Skip to main content
Tusaqtitsijjutiit

Nutaangullutik Qanuqtuurutiliangusimallutik Parnautiit tukimuagutiksauniaqtut Inuit Tapiriit Kanatami piliriaksariniaqtanginnut ukiut sitamat atuqpallianinginni

By April 9, 2024 No Comments

April 9, 2024 – Ottawa, ON

Inuit Tapiriit Kanatami saqqiisimaliqput Qanuqtuurutiliangusimallutik Parnautiliarisimajamingnik 2024-2028 ukiungit atuqpallianinginni, ikajurutiksaullutik katujjiqatigiingujut piliriaksariniaqtanginnik ukiut sitamat atuqpalliatillugit. Taakkua parnautiit pimmariutiullutik sapujjigiaqtiunirmi sanarrutiksarijauvut inuit katinniqaqsimalutik ammalu amiqqarutiqarunnaqullugit sivulliqpautitauqujaminnik.

Taakkunani parnautini turaarviksaqutigijaujut, piliriangujut ammalu saqqititausimalirunnaqtut Qanuqtuurutiliangusimallutik Parnautiit katujjaullutik isumaliurutiusimavut Inuit Angirutiqaqsimajut Katujjiqatigiinginnit (ITOs), Inuvialuit Aviktuqsimanirmi Kuapuriisanganit, Nunavut Tunngavik Timiqutingannit, Makivikkunnit ammalu Nunatsiavut Gavamanganni, ammalu atuliqtitauniaqsutik aaqqiksuiqatigiitsiarningitigut tamarmiullutik sitamaujut katujjiqagiigijanginnit. Qanuqtuurutiliangusimallutik Parnautiit ikajurutiuniarmijut sanarrutiqarnirmik qaujigiaqpanniarnirmut Inuit Tapiriit Kanatami sivummuktittigiaqsimalirninginnut.

Angijumik suli piliriniqarviujariaqaqput inuit inuusiqaqtitaujunnaqullugit upigisimatsiarlutik imminnik ammalu piliriniqarunnaqtitaulutik nangminiq isumaliurutiliurunnarnirijaminnik, aturunnaqtitaulutik inuusirminni piusituqarijaminnik ammalu inuusirminni naammaktumik inuusiqaqataujunnaqtitaulutik inuusirijaujunit asingini Canadamiuqatiminnit. Inuit Tapiriit Kanatami qanuqtuurutiliarisimallugit parnautingit 2024-2028 ukiunginni piliriaksaqaqtitausimavut 7-ngujunik sivulliqpautitaujariaqaqtunik:

  • Sanngiktittiniq Inuit katinniqaqsimaninginik, aulatsijiuninginnik ammalu nangminiq isumaliurutiliurunnarninginik
  • Piusigiaqtitausimaningit atuinnautitaujut ilinniarnilirinirmi, aanniaqsiurtilirijjutinut ammalu timimiktigut isumakkulluunniit ajurutiqaqtunut pijitsirarutissait
  • Piusigiaqtitauningit Inuktut uqausingata uummaqtitaugiakkannirninganut, aaqqiumatitautsiarninganut, mianirijausimaninganut ammalu quvvaqtitaugiaqpanningata
  • Ikajuqtuisimajut atuliqtitauniksangita kikkutuinnait pijunnautiqarninginik Inuit Nunanganni
  • Sivummugiaqtittisimajut Inuit Nangminiq isumaliurutiliurunnarninginik qaujisainiuvaktunut
  • Ikajurutiksaqaqtitsiniq piusigiaqtitauniksangita qanuinngitsiaqtitaujariaqarningita ammalu mianirijausimaningita aktuqtausaraittuullutik Inungni inuuqatigiiktut
  • Piliriniqarlutik pijariiqtausimaliqullugit Inuit Nunanganni pilirivviullutik aulatsiniqarviujuni ilakuuniqartut

“7-ngullutik sivulliqpautitaksaujuit ilijauqatausimajut taakkunani qanuqtuurutiliangusimallutik parnautini pijjutiqaqput Inuit Tapiriit Kanatami piliriaksaqarninginik aaqqiksuisimaliriamik aktuiniqarunnaqtunik, akuniiqtumut piusigiaqtitausimalirunnaqtunik inuuqatigijatta inuusinginnik,” uqaqsuni Inuit Tapiriit Kanatami Angijuqqaangat Natan Obed.

“Inuit Tapiriit Kanatami nautsiqtuisimaniaqput saputisimagiarlugillu atuliqtitausimaliqullugit inuktigut kikkutuinnait pijunnautiqarnitigijattinnik, ammalu atulirtillugit silarjualimaami piliriniqalirutiksaujut turaangatitausimallutik nunarjuarijaujuit saqqiisimaliriaqarninginnik kikkutuinnait pijunnautiqarninginnut angirutiqaliqtittisimagiaminni piliriarijariaqaqtaminnik.”

Inuit Tapiriit Kanatami qanuqtuurutiliangusimallutik parnautiit piruqtitauviuvalliasimavut ingirrattiaqtitausimaningita atuliqtitauvalliasimaninginni parnautiliariqqaalauqtattinnut, taimalu nalunaittutigut sivummugiarutiusimaliqsutik Inuit aulatsijiujunnarninginik ammalu nangminiq isumaliurutiliurunnarninginik, ilaqaqtillugit aaqqiksuisimalirnirmik Gavamatuqakkut Inuit Nunanganni Maligaqutingannik, pigiaqtitausimalirninganik Inuit Surusiit Sivulliqpautitaulutik Piliriangujumut ammalu saqqiisimalirnirmik Inuit Nunanganni Niqigijaksanik Pisimalirunnarnirmut Qanuqtuurutiliangusimajunik.

Iluikkaulugit Qanuqtuurutiliangusimallutikt Parnautiliangusimajut 2024-2028 ukiungit atuqpalliatillugit uvani uqalimaaqtaujunnaqput.