑦᓴᐅᙱᒻᒪᖔᕐᓗ ᓱᓇᐃᓪᓗ ᓂᕆᔭᑦᓴᐃᑦ ᐊᓐᓇᐅᒪᔾᔪᑕᐅᒍᓐᓇᕐᒪᖔᑕ. ᓈᓚᐅᑎᒃᑰᖅᐸᒻᒥᔪᖅ ᐅᖃᐅᓯᖃᖅᑐᓂ ᐃᓄᐃᑦ ᐱᓐᓇᕆᔭᖏᓐᓂᒃ ᐃᓚᐅᖃᑕᐅᕙᑦᑐᓂᓪᓗ ᐃᓄᐃᑦ ᐱᙳᐊᕈᓯᑐᖃᖏᓐᓂᒃ ᖁᕕᐊᓱᒡᕕᐅᓕᕋᐃᒻᒪᑦ ᑕᑯᔭᐅᒍᓐᓇᖅᐸᒃᑭᓪᓗᓂ ᐃᙱᑎᑦᓯᑎᓪᓗᒍ ᖁᕕᐊᓱᒡᕕᒻᒥ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᐸᐅᓗᓯ ᓄᕙᓕᙵᖅ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐃᓄᐃᑦ ᖃᐅᔨᒪᔨᑕᐅᓂᕐᒧᑦ ᐃᓕᑕᖅᓯᔾᔪᑎ
ᐸᐅᓗᓯ ᓂᕈᐊᕋᑦᓴᓕᐅᖑᓚᐅᖅᑐᖅ ᒪᑭᕕᒃᑯᓐᓄᑦ ᑲᑎᒪᔨᒧᑦ ᑯᓗ ᑐᑲᓚᒃᒧᑦ ᑕᖃᓚᐅᖅᓯᒪᒐᓂ ᓴᖅᑭᔮᖅᑎᑦᓯᕙᓐᓂᖓᓄᑦ ᐱᖅᑯᓯᑐᖃᑦᑎᓐᓂᒃ ᐊᒥᓱᓂᒃ, ᐊᒥᓱᒻᒪᕆᓂᓐᓂ ᐊᕐᕌᒍᕐᓄᑦ. ᐃᓚᒋᔭᐅᓚᐅᖅᓯᒪᔪᖅ ᓯᕗᓕᕐᓂᒃᑯᑦ ᐱᒋᐊᖅᑎᑦᓯᓪᓗᓂ ᓄᑲᖅᓰᑦ ᐅᓇᑕᖅᑎᑦᓴᓂᒃ ᓄᓇᕕᒻᒥ, ᖁᕕᐊᒋᔭᐅᓪᓚᕆᓕᖅᓯᒪᓪᓗᓂ ᑕᒪᓐᓇ ᑲᓇᑕᓕᒫᕐᒥ. ᐊᐅᓚᑦᓯᓯᒪᓕᖅᑐᖅ ᐊᐅᔭᒃᑯᑦ ᐃᓕᓴᐃᕙᑦᑐᓂ ᒪᒃᑯᑦᑐᓂᒃ ᐊᕐᕌᒍᐃᑦ 20 ᐅᖓᑖᓄᑦ ᓄᓇᒥ ᐱᓕᕆᐊᖑᒋᐊᓕᓐᓂᒃ. ᑕᒪᓐᓇ ᐃᓐᓇᕐᓂᒃ ᐊᑐᕆᐊᖅᑎᑦᓯᓯᒪᓕᖅᑐᖅ ᐃᓕᖅᑯᓯᑐᖃᕐᒥᓐᓂ. ᐊᓐᓇᐅᒪᒐᓱᐊᕐᓂᕐᒥᒃ ᐃᓕᓴᐃᖃᑦᑕᖅᓯᒪᓕᖅᑐᖅ ᓯᓚᑲᒻᒪᐅᑎᓪᓗᒍ, ᐊᑐᖅᑐᓂ ᐱᖅᑯᓯᑐᖃᐃᓐᓇᑲᓴᓐᓂᒃ. ᐃᓚᖏᑦ ᐃᓕᓴᖅᓯᒪᔭᖏᑦ ᐃᓕᓴᐃᔨᐅᖃᑦᑕᖅᓯᒪᓕᖅᑐᑦ ᐃᓄᓐᓂᒃ ᐊᓯᖏᓐᓂᓪᓗ ᐅᖓᓯᑦᑐᒦᑦᑐᓂᒃ. ᐸᐅᓗᓯ ᐱᓕᕆᐊᖃᖅᓯᒪᓪᓚᕆᒻᒥᔪᖅ ᐅᑎᖅᑎᑦᓯᒋᐊᕐᓂᕐᒥᒃ ᐃᓄᐃᑦ ᕿᒻᒥᑐᖃᖏᓐᓂᒃ, ᓯᕗᓂᑐᖃᖓᒍᑦ ᐃᕙᒃᑲᕐᓂᖅ ᐊᑐᓚᐅᖅᑎᓐᓇᒍ. ᕿᒧᑦᓯᖃᓚᕿᓕᖅᓱᑎᒃ ᐊᒥᓱᐃᑦ ᐳᕕᕐᓂᖅᑐᕐᒥ ᓄᓇᕕᒻᒥᓪᓗᔭ
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᐃᓅᒍᓐᓃᖅᑐᖅ ᐳᑐᓕᒃ ᐸᐱᑲᑦᑐᖅ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐊᕕᑦᑐᖅᓯᒪᔪᕐᓂ ᐱᓇᐃᓗᑕᖃᕐᓂᕐᔪᓄᑦ ᐃᓕᑕᖅᓯᔾᔪᑎ
ᐃᓅᒍᓐᓃᓚᐅᖅᑐᖅ ᐳᑐᓕᒃ ᐸᐱᑲᑦᑐᖅ ᐊᑎᓕᐅᖅᑎᐅᖃᑕᐅᓚᐅᖅᓯᒪᔪᖅ ᑕᒪᒃᑮᓐᓂᒃ ᔭᐃᒻᔅ ᕙᐃ ᓄᓇᑖᕐᓂᕐᒧᑦ ᐊᖏᖃᑎᒌᓐᓂᐅᔪᒥ ᐊᒻᒪᓗ ᓄᓇᕕᒻᒥ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒌᓐᓂᐅᔪᒥ, ᐃᓅᓯᓕᒫᕐᒥᓂ ᑲᑎᒪᔨᐅᓂᕐᒥᒃ ᐱᓕᕆᐊᖃᖅᓯᒪᓪᓗᓂ, ᓂᐱᒋᔭᐅᓪᓗᓂ ᐃᓕᖅᑯᓯᑐᖃᕐᓅᖓᔪᓂᒃ ᐃᓕᖅᑯᓯᑐᖃᕐᓅᖓᔪᓄᓪᓗ ᐱᓇᐃᓗᑕᐅᔪᓄᑦ ᐱᓕᕆᐊᑦᓴᓄᓪᓗ, ᓄᓇᓕᒻᒥᓂ ᐊᕕᑦᑐᖅᓯᒪᔪᓂᓪᓗ. ᐃᓚᐅᖃᑕᐅᓪᓚᕆᓚᐅᖅᓯᒪᔪᖅ ᓄᓇᒥᒃ ᑎᒍᒥᐊᖅᑎᒃᑯᓐᓄᑦ ᐊᒻᒪᓗ ᐆᒪᔪᕐᓂᐊᖅᑎᒃᑯᑦ ᑎᒥᖁᑎᖏᓐᓂ, ᐱᖃᑕᐅᓪᓗᒋᑦ ᐊᕙᑎᓕᕆᓂᕐᒧᑦ ᑲᑎᑦᑕᖅᑐᑦ. ᓂᕈᐊᕋᑦᓴᓕᐊᖑᓚᐅᖅᑐᖅ ᒪᑭᕕᒃᑯᓐᓄᑦ ᑲᑎᒪᔨᒧᑦ ᐋᑕᒥ ᐊᓚᑯᒧᑦ ᐃᖅᑲᐅᒪᒋᓪᓗᒋᑦ ᐃᓅᓯᓕᒫᖓᓂ ᐱᓕᕆᐊᕆᓯᒪᔭᖏᑦ ᑖᕗᖓᓕᒫᕐᓗ ᐊᑦᑐᐃᓂᖃᖅᓯᒪᓂᖓᓂᒃ ᑭᖑᕚᖏᓐᓄᑦ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᔫᓯᐱ ᐹᓪᓚᔮᖅ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐊᕕᑦᑐᖅᓯᒪᔪᕐᓂ ᐱᓇᐃᓗᑕᖃᕐᓂᕐᔪᓄᑦ ᐃᓕᑕᖅᓯᔾᔪᑎ
ᔫᓯᐱ ᐱᒋᐊᖅᑎᑦᓯᔨᓴᔪᖅ ᑐᓴᖅᑐᓕᕆᐅᑎᓄᑦ ᖃᓄᖅᑑᕐᓂᕐᒥᒃ ᓄᓇᕕᒻᒥ, ᐱᖃᓯᐅᓪᓗᒍ ᐱᒋᐊᖅᑎᑕᐅᓯᒪᓂᖓ ᑕᕐᕋᒥᐅᑦ ᓂᐱᖓᒃᑯᓐᓂ. ᐃᓚᐅᖃᑕᐅᓚᐅᖅᓯᒪᔪᖅ ᐱᒋᐊᖅᑎᑕᐅᑎᓪᓗᒋᑦ ᓈᓚᐅᑎᑲᕐᕖᑦ ᓄᓇᓕᓐᓂ ᐊᕕᑦᑐᖅᓯᒪᔪᓂᓪᓗ ᓈᓚᐅᑎᖃᕐᕕᓐᓂ, ᐱᕚᓪᓕᕆᐊᖅᑎᑕᐅᓂᖏᓐᓂᓪᓗ ᓈᓚᐅᑎᒃᑰᕈᑏᑦ ᓄᓇᕕᒻᒥ. ᔫᓯᐱ ᑎᒍᒥᐊᖃᑦᑕᖅᓯᒪᓕᖅᑐᖅ ᓯᕗᓕᖅᑎᐅᓂᕐᒥ ᑕᒪᒃᑮᓐᓂᒃ ᐊᕙᑕᖅ ᐃᓕᖅᑯᓯᓕᕆᕕᒻᒥ ᐊᒻᒪᓗ ᓄᓇᕕᒻᒥ ᐃᓗᓯᓕᕆᔨᒃᑯᑦ ᑲᑎᒪᔨᖏᓐᓄᑦ. ᓂᕈᐊᕋᑦᓴᓕᐊᖑᓚᐅᖅᑐᖅ ᒪᑭᕕᒃᑯᓐᓄᑦ ᑲᑎᒪᔨᒧᑦ ᐋᑕᒥ ᐊᓚᑯᒧᑦ ᐱᔨᑦᓯᖅᓯᒪᓂᖓᓄᑦ ᓄᓇᕕᒻᒧᑦ ᓄᓇᕕᒻᒥᐅᓄᓪᓗ.
ᑐᓂᔭᐅᔪᖅ ᐲᑕ ᐋᑕᒥᒧᑦ, ᒪᑭᕕᒃ ᑯᐊᐸᕇᓴᒃᑯᑦ
ᐃᓅᒍᓐᓃᖅᓯᒪᓕᖅᑐᖅ ᓄᐊ ᖁᒪ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐊᕕᑦᑐᖅᓯᒪᔪᓂ ᐱᓇᐃᓗᑕᐅᔪᓄᑦ ᐃᓕᑕᖅᓯᔾᔪᑎ
ᓄᐊ ᖁᒪᒃ ᓂᕈᐊᕋᑦᓴᓕᐊᖑᓚᐅᖅᑐᖅ ᒪᑭᕕᒃᑯᓐᓄᑦ ᑲᑎᒪᔨᒧᑦ ᐋᑕᒥ ᐊᓇᑯᒧᑦ ᐊᒻᒪᓗ ᓴᓪᓗᐃᑦ ᒪᐃᔭᖓᓐᓄᑦ ᐸᐅᓗᓯ ᐸᐱᑲᑦᑐᕐᒧᑦ ᐃᑲᔪᖅᓯᒪᓂᕆᔭᖓᓄᑦ ᒐᕙᒪᓕᕆᓂᕐᒧᑦ ᐋᖅᑭᑦᓯᒪᓂᐅᔪᓂᒃ ᐅᓪᓗᒥᐅᔪᖅ ᓄᓇᕕᒻᒥ. ᐃᓚᒋᔭᐅᓚᐅᖅᓯᒪᔪᖅ ᓯᕗᓪᓕᖅᐹᕐᓄᑦ ᐃᓄᓐᓄᑦ ᐃᓚᐅᓪᓗᓂ ᓄᓇᓕᓐᓂ, ᐊᕕᑦᑐᖅᓯᒪᔪᓂ ᑲᓇᑕᒥᓪᓗ ᐃᓄᐃᑦ ᐃᓚᐅᓕᖅᓱᑎᒃ ᒐᕙᒪᓕᕆᓂᕐᒥ. ᐃᓚᒋᔭᐅᓪᓗᓂ ᐊᖑᑎᐅᓪᓗᓂ ᓄᓇᕕᒻᒦᖔᖅᓯᒪᔪᖅ ᑲᑎᖃᑎᖃᖅᓯᒪᓪᓗᓂ ᓯᓚᑖᓃᖔᖅᑐᓂᒃ ᓄᓇᕕᐅᑉ ᐊᕕᑦᑐᖅᓯᒪᔪᓂᒃ, ᑕᐱᕇᓕᖅᑎᑦᓯᓚᐅᖅᓯᒪᔪᖅ ᐃᓄᓐᓂᒃ ᐊᑕᐅᓯᕐᒥᒃ ᓂᐱᖃᓕᖅᑎᓪᓗᒋᑦ. ᓄᐊ ᐃᓚᐅᓪᓚᕆᓚᐅᖅᓯᒪᔪᖅ ᓴᖅᑭᖅᑎᑕᐅᑎᓪᓗᒍ ᐃᓄᐃᑦ ᑕᐱᕇᑦᓴᑦ ᑲᓇᑕᒥ (ᐊᓯᔾᔨᓚᐅᖅᓯᒪᔪᖅ ᐃᓄᐃᑦ ᑕᐱᕇᑦ ᑲᓇᑕᒥᒧᑦ ᓄᐊ ᐃᓚᐅᑎᓪᓗᒍ 1971ᒥ) ᑭᒡᒐᖅᑐᐃᓚᐅᖅᓯᒪᔪᖅ ᓴᓪᓗᕐᓂᒃ ᓄᓇᕕᒻᒥᓪᓗ ᑲᑎᒪᖃᑎᖃᖅᑎᓪᓗᒋᑦ ᓛᕙᑐᐊᒥᐅᓂᒃ ᓄᓇᑦᓯᐊᕐᒥᐅᓂᓪᓗ. ᐅᖓᓯᑦᑐᓄᑦ ᐊᐅᓪᓚᖃᑦᑕᓚᐅᖅᓯᒪᔪᖅ ᓲᕐᓗ ᑯᐸᐃᒃ ᓯᑎᒧᑦ ᐊᒻᒪᓗ ᖁᕐᓗᖅᑑᕐᒧᑦ ᓴᖅᑭᔮᖅᑎᑦᓯᒋᐊᖅᑐᖅᓱᓂ ᓇᒻᒥᓂᖅᓱᕐᓂᕐᒥᒃ ᒐᕙᒪᓕᕆᓂᒃᑯᑦ ᑕᐱᕇᓕᖅᑎᑦᓯᓪᓗᓂᓪᓗ ᐃᓄᓐᓂᒃ ᐱᖃᓯᐅᓪᓗᒋᑦ ᑲᑎᒪᔩᑦ ᐃᓄᒋᐊᙵᒥᓂᕐᓄᑦ ᐱᔪᓐᓇᐅᑎᓕᓐᓄᑦ, ᐱᒋᐊᖅᑎᑕᐅᓯᒪᓂᖓ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐱᒋᐊᖅᑎᑕᐅᓯᒪᓪᓗᑎᓪᓗ ᑕᓪᓕᒪᐃᑦ ᑎᒥᐅᔪᑦ ᑭᒡᒐᑐᖅᑐᑦ ᐃᓄᓐᓂᒃ, ᐱᖃᓯᐅᓪᓗᒋᑦ: ᓄᓇᕕᒻᒥ ᐃᓄᐃᑦ ᑲᑐᔾᔨᖃᑎᒌᑦ, ᓛᕙᑐᐊᒥ ᐃᓄᐃᑦ ᑲᑐᔾᔨᖃᑎᒌᑦ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ.
ᑐᓂᔭᐅᔪᖅ ᓇᑖᓐ ᐅᕙᑦᒧᑦ, ᐃᓄᐃᑦ ᑕᐱᕇᑦ ᑲᓇᑕᒥ
ᐊᕙᑕᖅ ᐃᓕᖅᑯᓯᑐᖃᓕᕆᒡᕕᒃ
ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒧᐊᒋᐊᖅᑎᑦᓯᓂᖅ ᐅᑎᖅᑎᑦᓯᒋᐊᕐᓂᕐᒧᑦ ᐃᓕᑕᖅᓯᔾᔪᑎ
ᐊᕙᑕᖅ ᐃᓕᖅᑯᓯᑐᖃᓕᕆᒡᕕᒃ ᑐᓂᔭᐅᔪᖅ ᐃᓕᑕᖅᓯᔾᔪᑎᒧᑦ ᐃᓚᐅᓯᒪᓂᖓᓄᑦ ᐅᑎᖅᑎᑦᓯᓂᕐᒥᒃ ᐱᐅᓕᑦᓯᒋᐊᕐᓂᕐᒥᓪᓗ ᓄᓇᕕᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐊᕕᑦᑐᖅᓯᒪᔪᖏᓐᓂᒃ ᑲᓇᑕᓕᒫᕐᒥᓪᓗ. ᐱᓕᕆᐊᕆᓯᒪᔭᖏᑦ ᐃᓚᖃᖅᑐᑦ ᐊᕙᑕᒃᑯᑦ ᐱᓕᕆᐊᕆᓯᒪᔭᖓᑦ ᐅᑎᖅᑎᑦᓯᓂᕐᒥᒃ ᑎᒥᕕᓂᕐᓂᒃ ᐲᔭᖅᑕᐅᓚᐅᖅᑐᕕᓂᕐᓂᒃ ᐃᑦᑕᕐᓂᓴᖅᓯᐅᖅᑎᓄᑦ 1967ᖑᑎᓪᓗᒍ ᐃᓄᐃᑦ ᐃᓕᕕᖃᕐᕕᖏᓐᓂᑦ ᐊᑯᓐᓂᖓᓂᒃ ᐅᒥᐅᔭᐅᓪᓗ ᑰᔾᔪᐊᕌᐱᐅᓪᓗ. ᑭᖑᕚᖏᑦ ᐃᑦᑕᕐᓂᓴᖅᓯᐅᖅᑎᐅᑉ ᐅᑎᖅᑎᑦᓯᓚᐅᖅᑐᑦ ᑎᒥᒥᓂᕐᓂᒃ 2009ᒥ. ᐊᕙᑕᖅ ᐱᓕᕆᐊᖃᖅᓯᒪᒻᒥᔪᖅ ᐱᒻᒪᕆᓐᓂᒃ ᐃᑦᑕᕐᓂᓴᕐᓂᒃ ᐱᐅᓕᑦᓯᒋᐊᕐᓂᕐᒥ ᓄᓇᕕᒃ ᓄᓇᓕᖏᓐᓂᒃ, ᐱᖃᓯᐅᓪᓗᒋᑦ ᐱᓕᕆᐊᖑᓯᒪᔪᑦ ᐃᓄᒃᔪᐊᕐᒥ 2012ᒥ ᓴᒡᒐᖅᑐᑎᑦ ᓴᓇᕐᕈᑎᕕᓂᕐᓂᒃ ᓴᒃᑯᕕᓂᕐᓂᓪᓗ ᑐᓂᕕᓂᕐᓂᒃ, ᑐᓂᕕᓃᑦ ᓯᕗᓪᓕᕕᓂᖏᓐᓂᒃ, ᐊᒻᒪᓗ ᐃᓄᐃᑦ ᐊᑐᖅᓯᒪᔭᖏᓐᓂᒃ. ᐊᒥᓲᓪᓗᑎᒃ ᐱᓕᕆᐊᕆᓯᒪᔭᖏᑦ, ᐊᕙᑕᖅ ᓯᕗᒧᐊᒋᐊᖅᑎᑦᓯᒐᓱᐊᖅᑐᑦ ᖃᔭᖅᑕᓕᒻᒥ ᓴᓇᙳᐊᖅᑕᐅᓯᒪᔪᑦ ᖃᓂᒋᔮᓂ ᑲᖏᖅᓲᑉ ᓴᐳᑎᔭᐅᖁᓪᓗᒋᑦ ᐃᓕᑕᕆᔭᐅᓯᒪᓗᑎᑦ ᓄᓇᕐᔪᐊᓕᒫᕐᒥ ᐃᑦᑕᕐᓂᓴᖃᕐᕕᓐᓄᑦ. ᐅᔭᕋᓛᖑᓪᓗᓂ ᕿᑭᖅᑕᖅ ᓴᓇᙳᐊᒐᖃᖅᑐᖅ 170 ᑮᓇᙳᐊᕐᓂᒃ ᓴᓇᓯᒪᓪᓗᑎᑦ ᐅᒃᑯᓯᑦᓴᕐᒥ ᑕᑭᓂᖃᖅᑐᒥ 120-ᐆᑦᑑᑏᑦ ᖃᔭᙳᐊᖑᓪᓗᓂ ᖃᑦᓯᓐᓂᖓ.
ᓇᑖᓐ ᐅᕙᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂ, ᐊᒻᒪᓗ ᐊᓗᑭ ᑰᑦᑎᖅ, ᐊᖏᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖁᑖᓄᑦ, ᑐᓂᓯᔪᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᓯᕗᒧᐊᒋᐊᖅᑎᑦᓯᓂᕐᒧᑦ ᐃᓗᓯᓕᕆᓂᕐᒧᑦ ᐃᓕᑕᖅᓯᔾᔪᑎᒥᒃ ᐅᓖᐱᑲ ᐃᑭᓪᓗᐊᕐᒧᑦ (ᕿᑎᖓᓃᑦᑐᖅ) ᐃᖃᓗᓐᓂ.