ᐅᑉᓗᒥ, ᓯᓚᕐᔪᐊᓕᒫᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᑕ ᐅᑉᓗᕆᔭᖓᓂ, ᒥᓂᔅᑕ ᐹᑉᓘ ᕌᑦᕇᒐᔾ, ᒥᓂᔅᑕᕆᔭᐅᔪᖅ ᑲᓇᑕᒥ ᐱᐅᓯᑐᖃᓕᕆᔨᒃᑯᓐᓄᑦ, ᑲᓇᑕᒥ ᐃᓱᒪᑕᒻᒪᕆᒃ ᕉᔅᐋᓐ ᐋᑦᓯᐹᓪᑦ ᐃᖅᑭᓖᑦ ᑲᑐᔾᔨᖃᑎᒌᖏᓐᓂ, ᐊᖏᔪᖅᑳᖅ ᓇᐃᑖᓐ ᐆᐱᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᒻᒪᓗ ᐊᖏᔪᖅᑳᖅ ᑳᓯᑎ ᑭᐊᕋᓐ ᐊᓪᓚᖓᔪᑦ ᑲᓇᑕᒥ ᑲᑎᒪᔨᖏᓐᓄᑦ ᑲᑎᓐᓂᖃᖅᓯᒪᓪᓗᑎᒃ ᓇᓗᓇᐃᖅᓯᔾᔪᑎᖃᓚᐅᖅᑐᑦ ᓇᓗᓇᐃᒃᑯᑕᕆᔭᐅᓂᐊᖅᑐᒧᑦ ᐱᒋᐊᖅᑎᑕᐅᓯᒪᓂᖓᑕ ᓯᓚᕐᔪᐊᓕᒫᒥ ᐅᑭᐅᑦ ᖁᓕᓄᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ (2022-2032), ᓇᓗᓇᐃᔭᖅᑕᐅᓯᒪᓕᓚᐅᖅᑐᒧᑦ ᔪᓇᐃᑎᑦ ᓃᓴᒃᑯᑦ ᐃᓕᓐᓂᐊᕐᓂᓕᕆᓂᕐᒧᑦ, ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᐱᐅᓯᑐᖃᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂᑦ (UNESCO), ᐱᔾᔪᑕᐅᓗᐊᖅᓱᓂ ᓴᖅᑭᑕᐅᓯᒪᓕᓚᐅᖅᑐᒧᑦ 2019-ᒥ ᓯᓚᕐᔪᐊᓕᒫᒥ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑕ ᐅᑭᐅᕆᔭᖓᓄᑦ.
ᖁᓕᐅᓂᐊᖅᑐᓄᑦ ᐅᑭᐅᑦ ᐊᑐᖅᐸᓪᓕᐊᓂᖏᓐᓂ ᑐᕌᕐᕕᒃᓴᖃᖅᐳᑦ ᓯᓚᕐᔪᐊᕐᒥᐅᓕᒫᑦ ᐅᔾᔨᕈᓱᓕᖅᑎᑕᐅᖁᓪᓗᒋᑦ ᐊᓯᐅᔨᔭᐅᕙᓪᓕᐊᓂᖏᑕ ᐊᒻᒪᓗ ᒫᓐᓇᐅᔪᖅ ᐊᑦᑕᓇᖅᑐᒦᓕᖅᓯᒪᓂᖏᑕ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦᑕ, ᐊᒻᒪᓗ ᑕᒪᒃᑯᓂᖓ ᑎᒍᒥᐊᖅᑎᒋᔭᐅᔪᐃᑦ ᐱᓕᕆᓂᖃᓕᖅᑎᑕᐅᖁᓪᓗᒋᑦ ᐊᒻᒪᓗ ᑮᓇᐅᔭᖁᑎᒃᓴᐃᑦ ᐱᑕᖃᓕᖅᑎᑕᐅᓗᑎᒃ ᑐᐊᕕᐅᕐᓇᖅᓯᓯᒪᓂᖓᑕ ᐸᐸᑕᐅᓯᒪᔭᕆᐊᖃᕐᓂᖏᓐᓂ, ᐆᒻᒪᖅᑎᑕᐅᒋᐊᒃᑲᓐᓂᕐᓂᖏᓂ ᐊᒻᒪᓗ ᖁᕝᕙᖅᑎᑕᐅᒋᐊᖅᓯᒪᓕᕐᓗᑎᒃ ᐱᓕᕆᓂᐅᔪᓄᑦ.
ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦ ᕿᑎᐊᓃᓪᓚᕆᖕᒪᑕ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐱᐅᓯᑐᖃᖏᑕ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᖕᓇᕐᓂᖏᑕ. ᐅᖃᐅᓯᑐᖃᑦᑎᒍᑦ ᐊᒥᖅᑲᕈᑎᖃᖅᐸᒃᑲᑦᑕ ᐊᑐᖅᑕᐅᓯᒪᔪᓂᒃ ᐅᓂᒃᑳᖅᑐᐊᕐᓂᑦᑎᒍᑦ, ᐊᑦᑕᑕᖅᓯᒪᓕᕈᑎᒋᒋᐊᖅᐸᒃᓱᒍ ᓄᓇᒥ ᐃᒫᓂᓗ ᐊᕙᑎᒋᔭᑦᑎᓐᓃᑦᑐᓄᑦ ᐊᒻᒪᓗ ᐱᑕᖃᓕᖅᑎᑦᓯᒋᐊᒧᑦ ᐊᑕᕝᕕᒋᑐᕋᐅᓐᓂᖃᕐᓂᑦᑎᓐᓄᑦ.
ᐃᓚᒋᔭᐅᑎᓪᓗᒍ ᓯᓚᕐᔪᐊᓕᒫᒥ ᐅᑭᐅᑦ ᖁᓕᓄᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ, ᐃᓕᑕᖅᓯᓯᒪᒐᑦᑕ ᐊᒥᓱᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦ ᑭᖑᕚᕇᒃᐸᓪᓕᐊᔪᓄᑦ ᑐᓂᔭᐅᕙᓪᓕᐊᕙᓐᓂᖏᑕ ᐊᒻᒪᓗ ᐊᑐᓂ ᓲᕐᓗ ᐃᕙᓗᒋᔭᐅᓪᓗᑎᒃ ᑲᓇᑕᐅᑉ ᓄᓇᖃᕐᔪᐊᖓᑕ ᐱᐅᓪᓚᕆᒃᑑᓪᓗᓂ ᐊᑭᑐᔫᓪᓗᓂ ᐱᐅᓯᑐᖃᕆᔭᐅᔪᓄᑦ ᓄᕕᖅᓴᕈᑎᐅᓯᒪᓂᖃᕐᒪᑦ. ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦ ᑲᒪᒋᔭᐅᑦᓯᐊᕆᐊᖃᕐᒪᑕ ᑕᒪᓐᓇ ᓄᕕᖅᓴᒐᐅᓯᒪᓂᐅᔪᖅ ᐅᒪᓂᖃᐃᓐᓇᕈᓐᓇᖁᓪᓗᒍ ᐊᒻᒪᓗ ᐊᔾᔨᒌᖖᒋᐅᕐᓂᖃᖅᑑᖏᓐᓇᖅᑎᑕᐅᓗᓂ.
ᐱᔾᔪᑎᒋᓪᓗᒍ ᐃᓕᖅᑯᓯᑐᖃᒥᑎᒍᑦ ᑐᓂᐅᖅᑲᒐᐅᕙᓪᓕᐊᕙᓐᓂᖏᑕ ᐅᖃᐅᓯᖏᑎᒍᑦ ᐃᓄᑐᖃᐃᑦ ᒪᒃᑯᒃᑐᖁᑎᒥᓐᓄᑦ, ᐅᖃᐅᓯᖏᑦ ᓇᖏᕈᖕᓇᕈᑎᐅᖕᒪᑕ ᓄᓇᓕᒋᔭᐅᔪᓂᑦ, ᑭᓯᐊᓂᓗ ᓱᕋᒃᓯᒪᓕᖅᓴᕋᐃᑦᑑᒋᓪᓗᑎᒃ. ᐃᓗᓕᖃᖅᑑᓪᓗᑎᒃ ᐊᖏᔪᐊᓗᖕᒥᒃ ᐊᑐᕐᓂᖃᖅᑎᑕᐅᔪᓂᒃ ᐊᒻᒪᓗ ᖃᐅᔨᒪᓂᕆᔭᐅᔪᓂᒃ, ᐊᑦᑕᓇᖅᑐᒦᓐᓂᖏᑦ ᐱᓗᐊᓕᖅᐸᓪᓕᐊᓕᕐᒪᑦ ᐊᓯᐅᔨᔭᐅᓯᒪᓕᕈᖕᓇᕐᓂᖓᓂᑦ ᐊᑐᖅᑕᐅᓯᒪᔪᓃᑦᑐᓂᑦ. 3/4-ᓗᐊᖏᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦ ᐊᑦᑕᓇᖅᑐᒦᓕᖅᓯᒪᕗᑦ. ᑕᒪᑦᑕᐅᓪᓗᑕ ᐱᓕᕆᐊᒃᓴᖃᕋᑦᑕ ᐃᑲᔪᖅᑐᐃᒋᐊᒧᑦ ᓄᓇᖃᖅᑳᖅᓯᒪᔪᓂᒃ ᐅᖃᐅᓯᑐᖃᒥᓐᓂᒃ ᐆᒻᒪᖅᑎᑦᓯᒋᐊᒃᑲᓐᓂᕐᓂᖏᓐᓂ. ᑲᓇᑕᒥ ᒐᕙᒪᖓ ᑲᔪᓯᑎᑦᑎᓯᒪᕗᑦ ᑲᓇᑕᒥ ᓄᓇᖃᖅᑳᕐᓯᒪᔪᐃᑦ ᑲᑐᔾᔨᖃᑎᒌᖏᑦ ᐊᑐᓕᖅᑎᑦᓯᒋᐊᕐᓂᖏᓂ ᒪᓕᒐᕐᔪᐊᖁᑎᓂᒃ ᐋᖅᑭᒃᓱᐊᖑᓯᒪᔪᓂᒃ ᐃᑲᔪᕈᑎᐅᓕᕐᓂᐊᕐᓗᑎᒃ ᐆᒻᒪᖅᑎᑦᓯᒋᐊᒃᑲᓐᓂᕐᓂᕐᒥ, ᐃᓕᕆᓂᖃᕐᓂᕐᒥ ᐊᒻᒪᓗ ᓴᖖᒋᒃᑎᑦᓯᒋᐊᕐᓂᕐᒥ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐅᖃᐅᓯᖏᓐᓂᒃ, ᐃᓚᖃᖅᑎᓪᓗᒋᑦ ᐱᓕᕆᓂᐅᔪᑎᒍᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᓂᕐᒥ ᒪᓕᒐᒃᓴᖁᑎᖓᑎᒍᑦ ᐊᒻᒪᓗ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᖏᑦ ᐱᔪᖕᓇᐅᑎᖃᕐᓂᖏᑕ ᓄᓇᖃᖅᑳᕐᓯᒪᔪᐃᑦ ᒪᓕᒐᒃᓴᖁᑎᖓᑎᒍᑦ, ᐊᒻᒪᓗ ᓯᕗᓪᓕᖅᐹᒥᒃ ᑎᓕᔭᐅᓯᒪᓕᕈᑎᑎᒍᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᔨᖏᑕ ᑲᒥᓯᓄᕐᒋᔭᐅᔪᑉ ᐊᓪᓚᕝᕕᖓᑎᒍᑦ. ᑭᓯᐊᓂᓗ ᐊᓯᒃᑲᓐᓂᖏᑎᒍᑦ ᐃᓕᕆᓂᖃᕆᐊᖃᕐᒥᔪᒍᑦ.
ᐅᑭᐅᑦ ᖁᓕᑦ ᐊᑐᖅᐸᓪᓕᐊᓂᖏᓐᓂ, ᐃᑲᔪᖅᑎᒌᒃᓗᑕ ᐱᓕᕆᓂᖃᕐᓂᐊᖅᑐᒍ ᐊᒥᖅᑲᕈᑎᖃᖅᐸᓪᓕᐊᓂᑦᑎᓐᓂ ᐅᓂᒃᑳᖅᑐᐊᖁᑎᑦᑎᓐᓂᒃ, ᐊᒻᒪᓗ ᐃᑲᔪᖅᑐᐃᓂᕐᒥ ᖃᓄᐃᓕᐅᖅᑎᑦᓯᓂᐅᔪᓂᒃ ᐊᒻᒪᓗ ᐱᓕᕆᐊᖑᔪᓂᒃ ᑐᕌᖓᑎᑕᐅᓯᒪᓪᓗᑎᒃ ᐱᐅᒻᒪᕆᐅᔫᑎᑕᐅᓂᖓᑕ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑕ ᑲᓇᑕᒥ ᐊᒻᒪᓗ ᐱᓕᕆᐊᖑᓕᖅᓯᒪᔪᓂ ᐆᒻᒪᖅᑎᑦᓯᒋᐊᒃᑲᓐᓂᕐᓂᕐᓄᑦ ᐊᒻᒪᓗ ᐱᓕᕆᓂᐅᓕᖅᓯᒪᔪᓄᑦ. ᑐᕌᕐᕕᒃᓴᖁᑎᖃᖅᐳᒍᑦ ᐸᕐᓇᐅᑎᓕᐅᖅᓯᒪᓕᕆᐊᒧᑦ ᖁᓕᓄᑦ ᐅᑭᐅᑦ ᐊᑐᖅᐸᓪᓕᐊᓂᖏᓂ ᐱᓕᕆᐊᖑᓂᐊᖅᑐᓄᑦ ᐊᒻᒪᓗ ᕿᒪᐃᕙᓪᓕᐊᔾᔪᑎᒃᓴᓂᒃ ᐱᑕᖃᓕᖅᑎᑦᓯᓗᑕ ᓱᕈᓯᑦᑎᓐᓄᑦ ᐊᒻᒪᓗ ᓱᕈᓯᑦᑕ ᓱᕈᓯᕆᔪᒫᖅᑕᖏᓐᓄᑦ. ᑖᒃᑯᐊᖑᔪᒫᖅᑐᑦ ᐆᒪᐃᓐᓇᖅᑎᑦᓯᔨᐅᔪᒫᕐᒪᑕ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓂᒃ.
ᐃᓚᒋᔭᐅᖃᑕᐅᒋᑦᓯ ᐃᓕᑕᖅᓯᓯᒪᓂᑦᑎᓐᓂ, ᖁᕝᕙᖅᑎᑦᓯᒋᐊᕐᓂᑦᑎᓐᓂ ᐊᒻᒪᓗ ᖁᕕᐊᓱᒍᑎᖃᕐᓂᑦᑎᓐᓂ ᐱᐅᓯᑐᖃᕆᔭᐅᔪᐃᑦ ᐱᐅᓪᓚᕆᒃᑑᓂᖅᓴᓂᒃ ᐱᑕᖃᐅᖅᑑᓂᖏᓐᓂᒃ ᓄᓇᖃᖅᑳᕐᓯᒪᔪᐃᑦ ᐅᖃᐅᓯᖏᓐᓂ ᑲᓇᑕᒥ ᐊᒻᒪᓗ ᓯᓚᕐᔪᐊᓕᒫᒥ.
“ᐊᑐᓂ ᐃᓅᓪᓗᑕ ᐅᕙᑦᑎᓐᓄᑦ, ᐅᖃᐅᓯᑦᑎᓐᓂᒃ ᕿᑎᐊᓃᑎᑦᓯᒐᑦᑕ ᑭᓇᐅᓂᑦᑎᓐᓄᑦ, ᓄᓇᓕᒋᔭᑦᑎᓐᓂ ᐊᒻᒪᓗ ᐱᐅᓯᑐᖃᕆᔭᑦᑎᓐᓂ. ᐅᖃᐅᓯᖅ ᑕᐃᒪᐅᔭᕆᐊᖃᓪᓚᕆᖕᒪᑦ ᖃᓄᖅ ᐊᒥᖅᑲᕈᑎᖃᖅᐸᓐᓂᑦᑎᓐᓂ ᐅᓂᒃᑳᖅᑐᐊᑦᑎᓐᓂᒃ, ᐊᑐᖅᓯᒪᔭᑦᑎᓐᓂᒃ, ᐊᒻᒪᓗ ᖃᓄᖅ ᐊᓯᑦᑎᓐᓄᑦ ᐊᑦᑕᑕᖅᓯᒪᓂᖃᖅᐸᓐᓂᑦᑎᓐᓂ. ᑕᒪᓐᓇᓗ ᐱᔾᔪᑎᒋᓪᓗᒍ ᑲᓇᑕ ᓴᕆᒪᒍᓱᒻᒪᕆᒃᐳᖅ ᐃᑲᔪᖅᑐᐃᓕᕆᐊᒥᒃ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᑦᑕ ᐆᒻᒪᖅᑎᑕᐅᒋᐊᒃᑲᓐᓂᕐᓂᖏᓐᓄᑦ. ᓇᓗᓇᐃᒃᑯᓯᖅᓯᒪᓕᕐᓂᐊᖅᑕᕗᑦ ᓯᓚᕐᔪᐊᓕᒫᒥ ᐅᑭᐅᑦ ᖁᓕᓄᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ ᐱᓕᕆᓂᐅᔪᓄᑦ ᓱᒃᑲᓕᖅᑎᑦᓯᒋᐊᕐᓂᖅᑎᒍᑦ ᐊᑐᓕᖅᑎᑕᐅᓂᖏᑕ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᓂᕐᒥ ᒪᓕᒐᒃᓴᖁᑎᐅᔪᓄᑦ ᐋᖅᑭᒃᓱᐃᖃᑎᒌᖕᓂᖅᑎᒍᑦ ᐊᒻᒪᓗ ᐱᓕᕆᖃᑎᒌᖕᓂᖅᑎᒍᑦ ᓄᓇᖃᖅᑳᕐᓯᒪᔪᓂᑦ ᐱᓕᕆᐊᖃᖃᑎᒋᔭᑦᑎᓐᓂ. ᐃᑲᔪᖅᑐᓕᕆᐊᖃᕋᑦᑎᒍ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐱᓕᕆᓂᖃᕐᓂᖏᓂ ᐆᒻᒪᖅᑎᑦᓯᒋᐊᒃᑲᓐᓂᕐᓂᕐᒧᑦ ᐅᖃᐅᓯᒥᓐᓂᒃ ᐊᒻᒪᓗ ᐱᕈᖅᑎᑦᓯᕙᓪᓕᐊᓂᕐᒥᒃ ᐅᖃᓪᓚᒃᑎᐅᓕᕈᒫᖅᑐᓂᒃ ᓄᓇᖃᖅᑳᕐᓯᒪᔪᐃᑦ ᐅᖃᐅᓯᖏᑎᑐᑦ.”
—ᒥᓂᔅᑕ ᐹᑉᓘ ᕌᑦᕇᒐᔾ, ᒥᓂᔅᑕᕆᔭᐅᔪᖅ ᑲᓇᑕᒥ ᐱᐅᓯᑐᖃᓕᕆᔨᒃᑯᓐᓄᑦ
“ᑲᓇᑕᐅᑉ ᒐᕙᒪᖓᑦ ᐊᒻᒪᓗ ᐊᒥᓱᑲᓪᓚᐅᓪᓗᑎᒃ ᐅᒃᐱᕐᓂᓕᕆᓂᐅᔪᑦ, ᐱᓗᐊᖅᑐᒥᒃ ᐃᒃᓯᕋᕐᔪᐊᕐᒥᐅᑦ ᑐᒃᓯᐊᕐᕕᖓᑦ, ᒪᓕᒃᓗᒋᑦ ᐅᓪᓗᒥᐅᔪᖅ ᐊᑐᖅᑕᐅᕙᓕᖅᑐᑦ, ᐊᒥᓱᑲᓪᓚᒻᒪᕆᐊᓕᖕᓄᑦ ᐱᓕᐊᓐᓂᖖᒌᑦᑐᓂᒃ ᑮᓇᐅᔭᓂᒃ ᐊᑐᓚᐅᖅᓯᒪᒻᒪᑕ ᓱᕈᖅᑎᕆᓪᓗᑎᒃ ᐃᖅᑭᓖᑦ ᐅᖃᐅᓯᖏᓐᓂᒃ ᐊᒻᒪᓗ ᐱᐅᓯᑐᖃᕆᔭᖏᓐᓂᒃ. ᖁᓕᐅᓂᐊᖅᑐᓂ ᐅᑭᐅᓂ ᓯᕗᓂᑦᑎᓐᓂ, ᓂᕆᐅᖕᓂᖃᖅᐳᖓ ᑮᓇᐅᔭᖁᑎᒃᓴᓂᒃ ᕿᑐᕐᖏᐅᖅᑎᑦᓯᒃᑲᓐᓂᕐᓂᐊᕐᓂᖏᓐᓄᑦ ᐊᒻᒪᓗ ᐃᑲᔪᖅᑐᐃᓂᖃᕐᓂᐊᕐᓂᖏᓐᓄᑦ ᓱᕈᖅᑎᖅᓯᒪᓕᓚᐅᖅᑕᖏᓐᓂᒃ ᐋᖅᑭᒃᓱᐃᕙᓪᓕᐊᑎᑦᓯᔾᔪᑎᒃᓴᑦᑎᓐᓂᒃ. ᓯᕗᓪᓕᕐᐹᒥᒃ ᐱᓕᕆᐊᒃᓴᐅᓂᐊᕐᒪᑦ ᐃᓗᐃᒃᑲᐅᓪᓗᒋᑦ ᑮᓇᐅᔭᖁᑎᖃᖅᑎᑕᐅᓯᒪᓕᕐᓂᒃᓴᖓᑕ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᓂᕐᒥ ᒪᓕᒐᒃᓴᖁᑎᖓᑕ. ᐅᓪᓗᒥ ᐊᒻᒪᓗ ᖁᓕᐅᓂᐊᖅᑐᓂ ᐅᑭᐅᓂ, ᐱᓱᒃᐸᓪᓕᐊᔪᓐᓇᕐᓂᐊᕋᑦᑕ ᒪᒥᓴᖅᐸᓪᓕᐊᓂᑦᑎᓐᓂ ᓯᕗᒻᒧᑦ ᖁᕝᕙᖅᑎᑦᓯᒋᐊᕐᓂᑦᑎᒍᑦᐅᖃᐅᓯᓕᕆᓂᕐᒥ ᐊᔪᖖᒋᓐᓂᖅᐸᐅᓪᓗᑎᒃ ᐱᓕᕆᐊᖃᖅᑎᐅᔪᓂᒃ ᐊᒻᒪᓗ ᑕᒪᐃᓐᓂᒃ ᐃᖅᑭᓕᖕᓂᒃ ᐃᓕᑦᓯᕙᓪᓕᐊᒃᑲᓐᓂᖅᑎᑦᓯᓂᖅᑎᒍᑦ
—ᑲᓇᑕᒥ ᐃᓱᒪᑕᒻᒪᕆᒃ ᕉᔅᐋᓐ ᐋᑦᓯᐹᓪᑦ, ᐃᖅᑭᓖᑦ ᑲᑐᔾᔨᖃᑎᒌᖏᑦ
“ᐃᓅᓪᓗᑕ, ᐅᖃᐅᓯᕗᑦ ᑐᖖᒐᕝᕕᖁᑎᐅᒻᒪᑦ ᐱᐅᓯᑐᖃᕆᔭᑦᑎᓐᓄᑦ ᐊᒻᒪᓗ ᑭᓇᐅᓂᕆᔭᑦᑎᓐᓄᑦ. ᐱᓕᕆᓂᖃᖅᐸᓪᓕᐊᓕᖅᑎᓪᓗᑕ ᑖᔅᓱᒥᖓ ᓯᓚᕐᔪᐊᓕᒫᒥ ᐅᑭᐅᑦ ᖁᓕᓄᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ ᐱᓕᕆᓂᐅᔪᓂᒃ, ᐃᖅᑲᐅᒪᕙᖅᐳᑦ ᕿᒥᕐᕈᒃᑲᓐᓂᖅᓱᑎᒍ ᐃᓄᒃᑐᑦ ᐅᖃᐅᓯᐅᑉ ᑲᔪᓰᓐᓇᖅᑎᑕᐅᔪᓐᓇᕐᓂᖓᓂᒃ ᐊᒻᒪ ᐃᓚᒋᔭᐅᖃᑕᐅᓂᖓᑕ ᓴᖖᒋᓂᖅᐸᐅᓪᓗᑎᒃ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ ᑲᓇᑕᒥ. ᐃᓄᐃᑦ ᓇᓗᓇᐃᒻᒪᕆᒃᑐᒥᒃ ᐅᖃᐅᓯᕐᒥᓐᓂᒃ ᐊᓯᐅᔨᓯᒪᓂᖃᓕᕐᒪᑕ, ᑭᓯᐊᓂᓗ, ᐊᒻᒪᓗ ᒥᐊᓂᕆᔭᐅᓯᒪᓕᕐᓂᒃᓴᖓᓄᑦ ᐃᓄᒃᑐᑦ ᐅᖃᐅᓯᐅᑉ ᐱᓕᕆᐊᒃᓴᐅᓕᖅᓯᒪᔪᑦ ᑭᓯᑦᑕᐅᓗᑕ ᐱᓕᕆᐊᕆᔪᓐᓇᕐᓂᐊᖖᖏᓐᓇᑦᑎᒍᑦ. ᓂᕆᐅᖕᓂᖃᖅᐳᒍᑦ ᖁᓕᐅᓂᐊᖅᑐᓂ ᐅᑭᐅᓂ ᓄᑕᐅᓕᕆᐊᖅᑎᑕᐅᓯᒪᓕᕐᓂᐊᕐᓂᖏᑕ ᐃᑲᔪᖅᑐᐃᓂᐅᔪᑦ ᐊᒻᒪᓗ ᐆᒻᒪᖅᑎᑦᓯᒋᐊᒃᑲᓐᓂᕐᓂᕐᒧᑦ ᐱᓕᕆᓂᐅᔪᓄᑦ ᐃᑲᔪᕈᑎᐅᓂᐊᕐᓗᑎᒃ ᐃᓄᒃᑐᑦ ᐅᖃᐅᓯᐅᑉ ᐊᖏᓂᖅᓴᐅᓪᓗᓂ ᐊᑐᖅᑕᐅᕙᓕᕐᓂᐊᕐᓂᖓᑕ ᐃᓄᐃᑦ ᐃᖅᑲᓇᐃᔭᕐᕕᖏᓐᓂ, ᐃᓕᓐᓂᐊᕐᕕᖏᓐᓂ ᐊᒻᒪᓗ ᐊᖏᕐᕋᕆᔭᖏᓐᓂ.”
—ᓇᐃᑖᓐ ᐆᐱᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
“ᒐᕙᒪᖃᐅᓯᖅᑖᕐᓂᖅᑎᒍᑦ ᐊᐅᓚᑦᓯᓂᐅᓕᓚᐅᖅᑐᑦ ᓄᖑᑎᑦᓯᓯᒪᓕᑲᓚᓪᓚᕆᓚᐅᕐᒪᑕ ᒥᓯᕝ ᐅᖃᐅᓯᖓᓐᓂᒃ, ᐊᒻᒪᓗ, ᐅᖃᐅᓯᖅ ᐱᔾᔪᑎᒋᓪᓗᒍ, ᐱᐅᓯᑐᖃᕆᔭᐅᔪᑦ ᐊᒻᒪᓗ ᑭᓇᐅᓂᕆᔭᐅᔪᑦ ᐊᑦᑕᑕᖅᓯᒪᓂᖃᓪᓚᕆᖕᓂᖓᑦ, ᐊᖏᔪᐊᓗᖕᒥᒃ ᐊᒃᑐᐃᓂᖃᖅᓯᒪᓕᓚᐅᕐᒪᑕ ᐊᓪᓚᖓᔪᐃᑦ ᑭᓇᐅᓂᖏᓐᓂᒃ. ᔪᓇᐃᑎᑦ ᓃᓴᒃᑯᑦ ᓯᓚᕐᔪᐊᓕᒫᒥ ᐅᑭᐅᑦ ᖁᓕᓄᑦ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ ᐱᓕᕆᐊᖓᓂᑦ ᐱᕕᒃᓴᖃᓕᖅᑎᑕᐅᒐᑦᑕ ᓇᓗᓇᐃᖅᓯᓯᒪᓕᕆᐊᒥᒃ ᐱᓕᕆᓂᐅᔪᓂᒃ ᒥᓯᕝ ᐅᖃᓪᓚᒃᑎᖏᓂᑦ ᐊᒻᒪᓗ ᐊᓪᓚᖓᔪᐃᑦ ᒐᕙᒪᖓᓂᑦ ᓴᑐᖅᓯᓯᒪᓕᒃᑲᓐᓂᕆᐊᒧᑦ ᐊᒻᒪᓗ ᐆᒻᒪᖅᑎᑦᓯᓯᒪᓕᒃᑲᓐᓂᕆᐊᒧᑦ ᒥᓯᕝ ᐅᖃᐅᓯᐅᑉ ᐊᑐᖅᑕᐅᕙᓐᓂᖓᓂᒃ ᓄᓇᓕᒋᔭᑦᑎᓐᓂ.”
—ᑳᒥᓯ ᑭᐊᕋᓐ, ᐊᖏᔪᖅᑳᖅ, ᐊᓪᓚᖓᔪᐃᑦ ᑲᓇᑕᒥ ᑲᑎᒪᔨᖏᑦ
ᐊᒻᒪᓗᒃᑲᓐᓂᖅ, ᓄᓇᖃᖅᑳᖅᓯᒪᔪᓄᑦ ᐅᖃᐅᓯᓕᕆᓂᕐᒥ ᑲᒥᓯᓄᕐᒋᔭᐅᔪᖅ, ᓘᑦᑖᖅ ᕌᓄᓪᑦ ᐃᒡᓃᔅ, ᖁᕕᐊᓱᒍᑎᖃᕐᐳᖅ ᓇᓗᓇᐃᖅᓯᓯᒪᓕᕆᐊᒥᒃ ᐱᒻᒪᕆᐅᔫᓂᖓᑕ ᐅᑭᐅᓄᑦ ᖁᓕᓄᑦ ᐱᓕᕆᓂᐅᓂᐊᖅᑐᓂ ᑐᕌᕐᕕᒃᓴᖃᖅᑎᑕᐅᔪᓄᑦ ᐊᒻᒪᓗ ᐅᔾᔨᕈᓱᓕᖅᑎᑦᑎᒋᐊᕐᓂᕐᒥᒃ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᓂᕐᒥ ᐱᔪᖕᓇᐅᑎᖃᕐᓂᖏᓐᓂᒃ.
ᓄᓇᖃᖅᑳᖅᓯᒪᔪᓄᑦ ᐅᖃᐅᓯᓕᕆᓂᕐᒥ ᑲᒥᓯᓄᕐᒋᔭᐅᔪᑉ ᐊᓪᓚᕝᕕᖓᓂ ᐱᓕᕆᐊᖑᔪᑦ ᐱᒻᒪᕆᐅᑎᑕᐅᓂᐊᕐᒥᔪᑦ, ᐊᓯᖏᓄᓪᓗ ᐱᓕᕆᓂᕆᔭᖏᑦ, ᐃᑲᔪᖅᑎᐅᓂᖏᓐᓄᑦ ᖁᕝᕙᖅᑎᑦᓯᒋᐊᕐᓂᕐᓂ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓂᒃ ᐊᒻᒪᓗ ᐃᑲᔪᖅᑐᐃᓂᖃᕐᓂᖏᓐᓄᑦ ᓄᓇᖃᖅᑳᖅᓯᒪᔪᓂᒃ ᑎᑭᐅᑎᓯᒪᓕᕆᐊᖅᑎᓪᓗᒋᑦ ᐆᒻᒪᖅᑎᑦᓯᒋᐊᕐᓂᕐᒥ ᑐᕌᕐᕕᒃᓴᖁᑎᒋᔭᒥᖕᓄᑦ.