March 29, 2023 – Ottawa, Ontario
2023-mi gavamatuqakkut kiinaujat atuqtauniksanginnut saqqitisimajangit March 28-mi pitaqaqtittisimavut ilanganik kiinaujaqutiksarijaujariaqarniaqtunit nungutitausimaliqullugu puvaglungnirmik aanniaqaliqpangnilirinirmut Inuit Nunanganni ammalu amisuunngittuugaluanik ilagiarutinik pitaqaliqtittisimallutik angijummaringmik naliqqautitaulutik atuinnaulirviujjutiksanginnut Inuit ammalu asingita Canadamiutaujuit.
Kiinaujat Atuqtauniksanginnut saqqitisimalirtut 2023-mi angirutiqaqsimavut pitaqaliqtittiniarnirminnik $16.2-million-nik ukiut pingasunut atuqtauvalliajuksanik “sapujjigiarutiksaulutik mikigligiaqtittinirmi puvaglulirnirmik aanniaqaliqpaktunut quttingnirijaujunik inuit nunalinginni.” Taakkua kiinaujaqutiksaqtaarijauniaqtut qanutigiulingi 1/4-luatuinnanganik qassiturajarninganit nalunaiqsimalilauqtanginnit Inuit Tapiriit Kanatami pilirianguvallianingita tuglirijanginut puvagluliqattarnirmik nungutittisimalirianiarlutik kiinaujat atuqtauniksanginnut saqqiisimalilauqqaaqtinnagit tunisimalilauqtanginnut ukiaksaangulauqtumit.
“Taakkua mikittuullutik kiinaujanik qiturngiuqtittisimalirniujut Inuit aanniaqsiurtilirinirmi sivulliqpautitauqujanginnut pilirianut iluikkaujutigut piliriniqalirutigijunnarniannginnattigu katujjiluta piliriaksarijattinnut piliriqatigilutigu Canadami Gavamangat nungutitausimaliqullugu puvaglulingnirmik aanniaqaliqpaktulirinirnut Inuit Nunanganni ukiunga 2030-up sivurngani,” uqaqsuni Natan Obed, Angijuqqaaq Inuit Tapiriit Kanatami (ITK). “Taimannaikkaluaqtillugulu qularusulinngittugut sivunirmi gavamatuqakkut kiinaujat atuqtauniksanginnut piliriniuliqpaktut matuiqtausimalirumaarningita kiinaujaqutiksanik pisimaliriaqaqtattinnut piliriaksarijavut taatsumunga piliriangusimalirniaqullugu.”
Inuit Tapiriit Kanatami (ITK) katimajingit nalunaijaisimalilauqtut tallimanik qanuqtuurutiksalianik parnautiliangusimajuni sivulliqpautitaksauniaqtunik Kiinaujat Atuqtauniksanginnut 2023-mi. Ilagijaullutik puvagluliqattarniup nungutitausimaliriarningata piliriamut, ilauliqtittilaurmata nalunaijaqsimallugit parnautinik saqqiisimalirutiksanik ammalu piliriniulirajaqtumut Inuit Nunanganni Ilinniarvingni Nirijaksaqaqtittivannirmut Piliriamik, akigijaunajaqtunut pilirijjutiulirajaqtumik satuqtausimalirniksangata, uummaqtitaugiakkanniqsimalirajarningata, piliriangulirajarningata ammalu sanngiktigiarutiksanginik Inuktut uqausiup, atuliqtitauniksangita Pilirianguvallianingit 2-nga Canadami Inuit parnautiliarisimajangit Qaujisainiuvaktunut ammalu kiinaujanik qiturngiuqtittisimalirajarnirmut piliriangujuksanut Inuit Nunanganni piliriniqarviulianiktuni piliriangukainnaqtutigu aaqqiisimalirutiujunut tamaitigut amisuilingajuullutik qaujigiarniujunut sunanik pisimaliriaqarnirmut iluikkaruqtitausimaliqullugu piliriangulianiktuni ilakuuniqarviujunut Inuit Nunanganni 2030 ukiungata sivurngani.
Inuit Tapiriit Kanatami (ITK) kajusilutik sapujjigiaqsimaniaqtut nunaqaqqaaqsimajuit ajjigiinngittuuninginnut tunngavviqaqtitausimallutik kiinaujaqutiksaqtaartitauvagiaqarninginnut gavamatuqakkunni kiinaujalirinnaup ukiunga atuqtillugu nalunaijaqtausimalitsiaqattalirniarmata ammalu qularnannginniqsauliqtitaulutik amisuilingallutik parnautiliuqpallianirmi pilirianguvaktuni sitamaullutik ajjiqaratik aviktuqsimanirijaujuni Inuit Nunanganni.
Inuit – Gavamatuqakkut Piliriaqaqatigiingninginnut Katimajiralaangit sivuliqtiulluti piliriniqaliqtittijiummata Inuit ammalu gavamatuqakkut ikajuqtigiiksutik piliriaqarninginnut pivalliajuliriniujuni amiqqartaullutik sivulliqpautitaksaujut turaangatitauqullugit gavamatuqakkut kiinaujanik qiturngiuqtittivanninginni ammalu ikajuqtuiniqarninginni Inuit nangminiq isumaliurutiliurunnarninginnut pijjutiqaqtunut. Inuit Tapiriit Kanatami (ITK) niriungniqaqput tusaqtitaugiakkannirutiksaminnik taakkununga kiinaujatatuqtauniksanginnut pijjutiqaqtunik ammalu piliriqatiqattiarnirminnik Canadami Angijuqqaarjuamik ammalu Isumatammariullutik Minister-gijaujunik katimaniqalirmikpata ICPC-kut Sivuliqtigijangit Nain, Nunatsiavutmi, May 2023-nguliqpat.