November 6, 2020–Ottawa, Ontario
Inuit Tapiriit Kanatami (ITK) tusaqtitausimaliriamik quviasugutiqaqput $10.9-million-nik kajusititausimainnaqullugit atuinnautitauningit ilinnialisaaqtunut ammalu pairivvilirinirmi piliriangujut ikajuusiaqtaaqtitaujunnarniarningita Inuit silarjualimaami qanimanaqtuqaliqsimaningani, ammalu ikajuqsugausimaliqullugit Nuvagjuarnaq-19 pijjutigillugu mianiqsisimaliriarutiujunik mianirijausimaliqullugit surusiit ammalu ilagiingujut. Silarjualimaami qanimanarnialuk aktuqtausimaliqtitsimmat pitaqariaqallariksutik piliriaqaqtiujuujunnarninginik Ilinnialisaaqtunut Ilisaijiujut ammalu sannginiqatsiaqtutigut pairivvilirinirmi iqqanaijaqtigijaujut qanuinngitsiaqtuutitsigiaqsutik kiinaujaliriniuvaktunut. Tamakkua aturniqallariktutigut pilirijigijaujut utiqsimalirmata quttiktummariulluni attanaqtumiilirunnarningita iqqanaijarvigijaminni atuliqsimatillugit qanimanaqtuqaliqsimaniujumik ilagiingujut nunaligijaminni atuinnauvviutitauningit kajusititausimajunnaqullugit pairivviqaqtitsivannirni ammalu pisimajariaqallariksunigit kiinaujaqutiqaqtitausimavanningit.
Kiinaujatigut ikajuusiaqtaartitausimalirningit qassilluanik Inuit katujjiqatigiingitiguuqtitausimavut imanna:
Nunatsiavut Gavamangat: $1.153-million
Kativik Aviktuqsimaningani Gavamangat: $2.758-million
Nunavut (QIA, KivIA, KitIA): $5.544-million
Inuvialuit Aviktuqsimanirmi Kuapuriisangat: $1.305-million
Ammalu ilaqaqtitaummijut $143,010-nik Inuuqatigiit Iqqanaijarvingatta Iqqanaijarvingat Inuit Surusilirinirmi, Makkuktulirinirmi ammalu Ilagiiktulirinirmi Ottawa-mi.
Taakkua ikajuusiaqtaanguniaqtut atausiaqtitaulutik pijausimalirunnarniaqput tuaviurnaqtuqaliqsimaningani kiinaujaqutiksaqtaartitsinirmi ilagiarutiusimallutik taimaulianiktunut kiinaujaqutiksaqtaangusimajunut nunaqaqqaarsimajuit ilinnialisaaqtulirinirmi ammalu pairivvilirinirmi pilirianginnit. September 2019-mi, Inuit Tapiriikkut Kanatami, piqatigillugit Iqqiliit Katujjiqatigiingit ammalu Canadami Allangajut Katimajingit, ilagijauqataulaqtut gavamatuqakkut tusaqtitsisimaliqtillugit Nunaqaqqaarsimajut Ilinnialisaaqtulirinirmi ammalu Pairivvilirinirmi Iqqanaijarvingata Asijjiriaqtitauninganut Piliriangujumut, ikajuqtaujjutiksanik tunisisimaqatauniaqtunut $1.7 billion-nik ukiut qulit (10) atuqpallianinginni nutaangulluni piliriqatigiiliqsimaningita Iqqiliit, Inuit ammalu Allangajut Inuuqatigiingita.