Utupiri 6, 2022 – Aatuvaa, Aantiuriu
Qallivallitilluta Nunarjualimaarmi Isumakkut Qanuinngitsiarnirmut Ullunganut, Gavamakkungit Kanataup ammalu Inuit Tapiriit Kanatamikkut tusaratsaqaqtut $11 milijannit nutaangullutit ikajuqsigiarutaulutit sanngiliriaqtauqullugu Kanatami Inuit Inuusinginnit Kipisititsittailinirmut Qanuqtuurutimik. Taanna kiinaujaqaqtitauninga pisimajuq Kiinaujaqtuutitsanut 2022mi piruriarutaullunillu sivuniagut kiinaujatigut ikajuutitsaliangusimajuni Kiinaujaqtuutitsani 2019 pisimajuni.
Saqqiqtitaulauqsimajut Inuit Tapiriit Kanatamikkunnut 2016mi, Kanatami Inuit Inuusinginnit Kipisititsittailinirmut Qanuqtuuruti Inunnut-sivuliqtaujuq, suqquiqsirutaugunnaqtunit-tunngariqaqtuni, nunarjualimaarmillu tukisimanikkut atuqtaugiaqtuq inuisalligiaqullugit inuusirminni kipisiqattaqtut Inunnit Inuit Nunanganni. Pingasuujuqtunit sivulliutitsigumaniliit qanuiliuriarutigillugit ilaulugit: saqqiqtitsilutit inuuqatigiittut pivitsaqatigiitsiarlutit, saqqititsinikkut iliqqusituqarminni kajusitiksigiaqtunit, paqqitsiarnirmik qanuinngitsiaqtunit Inunnit nutaqqanit, pivitsaqaqtitsiarlugit isumalirinikkut ikajuqsigiarutaugunnaqtunit isulittarviqanngittunit Inunnut, mamisarniqarlutit quaqsaarnaqtukkuuqsimajut kitsarniqaqsimajullu aniguujjisimanngittaminni, aulajjagiarlugillu Inuit qaujimaniqaqtut makitagiarunnarnirmik inuusirmillu kipisititsittailinirmi.
Tamanna nutaaq kiinaujatigut ikajuqsigiaruti ullumi tusaqtitsigutiujuq ikajuqsiniaqtut piliriariinnaqtanginnit Inuit Tapiriit Kanatamikkut ammalu Inuit Nunataarnirmut Timiqutinginnut, iluunnangagut qimirruniqariaqsimalluni, Inunnut-turaangajunit aturiaqtaugunnaqtunit inuusirmik kipisititsittailinirmut piliriaqallarittunillu pinasuarutiuvattut asijjiriarlugit, isumalisaarninginni nuqqaqtitsigiarnirmik ikajuqtuqtautsiarlutit, kinatuinnaq tikiutiqunagu inuusirminni kipisigumanirmut. Kiinaujaqaqtitauniq atuinnaqaqtitsiniqsauniaqtuq piliriatsanut pijitsirautitsanullu, piruqpalliatitsiluni ajunnginniqaqtunit, ikajuqsilunillu qaujisarutaujunit qimirrugiarutaujunillu.
Taikkununga ikajuqtaugiaqaqtunut, Niriunniq Qanuinngitsiarnirmut Uqaalararvinga atuinnaqaqpattut maannatsautigimuungajunit, iliqqusimut uluriananngittunit, uqaalautikkut uqumailliuqtunut ikajuqtauvimmik iluunnanginnut Nunaqaqqaaqsimajunut Kanatami, 24nit ikarranit matuingavattut qautamaat, 7 ulluit pinasuarutitamaat (1-855-242-3310 upvaluunniit ikiaqqivikkutigut titiraqattautilutit uvani hopeforwellness.ca) Qallunaatitut, Uivititut, tutsiraqtaugunillu Inuktitut, Kuriititut ammalu Ujigvuititut. Inuusuttut ikajuqtaugumajut uqaalagunnarmijut Nutaqqanut Ikajuqtauvimmuq uqaalavimmut uvunga 1-800-668-6868, uqaalautiralaakkulluunniit titirarviqarlutit uvunga 686868.
Uqausiusimajut
“Akuniuluaqtut, piliriatsait inuusirmik kipisititsittailinirmuungajut sanajausimaniqalaurmata isumagijaqarnatit inunnit ikajurutigigasuaqtaminni. Taanna Inunnut-turaangajuq, sanajausimalluni sivuliqtaullunillu Kanatami Inuit Inuusirmik Kipisititsittailinirmut Qanuqtuuruti asijjiqtuivalliajuq iluunnanganni. Nunaqaqqaaqmimajunut Pijitsirrarniit Kanatami kiinaujatsaqaqtitsiniaqtut $11 milijannit qaakkanniagut pilirianguninganut qanuqtuurutiup Inuit atuinnaqatsiarniqsauqullugit tamakkuninga inuusirmik-quppaqtirigiarnirmuungajunit piliriatsanut pijitsirautitsanullu. Ikajuqsinikkut ajunnginniqaqtunit piruqpalliatitsinirmi timiujuni nunalinnillu, Inuit Tapiriit Kanatamikkut aaqqigiarigunnaqattarniaqtut qanuqtuurutimik inuit ikajuqtauniqsaugunnaqullugit ilaminniinginnaqullugit nunaqqatiminnillu.
Tamanna qanuqtuuruti pimmariujuq, taimaimmijut asingitta Gavamakkungit Kanataup piliriqatiqarningannut Inuit Tapiriit Kanatamikkunnit tunngavitsaqatsiaqullugit qanuinngitsiarnirmut inuuqatigiittuni nunaqqatigiittunillu. Ikajuqsigianginnariaqaqtugut piuniqsanit illuqaqullugit, ilinniaqtuliriqullugit, niqiqatsiarniqsauqullugit, atuinnaqarniqsauqullugillu ilusilirinirmut pijitsirautiujunit, atsuruutiqakkannirlutillu nuqqaqtiqullugu naammagijauqattannginniq pilirigvinni uviniuqatiginngittaminnillu piuksannginniuvattuq – saqqisimajut tamakkua silatittinniingaaqtunut aulatausimanirmut. Upigivakka Inuit Tapiriit Kanatamikkut atsuruutigiinnaqtangit pivaalliriaqullugit Inuit atangirlugit Inuit Nunanganniittut, sivuliqpanninginnillu inuusirmik quppaqtirigiarnirmik nalimugiittitsigiarnirmillu.”
Maligaliuqti Patty Hajdu
Minista Nunaqaqqaaqsimajuit Pijitsiqtauninginnut
“Quaqsaarnaqtumiinnarninga inuusirminni kipisivattut Inuit nunanginni atangiqtunga, Inuulluta, saanngiinnaqpattavut qautamaat. Tamanna nutaaq kiinaujatigut ikajuutitsaujuq ikajuqsiniaqtut piliriangugiarluni atsurunnaqtumiinnirivattavut ajunnginniqaqtunillu piruqpalliatitsiluni qanuinngitsiarniqsauqulluta, makitagiarniqsaugunnaqtunillu nunaliqarunnaqulluta. Inuusirmik kipisititsittailiniq qutsiniqtaunginnaqtuq sivulliutitanginnut Inuit Tapiriit Kanatamikkut, ammalu Kanatami Inuit Inuusinginnit Kipisititsittailinirmut Qanuqtuuruti suqquiqsirutaugunnaqtunit-tunngariqainnaqtuq ajauqtuigutiulluni piliriarivattattinnut”
Natan Obed
Inuit Tapiriit Kanatami Angijuqqaangat
Suiniliit
- 2016mi, Gavamakkungit Kanataup kiinaujaqaqtitsilauqtut $9 milijannit atuqtaujutsarnit arraagurnut pingasunut atuliqtitauqullugu Kanatami Inuit Inuusinginnit Kipisititsittailinirmut Qanuqtuurutimut. Kinguniagut 2019mi, qaakkanniagut kiinaujaqaqtitsilaurmijut $50 milijannit atuqtaujutsamaangutillugit 10nut arraagurnut, qaamiutaliqtauvalluni $5 milijannit arraagutamaat kajusiningani
- Nunaqaqqaaqsimajunit Pijitsiraqtiit Kanatami piliriqatiqatsiapattut Nunaqaqqaaqsimajunit pinasuaqatiujunit ajauqtuigutiqaqtutit titiqqaqutilluataujunit piliriangusimajunut Nunaqaqqaaqsimajunut pinasuaqutiujunut, tailuarlugu Nunaqaqqaaqsimajut Isumalirinirmut Qanuinngitsiarnirmut Pilirijjutinga, Upigusunniq Sannginittinnit ammalu Kanatami Inuit Inuusinginnit Kipisititsittailinirmut Qanuqtuurutimi. Tamakkua pingasuq titiqqaqutiit nalunaiqsisimajut iluunnaaguungajumit aturiaqtut isumakkut qanuinngitsiarnirmuungajunit tunngaviqaqtutillu iliqqusituqanginnit turaanganiqaqtutillu-Nunaqaqqaaqsimajunut apuqtarutauvattuni ilusilirinirmut.
- Kiujjutiulluni amisuuluaqtut kipisiqattarninginnut inuusiminni ilanginni Nunaqaqqaaqsimajuit nunanginni, Gavamakkungit Kanataup ikajuqsiniqaqtut ajjigiinngittuutinit pigiaqtitausimajunit turaanganiqaqtuni inuusirmik quppaqtirinirmuungajunit ammalu inuusirmik kipisititsittailinirmuungajunit, piqasiutillugu Niriunniq Qanuinngitsiarnirmut Uqaalararvik, Kanatami Inuit Inuusinginnit Kipisititsittailinirmut Qanuqtuuruti, Kanatami Nunaqaqqaaqsimajut Inuusuttut Inuusinginnit Kipisititsittailinirmut Qanuqtuuruti, ammalu Inuusuttut Niriunniqarninginnut Kiinaujatsaq. Taanna Niriunniq Qanuinngitsiarnirmut Uqaalararvik atuinnautsautigivattut, iliqqusituqarmut uluriananngittunut, uqaalautikkut uqumailliuqtuni uqaalaviugunnaqtuq Nunaqaaqqaaqsimajunut Kanatami, 24 ikarrait qautamaat, 7 ulluit pinasuarusitamaat (1-855-242-3310, upvaluunniit ikiaqqivikkutigut titiraqattautilutit uvani hopeforwellness.ca) Qallunaatitut, Uivititut, tutsiraqtaugunillu Inuktitut, Kuriititut ammalu Ujigvuititut