Aatuvaa, Aantiuriu, Mai 7, 2021 − Ullumi tusaqtittigatta nutaamik Tukisiqattautisimaniqmut Titiraqsimajunik (MOU) ikajurutinik ukuninga Juunaitat Kiingtam-Kanatami Inuit Nunangat amma Ukiurtaqturmi Qaujasarniqmut Piliriaksamut atiliuqtaulaurninganik ukunanngat Inuit Tapiriit Kanatami, Juunaitat Kingtam Qaujisarniqmut amma Pinasuarniqmut, Ukiurtaqtuqmit Qaujimaniq Kanatami (POLAR), Kanatami Qaujisaqtuliriniqmut Katimajikkut (NRC), Mirnguirsiqvilirijikkut Kanatami Pilirivvinga, ammalu Ukua Qaujisaqtulirijikkut Kupaikmit.
Ukiurtaqtuup silanga sukkalijumik asinnguqpalliatillugu, tamatumunga tukisisimaniqtaqariaqarmat ammalu avatigijamut qanuiliurutitaqariaqaqłuni, inuuqatigiingnikkullu amma kiinaujaqarunnaqnikkut aktuqtaujjutigijaujunik. Una Tukisiqattautisimaniqmut Titiraqsimajuq (MOU) turaangaluartuq piliriqatigiingnikkut aaqqiksuivallianiqmik amma aulattiniqmik uuminga nutaamik piliriaksaqmik, taannalu maliksimalluni Kanatami Inuit Qanuiliurutinginnut Qaujisarniqmu qanuiliurutiksanik amma piliriaksanik. Anginirsakkulli, qaujisarniqmut ikajuutiksat uvuunaaqtut piliriatigut turaangaluarniaqtunik Ukiurtaqturmi qanuiliuqpalliajjutinik ammalu aktuijjutinik inuit nunalinginnik ungataanullu, ammalu qaujinasukniaqłutik qanuiliurutiksakkut amma pituinnarialingnik aaqqiksuijjutiunajaqtunik amma atulirunnaqniqmik aulautilingnik amma pilirijjutinik piusivaalliqtittinasuglutik avatigijaujunut asinngurutiuvalliajunik.
Taakkua piliriqatigiingniaqtut katimajiralaatigut aaqqiksuiniarmata piliriamut turaangajulimaanik. Piliriqatigiiktut imanna piliriaksaqaqtut:
- Aaqqiksuilutik qaujisarniqmut sivulliutijarialingnut piliriaksanik,
- Ikajurlutik inungnik pilirivalliatittinikkut,
- Aaqqiksuilutik makuninga tuksirarutinik pijumajjutiksanik,
- Aaqqiksilutik katujjinikkut tuksirarutiliurniqmut piliriqatigiingniaqtunik,
- Qaujisarniq piliriarijautitauluni naammalaangunikkut.
Piliriqatigiiktut maanna pilirijut pianikgasukłutik qanuilinganiarninginnik taassuma nutaap piliriaksaup. Qaujisarumajunik tuksirarutinik saqqittilaaqtut upirngaanguliqpat.
Uqausiit
“Kanatami pinasuagaqarmata nunaqaqqaaqtut nangminiq pinasugumaninginnut Ukiurtaqturmi qaujisarniqmik tamannalu aturtaujunnaqniarluni pilirijunnaqtunik unursivalliatittiniqmut, ilinniarniqmut, qarasaujakkut piliriqatigiigunnaqnirmut ammalu pinasuinnarunnarniqmut. Taimanna piliriniujuq qaujisarniqmik Ukiurtaqturmi aktuiniqattiaraluariaksanganik, amma aturtaujunnarluni gavamaujunut, ammalu ukununga nunaqaqqaaqtunut inungnut amma nunalinginnut taakkualu nunagijauqattaqsimajangit qaujisaqtauvalliallutik. Una nunarjuatigut piliriqatigiingniq nalunaiqsijjutiujuq nunaqaqqaaqtut qaujimaningittigu Ukiurtaqturmi qaujisaqtuliriniq asinnguqtauninganik.”
Nirsurnartuq Daniel Vandal, Minista Ukiuqtaqtuliriniqmut
“Ukiurtaqtuqmit Qaujimaniq kanatami (POLAR) pinasuagaqartuq ikajurniarlutik aaqqiksuivallianirmik atuqtaujunnaqtunik ukiurtaqtuup avatigijanganik qaujimanirmik tamannalu tunngaviqarluni nangminiq pinasungnikkut qaujimaniqmik tamakkua nunaliit pijunnarniqaqtitaujunnarlutik qaujimanikkut isumaliurijiujunnarninginnik. Ina piliriqatigiingniq sivumukpaallirutiujuq tamakkununga turaagarijaujunut.”
Jennifer C. Hubbard, Angajuqqaaq amma Aulattiji, Ukiurtaqtuqmit Qaujimaniq kanatami
“Aaqqiksiniq isumagijaqattiarniqmut amma ikajurutiksanik Inungni nangminiq pinasungnikkut qaujisarniqmik pigiarutimmariuvuq piusivaalliqtittiniqmut amma akturutiujunut qaujisarniqmik Inuit Nunanganik. Una qaujisarniqmut piliriangujuq aaqqiktaujuq ikajurutiuniartuq piliriqatigiingnikkut aaqqiksuiqatigiingniqmik piliriamut qaujisarutiuniaqtunik sivulliutitaujunik ammalu piliriqatigiingniqmik ukuninga inuit amma asingit qaujisaqtiit qanuq piliriaqarninginnik qaujisarnikkut. Juunaitat Kingtam-Kanatami Inuit Nunangat amma Ukiurtaqturmut Qaujisarniqmut Piliriaksaq pigiakkannirutiuvuq qaujisarniqmik qanuiliurniqmik Inuit Nunanganik, taannalu aaqiksijjutiulluni qanuq Inuit, gavamaujut, qaujisarvilirijikkut, ammalu qaujisaqtiujut piliriqatigiiqattarniarninginnut.”
Natan Obed, Angajuqqaaq, Inuit Tapiriit Kanatami
“Silaup asinnguqpallianinga suli Ukiurtaqturmit asinnguqtittivalliallariktuq. Tukisisimaniqsaujariaqaliratta ammalu piliriaqarniqsauluta avatiliriniqmik, inuuqatigiingniqmut, avatiliriniqmut. Aulautiliriniqmut, pilirivviliuqpallianikku ammalu iliqqusirmut aktuijjutinik asinngurutiujumut ammalu pilirianguluni piliriqatigiillutik tamatumunga aktuqtausimalaangujut. Una nutaaq piliriqatigiilirniq Juunaitat Kingtam Qaujisarniqmut amma Pinasuarniqmut katiqatigijjutigijauniartuq qaujisaqtinik Juunaitat Kingtammit, Kanatami ammalu Inuit nunanginniittu, taakkua piliriqatigiilirlutik qaujimajanginnik amma ajunginninginnik atuqtuinnaulutik. Tamanna pimmariugijaqarnikkuungajariaqarniaqtuq ammalu isumagijaqattiarnikkut tamainni qaujimaningittigut ajjigiingnikkut taimannalu taanna pigialisaarutiuniaqłuni qanuq ukiurtaqtuq Qaujisaqtauqattarninganut. Niriummariktunga taanna pimmarialuk piliriaksaq aaqqiktauvallianiarmat ammalu uvattinnik katitittijjutiuluni qanuiliurutiksalirinikku amma sapujjisimanirmik avatigijattinnik.”
Ilisaiji Christopher Smith, Nunarjuami Pilirijimmarik, Juunait Kingtam Qaujisarniqmut amma Pinasuarniqmut amma Aulattijiulluni Iksivautaq, Sanauganut amma Inuusirnut Qaujisarniqmut Katimajikkut
“Kanatami Qaujisaqtuliriniqmut Katimajikkut (NRC) niriummariktut ikajuqtuiniarninginnik Juunaitat Kingtam-Kanatami Inuit Nunanganik amma Ukiurtaqturmi Qaujisarniqmut Piliriaksarmi mauna piliriqatigiingnikkut qaujisaqattarniqmik amma pivalliajuliriniqmik, turaagaqaqtunik isumaaluutiuluaqtunik akturutiujunik Ukiurtaqturmut amma ukiurtaqturmiittunut.”
Mitch Davies, Angajuqqaaq, Kanatami Qaujisaqtuliriniqmut Katimajikkut.”
“Ukua Qaujisaqtulirijikkut Kupaikmit quviasuktiaqtut ilautitaujunnarninginnik piliriqatigiiktunik inungnik, Kanatamiutani amma Puritismiutanik ikajurasungnikkut pivalliajulirijauniaqtuq arraagu ungataanuungajunik ajjigiinngittuutinut qaujisarniqmut piliriaksanik, sanaqatauniqmik ukuninga inungni kiggattuijunik nunalingni pijjutiqarlutik sivulliutitauqujanginnik amma qaujisarniqmut piliriaqarniqmut. Qaujisarniq aktuijjutiqarniarluni Inuit nunalinginnik, pimmarialuuvuq kiiggaqtuijingit ilautitauvaglutik tamainni pilirianguvallianingagut qaujisarniup. Niriukpunga tusalaarnittinnik piliriarijaujunik makutiguuna tuksirarutiliurnikkut piliriangujunik.”
Rémi Quiron, Angajuqqaaq Qaujisaqti Kupaikmit, Qaujisaqtulirijikkut Kupaikmit
“Mirnguirsirvilirijikkut Kanatami quviasuktut ikajurniarninginnik nunarjuakkut piliriniuniaqtuq ilauliqtittisimaninganik Kanatami Inuit Qanuiliurutinginnut Qaujisarniqmut. Ikajuqtuittiarniq Inuit nangminiq pilirijumaninginnik qaujisarnikkut ikajurutimmariujuq maanna inungnut amma sivuniriniaqtanginnut, piliriqagiiktilluta sapujjisimanasungniqmik Quttirturmit una silaup asinnguqpallianinga tavvautillugu.”
Nirsurnaqtuq Jonathan Wilkinson
Minista Avatiliriniqmut amma Silaup Asinnguqpallianinganut ammalu Minista Kamagijaqaqtuq Mirnguirsirvilirijikkunnit Kanatami
Naittuutiit Sulijut
- Inuit Tapiriit Kanatami (ITK) kiggaqtuijiullutik katujjiqatigiingujut sapujjisimajiullutik amma sivumugiaqtittijiullutik pijunnautigijaujunik amma isumagijaujunik inungnut Kanatami.Aaqqiksuilaurtut uuminga Kanatami Inuit Qanuiliurutinginnut Qaujisarniqmut (NISR), taannalu nalunaiqsisimalluni naukkut piliriqatigiingnikku amma qanuiliuqpallianikku sanngiktippaallirutiujunnarmangaat aktuijjutinik amma aturutiqaqtunik inungnut qaujisarnikkut Inuit Nunangani.
- Juunaitat Kingtam Qaujisarniqmut amma Pinasuarniqmut (UKRI) pilirivvingnut pilirijiunngittuq kikkulimaanut pilirijiullutik ikajuqtaullutik Nangminiq Piliriaqarniqmut, Uummaqqutiliriniqmut amma Sanavviliriniqmut qanuiliurutiksalirijik gavamakkunnut Juunaitat Kingtammit. Una piliriniq ilaqaqtut tisamanik katimajini ilautittillutik ukunanngat Juunaitat Kingtam Qaujisarniqmut amma Pinasuarniqmut (UKRI): Nunaminngaaqtunik Avatiliriniqmut Qaujisarniqmut Katimajit (NERC), Sanauganut amma Inuusirnut Qaujisarniqmut Katimajikkut (AHRC), Aulautiliriniqmut amma Saqqijaaqtukkut Qaujisaqtuliriniqmut Katimajit (EPSRC), ammalu Kinaujaliurutilirinikkut amma Inuuqatigiingniqmut Qaujisarniqmik Katimajinik (ESRC).
- Ukiurtaqtuqmit Qaujimaniq Kanatami (POLAR) Kanatami Gavamakkunnut pilirivviujuq kamagijaqaqłutik sanngitittivaallirniqmik Kanatamiutani ukiurtaqturmi qaujisaqtulirinikkut amma pilirijjutilirinikkut. Uvaniittuq Kanatami Quttikkurmiunut Qaujisaqvikmit (CHARS) ilinniaqvikmit, taannalu aulataulluni uvani Iqaluktuuttiaq, Nunavut.
- Kanatami Qaujisaqtuliriniqmut Katimajikkut Kanatami angilaangujuq gavamatuqakkut qaujisarniqmut amma pivallianiqmut katujjiqatigiinik. Tamakkua Ukiurtaqturmit piliriaksaujut turaagaqarniaqtut tisamalluatarnik qaujisarutiujunik: igluliriniq, aanniaqarnanngittuliriniq, niqinik amma imarmik.
- Mirnguirsiqvilirijikkut Kanatami Pilirivvik kamagijaqaqtuq tamakkua Kanatami mirnguiqsiviujut, inigijaujuvinituqait ammalu tamaangaangajut ittarnisait iniviniujut sapujjausimangmata amma asiutitauttailillutik mannamut amma sivuniksamut inugijauniaqtunut.
- Una Qaujisaqtulirijikkut Kupaikmit saqitittivaktut amma kiinaujatigut ikajuutiqaqtittivakłutik makununga: qaujisarniq; qaujisaqtulirinikkut qaujijauvalliajunik tusaumajautittiniq; ammalu ajurunniiqsaqtittiniqmik qaujisaqtinik nunainnarmiiktunik makuninga nunamiinngaaqtunik qaujisaqtuliriniqmik, naisausirinikkut qaujisaqtuliriniq, aulautiqaqtunik, aanniaqarnanngittuliriniqmut amma inuuqatigiingniqmut qaujisaqtuliriniqmik Kupaikmit.
Kasuumavviit Turaangaqasiutijut
Kanatami Inungnut Parnautiujuq Qaujisarnirmut
Juunait Kingtam Qaujisarniqmut Amma Pinasuarniqmut
Kanatami Qaujisaqtuliriniqmut Katimajikkut