ᓄᕕᐱᕆ 6, 2020 – ᐋᑐᕙ, ᐋᓐᑎᐊᕆᐅ
ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᑐᓴᖅᑎᑕᐅᓯᒪᓕᕆᐊᒥᒃ ᖁᕕᐊᓱᒍᑎᖃᖅᐳᑦ $10.9-ᒥᓕᐊᓐᑖᓚᓂᒃ ᑲᔪᓯᑎᑕᐅᓯᒪᐃᓐᓇᖁᓪᓗᒋᑦ ᐊᑐᐃᓐᓇᐅᑎᑕᐅᓂᖏᑦ ᐃᓕᓐᓂᐊᓕᓵᖅᑐᓄᑦ ᐊᒻᒪᓗ ᐸᐃᕆᕝᕕᓕᕆᓂᕐᒥ ᐱᓕᕆᐊᖑᔪᑦ ᐃᑲᔫᓯᐊᖅᑖᖅᑎᑕᐅᔪᓐᓇᕐᓂᐊᕐᓂᖏᑕ ᐃᓄᐃᑦ ᓯᓚᕐᔪᐊᓕᒫᒥ ᖃᓂᒪᓇᖅᑐᖃᓕᖅᓯᒪᓂᖓᓂ, ᐊᒻᒪᓗ ᐃᑲᔪᖅᓱᒐᐅᓯᒪᓕᖁᓪᓗᒋᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᒥᐊᓂᖅᓯᓯᒪᓕᕆᐊᕈᑎᐅᔪᓂᒃ ᒥᐊᓂᕆᔭᐅᓯᒪᓕᖁᓪᓗᒋᑦ ᓱᕈᓰᑦ ᐊᒻᒪᓗ ᐃᓚᒌᖑᔪᑦ. ᓯᓚᕐᔪᐊᓕᒫᒥ ᖃᓂᒪᓇᕐᓂᐊᓗᒃ ᐊᒃᑐᖅᑕᐅᓯᒪᓕᖅᑎᑦᓯᒻᒪᑦ ᐱᑕᖃᕆᐊᖃᓪᓚᕆᒃᓱᑎᒃ ᐱᓕᕆᐊᖃᖅᑎᐅᔫᔪᓐᓇᕐᓂᖏᓂᒃ ᐃᓕᓐᓂᐊᓕᓵᖅᑐᓄᑦ ᐃᓕᓴᐃᔨᐅᔪᑦ ᐊᒻᒪᓗ ᓴᖖᒋᓂᖃᑦᓯᐊᖅᑐᑎᒍᑦ ᐸᐃᕆᕝᕕᓕᕆᓂᕐᒥ ᐃᖅᑲᓇᐃᔭᖅᑎᒋᔭᐅᔪᑦ ᖃᓄᐃᖖᒋᑦᓯᐊᖅᑑᑎᑦᓯᒋᐊᖅᓱᑎᒃ ᑮᓇᐅᔭᓕᕆᓂᐅᕙᒃᑐᓄᑦ. ᑕᒪᒃᑯᐊ ᐊᑐᕐᓂᖃᓪᓚᕆᒃᑐᑎᒍᑦ ᐱᓕᕆᔨᒋᔭᐅᔪᑦ ᐅᑎᖅᓯᒪᓕᕐᒪᑕ ᖁᑦᑎᒃᑐᒻᒪᕆᐅᓪᓗᓂ ᐊᑦᑕᓇᖅᑐᒦᓕᕈᓐᓇᕐᓂᖏᑕ ᐃᖅᑲᓇᐃᔭᕐᕕᒋᔭᒥᓐᓂ ᐊᑐᓕᖅᓯᒪᑎᓪᓗᒋᑦ ᖃᓂᒪᓇᖅᑐᖃᓕᖅᓯᒪᓂᐅᔪᒥᒃ ᐃᓚᒌᖑᔪᑦ ᓄᓇᓕᒋᔭᒥᓐᓂ ᐊᑐᐃᓐᓇᐅᕝᕕᐅᑎᑕᐅᓂᖏᑦ ᑲᔪᓯᑎᑕᐅᓯᒪᔪᓐᓇᖁᓪᓗᒋᑦ ᐸᐃᕆᕝᕕᖃᖅᑎᑦᓯᕙᓐᓂᕐᓂ ᐊᒻᒪᓗ ᐱᓯᒪᔭᕆᐊᖃᓪᓚᕆᒃᓱᓂᒋᑦ ᑮᓇᐅᔭᖁᑎᖃᖅᑎᑕᐅᓯᒪᕙᓐᓂᖏᑦ.
ᑮᓇᐅᔭᑎᒍᑦ ᐃᑲᔫᓯᐊᖅᑖᕐᑎᑕᐅᓯᒪᓕᕐᓂᖏᑦ ᖃᔅᓯᓪᓗᐊᓂᒃ ᐃᓄᐃᑦ ᑲᑐᔾᔨᖃᑎᒌᖏᑎᒎᖅᑎᑕᐅᓯᒪᕗᑦ ᐃᒪᓐᓇ:
ᓄᓇᑦᓯᐊᕗᑦ ᒐᕙᒪᖓᑦ: $1.153-ᒥᓕᐊᓐᑖᓚᐃᑦ
ᑲᑎᕕᒃ ᐊᕕᒃᑐᖅᓯᒪᓂᖓᓂ ᒐᕙᒪᖓᑦ: $2.758-ᒥᓕᐊᓐᑖᓚᐃᑦ
ᓄᓇᕗᑦ (ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ): $5.544-ᒥᓕᐊᓐᑖᓚᐃᑦ
ᐃᓄᕕᐊᓗᐃᑦ ᐊᕕᒃᑐᖅᓯᒪᓂᕐᒥ ᑯᐊᐳᕇᓴᖓᑦ: $1.305-ᒥᓕᐊᓐᑖᓚᐃᑦ
ᐊᒻᒪᓗ ᐃᓚᖃᖅᑎᑕᐅᒻᒥᔪᑦ $143,010-ᓂᒃ ᐃᓅᖃᑎᒌᑦ ᐃᖅᑲᓇᐃᔭᕐᕕᖓᑦᑕ ᐃᖅᑲᓇᐃᔭᕐᕕᖓᑦ ᐃᓄᐃᑦ ᓱᕈᓯᓕᕆᓂᕐᒥ, ᒪᒃᑯᒃᑐᓕᕆᓂᕐᒥ ᐊᒻᒪᓗ ᐃᓚᒌᒃᑐᓕᕆᓂᕐᒥ ᐋᑐᕙᒥ.
ᑖᒃᑯᐊ ᐃᑲᔫᓯᐊᖅᑖᖑᓂᐊᖅᑐᑦ ᐊᑕᐅᓯᐊᖅᑎᑕᐅᓗᑎᒃ ᐱᔭᐅᓯᒪᓕᕈᓐᓇᕐᓂᐊᖅᐳᑦ ᑐᐊᕕᐅᕐᓇᖅᑐᖃᓕᖅᓯᒪᓂᖓᓂ ᑮᓇᐅᔭᖁᑎᒃᓴᖅᑖᕐᑎᑦᓯᓂᕐᒥ ᐃᓚᒋᐊᕈᑎᐅᓯᒪᓪᓗᑎᒃ ᑕᐃᒪᐅᓕᐊᓂᒃᑐᓄᑦ ᑮᓇᐅᔭᖁᑎᒃᓴᖅᑖᖑᓯᒪᔪᓄᑦ ᓄᓇᖃᖅᑳᕐᓯᒪᔪᐃᑦ ᐃᓕᓐᓂᐊᓕᓵᖅᑐᓕᕆᓂᕐᒥ ᐊᒻᒪᓗ ᐸᐃᕆᕝᕕᓕᕆᓂᕐᒥ ᐱᓕᕆᐊᖏᓐᓂᑦ. ᓯᑦᑎᐱᕆ 2019-ᒥ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ, ᐱᖃᑎᒋᓪᓗᒋᑦ ᐃᖅᑭᓖᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑲᓇᑕᒥ ᐊᓪᓚᖓᔪᑦ ᑲᑎᒪᔨᖏᑦ, ᐃᓚᒋᔭᐅᖃᑕᐅᓚᖅᑐᑦ ᒐᕙᒪᑐᖃᒃᑯᑦ ᑐᓴᖅᑎᑦᓯᓯᒪᓕᖅᑎᓪᓗᒋᑦ ᓄᓇᖃᖅᑳᕐᓯᒪᔪᑦ ᐃᓕᓐᓂᐊᓕᓵᖅᑐᓕᕆᓂᕐᒥ ᐊᒻᒪᓗ ᐸᐃᕆᕝᕕᓕᕆᓂᕐᒥ ᐃᖅᑲᓇᐃᔭᕐᕕᖓᑕ ᐊᓯᔾᔨᕆᐊᖅᑎᑕᐅᓂᖓᓄᑦ ᐱᓕᕆᐊᖑᔪᒧᑦ, ᐃᑲᔪᖅᑕᐅᔾᔪᑎᒃᓴᓂᒃ ᑐᓂᓯᓯᒪᖃᑕᐅᓂᐊᖅᑐᓄᑦ $1.7-ᐱᓕᐊᓐᑖᓚᓪᓗᐊᓂᒃ ᐅᑭᐅᑦ ᖁᓕᑦ (10) ᐊᑐᖅᐸᓪᓕᐊᓂᖏᓐᓂ ᓄᑖᖑᓪᓗᓂ ᐱᓕᕆᖃᑎᒌᓕᖅᓯᒪᓂᖏᑕ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓅᖃᑎᒌᖏᑕ.