Uncategorized @iuq

Pauktuutikkut Tapiriikkullu Piliriqatigiittut Aaqqissuinirmut Inunnut Qanuqtuurutissanit Parnautinit Atuliqtittigutissanit MMIWG Naammattuligutauqullugit Maligaqtigut Qinujjutigisimajanginnik

By December 15, 2020 No Comments

Paukkuutit Inuit Arnait Kanatami ammalu Inuit Tapiriit Kanatami nalunairsiviusimavut iqqanaijaanguvalliammataguuq Kanataup Gavamakkunginni katujjillutik−aaqqissuivallianinginnik Kanatami Qanuqtuurutissanit Parnautinit atuliqtittinirmut Naammattuligutauqujaujunit Maligaqtigut Pijariirutinginni Unikkaanginniittunit Kanatami Qaujisarutausimajumi pijjutigillugit Jagasimajut Inuaqtauqattarsimajullu Nunaqaqtutuqait Arnait Niviarsiallu (MMIWG).

Katujjiluta, marruuk timiqutivut issivautauqatigiimmatik inunnit Pijariakillitittijinit kattungairutiqarsimallutik pijittirautiqarniarnirarnirmik naammajunit ammalu pinasuarutaullarittunit Inunnut Qanuqtuurutissanit Parnautinit gavamatuqakkunnut titiraqtausimalaaqtunit qanigijangani upirngaaq 2021. Taakkua Inunnut−turaangajut tukimuagutissait aaqqiigutaulaaqtut Inunnut turaangajunit Titirarsimajunit Kanatami Qanuqtuurutissanit Parnautinit iluunnanginnuungajunit.

Ilagijaujut Inunnit Pijariakillitittijinit ilaqaurngata atausiggutinit kiggatuqtinit atunit taakkunanngat 10nit ajjigiinngituggutinit timiujuniinngaarsimajunit:

  • Pauktuutit
  • Inuit Tapiriit Kanatami
  • Inuvialuit Kuapuriisan
  • Nunavut Tunngavik Timingat
  • Makivik Kuapuriisan
  • Nunatsiavut Gavamakkungit
  • Ilagiinut Annaumajullu Katujjiqatigiit
  • Nunalinnit Inugiannirsanit Inuit/Tunngasuvvingat Inuit
  • Anaanauqatigiit Tumingit Avittursimaniujunit Inuit Arnait Katujjiqatigiingit
  • Saturviit Inuit Arnait Katujjiqatigiingit Nunavimmi

Tracy Sarazin Tapiriikkunnit ammalu Mary Sillet kiggaqtuilluni Pauktuutikkunnit katujjijuunnik−issivautarijaak. Kiggatuqtiit Pauktuutikkunnit Tapiriikkunillu katimajiuqataummijut Pijariakillitittijilluatanginnit, taakkua pilirijut pijittirautiqarnirmik Kanatami Qanuqtuurutissanit Parnautinit.

Katujjilutik, Inuit kiggatuqtiit pilirijut qaujimattiarasuttutik Inuit Arnait niviarsiallu ajjigiimik piusiqarviuqattaqullugit attananngittumik, aanniaqtulirinirmik, ilinniarnilirinirmik, maligalirinirmillu akarrijaarutauvattunit Kanatamiulimaanut, ammalu timikkut, ippinnianikkut, kiinaujaliurasuarutikkut, inuusikkut iliqqusikkullu attananngittumiinnirmik amisunut Kanatamiunut qujagiliujjausimavattunut.

Inunnut Qanuqtuurutissait Parnautiit kamagijaqarniaqtut tamakkuninga naammanginniujunit aaqqisimallattaarniaqtunit, naammanaarsimajunit ammalu qanuqtuurutissanit pilirijjusiuvattunit asijjiigutauniaqtunit taimaak Inuit arnait niviarsiallu − ammaluttauq marruiliqqangajuunnik−anirniliit, arnauqatinginnik aippaqasuut, arnaruqtitausimajut angutiminiit, arnauqatinginnuungajunut, naluqqutijunut, tammautausimasugijunut qanuittuujariaqaqtuginirminik ammalu aippaqarsainnariatunnginirminik inuusilinnut − naammattumik piusiqarviuttiaqattaqullugit.

Qanuq iqqanaijaaqarngata MMWIG Inuit Pijariakillitittijiit?

Iqqanaijaaliit taakkua Pijariakillitittijiit aaqqissuinirmik Inunnut Qanuqtuurutissanit Parnautinit atuliqtittigutissanit Naammattuligutauqullugit Maligaqtigut MMIWG Kanatami Qaujisarutaujuq, ilagijaullutik 46 Inunnut−turaangajut Naammattuligutauqullugit Maligaqtigut. Pilirijugut naamajunit parnautiliurasuaqtuta pijjutiqarniaqtunit ikajuqtaujjutigigialinginnik ilagiit, nunaliujut ammalu Inuit arnait, niviarsiat ammalu 2SLGBTQQIA kikkutuinnait ullumi inuujut pilirijjusiuvattunit naammangittuliviuvattunit tamakkualu quvvasitturjuaraaluugutauvattutik ninngaujjauqattarninginnut. Inunnut Qanuqtuurutissait Parnautiit aaqqiijjutauniarngata inunnuungajunit gavamatuqakkunni Kanatami Qanuqtuurutissanit Parnautinit.

Ilagijaullunga unikkaarsimallunga (uvvaluunniit unikkaarsimananga), qanuq qaujikkaqtaulaaqqunga kamagijauvallianingita missaanut Inunnut Qanuqtuurutissait Parnautiit?  Piviqalaarivungaa isumagijaqarnik uqausiqarunnanirmik?

Issivautauqatigiittuta Pijariakillitittijinit, Paktuutikkut ammalu Inuit Tapiriikkut Kanatami tukisitittigiaqattaniaqtut pinasuarutingita missaanut Inunnut Qanuqtuurutissanik Parnausiurninginnik. Ilagijaullutit, unikkaatit pijjutausimajut atuliqujijjutausimajunit Kanatami Qaujisarutaujumi Pijariirutinginni Unikkaanit. Ilagijaujut Inunnut Pijariakillitittijinut maanna aaqqissuivalliajut naamajunit atuliqtittivallianirmut tukimuatissanit ikajuutilinnit nunalinnut aaqqiumagutauniaqtunit ammalu kamagijaqarniaqtunit pigiarutauvattunit ninngaujjauqattarninginnut Inuit arnait, niviarsiat ammalu 2SLGBTQQIA kikkutuinnait.

Qanuq Inuit Pijariakillitittijiit ikajuqqat ilagiinut?

Inuusiit pimmariummat uvattinnut. Isumalirijinut ammalu ippinniagijauluaqtunut ikajuqtaujariaqaruvit, atii uqaalaniaqqutit taakkununga namminirsuqtunut Kanatami akiqanngitukkut uqaalaqattarvimmut: 1-844-413-6649. Inuusilirijimik atuinnaqtaqarpattuq 24nit ikarranit qautamaat, tisamaujunngigaqtut ulluit pinasuarusitamaat. Iluunnatik uqaalaniujut tusaqtaujariaqanngittut kinalimaamut. Taakkua ikajuqtiit atuinnait ilinnut Inuktut, Qallunaatittut Uiviititulluunniit.

Unikkaarunnajunnginnala taissumani maannali unikkaarumalirama uvanniinngaaqtunit − uqarviqariaqaqqungaa Inunnit Pijariakillitittijinit?

Taakkua MMIWG Kanatami Qaujisaqutaujut pijariirsimalirngata ammalu saqqitittijummata pijariirutinginnik unikkaanit. Maannali Pijariakillitittijivut aullujjingaariaqalirmimmata titirarpallianirmik Inunnut Qanuqtuurutissanit Parnautinit atuliqtittinirmut Naammattuligutauqujaujunit Maligaqtigut.

Amisuaqtiluaqtuta unikkaaqattaratta kisiani saqqiqtuqalaursimavanngimmat. Inunnut Qanuqtuurutissait Parnautiit atuliqtitaulaarvaluttuujaaqqaat kamagijaullattaarlutik?

Iluunnatik katujjiqataujut tamatuminga piliriarmi kamagijaqarngata atuliqujijjutausimajunit Kanatami Qaujisarutaujumi pijariirutinginni unikkaanit katujjilutik−titiraqujaullutik Kanatami Qanuqtuurutissanit Parnautinit. Pilirijugut tatigiqattautittiaqtuta ammalu kamagijauqullugit saanngajaujariaqarsimatillugit gavamakkut uvagullu namminiq. Qanuqtuurutissait parnautivut pilirijjutissaqattiariaqarngata ammalu piqasiujjisimalutik kiujigijaujunnanirmik parnautinit atuliqtittinirmut qilammiujumuungajunit, akunnaaqijumuungajunit sivitujumuungajunillu qanuqtuurutissanit kamagivalliajavut kajusititaujunnaniarngata kamagijaujunnaniarngatalu.