ᔫᓂ 23, 2020—ᐋᑐᕙ, ᐋᓐᑎᐊᕆᐅ

ᑲᓇᑕᒥ ᐃᓄᐃᑦ ᐊᑐᐃᓐᓇᐅᕝᕕᐅᖕᒪᑕ ᓄᑖᑎᒍᑦ ᑮᓇᐅᔭᖁᑎᔅᓴᓂᒃ ᓯᓚᑦᑐᖅᓴᖅᕕᖕᒥ ᐃᓕᓐᓂᐊᕆᐊᕈᑎᒃᓴᖏᓂᒃ. ᑮᓇᐅᔭᖁᑎᔅᓴᐅᔪᑦ ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᑦ (IPSE) ᐱᓕᕆᐊᖅ ᓴᖅᑭᑕᐅᓯᒪᕗᑦ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓂᕐᒥᒃ $125.5-ᒥᓕᐊᓐᑖᓚᓂᒃ ᐅᑭᐅᑦ ᖁᓕᑦ (10) ᐊᑐᖅᐸᓪᓕᐊᓯᒪᓂᖏᓐᓂ ᐊᒻᒪᓗ $21.8-ᒥᓕᐊᓐᑖᓚᓂᒃ ᐅᑭᐅᖅᑕᒫᑦ ᑭᖑᓂᐊᓂ ᑐᓴᖅᑎᑦᑎᓯᒪᓕᓚᐅᕐᓂᖏᓐᓂᑦ ᑮᓇᐅᔭᖁᑎᔅᓴᕆᔭᐅᓂᐊᖅᑐᓄᑦ 2019-ᒥ.

ᑮᓇᐅᔭᖁᑎᔅᓴᐅᔪᓂᑦ ¾-ᓗᐊᖏᑦ ᑐᕌᖅᑎᑕᐅᓯᒪᓂᐊᖅᑐᑦ ᐃᑲᔪᕈᑎᒃᓴᐅᑎᑕᐅᓗᑎᒃ ᐃᓄᓐᓄᑦ ᐃᓕᓐᓂᐊᖅᑐᓄᑦ. ᑕᒪᕐᒥᑲᓴᐅᓪᓗᑎᒃᓗ ᓇᓕᖅᑲᖏᑦ ᑮᓇᐅᔭᖁᑎᔅᓴᕆᔭᐅᓂᐊᖅᓱᑎᒃ ᐊᕕᒃᑐᖅᓯᒪᓂᕐᓂ ᐱᓕᕆᖃᑕᐅᑦᑎᓂᕐᒧᑦ ᐱᓕᕆᐊᖑᔪᓄᑦ ᐊᒥᓲᓂᖅᓴᐃᑦ ᐃᓄᐃᑦ ᐃᓕᓐᓂᐊᖅᑐᑦ ᐃᓚᒋᔭᐅᓕᖁᓪᓗᒋᑦ ᓯᓚᑦᑐᖅᓴᕐᕕᖕᒥ (PSE) ᐃᓕᓐᓂᐊᕆᐊᕈᑎᖃᖅᑐᓄᑦ ᐊᒻᒪᓗ ᐱᔨᑦᓯᕋᕈᑎᒃᓴᐅᔪᓄᑦ ᓲᕐᓗ ᓯᓚᑦᑐᖅᓴᖅᕕᖕᒥ ᐱᓕᒻᒪᒃᓴᐃᓂᕐᓄᑦ ᐊᒻᒪᓗ ᐃᑲᔪᖅᑎᖃᖅᐸᓐᓂᕐᓄᑦ, ᐃᑲᔪᕈᑎᒃᓴᐅᓗᑎᒃ ᐃᓄᐃᑦ ᐃᓕᓐᓂᐊᖅᑐᑦ ᐃᓕᓐᓂᐊᕈᑎᒋᔭᒥᓐᓂᒃ ᐃᖏᕐᕋᑦᑎᐊᖅᑎᑦᑎᓯᒪᖁᓪᓗᒋᑦ (PSE) ᓯᓚᑦᑐᖅᓴᖅᕕᖕᒥ ᐃᓕᓐᓂᐊᕈᑎᒃᓴᖃᖅᑎᑕᐅᓗᑎᒃ ᐱᓕᕆᐊᒥ.

ᑖᒃᑯᐊ ᓄᑖᖑᓪᓗᑎᒃ ᐱᓕᕆᐊᓄᑦ ᐱᐅᓯᒋᐊᖅᑎᑦᓯᔾᔪᑎᐅᕗᑦ ᑮᓇᐅᔭᖁᑎᒃᓴᖃᖅᑎᑦᑎᕙᓐᓂᕐᓄᑦ ᐃᓄᓐᓄᑦ ᐊᒻᒪᓗ ᐃᓚᒋᐊᕈᑎᐅᓪᓗᑎᒃ ᑮᓇᐅᔭᖁᑎᒃᓴᐅᔪᓄᑦ ᐊᑐᐃᓐᓇᐅᑎᑕᐅᓪᓗᑎᒃ ᐳᕌᕕᓐᓯᐅᔪᓂ ᐊᒻᒪᓗ ᐊᕕᒃᑐᖅᓯᒪᓂᕐᓂ ᐱᓕᕆᐊᖑᔪᓄᑦ. ᑮᓇᐅᔭᖁᑎᒃᓴᐃᑦ ᐊᑐᐃᓐᓇᐅᑎᑕᐅᕗᑦ ᐃᓄᓐᓄᑦ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᕈᑎᖃᖅᑐᓄᑦ ᒪᓕᒃᓗᒋᑦ ᐃᓄᕕᐊᓗᐃᑦ ᑭᖑᓪᓕᕐᒥᒃ ᐊᖏᕈᑎᒋᓯᒪᔭᖏᓂ, ᓄᓇᕗᑦ ᐊᖏᕈᑎᒋᓯᒪᔭᖏᓂ, ᔭᐃᒻᔅ ᐸᐃ ᐊᒻᒪᓗ ᑯᐃᐸᒃᑕᖅᕋᖓᓂ ᐊᖏᕈᑎᒋᓯᒪᔭᖏᓂ ᐊᒻᒪᓗ ᓛᐸᑐᐊᕆᒥ ᐃᓄᐃᑦ ᓄᓇᓕᕆᓂᕐᒧᑦ ᐊᖏᕈᑎᒋᓯᒪᔭᖏᓂ ᐅᖃᖅᑕᐅᓯᒪᔪᑦ, ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ ᐅᕝᕙᓘᓐᓃᑦ ᓇᓂ ᐃᓕᓐᓂᐊᕈᑎᖃᕋᓗᐊᖅᐸᑕᓘᓐᓃᑦ.

ᑮᓇᐅᔭᖁᑎᔅᓴᐅᔪᑦ ᐊᐅᓚᑕᐅᓂᐊᖅᑐᑦ ᐃᓄᐃᑦ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᒋᔭᖏᓐᓂᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᖏᓂ ᐃᓄᐃᑦ ᓄᓇᖓᓐᓂ ᐅᕝᕙᓘᓐᓃᑦ ᑎᓕᔭᐅᓯᒪᔾᔪᑎᑎᒍᑦ ᑐᓂᓯᔨᐅᖃᑦᑕᕐᓂᐊᕐᓂᖏᓐᓄᑦ ᑲᑐᔾᔨᖃᑎᒌᖑᔪᓂᑦ, ᑕᐃᒪᐅᓕᐊᓂᒃᓱᑎᒃ ᐊᖏᕈᑎᐅᓯᒪᓪᓗᑎᒃ ᐱᓕᕆᐊᓄᑦ ᐱᐅᓯᒋᐊᖅᑎᑦᑎᔾᔪᑎᑎᒍᑦ. ᐊᕕᒃᑐᖅᓯᒪᔪᓄᑦ ᓴᓂᕐᕙᖅᑕᐅᓯᒪᔪᑦ ᑮᓇᐅᔭᖁᑎᒃᓴᐃᑦ 2020-ᒥ ᐊᒻᒪᓗ 2021-ᒥ ᒪᓕᒃᑎᑕᐅᓯᒪᕗᑦ ᐱᓕᕆᐊᖃᕈᑎᐅᔪᓄᑦ ᐊᖏᕈᑎᒋᔭᐅᓯᒪᓕᓚᐅᖅᑐᓂᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᓐᓂᑦ ᑎᓯᐱᕆ 2019-ᒥ. ᑲᑎᓪᓗᒋᑦ ᑮᓇᐅᔭᐃᑦ $1,052,531-ᖑᕗᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖏᓐᓄᑦ, $4,056,291-ᖑᕗᑦ ᓄᓇᕗᒻᒧᑦ, $2,024,097-ᖑᕗᑦ ᓄᓇᕕᖕᒧᑦ ᐊᒻᒪᓗ $963,470-ᖑᓪᓗᑎᒃ ᓄᓇᑦᓯᐊᕗᑦᒧᑦ 2020-2021 ᐅᑭᐅᖓᓄᑦ.

ᐃᓕᓐᓂᐊᖅᑐᐃᑦ ᑐᒃᓯᕋᐅᑎᖃᖅᑐᑦ ᑮᓇᐅᔭᑎᒍᑦ ᐃᑲᔪᖅᑕᐅᔾᔪᑎᒃᓴᖅᑖᕈᒪᓪᓗᑎᒃ ᐃᓚᒋᔭᐅᖃᑕᐅᔾᔪᑎᒃᓴᓂᒃ ᐃᓕᓐᓂᐊᕈᑎᒋᓂᐊᕐᓗᒋᑦ (PSE) ᓯᓚᑦᑐᖅᓴᖅᕕᖕᒥ ᓯᕗᓪᓕᖅᐹᒥᒃ ᐊᒻᒪᓗ ᐅᑎᕐᓂᐊᖅᑐᓄᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖃᖅᑐᓄᑦ ᐱᓕᕆᐊᒥ ᐱᒋᐊᕐᓗᑎᒃ ᐅᑭᐊᒃᓵᖓᓂ 2020 ᖃᐅᔨᒋᐊᕈᑎᖃᕈᓐᓇᖅᐳᑦ ᓄᓇᓕᕆᓂᕐᒧᑦ ᐅᕝᕙᓘᓐᓃᑦ ᑎᓕᔭᐅᓯᒪᔾᔪᑎᑎᒍᑦ ᑐᓂᓯᔨᐅᖃᑦᑕᕐᑎᓄᑦ ᑲᑐᔾᔨᖃᑎᒌᒋᔭᒥᓐᓄᑦ ᑐᓴᖅᑎᑕᐅᒋᐊᒃᑲᓐᓂᕈᒪᓗᑎᒃ ᐱᔾᔪᑎᖃᖅᑐᓂᒃ ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᑦ (IPSE) ᐱᓕᕆᐊᒥᑦ ᑐᒃᓯᕋᐅᑎᑦ ᐱᓕᕆᐊᖑᕙᓪᓕᐊᕙᓐᓂᖏᓐᓄᑦ. ᐃᓗᐃᒃᑲᐅᓪᓗᑎᒃ ᖃᐅᔨᒋᐊᕐᕕᐅᔪᒃᓴᓄᑦ ᓇᓗᓇᐃᔭᐅᑏᑦ ᐊᑐᐃᓐᓇᐅᑎᑕᐅᕗᑦ ᐅᕙᓂ https://www.itk.ca/inuit-post-secondary-education/?lang=ius.

ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᑦ (IPSE) ᐱᓕᕆᐊᖅ ᐃᓇᖏᖅᓯᓯᒪᒻᒪᑕ ᐊᒻᒪᓗ ᐅᖓᑖᓄᐊᖅᑎᑦᑎᓯᒪᓪᓗᑎᒃ ᑮᓇᐅᔭᖁᑎᔅᓴᐅᔪᓐᓇᖅᑐᓂᒃ ᐊᑐᐃᓐᓇᐅᑎᑕᐅᔪᓄᑦ ᐃᓄᓐᓄᑦ ᒪᓕᒡᓗᒋᑦ ᒐᕙᒪᑐᖃᒃᑯᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᐃᑦ ᐃᑲᔪᖅᐅᔾᔪᑎᒃᓴᖏᓂᑦ ᐱᓕᕆᐊᖏᓂᑦ (PSSSP). ᑕᐃᒃᑯᐊ ᑮᓇᐅᔭᖁᑎᔅᓴᐅᑎᑕᐅᔪᑦ ᑕᐃᒪᖖᒐᓂᑐᖃᖅ ᐱᕝᕕᐅᖃᑦᑕᖅᓯᒪᒻᒪᑕ ᐃᖅᑭᓖᑦ ᐊᐅᓚᑦᓯᔨᖏᓂᑦ ᐊᐅᓚᑦᓯᓂᖃᖅᑐᓂᑦ ᖃᓪᓗᓈᑦ ᓄᓇᖓᓐᓂ ᐃᖅᑲᓇᐃᔭᕐᕕᐅᔪᓂᑦ. ᒪᕐᕈᐃᖑᔪᒃ ᐱᓕᕆᐊᑦ ᖃᓕᕇᓕᖅᓯᒪᖃᑦᑕᕐᓂᐊᕐᒪᑕ, ᑮᓇᐅᔭᖁᑎᔅᓴᕆᔭᐅᔪᑦ ᐊᓯᔾᔨᖅᓯᒪᓕᖅᑎᑕᐅᖁᓇᒋᑦ ᒫᓐᓇᐅᔪᖅ ᐃᓄᓐᓄᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᐃᑦ ᐃᑲᔪᖅᐅᔾᔪᑎᒃᓴᖏᓂᑦ ᐱᓕᕆᐊᖏᓂᑦ (PSSSP) ᐱᑎᑕᐅᖃᑦᑕᖅᑐᓂᑦ ᑎᑭᓪᓗᒍ ᓯᑦᑎᐱᕆ 2020-ᒧᑦ, ᑕᐃᒪᓗ ᑐᒃᓯᕋᕈᑎᖃᕈᓐᓇᖅᓯᑎᑕᐅᓂᐊᖅᓱᑎᒃ ᐊᕕᒃᑐᖅᓯᒪᓂᕐᓂ ᑮᓇᐅᔭᖁᑎᔅᓴᑖᕐᕕᐅᔪᓐᓇᖅᑐᑎᒍᑦ.

ᑖᓐᓇ ᐱᓕᕆᐊᖑᓕᖅᓯᒪᔪᖅ ᐃᓚᒋᔭᐅᖃᑕᐅᕗᖅ ᐊᖏᓂᖅᓴᐅᓪᓗᓂ ᓂᕆᐅᓐᓂᖃᕐᕕᒋᔭᖏᓐᓄᑦ ᐅᑯᓇᖖᒐᑦ ᐃᓄᐃᑦ ᓯᓚᑦᑐᖅᓴᖅᕕᖕᒥ ᐃᓕᓐᓂᐊᖅᑐᓄᑦ ᐸᕐᓇᐅᑎᖏᑦ, ᐋᖅᑭᒃᓱᐊᖑᓯᒪᔪᓂᑦ ᐃᓄᓐᓂᑦ ᐊᒻᒪᓗ ᑲᓇᑕᒥ ᒐᕙᒪᖓᓐᓂᑦ, ᐱᕈᖅᑎᑕᐅᓯᒪᓪᓗᑎᒃ ᐱᓯᒪᓕᖅᑕᐅᔪᒪᔪᓂᑦ ᐃᓄᐃᑦ ᒐᕙᒪᑐᖃᒃᑯᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖏᓐᓂᑦ. ᑖᒃᑯᐊ ᐸᕐᓇᐅᑏᑦ ᑐᕌᕐᕕᒃᓴᖃᖅᑎᑕᐅᒻᒪᑕ ᐊᖏᒡᓕᒋᐊᖅᑎᑦᑎᓂᕐᒧᑦ ᐃᓄᐃᑦ ᐃᓚᒋᔭᐅᓕᖅᓯᒪᔪᑦ ᓯᓚᑦᑐᖅᓴᕐᕕᖕᒥ (PSE) ᐃᓕᓐᓂᐊᕆᐊᕈᑎᖃᖅᑐᓂ ᖁᑦᑎᖕᓂᕆᔭᐅᔪᑦ ᖁᑦᑎᖕᓂᖃᓕᖅᑎᑕᐅᓗᑎᒃ ᐊᔾᔨᒋᓗᒋᑦ ᓄᓇᖃᖅᑳᕐᓯᒪᔫᖖᒋᑦᑐᓂ ᐃᓅᖃᑎᒌᓂ.

ᐊᐱᖅᑯᑎᐅᒐᔪᒃᑐᑦ

ᓱᓚᐅᒻᒪᑕ IPSE-ᓄᑦ ᐱᓕᕆᐊᑦ?

ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᖏᓐᓄᑦ ᐱᓕᕆᐊᖅ (IPSE) ᓄᑖᖑᓪᓗᑎᒃ ᒐᕙᒪᑐᖃᒃᑯᑦ ᑮᓇᐅᔭᖁᑎᔅᓴᖅᑖᕐᕕᒋᕙᖓᑦ ᐃᓄᓐᓄᑦ ᐃᓕᓐᓂᐊᖅᑐᓄᑦ ᐃᓇᖏᕈᑎᐅᓪᓗᑎᒃ ᑮᓇᐅᔭᖁᑎᔅᓴᓂᒃ ᐊᑐᐃᓐᓇᐅᑎᑕᐅᓯᒪᔪᓄᑦ ᒐᕙᒪᑐᖃᒃᑯᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑐᓄᑦ ᐃᑲᔪᕈᑎᔅᓴᖅᑖᖑᕙᑦᑐᓄᑦ ᐱᓕᕆᐊᖓᑎᒍᑦ (PSSSP). ᐊᒥᓱᖖᒍᕆᐊᖅᑎᑦᑎᓯᒪᕗᑦ ᑮᓇᐅᔭᖁᑎᔅᓴᐅᔪᓂᒃ ᐊᑐᐃᓐᓇᐅᑎᑕᐅᓪᓗᑎᒃ ᐃᓄᓐᓄᑦ ᐊᒻᒪᓗ ᓯᓚᕐᔪᐊᓕᒫᒥ ᐊᑐᐃᓐᓇᐅᑎᑕᐅᓪᓗᑎᒃ ᐃᓄᐃᑦ ᓄᓇᖓᓐᓂ ᓄᓇᓕᕆᓂᕐᒧᑦ ᐊᖏᕈᑎᓄᑦ ᐃᓚᒋᔭᐅᖃᑕᐅᔪᓄᑦ, ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ ᑲᓇᑕᒥ. ᐃᓚᖃᕐᒥᔪᑦ ᐊᓯᒃᑲᓐᓂᖏᓂᒃ ᑮᓇᐅᔭᖁᑎᔅᓴᕆᔭᐅᔪᓄᑦ ᐊᕕᒃᑐᖅᓯᒪᓂᕐᒥ ᑲᑐᔾᔨᖃᑎᒌᑦ ᐋᖅᑭᒃᓱᐃᔾᔪᑎᒃᓴᖏᓂᒃ ᐱᓕᕆᐊᓂᒃ ᐊᒻᒪᓗ ᐱᔨᑦᓯᕋᕈᑎᔅᓴᓂᒃ ᐃᑲᔪᕈᑎᐅᓂᐊᕐᓗᑎᒃ ᐃᓕᓐᓂᐊᖅᑐᐃᑦ ᐃᓕᓐᓂᐊᕈᑎᒥᓐᓂᒃ ᐃᖏᕐᕋᑦᑎᐊᖅᑎᑦᑎᔪᓐᓇᖁᓪᓗᒋᑦ, ᐱᖃᓯᐅᑎᓪᓗᒋᑦ ᑮᓇᐅᔭᖁᑎᔅᓴᓂᒃ ᓄᓇᖅᑲᑎᒌᑦ ᐱᓕᕆᖃᑕᐅᓕᕈᑎᒃᓴᖏᓄᑦ ᐊᒥᓱᖖᒍᕆᐊᖅᑎᑕᐅᓯᒪᓕᖁᓪᓗᒋᑦ ᖃᔅᓯᐅᓂᖏᑦ ᐃᓕᓐᓂᐊᖅᑐᐃᑦ ᐃᓚᒋᔭᐅᓕᖅᓯᒪᔪᑦ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᕈᑎᓕᕆᓂᕐᒥ ᐱᓕᕆᐊᖑᔪᓄᑦ.

ᖃᓄᖅ ᑖᒃᑯᐊ ᐊᓯᖏᓂᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕆᐊᕈᑎᒃᓴᓄᑦ ᑮᓇᐅᔭᖁᑎᔅᓴᐅᓪᓗᑎᒃ ᐱᓕᕆᐊᓂᑦ ᐊᔾᔨᒋᔭᐅᖖᒋᑉᐸᑦ?

ᑖᒃᑯᐊ ᓄᑖᖑᓪᓗᑎᒃ ᐱᓕᕆᔾᔪᑎᐅᓕᕐᒪᑕ ᑮᓇᐅᔭᖁᑎᔅᓴᖃᖅᑎᑦᑎᕙᓐᓂᕐᒥ ᐃᓄᓐᓄᑦ ᐃᓕᓐᓂᐊᖅᑐᓄᑦ. ᐱᓕᕆᐊᑐᖃᐅᓂᖅᓴᐅᓪᓗᑎᒃ ᐱᓕᕆᐊᖏᑦ ᒐᕙᒪᑐᖃᒃᑯᑦ ᑮᓇᐅᔭᖁᑎᔅᓴᖃᖅᑎᑦᑎᓂᕐᒧᑦ ᐱᓕᕆᐊᖏᑦ ᐊᐅᓚᑕᐅᓂᖃᐃᓐᓇᖅᐸᓚᐅᖖᒋᒻᒪᑕ ᐃᓄᐃᑦ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᖏᓂᑦ ᐅᕝᕙᓘᓐᓃᑦ ᑎᓕᔭᐅᓯᒪᔾᔪᑎᑎᒍᑦ ᐱᑕᖃᖅᑎᑦᓯᔨᐅᕙᒃᓱᑎᒃ ᑲᑐᔾᔨᖃᑎᒌᖑᔪᓂᑦ. ᑮᓇᐅᔭᖁᑎᔅᓴᐃᑦ ᐊᑐᐃᓐᓇᐅᑎᑕᐅᕗᑦ ᐃᓄᓐᓄᑦ ᐃᓚᒋᔭᐅᔪᓄᑦ ᒪᓕᒃᓗᒋᑦ ᐃᓄᐃᑦ ᓄᓇᖓᓐᓂ ᓄᓇᓕᕆᓂᕐᒧᑦ ᐊᖏᕈᑎᖏᑦ, ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ ᐅᕝᕙᓘᓐᓃᑦ ᓇᓂ ᐃᓕᓐᓂᐊᕆᐊᕈᒪᓂᖃᕋᓗᐊᖅᐸᑕ.

ᑭᒃᑯᑦ ᐱᑎᑕᐅᔪᓐᓇᖅᑎᑕᐅᕙᑦ?

ᑮᓇᐅᔭᖁᑎᔅᓴᐃᑦ ᐊᑐᐃᓐᓇᐅᑎᑕᐅᕗᑦ ᐃᓄᓐᓄᑦ ᐃᓚᒋᔭᐅᖃᑕᐅᔪᓄᑦ ᒪᓕᒃᓗᒋᑦ ᐅᖃᖅᓯᒪᓂᖏᑦ ᐃᓄᕕᐊᓗᐃᑦ ᑭᖑᓪᓕᕐᒥ ᐊᖏᕈᑎᖏᑦ, ᓄᓇᕗᑦ ᐊᖏᕈᑎᖏᑦ, ᔭᐃᒻᔅ ᐸᐃᒥ ᐊᒻᒪᓗ ᑯᐃᐸᒃ ᑕᖅᕋᖓᓂ ᐊᖏᕈᑎᖏᑦ ᐊᒻᒪᓗ ᓛᐸᑐᐊᕆᒥ ᐃᓄᐃᑦ ᓄᓇᓕᕆᓂᕐᒧᑦ ᐊᖏᕈᑎᖏᑦ, ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ ᐅᕝᕙᓘᓐᓃᑦ ᓇᓂ ᐃᓕᓐᓂᐊᕆᐊᕈᒪᒐᓗᐊᖅᐸᑕ.

ᖃᓄᖅ ᑐᒃᓯᕋᐅᑎᖃᕈᓐᓇᖅᐳᖓ?

ᖃᐅᔨᒋᐊᕐᕕᒋᓗᒋᑦ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᒋᔭᓯ ᐅᕝᕙᓘᓐᓃᑦ ᑎᓕᔭᐅᓯᒪᔾᔪᑎᑎᒍᑦ ᐱᑕᖃᖅᑎᑦᑎᔨᐅᓪᓗᑎᒃ ᑲᑐᔾᔨᖃᑎᒌᒋᔭᓯ ᐃᓗᐃᒃᑲᐅᔪᓂᒃ ᓇᓗᓇᐃᔭᕐᕕᐅᔪᒪᓗᑎᑦ:

ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓ

ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ ([email protected])

ᓄᓇᕗᑦ

ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ([email protected])
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ ([email protected])
ᑲᑭᕙᒃ ᑲᑐᔾᔨᖃᑎᒌᖏᑦ ([email protected])
ᓄᓇᕗᑦ ᑐᖖᒐᕝᕕᒃ ᑎᒥᖁᑎᖓᑦ ([email protected])

ᓄᓇᕕᒃ

ᒪᑭᕕᒃ ᑯᐊᐳᕇᓴᖓᑦ
ᑲᑎᕕᒃ ᐃᓕᓴᕐᓂᓕᕆᓂᖅ ([email protected])

ᓄᓇᑦᓯᐊᕗᑦ

ᓄᓇᑦᓯᐊᕗᑦ ᒐᕙᒪᖓᑦ ([email protected])

ᖃᓄᐃᑦᑐᓄᑦ ᐱᓕᕆᐊᓄᑦ ᐃᓚᒋᔭᐅᓕᕆᐊᖃᕋᒪ?

ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᖏᓐᓄᑦ ᐱᓕᕆᐊᒥᑦ (IPSE) ᑮᓇᐅᔭᖁᑎᒃᓴᐅᔪᑦ ᐊᑐᖅᑕᐅᔪᓐᓇᖅᐳᑦ ᖃᓄᐃᑦᑐᑐᐃᓐᓇᓄᑦ ᓯᓚᑦᑐᖅᓴᕐᕕᓕᕆᓂᕐᒥ ᐱᓕᕆᐊᓄᑦ ᑕᐃᒪᐅᑎᑕᐅᓪᓗᑎᒃ ᐃᓕᑕᕆᔭᐅᓯᒪᓪᓗᑎᒃ ᐃᖅᑲᓇᐃᔭᕐᕕᐅᔪᓄᑦ. ᑖᒃᑯᐊ ᐃᓚᖃᖅᐳᑦ ᓯᓚᑦᑐᖅᓴᕐᕕᒻᒥ ᐱᓕᕆᐊᖑᔪᑦ, ᐃᖅᑲᓇᐃᔭᕐᓯᓐᓈᖅ ᐃᓕᓐᓂᐊᕈᑎᖃᖅᐸᓪᓕᐊᓂᕐᒧᑦ ᐱᓕᕆᐊᖑᔪᑦ, ᖁᑦᑎᖕᓂᒃᓴᓄᑦ ᐃᓕᓐᓂᐊᕌᓂᒍᑎᑖᕈᑎᐅᓗᑎᒃ, ᐃᓕᓴᐃᔨᒻᒪᕆᓐᓄᑦ ᐅᕝᕙᓘᓐᓃᑦ PhD-ᓄᑦ ᐱᓕᕆᐊᖑᔪᓄᑦ, ᐃᓚᖃᖅᑎᓪᓗᒋᑦ ᖃᕆᑕᐅᔭᑎᒍᑦ ᐊᒻᒪᓗ ᐅᓪᓗᑉ ᐃᓚᑐᐃᓐᓇᖓᓂ ᐱᓕᕆᐊᖑᔪᓄᑦ. ᐊᑐᖅᑕᐅᔪᓐᓇᕐᒥᔪᑦ ᐊᐅᔭᐅᑎᓪᓗᒍ ᐱᓕᕆᐊᖑᕙᑦᑐᓄᑦᑕᐅᖅ, ᐱᓕᕆᐊᖑᑐᐊᖅᐸᑕ ᐃᓕᑕᕆᔭᐅᓯᒪᓪᓗᑎᒃ ᓯᓚᑦᑐᖅᓴᕐᕕᐅᔪᓂᑦ. ᖃᐅᔨᒋᐊᕐᕕᒋᓗᒋᑦ ᐱᑕᖃᖅᑎᑦᑎᔨᐅᓪᓗᑎᒃ ᑲᑐᔾᔨᖃᑎᒌᒋᔭᓯ ᓇᓗᓇᐃᔭᖅᑕᐅᓯᒪᔪᓂᒃ ᑖᒃᑯᓄᖓ ᐱᓯᒪᓕᕐᕕᒋᓂᐊᕐᓗᒋᑦ.

ᖃᓄᕐᓕ ᑮᓇᐅᔭᖁᑎᔅᓴᓂᒃ ᐱᓯᒪᓕᐊᓂᖕᓂᕈᒪ?

ᐱᑎᑕᐅᔪᓐᓇᖅᐳᑎᑦ ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᖏᓐᓄᑦ ᐱᓕᕆᐊᒥᑦ (IPSE) ᑮᓇᐅᔭᖁᑎᔅᓴᐃᔪᓂᑦ ᐊᓯᖏᓂᑦ ᑮᓇᐅᔭᖁᑎᔅᓴᓂᒃ ᐱᓯᒪᓕᓚᐅᕋᓗᐊᕈᕕᑦ. ᓱᓕ ᑐᒃᓯᕋᐅᑎᖃᕈᓐᓇᕋᕕᑦ ᐊᓯᖏᓐᓂᑦ ᑮᓇᐅᔭᖁᑎᔅᓴᖅᑖᕐᕕᐅᕙᑦᑐᓂᒃ ᐱᑎᑕᐅᖃᑦᑕᕋᓗᐊᕐᓗᑎᑦ IPSE-ᑯᑦ ᑮᓇᐅᔭᖁᑎᔅᓴᖅᑖᕆᔭᐅᕙᑦᑐᓂᒃ.

ᐃᓄᐃᑦ ᐃᓕᓐᓂᐊᖅᑐᑦ ᓄᓇᓕᖏᓐᓃᑦᑐᑦ ᐊᒻᒪᓗ ᐃᓕᓐᓂᐊᕈᑎᖃᖅᑐᑦ ᓄᓇᑦᓯᐊᕐᒥ ᖃᐅᔨᒋᐊᕐᕕᖃᕆᐊᓖᑦ ᓄᓇᑦᓯᐊᑉᒐᕙᒪᖓᑕ ᐃᓕᓐᓂᐊᖅᑐᓄᑦ ᑮᓇᐅᔭᑎᒍᑦ ᐃᑲᔫᓯᐊᖅᑖᖑᕙᑦᑐᓄᑦ ᐱᓕᕆᐊᓂᑦ, ᐊᒻᒪᓗ ᐱᑎᑕᐅᔪᓐᓇᕐᒪᑕ ᐃᓚᒋᐊᕈᑎᒃᓴᕆᔭᐅᔪᓂᒃ IPSE-ᑯᑦ ᐱᓕᕆᐊᖓᓐᓂᑦ. ᓄᓇᕗᒻᒥ ᓄᓇᖃᖅᑐᑦ ᑐᒃᓯᕋᖅᓯᒪᔭᕆᐊᓖᑦ ᓄᓇᕗᑦ ᒐᕙᒪᖓᑕ ᑮᓇᐅᔭᑎᒍᑦ ᐃᑲᔫᓯᐊᖅᑖᖑᕙᑦᑐᓄᑦ ᓄᓇᕗᒻᒥᐅᑦ ᐃᓕᓐᓂᐊᖅᑐᓂᑦ ᐱᓕᕆᐊᓂᑦ (FANS) ᐅᕝᕙᓘᓐᓃᑦ ᐃᓐᓇᐃᑦ ᐃᓕᓐᓂᐊᕈᑎᖃᖅᑐᓄᑦ ᐊᒻᒪᓗ ᐱᓕᒻᒪᒃᓴᔭᐅᔪᓄᑦ ᐃᑲᔪᕈᑎᒃᓴᖃᕐᓂᕐᒧᑦ ᐱᓕᕆᐊᒥᑦ (ALTS), ᐊᒻᒪᓗ ᐃᓚᒋᐊᕈᑎᒃᓴᕆᔭᐅᔪᓂᒃ IPSE-ᑯᑦ ᐱᓕᕆᐊᖓᓐᓂᑦ.

ᑮᓇᐅᔭᖁᑎᔅᓴᐅᔪᑦ ᓱᓇᓄᑦ ᐊᑭᓕᐅᑕᐅᔪᓐᓇᖅᐸᑦ?

ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᖏᓐᓄᑦ ᐱᓕᕆᐊᒥᑦ (IPSE) ᑮᓇᐅᔭᖁᑎᔅᓴᐃᑦ ᐊᑐᖅᑕᐅᔪᓐᓇᖅᐳᑦ ᐊᔾᔨᒌᖖᒋᐅᖅᑐᓄᑦ ᑐᕌᖓᔪᓄᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖃᕐᓂᕐᓄᑦ. ᑕᒪᒃᑯᐊ ᐃᓚᖃᕈᓐᓇᖅᐳᑦ, ᐃᓕᓐᓂᐊᕆᐊᕈᓐᓇᐅᑎᑦ, ᖃᖓᑦᑕᐅᑎᑦ, ᐸᐃᕆᕝᕕᒃ, ᐃᓕᓐᓂᐊᕈᑎᑦ ᐅᖃᓕᒫᒐᐃᑦ, ᐊᒻᒪᓗ ᐊᓯᖏᑦ. ᐱᕝᕕᒋᖃᑦᑕᖅᑕᕕᑦ ᑲᑐᔾᔨᖃᑎᒌᖑᔪᓂᑦ ᓇᓗᓇᐃᔭᕈᑎᓂᒃ ᓱᓇᓄᑦ ᐊᑐᖅᑕᐅᔪᓐᓇᕐᓂᖏᓄᑦ ᐱᑎᑕᐅᓯᒪᓕᕈᓐᓇᕋᕕᑦ.

ᖃᔅᓯᓂᒃ ᑮᓇᐅᔭᖁᑎᔅᓴᖅᑖᕐᑎᑕᐅᔪᓐᓇᕋᒪ?

ᖃᔅᓯᓂᒃ ᐊᑐᓂ ᐃᓕᓐᓂᐊᖅᑐᑦ ᐱᑎᑕᐅᔪᓐᓇᕋᔭᕐᓂᖏᑦ ᑐᖖᒐᕝᕕᖃᖅᑎᑕᐅᓇᔭᖅᑐᑦ ᐱᓕᕆᐊᒧᑦ ᒪᓕᒐᖁᑎᒋᔭᐅᓯᒪᔪᓂᒃ ᐋᖅᑭᒃᓱᐊᖑᓯᒪᓪᓗᑎᒃ ᐊᑐᓂ ᐊᕕᒃᑐᖅᓯᒪᓂᐅᔪᓂ.

ᐊᒃᑐᐃᓯᒪᓂᖃᕋᔭᖅᐸᑦ ᑕᒪᒃᑯᐊ ᖁᑦᑎᖕᓂᖅᓴᓄᑦ ᐃᓕᓐᓂᐊᕈᑎᒋᔭᒃᑲ ᐊᑦᓯᓗᐊᖅᑑᓐᓂᖅᐸᑕ?

ᐃᓄᐃᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕆᐊᕈᑎᔅᓴᖏᓐᓄᑦ ᐱᓕᕆᐊᒥᑦ (IPSE) ᑮᓇᐅᔭᖁᑎᔅᓴᐅᔪᑦ ᐃᓕᓐᓂᐊᕆᐊᕈᓐᓇᐅᑎᐅᖖᒋᒻᒪᑕ, ᐊᒻᒪᓗ ᑐᖖᒐᕝᕕᖃᖅᑎᑕᐅᓂᐊᕋᑎᒃ ᖃᓄᖅ ᐃᓕᓐᓂᐊᕈᑎᒋᔭᑎᑦ ᖁᑦᑎᖕᓂᖃᕐᒪᖔᑕ. ᖃᐅᔨᒋᐊᕐᕕᒋᓗᒋᑦ ᐱᓯᒪᓕᕐᕕᒋᔭᐅᕙᒃᑐᑦ ᑲᑐᔾᔨᖃᑎᒌᒋᔭᓯ ᑐᑭᓯᒋᐊᒃᑲᓐᓂᖅᑎᑕᐅᔪᒪᓗᑎᑦ ᖃᓄᖅ ᑐᒃᓯᕋᐅᑎᒋᔭᐅᔪᑦ ᐱᓕᕆᐊᖑᕙᓐᓂᖏᓐᓄᑦ ᐊᕕᒃᑐᖅᓯᒪᓂᕆᔭᑦᓯᓐᓂ.

ᑖᒃᑯᐊ ᐱᓕᕆᐊᑦ ᐊᒥᓱᓄᑦ ᐃᓕᓐᓂᐊᖅᑐᓄᑦ ᐃᓅᓯᖏᓐᓂᒃ ᐊᓯᔾᔩᓯᒪᓕᖅᑎᑦᑎᔪᓐᓇᕐᒪᑕ,” ᐅᖃᖅᓱᓂ ᓇᑖᓐ ᐆᐱᑦ, ᐊᖏᔪᖅᑳᖓᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ. “ᑖᔅᓱᒥᖓ ᐱᓕᕆᐊᒥᒃ ᐋᖅᑭᒃᓱᐃᕙᓪᓕᐊᓂᕐᒥ, ᐱᒻᒪᕆᐅᑎᑕᐅᓗᐊᓚᐅᕐᒪᑕ ᑮᓇᐅᔭᖁᑎᔅᓴᖅᑖᖑᔪᓐᓇᖅᑐᑦ ᓯᓚᕐᔪᐊᓕᒫᒥ ᐊᑐᐃᓐᓇᐅᑎᑕᐅᔪᓐᓇᕆᐊᖃᕐᓂᖏᑦ ᐃᓄᓐᓄᑦ ᐃᓚᒋᔭᐅᖃᑕᐅᔪᓄᑦ ᑲᓇᑕᓕᒫᒥ, ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ, ᐊᒻᒪᓗ ᐱᓕᕆᐊᖑᓯᒪᓕᖁᓪᓗᒋᑦ ᐃᓅᖃᑎᒌᒃᑐᓂ ᐊᔾᔨᒌᒃᑎᑦᑎᕙᖖᒋᓐᓂᐅᔪᓂᒃ ᐱᔨᑦᓯᕋᖅᑎᐅᕙᒃᑐᓂᑦ ᑐᓗᖅᑕᕐᕕᖃᓕᖅᑎᑦᑎᕙᓐᓂᖅᑎᒍᑦ ᓯᓚᑦᑐᖅᓴᕕᓐᓄᑦ ᐃᓕᓐᓂᐊᕆᐊᕈᑎᒃᓴᓄᑦ ᐃᓚᒋᔭᐅᖃᑕᐅᔪᓐᓇᕐᓂᖏᓂ (PSE) ᐊᒥᓱᓄᑦ ᐃᓄᓐᓄᑦ - ᖃᖓᑦᑕᐅᑎᒃᓴᓄᑦ ᐊᑭᒋᔭᐅᕙᒃᑐᓄᑦ, ᐸᐃᕆᕝᕕᓐᓄᑦ, ᐃᓚᒌᓄᑦ ᐃᑲᔪᕈᑎᒃᓴᖅᑖᖑᕙᒃᑐᓄᑦ ᐊᒻᒪᓗ ᐅᖓᓯᒃᑐᒥ ᓄᓇᒥᓐᓂᑦ ᐃᓚᒋᔭᒥᓐᓂᓪᓗ ᓄᓇᖃᓕᖅᓯᒪᓪᓗᑎᒃ ᐊᑭᒋᔭᐅᕙᒃᑐᓄᑦ ᑮᓇᐅᔭᑎᒍᑦ. ᑕᐃᒪᐅᔭᕆᐊᖃᓪᓚᕆᒃᓱᓂ ᐃᓚᒋᔭᐅᖃᑕᐅᓂᐊᕐᒪᑦ ᐱᓕᕆᐊᒧᑦ ᖃᓕᕇᓕᖅᓯᒪᑎᑕᐅᓂᖏᑦ ᐱᔨᑦᓯᕋᕈᑎᒃᓴᐅᔪᑦ ᐃᑲᔪᖅᑐᒐᐅᓂᖏᑦ ᐊᖏᓂᖅᓴᐅᓕᖅᑎᑕᐅᖁᓪᓗᒋᑦ ᐃᓚᒋᔭᐅᓕᕈᓐᓇᕐᓂᖏᓄᑦ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᕆᐊᕈᑎᒃᓴᐅᔪᓄᑦ ᐊᒻᒪᓗ ᑕᐃᒪᐅᔭᕆᐊᖃᓪᓚᕆᒃᓱᑎᒃ ᐃᑲᔪᕈᑎᒃᓴᐅᔪᓄᑦ ᐃᓕᓐᓂᐊᖅᑐᓄᑦ ᐊᑐᕐᓂᖃᓪᓚᕆᒐᔭᖅᑐᓄᑦ ᐃᓅᓯᖏᓐᓂ.

Natan ObedPresident, Inuit Tapiriit Kanatami
ᑖᒃᑯᓄᖓ ᑐᓴᖅᑎᑕᐅᒋᐊᒃᑲᓐᓂᕈᒪᔪᑦ, ᖃᐅᔨᒋᐊᕐᕕᖃᕈᓐᓇᖅᑐᑦ:

[email protected]
1 (613) 292-4482