June 23, 2020–Ottawa, Ontario
Canadami Inuit atuinnauvviungmata nutaatigut kiinaujaqutissanik silattuqsaqvingmi ilinniariarutiksanginik. Iiinaujaqutissaujut Inuit Silattuqsarvinni Ilinniariarutissat (IPSE) Piliriaq saqqitausimavut kiinaujanik qiturngiuqtittisimanirmik $125.5-miliantaalanik ukiut qulit (10) atuqpalliasimaninginni ammalu $21.8-miliantaalanik ukiuqtamaat kinguniani tusaqtittisimalilaurninginnit Kiinaujaqutissarijauniaqtunut 2019-mi.
Kiinaujaqutissaujunit ¾-luangit turaaqtitausimaniaqtut ikajurutiksautitaulutik Inunnut ilinniaqtunut. Tamarmikasaullutiklu naliqqangit kiinaujaqutissarijauniaqsutik aviktuqsimanirni piliriqatauttinirmut piliriangujunut amisuuniqsait Inuit Ilinniaqtut Ilagijauliqullugit Silattuqsarvingmi (PSE) ilinniariarutiqaqtunut ammalu pijitsirarutiksaujunut suurlu silattuqsaqvingmi pilimmaksainirnut ammalu ikajuqtiqaqpannirnut, ikajurutiksaulutik Inuit ilinniaqtut ilinniarutigijaminnik ingirrattiaqtittisimaqullugit (PSE) Silattuqsaqvingmi Ilinniarutiksaqaqtitaulutik Piliriami.
Taakkua nutaangullutik pilirianut piusigiaqtitsijjutiuvut kiinaujaqutiksaqaqtittivannirnut Inunnut ammalu ilagiarutiullutik kiinaujaqutiksaujunut atuinnautitaullutik puraavinsiujuni ammalu aviktuqsimanirni piliriangujunut. Kiinaujaqutiksait atuinnautitauvut Inunnut silattuqsarvingni ilinniarutiqaqtunut maliklugit Inuvialuit Kingullirmik Angirutigisimajangini, Nunavut Angirutigisimajangini, James Bay ammalu Quebec Taqrangani Angirutigisimajangini ammalu Labrador-mi Inuit Nunalirinirmut Angirutigisimajangini uqaqtausimajut, nanirmiutaugaluaqpataluunniit uvvaluunniit nani ilinniarutiqaraluaqpataluunniit.
Kiinaujaqutissaujut aulatauniaqtut Inuit nunalirinirmut katujjiqatigiigijanginnit sitamaullutik aviktuqsimaningini Inuit Nnunanganni uvvaluunniit tilijausimajjutitigut tunisijiuqattarniarninginnut katujjiqatigiingujunit, taimaulianiksutik angirutiusimallutik pilirianut piusigiaqtittijjutitigut. Aviktuqsimajunut sanirvaqtausimajut kiinaujaqutiksait 2020-mi ammalu 2021-mi maliktitausimavut piliriaqarutiujunut angirutigijausimalilauqtunit Inuit Tapiriikkut Kanatami Katimajinginnit tisipiri 2019-mi. Katillugit kiinaujait $1,052,531-nguvut Inuvialuit Aviktuqsimaninginnut, $4,056,291-nguvut Nunavummut, $2,024,097-nguvut Nunavikmut ammalu $963,470-ngullutik Nunatsiavutmut 2020-2021 ukiunganut.
Ilinniaqtuit tuksirautiqaqtut kiinaujatigut ikajuqtaujjutiksaqtaarumallutik ilagijauqataujjutiksanik ilinniarutiginiarlugit (PSE) silattuqsaqvingmi sivulliqpaamik ammalu utirniaqtunut silattuqsarvingmi ilinniarutiqaqtunut piliriami pigiarlutik ukiaksaangani 2020 qaujigiarutiqarunnaqput nunalirinirmut uvvaluunniit tilijausimajjutitigut tunisijiuqattartinut katujjiqatigiigijaminnut tusaqtitaugiakkannirumalutik pijjutiqaqtunik Inuit Silattuqsarvinni Ilinniariarutissat (IPSE) piliriamit tuksirautit pilirianguvalliavanninginnut.Iluikkaullutik qaujigiarviujuksanut nalunaijautiit atuinnautitauvut uvani https://www.itk.ca/inuit-post-secondary-education/?lang=iuq.
Inuit Silattuqsarvinni Ilinniariarutissat (IPSE) Piliriaq inangiqsisimammata ammalu ungataanuaqtittisimallutik kiinaujaqutissaujunnaqtunik atuinnautitaujunut Inunnut maliglugit gavamatuqakkut Silattuqsarvimmi Ilinniaqtuit Ikajuqujjutiksanginit Pilirianginit (PSSSP). Taikkua kiinaujaqutissautitaujut taimannganituqaq pivviuqattaqsimammata Iqqiliit Aulatsijinginit aulatsiniqaqtunit qallunaat nunanganni iqqanaijarviujunit. Marruingujuk piliriat qaliriiliqsimaqattarniarmata, kiinaujaqutissarijaujut asijjiqsimaliqtitauqunagit maannaujuq Inunnut Silattuqsarvimmi Ilinniaqtuit Ikajuqujjutiksanginit Pilirianginit (PSSSP) pititauqattaqtunit tikillugu September 2020-mut, taimalu tuksirarutiqarunnaqsititauniaqsutik aviktuqsimanirni kiinaujaqutissataarviujunnaqtutigut.
Taanna pilirianguliqsimajuq ilagijauqatauvuq anginiqsaulluni niriunniqarvigijanginnut ukunanngat Inuit Silattuqsaqvingmi Ilinniaqtunut Parnautingit, aaqqiksuangusimajunit inunnit ammalu Canadami Gavamangannit, piruqtitausimallutik pisimaliqtaujumajunit Inuit Gavamatuqakkullu Piliriaqaqatigiinninginnut Katimajiralaanginnit. Taakkua Parnautiit turaarviksaqaqtitaummata angigligiaqtittinirmut Inuit ilagijauliqsimajut Silattuqsarvingmi (PSE) Ilinniariarutiqaqtuni quttingnirijaujut quttingniqaliqtitaulutik ajjigilugit nunaqaqqaarsimajuunngittuni inuuqatigiini.
Apiqqutiugajuktut
Sunaummata IPSE-nut Piliriat?
Inuit Silattuqsarvinni Ilinniariarutissanginnut Piliriaq (IPSE) nutaangullutik gavamatuqakkut kiinaujaqutissaqtaarvigivangat Inunnut ilinniaqtunut inangirutiullutik kiinaujaqutissanik atuinnautitausimajunut gavamatuqakkut Silattuqsarvingmi Ilinniaqtunut Ikajurutissaqtaanguvattunut Piliriangatigut (PSSSP). Amisunnguriaqtittisimavut kiinaujaqutissaujunik atuinnautitaullutik Iinunnut ammalu silarjualimaami atuinnautitaullutik Inuit Nunanganni nunalirinirmut angirutinut ilagijauqataujunut, nanirmiutaugaluaqpataluunniit Canadami. Ilaqarmijut asikkanninginik kiinaujaqutissarijaujunut aviktuqsimanirmi katujjiqatigiit aaqqiksuijjutiksanginik pilirianik ammalu pijitsirarutissanik ikajurutiuniarlutik ilinniaqtuit ilinniarutiminnik ingirrattiaqtittijunnaqullugit, piqasiutillugit kiinaujaqutissanik nunaqqatigiit piliriqataulirutiksanginut amisunnguriaqtitausimaliqullugit qassiuningit ilinniaqtuit ilagijauliqsimajut silattuqsarvingni ilinniarutilirinirmi piliriangujunut.
Qanuq taakkua asinginit Silattuqsarvingmi Ilinniariarutiksanut kiinaujaqutissaullutik pilirianit ajjigijaunngippat?
Taakkua nutaangullutik pilirijjutiulirmata kiinaujaqutissaqaqtittivannirmi Inunnut ilinniaqtunut. Piliriatuqauniqsaullutik piliriangit gavamatuqakkut kiinaujaqutissaqaqtittinirmut piliriangit aulatauniqainnaqpalaunngimmata inuit nunalirinirmut katujjiqatigiinginit uvvaluunniit tilijausimajjutitigut pitaqaqtitsijiuvaksutik katujjiqatigiingujunit. Kiinaujaqutissait atuinnautitauvut inunnut ilagijaujunut maliklugit Inuit Nunanganni nunalirinirmut angirutingit, nanirmiutaugaluaqpataluunniit uvvaluunniit nani ilinniariarumaniqaraluaqpata.
Kikkut Pititaujungnaqtitauvat?
Kiinaujaqutissait atuinnautitauvut Inunnut ilagijauqataujunut maliklugit uqaqsimaningit Inuvialuit Kingullirmi Angirutingit, Nunavut Angirutingit, James Baymi ammalu Quebec Taqrangani Angirutingit ammalu Labradormi Inuit Nunalirinirmut Angirutingit, nanirmiutaugaluaqpataluunniit uvvaluunniit nani ilinniariarumagaluaqpata.
Qanuq tuksirautiqarunnaqpunga?
Qaujigiarvigilugit nunalirinirnmut katujjiqatigiigijasi uvvaluunniit tilijausimajjutitigut pitaqaqtittijiullutik katujjiqatigiigijasi iluikkaujunik nalunaijarviujumalutit:
Inuvialuit Aviktuqsimaninga
Inuvialuit Aviktuqsimaningani Kuapuriisanga ([email protected])
Nunavut
Qitirmiut Inuit Katujjiqatigiingit ([email protected])
Kivalliq Inuit Katujjiqatigiingit ([email protected])
Kakivak Katujjiqatigiingit ([email protected])
Nunavut Tunnagik Timiqutingat ([email protected])
Nunavik
Makivik Kuapuriisangat
Kativik Ilisarniliriniq ([email protected])
Nunatsiavut
Nunatsiavut Gavamangat ([email protected])
Qanuittunut pilirianut ilagijauliriaqarama?
Inuit Silattuqsarvinni Ilinniariarutissanginnut Piliriaq (IPSE) kiinaujaqutiksaujut atuqtaujunnaqput qanuittutuinnanut silattuqsarvilirinirmi pilirianut taimautitaullutik ilitarijausimallutik iqqanaijarviujunut. Taakkua ilaqaqput silattuqsarvimmi piliriangujut, iqqanaijarsinnaaq ilinniarutiqaqpallianirmut piliriangujut, quttingniksanut ilinniaraanigutitaarutiulutik, ilisaijimmarinnut uvvaluunniit PhD-nut piliriangujunut, ilaqaqtillugit qaritaujatigut ammalu ullup ilatuinnangani piliriangujunut. atuqtaujunnarmijut aujautillugu pilirianguvattunuttauq, piliriangutuaqpata ilitarijausimallutik silattuqsarviujunit. Qaujigiarvigilugit pitaqaqtittijiullutik katujjiqatigiigijasi nalunaijaqtausimajunik taakkununga pisimalirviginiarlugit.
Qanurli kiinaujaqutissanik pisimalianingniruma?
Inuit Silattuqsarvinni Ilinniariarutissanginnut Piliriamit (IPSE) kiinaujaqutissaijunit asinginit kiinaujaqutissanik pisimalilauraluaruvit. Suli tuksirautiqarunnaravit asinginnit kiinaujaqutissaqtaarviuvattunik pititauqattaraluarlutit IPSE-kut kiinaujaqutissaqtaarijauvattunik.
Inuit ilinniaqtut nunalinginniittut ammalu ilinniarutiqaqtut Nunatsiarmi qaujigiarviqarialiit Nunatsiapgavamangata Ilinniaqtunut Kiinaujatigut Ikajuusiaqtaanguvattunut pilirianit, ammalu pititaujunnarmata ilagiarutiksarijaujunik IPSE-kut Piliriangannit. Nunavummi nunaqaqtut tuksiraqsimajarialiit Nunavut Gavamangata Kiinaujatigut Ikajuusiaqtaanguvattunut Nunavummiut Ilinniaqtunit Pilirianit (FANS) uvvaluunniit Innait Ilinniarutiqaqtunut ammalu Pilimmaksajaujunut Ikajurutiksaqarnirmut Piliriamit (ALTS), ammalu ilagiarutiksarijaujunik IPSE-kut Piliriangannit.
Kiinaujaqutissaujut sunanut akiliutaujunnaqpat?
Inuit Silattuqsarvinni Ilinniariarutissanginnut Piliriamit (IPSE) kiinaujaqutissait atuqtaujunnaqput ajjigiinngiuqtunut turaangajunut silattuqsarvingmi ilinniarutiqarnirnut. Tamakkua ilaqarunnaqput, ilinniariarunnautit, qangattautit, pairivvik, ilinniarutit uqalimaagait, ammalu asingit. pivvigiqattaqtavit katujjiqatigiingujunit nalunaijarutinik sunanut atuqtaujunnarninginut pititausimalirunnaravit.
Qassinik Kiinaujaqutissaqtaaqtitaujunnarama?
Qassinik atuni ilinniaqtut pititaujunnarajarningit tunngavviqaqtitaunajaqtut piliriamut maligaqutigijausimajunik aaqqiksuangusimallutik atuni aviktuqsimaniujuni.
Qanurli tuksirautiqaaniksimalilaurniruma Silattuqsarvingmi Ilinniariarutiqaqtunut (PSE) Piliriamit ammalu suli kiujaulaunngitsunga naammagijausimammangaata niruaqsimallugu ilinniarvigijumajannit/piliriamit?
Qaujigiarvigilugit pisimalirvigivaktatit katujjiqatigiingujut tusaqtitaugiakkannirumalutit.
Aktuisimaniqarajaqpat tamakkua quttingniqsanut ilinniarutikka atsiluarniqpata?
Inuit Silattuqsarvinni Ilinniariarutissanginnut Piliriamit (IPSE) kiinaujaqutissaujut ilinniariarunnautiunngimmata, ammalu tunngavviqaqtitauniaratik qanuq ilinniarutigijatit quttingniqarmangaata. Qaujigiarvigilugit pisimalirvigijauvaktut katujjiqatigiigijasi tukisigiakkanniqtitaujumalutit qanuq tuksirautigijaujut pilirianguvanninginnut aviktuqsimanirijatsinni.
”Taakkua piliriat amisunut ilinniaqtunut inuusinginnik asijjiisimaliqtittijunnarmata. Taassuminga piliriamik aaqqiksuivallianirmi, pimmariutitaulualaurmata kiinaujaqutissaqtaangujunnaqtut silarjualimaami atuinnautitaujunnariaqarningit inunnut ilagijauqataujunut Canadalimaami, nanirmiutaugaluaqpataluunniit, ammalu piliriangusimaliqullugit inuuqatigiiktuni ajjigiiktittivannginniujunik pijitsiraqtiuvaktunit tuluqtarviqaliqtittivanniqtigut Silattuqsavinnut Ilinniariarutiksanut Ilagijauqataujunnarningini (PSE) amisunut Inunnut—qangattautiksanut akigijauvaktunut, pairivvinnut, ilagiinut ikajurutiksaqtaanguvaktunut ammalu ungasiktumi nunaminnit ilagijaminnillu nunaqaliqsimallutik akigijauvaktunut kiinaujatigut. Taimaujariaqallariksuni ilagijauqatauniarmat piliriamut qaliriiliqsimatitauningit pijitsirarutiksaujut ikajuqtugauningit anginiqsauliqtitauqullugit Ilagijaulirunnarninginut Silattuqsarvingni Ilinniariarutiksaujunut ammalu taimaujariaqallariksutik ikajurutiksaujunut ilinniaqtunut aturniqallarigajaqtunut inuusinginni.
Natan ObedAngijuqqaangat Inuit Tapiriikkut Kanatami
