Juuni 3, 2021 – Ottawa
Ullumi Inuit Tapiriit Kanatami amma Pauktuutit Inuit Arnait Kanatami alakkaivut uuminga Kanatami Inuknut Qanurtuurutauqujaujut Parnautiit pitjutigillugit Kinngurtausimajut amma Inuartausimajut Inuit Arnait Niviarsiat amma Angutaujumajutlu Arnaujumajutlu amma Asingit, pitjutiqarsutik taikkununga 46ngujunut Qanurtuurutauqujausimajunut Kanatami Killisiniartuqalaurtillugu Kinngurtausimajut amma Inuartausimajut Nunaqaqqaarsimajut Arnait amma Niviarsiat.
Kanatami Inuknut Qanurtuurutauqujaujut Parnautiit nalunairsivut qaujimajaktinnik summat amisuuluartualuit aannirtiktauvakmangaata Inuit arnait niviarsiat angutaujumajutlu arnaujumajutlu amma asingit amma taakkua qitungangit. Pitjutiusutik ukua kimaavikitsarniq amma attanattailimaviksami najugaksaqanginniq amma iglukitsarnialuk Inuit Nunanginni ammaluttauq pitaqangiluarningit aanniartailimanirmut amma qanuingitsianirmut piliritjutinik amma ikajuusiujunnartunik.
Gavamaujut amma Inuit nunalirinirmut timiujut sivumuakkaigiaqaraluaqqut atulirtitauninginnik Kanatami Inuknut Qanurtuurutauqujaujut Parnautinik atulirtiksilutik pijunnautigijaujugaluat killigijaulutik. Tamanna atulirtiksinasuarniq tunngaviqallutik isumagijautsiarlutik amma ikajurturtautsialutik pijunnautigijaullartaartut, inuuningit pitjutigilugit amma isumagilugit kamajiulluatarningit Inuit Nunalirinirmut Timiujut, amma utjirijautsiarlutik Inuit Nunalirinirmut Angiqatigiijutiit tamanna ikajursisimaalirutauqullugu angiqatgitjutausimajut pilirisuarnirmut inungnut amma gavamaujunut.
Qanurtuurutauqujaujut parnatausimajunittut 14nguvut pitjutigitsugi qivaaviliriniq amma illuliriniq, amma iqqartuiviliriniq amma paliisiliriniq, anniaqangittuliriniq amma qaingitsiarniq ammalu kinaujartigut ajursartailimaniq. Qanurtuurutauqujaujut aviktursimaurmijut qanurtuurutauqujaullutik immikkuulingalutik gavamatuqakkunnut, aviktursimaurtunut gavamaujunut amma inuknut qanurtuurutauqujaujut.
Kanatami Inuknut Qanurtuurutauqujaujut Parnautaujut aqqittausimajut ukununga Kanatami Inuit Pilirijinginnut pijutiqarsutik Kinngurtausimajut amma Inuartausimajut Inuit Arnait Niviarsiat Angutaujumajutlu Arnaujumajutlu amma Asingit. Taakkua quliutsutik pilirijiit Pauktuutitkunniingaartumik amma Tapiriikkunniingaartumik iksivautaliit. Kigartuijiqarsutik Inuvialuit Kuapuriisakungannik, Nunavut Tunngavikkunnit, Makivik kuapuriisakungannik amma Nunatsiavut Gavamakkunginnik. Pilirijiuqaummijut timiujuniingaartunik nunalingniingaartunik tisamaujunik ukunangat Ilagiit amma Qimmakuit Timingat, Tunngasukvingat Inuit, AnanauKatiget Tumingit amma Saturviit Inuit Arnait Katutjiqatigiingit Nunavikmi.
Tamanna arnauninginnut annitirtauvakningit isuliktinniatuaruttigu, Inuit arnait sivumuaktiksijiuqataugialiit atulirtitauninganut amma kajusikkartauninganut Kanatami Qanurtuurutaujumajut Parnataujut. Rebecca Kudloo Pauktuutikut Angijuqqaangat imaak uqalaurtuq tamanna isumarsuutaugiatukjangittuq kisianili aturtaugiaqallattaartuq tamanna maliksugugi Silarjuarmiut Katutjiqatigiitta Nalunairsisimaningat Nunaqaqqaarsimajut Pijunnautinginnik amma pitjutigillugit taikkua atulirtitauqujausimajut titirartausimajunik Kingullirpaarsiutingannik Unikkaani Kanatami Killisiniartuqalaurtillugu Kinngurtausimajut amma Inuartausimajut Nunaqaqqaarsimajut Arnait amma Niviarsiat.
Kanatami Inuknut Qanurtuurutauqujaujut Parnautaujut aqqittausimavuq qanurtuuqatigitlariktutik inuit nalunarsinasuarsutik qanuq Inuit arnait niviarsiat angutaujumajutlu arnaujumajutlu amma asingit taakkua attanartumiiqattaqunagit isumaalunartumiqunagitlu amma qanuingitsiaqullugitlu. Tapiriikkut angijuqqaangat Natan Obed uqalaurtuq tapiriikkutguuq pinasuaqatiqatsiarumajut atulirtitautsiarunnaqunlugit qanurtuurutauqujausimajut amma tiliuraluarpavut Gavamatuqakkut amma aviktursimaurtup gavamangit saniqvaiqullugit kinaujartuutiksanik aturtaugajartunik atulirtitauninginnut.
Inuit Pilirijiit ilagijaulartut aqqittautillugi quliit Pilirijiksait taakkua atunit Kanatami Qanurtuurutauqujaujunik Parnautiksanik kamalaursutik tamakkuninga 231-ngujunik Qanurtuuratauqujaujunik nalunairtaulaurtuni Kingullirparsiutinganni Unikkaani Kanatami Killisiniartuqalaurtillugu.