Skip to main content
AnnouncementsTusaqtitsijjutiit

Inuit Tapiriit Kanatami niriunniqaliqtitauvut Gavamatuqakkut Kiinaujanik Aulatsiniqarutiksanginit 2024-mi pitaqaqtittisimaniarningita kiinaujanik qiturngiuqtittinirminnut Inuit iglulirininginnut, aulatsiniqarvigijaujunut ammalu niqigijaksaminnik pisimalirutiksanginnut

April 16, 2024 – Ottawa, Ontario

Inuit Tapiriit Kanatami (ITK) niriunniqaliqtitauvut amisurlaullutik Inungnut turaangajunik kiinaujait qiturngiuqtitaulirninginnut ullumi gavamatuqakkut kiinaujanik aulatsiniqarutiksanik tusaqtittisimalilaurninginnit pitaqaqtittisimaniarningitta, piluaqtumik $370-million-nik iglulirinirmut ammalu aulatsiniqarutiksanik piliriangujunut kiinaujaqutiksaqaqtittiniarnirmut Inuit Nunanganni. Taakkua amiqqarutiullutik sivulliqpautitaksarijauvut Inuit Gavamatuqakkut Piliriaqaqatigiinnirnut Katimajiralaanginnit ammalu piruqtittigiarviullutik iglulirinirmi kiinaujaqutissarijaujunut $845-million-nit turaangatitausimalauqtunut Aulatsiniqarutiksaullutik Kiinaujaqutiksaqtaarijaulauqtunut 2022 ukiungani kisianilu tikiutisimalilaunngimmata tuksirarutiulauqsimajunut kiinaujaqutiksanik $75-Billion-nik pititauqattalirumallutik ukiut 35 atuqpallianinginni atuqtaujuksanik aulatsiniqarviullutik piliriarijauniaqtunit Inuit Tapiriit Kanatami kiinaujaqutiksauniaqtunik tunisisimalirniarnirmut saqqiisimalilauqqaaqtinnagit tunijausimalilauqtunit.

Inuit Tapiriit Kanatami (ITK) niriukput tusaumaliqtitaukkanniriaksaq amisurlaullutik kiinaujanik qiturngiuqtittisimalirviujunnaqtunik ilaqaqtillugit niqigijaksanik pisimalirunnarnilirinirmi piliriaqarutiksanik kiinaujanik ikajurutiksaqaqtittijunut Inunnut angunasuaqtinut ammalu nunaliujuni niqigijaksaujunik pitaqaliqtittijiuvaktunut, ammalu Inuktut uqausilirinirmi ammalu piusituqalirinirmi piliriangujunut kiinaujaqutiqaqtitauvaktunut kanatami iliqqusituqalirijikkutigut.

Ilaalu quviasugutiksaqaraluarmitillugit Aulatsijjutiksanik Kiinaujaqutiksaqtaarunnarniarnirminnut 2024 ukiungani, Inuit Tapiriit Kanatami (ITK) nikallurutiqaqsimalilauqput nalunaittumik kiinaujaqutiksaqtaaqtitausimannginnirminnut pilirijjutiksanik nungutitausimaliqullugu puvagluliqattarniujut ukiungata 2030-mut tikiutisimalirutta, amiqqarutiulluni piliriaksarijaulilauqtumit Inunnit ammalu Canadami Gavamakkungannit 2017-mi. Inuit Tapiriit Kanatami (ITK) gavamatuqakku tusaqtittisimalirviksangata sivurngani tunisisimalilaurningit tuksirautigisimajaminnut $131.6-million-nik atuqtauvalliajuksanik piliriamut 7-ni ukiuni nungutitausimaliqullugu Puvagluliqattarnirjuq.

“Inuit Tapiriit Kanatami (ITK) piliriqatiraqpaktut gavamatuqakkunnik Inuit Gavamatuqakkut Piliriaqaqatigiingninginnut Katimajiralaangitigut sivummugiaqtitausimaliqullugit Inuit sivulliqpautitauqujanginik. Niriunniqaliqtitausimavugut takusimaliriamik ilanginnik katujjiniqarvigillutigut piliriarijavut takuksauliqtitauningita Gavamatuqakkut Kiinaujaqutiksanik Pisimaliqtittiniarninginnut 2024 ukiungani,” uqaqsuni Inuit Tapiriit Kanatami Angijuqqaangat Natan Obed. “Kisianilu amiqqarutigillutigu piliriaksaqarnivut turaangallutik Puvagluliqattarnirmik nungutittisimaliriamut piliriangusimalirunnarnianngittut angijunik kiinaujaqutiksaqaqtitaulinngikkutit.”

Inuit Tapiriit Kanatami (ITK) ujjirijaqalilaurmata gavamatuqakkut tusaqtittisimalirutigilauqtanginit taanna taqqiq atulisaaqtillugu aaqqiksuisimalirniarnirminnut Canadami Ilinniarvingni Nirijaksaqaqtittivanniarnirmut Piliriamik. Inuktigut Inuit Nunanganni Ilinniarvingni Nirijaksaqaqtittivannirmut Piliriangujumut akigijanginnut unikkaaliangusimajut, saqqititausimalilauqtut 2022-mi piliriangujuksaummata saqqitausimaliriaqaqsutik akituluaqtuutinnagit, atuinnautitausimalutik, ammalu Inunnut turaangatitaulutik nirijaksaqaqtittivannirmut piliriangungujuq atuliqtitaujuksaulluni 75-ni ilinniarvingni Inuit Nunanganni. Gavamatuqakkut Kiinaujanik aulatsijjutiksanik Pitaqaqtittiniarningit 2024 ukiungani tusaqtittijjutingit ilaqaqtitsinngimmata qanutuinnaq tusaqtittisimalirnirminnut qanuq taanna turaarviksarijaulilaurtuq piliriangusimalirunnarniarmangaat.

Taakkua Gavamatuqakkut Aulatsijjutiksanik Kiinaujanik Pitaqaqtittiniarningit nalunaiqsisimammata Inuit Tapiriit Kanatami (ITK) piliriarijanginnik Inuit Nunanganni Niqigijaksanik Pisimalirunnarnirmut Qanuqtuurutiliangusimallutik Parnautinut sivulliqpautitaksanik nalunaiqsisimallutik ikajuqtuiniqarniarnirmut angunasuaqtinik ammalu nunaliujumi nirijaksaqaqtittinirmut piliriangujunut, kisianilu nalunaiqsisimanatik qanuq Gavamatuqakkut Kiinaujaqutiksaqaqtittiningit 2024 ukiungani ikajurutiksanik pitaqaqtittiniarmangaata niqigijaksanik pisimaliqattarnirmi piliriangujut sivulliqpautitausimajariaqarningitta.

Quviasukpugut Gavamatuqakkut Kiinaujaqutiksaqaqtittiniarningit 2024 ukiungani ilaqaqtitauningita $2.8-miliantaalanik atuqtauvallianiaqtunik ukiut pingasut (3) atuqpalliatillugit, aaqqiksuiqatigiingninginnut Inuit Tapiriit Kanatami ammalu Inuit Angirutiusimajutigut Katujjiqatigiingita, maligannguqtittisimanilirinirmi ammalu maligaqutilirinirmi piliriniqarviungaalirunnaqtunik tukimuagutiksaqaliqtittiniarnirmut niuvrutiqaqpannirnut ammalu niuviaksaqaqtittivannirnut Inuit niqinginik – nalunaiqtausimalluni apirijjutigisimalauqtangat Inuit Tapiriit Kanatami (ITK) Gavamatuqakkut Kiinaujaqutiksanik Pitaqaqtittiniarnirmut tusaqtittisimalilauqqaartinnagit tunijausimalilauqtuni.

Ullumi gavamatuqakkut kiinaujaqutiksanik pitaqaqtittiniarnirminnut tusaqtittijjutingit iluliqartitauvut amisurlaullutik asinginik tusaqtittijjutinik ikajurutiusimalirunnaqtunik Inunnut Canadami. Makuninga ilaqaqsutik:

  • $167.5-million Inuit Surusiit Sivulliqpautitaulutik Piliriangujunut, Inunnut turaangatitausimallutik ajjigijangit piliriangujumut taijaulluni juartan tunngavviqutingit piliriamut
  • $10- million atuqtauvalliajuksaujut ukiut pingasut (3) atuqpallianinginni ikajurutiksauniaqsutik Inuit nangminiq isumaliurutiliurunnarninginnut qaujisainirni
  • $630.2- million atuqtauvalliajuksaujut ukiut marruuk (2) atuqpallianinginni ikajurutiksauniaqsutik isumakkut aanniaqaliqtailimajulirinirmi pijitsirarutiksanut ilaqaqtillugit ajjigiinnginniujunut tunngavviqaqtitaullutik isumakkut qanuinngitsiariaqarnilirinirmi qanuqtuurutiliangusimajunut
  • $225- million atuqtauvalliajuksaujut ukiut tallimat (5) atuqpallianinginni, kiinaujaqutiksaqaqtitauvanniarningit $45-miliantaalanik ukiutamaat kajutiinnaqtitausimalutik, Nunaqaqqaaqsimajuit uqausilirininginnut ammalu piusituqalirinirmi pilirianut kiinaujaqutiqaqtitausimalutik Canadami Piusituqalirijikkutigut