Ottawa, Ontario (March 24, 2023)
Inuit Tapiriit Kanatami angijuqqaangat Natan Obed ammalu Nunaqaqqaasimajulirijikkunnut Minister-ngat Patty Hajdu saqqiisimalilauqput tusaqtitsitjutinik ullumi Silarjualimaami Puvagluliqattarnirmik Aanniaqaliqpaktut Ullungani 2023:
“Puvagluliqattarnirmik aanniaqaliqpaktut kajusiinnaqsimaningat ugguarnaraluarpuq ammalu taimaitsariaqanngikkaluaqsuni suli taimannainningata Inuit Nunanganni. Puvagluliqattarniq (TB) quttiluammaringninga aktuisimaniqarmat Inuit nunaligijanginik Canadalimaami. Canadami Gavamangat ammalu Inuit Tapiriit Kanatami (ITK), Canadalimaami pijjutiqaqtiullutik katujjiqatigiit Inungnut Canadami, katujjillutik piliriaqaqatigiingmata nungutitausimaliqullugu Puvagluliqattarnirmik Aanniaqalirniuvaktuq Inuit Nunangannit, aanniaqaqtut ihluaqsaqtausimaliqpangningitigut ammalu aanniaqaliqujinnginnirmik piliriniujutigut turaarviqaqtitausimalutik aanniaqaliqtailimanirmut, niqigijaksanik pisimaliqattarunnarnirmi ammalu ikajurutiksaujunut pijitsirarutiksaujunut mikigligiarutiujunnaqtunut aanniaqaliqtailimatittinirmut.
Ukiungita 2015 ammalu 2019 akunninginni, saqqitausimalilauqtut aanniaqaliqpaktunut quttingnirijaujunut Puvagluliqattarnirmi Aanniaqaliqsimajunut Inungni nunaqaqtuni Inuit Nunanganni 300-ngiqtarunnalaurmata quttingnirijauliqsimajunit Canadami irningangusimallutik Canadamiuni, Nunaqaqqaaqsimajuunatik. Tamanna naammanngillariktuulluni quttingnirijanga Puvagluliqattaqtunut Inuit Nunaluktaangani takuksautittisimavut aulatsijjutiuvaktutuqait sanngiktigiarutiusimaningita aanniaqaliqtailimanilirinirnut ammalu inuusilirinirmut kiinaujaliurasuarutiuvaktut ajjigiinngittumik piliriniqarviuvamnningita Inuit ammalu asingita Canadamiutaujut, ilaqaqtillugit inugialuaqsutik iglumiuqatigiikpangniujunut, niqigijaksaminnik pisimalirunnaqattannginnirnut, tuluqtarviqarnirmik aanniaqsiurtilirijjutinut, ammalu akhluluaqtuuninginnut.
2018-mi, Canadami Gavamangat ammalu Inuit Tapiriit Kanatami (ITK) piliriaqaqatigiingniarnirminnik nalunaiqsisimalilaurmata nungutitausimaliqullugu Puvagluliqattarnirmik Aanniaqaliqpaktunut Inuit Nunangannirmiuni sivurngani 2030 ukiungata. Canadami Gavamangata sivullirmik kiinaujanik qiturngiuqtittisimalilaurningit $27.5 million-nik atuqtaulaurmata piliriniqarviujunut parnautiliurnirmut turaangatitausimajunut atunit sitamaullutik aviktuqsimanirijaujunut Inuit Nunanganni. Piliriamut parnautigijausimajut ilaqaqput turaarviksaujunik suurlu Puvaglulirsimagiaksanginik qaujisaiqattarnirmi piliriniujunik, nunaliujumi ikajuliriarutiksanik, pilimmaksaisimaliriamut nunaliujumi aanniaqarnanngittulirijikkunnut sanajinik, inungnut turaangatitaullutik qaujisainiulirajaqtunik ammalu qaujisagausimalirniksangita atavvigiturautsunnarmangaata Puvagluliqattarnirmik Aanniaqaliqpangniujut (TB) ammalu Nuvagjuarnaq-19. Canadami Gavamangat atainnaqtumik piliriniqainnaqput nanisisimaliriaksaminnik nutaanik piliriniqarviulirajaqtunik ikajurutiulirniarlutik tikisimalirutiksattinnik turaarviuliqsimajunut nungutittisimaliriamik Puvagluliqattarnirmik Aanniaqaliqpangniujuq (TB).
Kajusiinnaqtitaujariaqarmata kiinaujanik qiturngiuqtittiniujut nuqqaqtitausimaliqullugu Puvagluliqattarnirmik Aanniaqaliqpangniujut Inuit Nunaluktaanganni. Inuit Tapiriit Kanatami (ITK) isumaliuqsimaliqtut atainnaqtumik ammalu naammaktunik kiinaujanik pititausimaqattariaqarningita 8-nguniaqtunut ukiunut nungutittisimalirumaniarutta Puvagluliqattarsutik Aanniaqaliqpaktunik Inuit nunaligijanginni. Pimmariuluaqpurlu, kajusitittisimajariaqarnivut iglurjualiuqpallianittinnik, piuniqsatigut niqigijaksanik pisimaliqattarutiujunnaqtunik ammalu piliriangusimaliqullugittauq asingit ilinganniuliqsimajut pitaqalirutiujunnaqsutik qanuinngitsiaqtunik Inungnik ammalu nunaligijaujunik Inuit Puvagluliqattarnirmik Aanniaqaliqattarungniiqtinniaruttigu.
Canadami Gavamangat kajusitittisimaniaqtut piliriaqaqatiqarnirminnik Inungnik piliriaqaqatigiiktunik ammalu aanniaqsiurtilirijjutinut iqqanaijaqtimmariujunik ikajuqtugausimaliqullugit Inungnik sivuliqtiqarlutik, nunaligijaujuni Puvagluliqattarnilirinirmut (TB) pilirianguliqsimajut ammalu piliriangujut sivulliqpautittisimallutik piusituqakkut qanuinngitsiaqtitsigiarnirmut, piusituqami qaujimajaujunik ammalu pilirijjusiuvaktunik, ammalu nangminiq isumaliurutiliurunnarnirnik.
Silarjualimaami Puvagluliqattarnirmik Aanniaqaliqpaktut Ullungani, nalunaiqsivugut kajusitittiniarnittinnik piliriarijattinnik pisimalirutiunaqtunik aanniaqsiurtilirinirmi piliriniujut naliqqariiktitauliqullugit kikkutuinnait aanniaqsiurtilirininginni Inungnut, ammalu ilijausimalirniksangita pijausimajariaqaqtut kiinaujatigut ikajuruksait ilitarijausimaliqullugit piliriaksariliqsimajavut nungutitausimaliqullugu puvagluliqattarnirmik aanniaqalirniuvaktunut (TB) Inuit Nunanganni tikiutilauqqaartinnata 2030 ukiunganut, ammalu kajusiinnaqtitausimaqullugu nungutitausimalirninga kinguniani.”