Vipuari 3, 2021 – Ottawa, Ontario
Inuit Tapiriit Kanatami quviasugutiqaqput isumaliurutiusimaliqtumut tusaqtitausimaliramik tavvani pinasuarusirmi Kikkutuinnanut Pijitsiraqtikkut ammalu Niuviqattarnilirijinginit Canadami, pijjutigisimallugit Canadami Unataqtuksalirijikkut, tunisisimalirniarnirminnut $527-million-nik Ukiuqtaqtumi Naalagviqarvivinirnut pilirijunniutinik Nasittuq Kuapuriisangannut, Inungnik sivuliqtiqaqsutik piliriaqaqtigijauqataujunik Inuit Nunanganni pivalliajulirijikkut kuapuriisanginnik.
Piliriqatigiiktiujut ilaqaqput Nunasi Kuapuriisangannik, Paan Arctic Inuit Nuktaqtulirijinginik (katillugit ukuangullutik Inuvialuit Pivalliajulirijingit Kuapuriisangat, Makivik Kuapuriisangat, Nunatsiavutmi Nangminiqaqtut Timiqutingat, Qikiqtaaluk Kuapuriisangat, Sakku Kiinaujanik Qiturngiuqtitsijit Kuapuriisangat, ammalu Qitirmiut Kuapuriisangat), ilagiqataullugit ATCO Frontec Ltd.
Ukiuqtaqtumi Naalagviqarvivinirnut naalagvilirijit anginiqpaulluni unataqtuksanit pilirijungnautigijaungmat Inuit Nunanganni. Nasittuq Kuapuriisangat saqqiisimalilaurput aulatsiniqarniuniaqtunut ammalu pilirianguvanniaqtunut pilirinirilauqtamingnik ukiungit 2001 ammalu 2014 akunningit atuqtillugit ajjirlagillugit katujjiniqarutigillugu pilirinirilauqtamingnik. 2022-mi pilirijungnautit ilaqaqput sitamanik ukiungnut marruungnut asiagut piliriniujungnaqtunik kiinaujatigut akiqarajaqłutik $1.1-billion-nik.
Satuqsisimaniq taakkuninga pilirijungnautiujunik sivulliqpautitaksausimangmat piliriniuvaktunik Inuit pivalliajulirijingita kuapuriisangannit ammalu Inuit Tapiriikkunginit Kanatami. Taakkua pilirijungnautit tunijausimalilaurningit Nasittuq Kuapuriisangannut pijjutiuluaqtuulluni turaarviksaqutinut tikisimajjutiulirmat Kiinaujaliurasuarnirmi Pivalliajulirijikkut ammalu Niuviqattarnilirijikkunnit sivulliqpautitaksarijaulluni Inuit Gavamatuqakkullu Piliriaqaqatigiiktit Katimajiralaanginnit angigligiaqtitausimaliqullugit Inuit nangminiq isumaliurutiliurungnarninginnut kiinaujaliurasuarnirmi pivalliajuliriniuvaktunut atuinnaulirviusimanirmiktigut gavamatuqakkut niuviqattarnilirinirmi piliriniqarviujungnaqtunut.