Uncategorized @ius

ᐸᐅᒃᑑᑎᒃᑯᑦ ᑕᐱᕇᒃᑯᓪᓗ ᐱᓕᕆᖃᑎᒌᑦᑐᑦ ᐋᖅᑭᔅᓱᐃᓂᕐᒧᑦ ᐃᓄᓐᓄᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐊᑐᓕᖅᑎᑦᑎᒍᑎᔅᓴᓂᑦ MMIWG ᓈᒻᒪᑦᑐᓕᒍᑕᐅᖁᓪᓗᒋᑦ ᒪᓕᒐᖅᑎᒍᑦ ᕿᓄᔾᔪᑎᒋᓯᒪᔭᖏᓐᓂᒃ

By December 15, 2020 No Comments

ᑎᓯᐱᕆ 14, 2020 – ᐋᑐᕚ, ᐋᓐᑎᐅᕆᐅ

ᐸᐅᒃᑰᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓇᐃᕐᓯᕕᐅᓯᒪᕗᑦ ᐃᖅᑲᓇᐃᔮᖑᕙᓪᓕᐊᒻᒪᑕᒎᖅ ᑲᓇᑕᐅᑉ ᒐᕙᒪᒃᑯᖏᓐᓂ ᑲᑐᔾᔨᓪᓗᑎᒃ−ᐋᖅᑭᔅᓱᐃᕙᓪᓕᐊᓂᖏᓐᓂᒃ ᑲᓇᑕᒥ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐊᑐᓕᖅᑎᑦᑎᓂᕐᒧᑦ ᓈᒻᒪᑦᑐᓕᒍᑕᐅᖁᔭᐅᔪᓂᑦ ᒪᓕᒐᖅᑎᒍᑦ ᐱᔭᕇᕈᑎᖏᓐᓂ ᐅᓂᒃᑳᖏᓐᓃᑦᑐᓂᑦ ᑲᓇᑕᒥ ᖃᐅᔨᓴᕈᑕᐅᓯᒪᔪᒥ ᐱᔾᔪᑎᒋᓪᓗᒋᑦ ᔭᒐᓯᒪᔪᑦ ᐃᓄᐊᖅᑕᐅᖃᑦᑕᕐᓯᒪᔪᓪᓗ ᓄᓇᖃᖅᑐᑐᖃᐃᑦ ᐊᕐᓇᐃᑦ ᓂᕕᐊᕐᓯᐊᓪᓗ (MMIWG).

ᑲᑐᔾᔨᓗᑕ, ᒪᕐᕉᒃ ᑎᒥᖁᑎᕗᑦ ᐃᔅᓯᕙᐅᑕᐅᖃᑎᒌᒻᒪᑎᒃ ᐃᓄᓐᓂᑦ ᐱᔭᕆᐊᑭᓪᓕᑎᑦᑎᔨᓂᑦ ᑲᑦᑐᖓᐃᕈᑎᖃᕐᓯᒪᓪᓗᑎᒃ ᐱᔨᑦᑎᕋᐅᑎᖃᕐᓂᐊᕐᓂᕋᕐᓂᕐᒥᒃ ᓈᒻᒪᔪᓂᑦ ᐊᒻᒪᓗ ᐱᓇᓱᐊᕈᑕᐅᓪᓚᕆᑦᑐᓂᑦ ᐃᓄᓐᓄᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᒐᕙᒪᑐᖃᒃᑯᓐᓄᑦ ᑎᑎᕋᖅᑕᐅᓯᒪᓛᖅᑐᓂᑦ ᖃᓂᒋᔭᖓᓂ ᐅᐱᕐᖔᖅ 2021. ᑖᒃᑯᐊ ᐃᓄᓐᓄᑦ−ᑐᕌᖓᔪᑦ ᑐᑭᒧᐊᒍᑎᔅᓴᐃᑦ ᐋᖅᑮᒍᑕᐅᓛᖅᑐᑦ ᐃᓄᓐᓄᑦ ᑐᕌᖓᔪᓂᑦ ᑎᑎᕋᕐᓯᒪᔪᓂᑦ ᑲᓇᑕᒥ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐃᓘᓐᓇᖏᓐᓅᖓᔪᓂᑦ.

ᐃᓚᒋᔭᐅᔪᑦ ᐃᓄᓐᓂᑦ ᐱᔭᕆᐊᑭᓪᓕᑎᑦᑎᔨᓂᑦ ᐃᓚᖃᐅᕐᖓᑕ ᐊᑕᐅᓯᒡᒍᑎᓂᑦ ᑭᒡᒐᑐᖅᑎᓂᑦ ᐊᑐᓂᑦ ᑖᒃᑯᓇᙵᑦ 10ᓂᑦ ᐊᔾᔨᒌᙱᑐᒡᒍᑎᓂᑦ ᑎᒥᐅᔪᓃᙶᕐᓯᒪᔪᓂᑦ:

  • ᐸᐅᒃᑑᑎᑦ
  • ᐃᓄᐃᑦ ᑕᐱᕇᑦ ᑲᓇᑕᒥ
  • ᐃᓄᕕᐊᓗᐃᑦ ᑯᐊᐳᕇᓴᓐ
  • ᓄᓇᕗᑦ ᑐᙵᕕᒃ ᑎᒥᖓᑦ
  • ᒪᑭᕕᒃ ᑯᐊᕈᕇᓴᓐ
  • ᓄᓇᑦᓯᐊᕗᑦ ᒐᕙᒪᒃᑯᖏᑦ
  • ᐃᓚᒌᓄᑦ ᐊᓐᓇᐅᒪᔪᓪᓗ ᑲᑐᔾᔨᖃᑎᒌᑦ
  • ᓄᓇᓕᓐᓂᑦ ᐃᓄᒋᐊᓐᓂᕐᓴᓂᑦ ᐃᓄᐃᑦ/ᑐᙵᓱᕝᕕᖓᑦ ᐃᓄᐃᑦ
  • ᐊᓈᓇᐅᖃᑎᒌᑦ ᑐᒥᖏᑦ ᐊᕕᑦᑐᕐᓯᒪᓂᐅᔪᓂᑦ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ
  • ᓴᑐᕐᕖᑦ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ ᓄᓇᕕᒻᒥ

ᑐᕋᐃᓯ ᓯᐅᕋᔨᓐ ᑕᐱᕇᒃᑯᓐᓂᑦ ᐊᒻᒪᓗ ᒥᐊᓕ ᓯᓚᑦ ᑭᒡᒐᖅᑐᐃᓪᓗᓂ ᐸᐅᒃᑑᑎᒃᑯᓐᓂᑦ ᑲᑐᔾᔨᔫᓐᓂᒃ−ᐃᔅᓯᕙᐅᑕᕆᔮᒃ. ᑭᒡᒐᑐᖅᑏᑦ ᐸᐅᒃᑑᑎᒃᑯᓐᓂᑦ ᑕᐱᕇᒃᑯᓂᓪᓗ ᑲᑎᒪᔨᐅᖃᑕᐅᒻᒥᔪᑦ ᐱᔭᕆᐊᑭᓪᓕᑎᑦᑎᔨᓪᓗᐊᑕᖏᓐᓂᑦ, ᑖᒃᑯᐊ ᐱᓕᕆᔪᑦ ᐱᔨᑦᑎᕋᐅᑎᖃᕐᓂᕐᒥᒃ ᑲᓇᑕᒥ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ.

ᑲᑐᔾᔨᓗᑎᒃ, ᐃᓄᐃᑦ ᑭᒡᒐᑐᖅᑏᑦ ᐱᓕᕆᔪᑦ ᖃᐅᔨᒪᑦᑎᐊᕋᓱᑦᑐᑎᒃ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᓪᓗ ᐊᔾᔨᒌᒥᒃ ᐱᐅᓯᖃᕐᕕᐅᖃᑦᑕᖁᓪᓗᒋᑦ ᐊᑦᑕᓇᙱᑦᑐᒥᒃ, ᐋᓐᓂᐊᖅᑐᓕᕆᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᒃ, ᒪᓕᒐᓕᕆᓂᕐᒥᓪᓗ ᐊᑲᕐᕆᔮᕈᑕᐅᕙᑦᑐᓂᑦ ᑲᓇᑕᒥᐅᓕᒫᓄᑦ, ᐊᒻᒪᓗ ᑎᒥᒃᑯᑦ, ᐃᑉᐱᓐᓂᐊᓂᒃᑯᑦ, ᑮᓇᐅᔭᓕᐅᕋᓱᐊᕈᑎᒃᑯᑦ, ᐃᓅᓯᒃᑯᑦ ᐃᓕᖅᑯᓯᒃᑯᓪᓗ ᐊᑦᑕᓇᙱᑦᑐᒦᓐᓂᕐᒥᒃ ᐊᒥᓱᓄᑦ ᑲᓇᑕᒥᐅᓄᑦ ᖁᔭᒋᓕᐅᔾᔭᐅᓯᒪᕙᑦᑐᓄᑦ.

ᐃᓄᓐᓄᑦ ᖃᓄᖅᑑᕈᑎᔅᓴᐃᑦ ᐸᕐᓇᐅᑏᑦ ᑲᒪᒋᔭᖃᕐᓂᐊᖅᑐᑦ ᑕᒪᒃᑯᓂᖓ ᓈᒻᒪᖏᓐᓂᐅᔪᓂᑦ ᐋᖅᑭᓯᒪᓪᓚᑦᑖᕐᓂᐊᖅᑐᓂᑦ, ᓈᒻᒪᓈᕐᓯᒪᔪᓂᑦ ᐊᒻᒪᓗ ᖃᓄᖅᑑᕈᑎᔅᓴᓂᑦ ᐱᓕᕆᔾᔪᓯᐅᕙᑦᑐᓂᑦ ᐊᓯᔾᔩᒍᑕᐅᓂᐊᖅᑐᓂᑦ ᑕᐃᒫᒃ ᐃᓄᐃᑦ ᐊᕐᓇᐃᑦ ᓂᕕᐊᕐᓯᐊᓪᓗ − ᐊᒻᒪᓗᑦᑕᐅᖅ ᒪᕐᕈᐃᓕᖅᑲᖓᔫᓐᓂᒃ−ᐊᓂᕐᓂᓖᑦ, ᐊᕐᓇᐅᖃᑎᖏᓐᓂᒃ ᐊᐃᑉᐸᖃᓲᑦ, ᐊᕐᓇᕈᖅᑎᑕᐅᓯᒪᔪᑦ ᐊᖑᑎᒥᓃᑦ, ᐊᕐᓇᐅᖃᑎᖏᓐᓅᖓᔪᓄᑦ, ᓇᓗᖅᑯᑎᔪᓄᑦ, ᑕᒻᒪᐅᑕᐅᓯᒪᓱᒋᔪᓄᑦ ᖃᓄᐃᑦᑑᔭᕆᐊᖃᖅᑐᒋᓂᕐᒥᓂᒃ ᐊᒻᒪᓗ ᐊᐃᑉᐸᖃᕐᓴᐃᓐᓇᕆᐊᑐᙱᓂᕐᒥᓂᒃ ᐃᓅᓯᓕᓐᓄᑦ − ᓈᒻᒪᑦᑐᒥᒃ ᐱᐅᓯᖃᕐᕕᐅᑦᑎᐊᖃᑦᑕᖁᓪᓗᒋᑦ.

 

ᖃᓄᖅ ᐃᖅᑲᓇᐃᔮᖃᕐᖓᑕ MMWIG ᐃᓄᐃᑦ ᐱᔭᕆᐊᑭᓪᓕᑎᑦᑎᔩᑦ?

ᐃᖅᑲᓇᐃᔮᓖᑦ ᑖᒃᑯᐊ ᐱᔭᕆᐊᑭᓪᓕᑎᑦᑎᔩᑦ ᐋᖅᑭᔅᓱᐃᓂᕐᒥᒃ ᐃᓄᓐᓄᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐊᑐᓕᖅᑎᑦᑎᒍᑎᔅᓴᓂᑦ ᓈᒻᒪᑦᑐᓕᒍᑕᐅᖁᓪᓗᒋᑦ ᒪᓕᒐᖅᑎᒍᑦ MMIWG ᑲᓇᑕᒥ ᖃᐅᔨᓴᕈᑕᐅᔪᖅ, ᐃᓚᒋᔭᐅᓪᓗᑎᒃ 46 ᐃᓄᓐᓄᑦ−ᑐᕌᖓᔪᑦ ᓈᒻᒪᑦᑐᓕᒍᑕᐅᖁᓪᓗᒋᑦ ᒪᓕᒐᖅᑎᒍᑦ. ᐱᓕᕆᔪᒍᑦ ᓈᒪᔪᓂᑦ ᐸᕐᓇᐅᑎᓕᐅᕋᓱᐊᖅᑐᑕ ᐱᔾᔪᑎᖃᕐᓂᐊᖅᑐᓂᑦ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᐃᓚᒌᑦ, ᓄᓇᓕᐅᔪᑦ ᐊᒻᒪᓗ ᐃᓄᐃᑦ ᐊᕐᓇᐃᑦ, ᓂᕕᐊᕐᓯᐊᑦ ᐊᒻᒪᓗ 2SLGBTQQIA ᑭᒃᑯᑐᐃᓐᓇᐃᑦ ᐅᓪᓗᒥ ᐃᓅᔪᑦ ᐱᓕᕆᔾᔪᓯᐅᕙᑦᑐᓂᑦ ᓈᒻᒪᖏᑦᑐᓕᕕᐅᕙᑦᑐᓂᑦ ᑕᒪᒃᑯᐊᓗ ᖁᕝᕙᓯᑦᑐᕐᔪᐊᕌᓘᒍᑕᐅᕙᑦᑐᑎᒃ ᓂᙵᐅᔾᔭᐅᖃᑦᑕᕐᓂᖏᓐᓄᑦ. ᐃᓄᓐᓄᑦ ᖃᓄᖅᑑᕈᑎᔅᓴᐃᑦ ᐸᕐᓇᐅᑏᑦ ᐋᖅᑮᔾᔪᑕᐅᓂᐊᕐᖓᑕ ᐃᓄᓐᓅᖓᔪᓂᑦ ᒐᕙᒪᑐᖃᒃᑯᓐᓂ ᑲᓇᑕᒥ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ.

ᐃᓚᒋᔭᐅᓪᓗᖓ ᐅᓂᒃᑳᕐᓯᒪᓪᓗᖓ (ᐅᕝᕙᓘᓐᓃᑦ ᐅᓂᒃᑳᕐᓯᒪᓇᖓ), ᖃᓄᖅ ᖃᐅᔨᒃᑲᖅᑕᐅᓛᖅᑯᖓ ᑲᒪᒋᔭᐅᕙᓪᓕᐊᓂᖏᑕ ᒥᔅᓵᓄᑦ ᐃᓄᓐᓄᑦ ᖃᓄᖅᑑᕈᑎᔅᓴᐃᑦ ᐸᕐᓇᐅᑏᑦ?  ᐱᕕᖃᓛᕆᕗᖔ ᐃᓱᒪᒋᔭᖃᕐᓂᒃ ᐅᖃᐅᓯᖃᕈᓐᓇᓂᕐᒥᒃ?

ᐃᔅᓯᕙᐅᑕᐅᖃᑎᒌᑦᑐᑕ ᐱᔭᕆᐊᑭᓪᓕᑎᑦᑎᔨᓂᑦ, ᐸᒃᑑᑎᒃᑯᑦ ᐊᒻᒪᓗ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑐᑭᓯᑎᑦᑎᒋᐊᖃᑦᑕᓂᐊᖅᑐᑦ ᐱᓇᓱᐊᕈᑎᖏᑕ ᒥᔅᓵᓄᑦ ᐃᓄᓐᓄᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᓯᐅᕐᓂᖏᓐᓂᒃ. ᐃᓚᒋᔭᐅᓪᓗᑎᑦ, ᐅᓂᒃᑳᑎᑦ ᐱᔾᔪᑕᐅᓯᒪᔪᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᑲᓇᑕᒥ ᖃᐅᔨᓴᕈᑕᐅᔪᒥ ᐱᔭᕇᕈᑎᖏᓐᓂ ᐅᓂᒃᑳᓂᑦ. ᐃᓚᒋᔭᐅᔪᑦ ᐃᓄᓐᓄᑦ ᐱᔭᕆᐊᑭᓪᓕᑎᑦᑎᔨᓄᑦ ᒫᓐᓇ ᐋᖅᑭᔅᓱᐃᕙᓪᓕᐊᔪᑦ ᓈᒪᔪᓂᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑐᑭᒧᐊᑎᔅᓴᓂᑦ ᐃᑲᔫᑎᓕᓐᓂᑦ ᓄᓇᓕᓐᓄᑦ ᐋᖅᑭᐅᒪᒍᑕᐅᓂᐊᖅᑐᓂᑦ ᐊᒻᒪᓗ ᑲᒪᒋᔭᖃᕐᓂᐊᖅᑐᓂᑦ ᐱᒋᐊᕈᑕᐅᕙᑦᑐᓂᑦ ᓂᙵᐅᔾᔭᐅᖃᑦᑕᕐᓂᖏᓐᓄᑦ ᐃᓄᐃᑦ ᐊᕐᓇᐃᑦ, ᓂᕕᐊᕐᓯᐊᑦ ᐊᒻᒪᓗ 2SLGBTQQIA ᑭᒃᑯᑐᐃᓐᓇᐃᑦ.

ᖃᓄᖅ ᐃᓄᐃᑦ ᐱᔭᕆᐊᑭᓪᓕᑎᑦᑎᔩᑦ ᐃᑲᔪᖅᑲᑦ ᐃᓚᒌᓄᑦ?

ᐃᓅᓰᑦ ᐱᒻᒪᕆᐅᒻᒪᑦ ᐅᕙᑦᑎᓐᓄᑦ. ᐃᓱᒪᓕᕆᔨᓄᑦ ᐊᒻᒪᓗ ᐃᑉᐱᓐᓂᐊᒋᔭᐅᓗᐊᖅᑐᓄᑦ ᐃᑲᔪᖅᑕᐅᔭᕆᐊᖃᕈᕕᑦ, ᐊᑏ ᐅᖄᓚᓂᐊᖅᑯᑎᑦ ᑖᒃᑯᓄᖓ ᓇᒻᒥᓂᕐᓱᖅᑐᓄᑦ ᑲᓇᑕᒥ ᐊᑭᖃᙱᑐᒃᑯᑦ ᐅᖄᓚᖃᑦᑕᕐᕕᒻᒧᑦ: 1-844-413-6649. ᐃᓅᓯᓕᕆᔨᒥᒃ ᐊᑐᐃᓐᓇᖅᑕᖃᕐᐸᑦᑐᖅ 24ᓂᑦ ᐃᑲᕐᕋᓂᑦ ᖃᐅᑕᒫᑦ, ᑎᓴᒪᐅᔪᙱᒐᖅᑐᑦ ᐅᓪᓗᐃᑦ ᐱᓇᓱᐊᕈᓯᑕᒫᑦ. ᐃᓘᓐᓇᑎᒃ ᐅᖄᓚᓂᐅᔪᑦ ᑐᓴᖅᑕᐅᔭᕆᐊᖃᙱᑦᑐᑦ ᑭᓇᓕᒫᒧᑦ. ᑖᒃᑯᐊ ᐃᑲᔪᖅᑏᑦ ᐊᑐᐃᓐᓇᐃᑦ ᐃᓕᓐᓄᑦ ᐃᓄᒃᑎᑐᑦ, ᖃᓪᓗᓈᑎᑦᑐᑦ ᐅᐃᕖᑎᑐᓪᓘᓐᓃᑦ.

ᐅᓂᒃᑳᕈᓐᓇᔪᙱᓐᓇᓚ ᑕᐃᔅᓱᒪᓂ ᒫᓐᓇᓕ ᐅᓂᒃᑳᕈᒪᓕᕋᒪ ᐅᕙᓐᓃᙶᖅᑐᓂᑦ − ᐅᖃᕐᕕᖃᕆᐊᖃᖅᑯᖔ ᐃᓄᓐᓂᑦ ᐱᔭᕆᐊᑭᓪᓕᑎᑦᑎᔨᓂᑦ?

ᑖᒃᑯᐊ MMIWG ᑲᓇᑕᒥ ᖃᐅᔨᓴᖁᑕᐅᔪᑦ ᐱᔭᕇᕐᓯᒪᓕᕐᖓᑕ ᐊᒻᒪᓗ ᓴᖅᑭᑎᑦᑎᔪᒻᒪᑕ ᐱᔭᕇᕈᑎᖏᓐᓂᒃ ᐅᓂᒃᑳᓂᑦ. ᒫᓐᓇᓕ ᐱᔭᕆᐊᑭᓪᓕᑎᑦᑎᔨᕗᑦ ᐊᐅᓪᓗᔾᔨᖔᕆᐊᖃᓕᕐᒥᒻᒪᑕ ᑎᑎᕋᕐᐸᓪᓕᐊᓂᕐᒥᒃ ᐃᓄᓐᓄᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐊᑐᓕᖅᑎᑦᑎᓂᕐᒧᑦ ᓈᒻᒪᑦᑐᓕᒍᑕᐅᖁᔭᐅᔪᓂᑦ ᒪᓕᒐᖅᑎᒍᑦ.

ᐊᒥᓱᐊᖅᑎᓗᐊᖅᑐᑕ ᐅᓂᒃᑳᖃᑦᑕᕋᑦᑕ ᑭᓯᐊᓂ ᓴᖅᑭᖅᑐᖃᓚᐅᕐᓯᒪᕙᙱᒻᒪᑦ. ᐃᓄᓐᓄᑦ ᖃᓄᖅᑑᕈᑎᔅᓴᐃᑦ ᐸᕐᓇᐅᑏᑦ ᐊᑐᓕᖅᑎᑕᐅᓛᕐᕙᓗᑦᑑᔮᖅᑳᑦ ᑲᒪᒋᔭᐅᓪᓚᑦᑖᕐᓗᑎᒃ?

ᐃᓘᓐᓇᑎᒃ ᑲᑐᔾᔨᖃᑕᐅᔪᑦ ᑕᒪᑐᒥᖓ ᐱᓕᕆᐊᕐᒥ ᑲᒪᒋᔭᖃᕐᖓᑕ ᐊᑐᓕᖁᔨᔾᔪᑕᐅᓯᒪᔪᓂᑦ ᑲᓇᑕᒥ ᖃᐅᔨᓴᕈᑕᐅᔪᒥ ᐱᔭᕇᕈᑎᖏᓐᓂ ᐅᓂᒃᑳᓂᑦ ᑲᑐᔾᔨᓗᑎᒃ−ᑎᑎᕋᖁᔭᐅᓪᓗᑎᒃ ᑲᓇᑕᒥ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ. ᐱᓕᕆᔪᒍᑦ ᑕᑎᒋᖃᑦᑕᐅᑎᑦᑎᐊᖅᑐᑕ ᐊᒻᒪᓗ ᑲᒪᒋᔭᐅᖁᓪᓗᒋᑦ ᓵᙵᔭᐅᔭᕆᐊᖃᕐᓯᒪᑎᓪᓗᒋᑦ ᒐᕙᒪᒃᑯᑦ ᐅᕙᒍᓪᓗ ᓇᒻᒥᓂᖅ. ᖃᓄᖅᑑᕈᑎᔅᓴᐃᑦ ᐸᕐᓇᐅᑎᕗᑦ ᐱᓕᕆᔾᔪᑎᔅᓴᖃᑦᑎᐊᕆᐊᖃᕐᖓᑕ ᐊᒻᒪᓗ ᐱᖃᓯᐅᔾᔨᓯᒪᓗᑎᒃ ᑭᐅᔨᒋᔭᐅᔪᓐᓇᓂᕐᒥᒃ ᐸᕐᓇᐅᑎᓂᑦ ᐊᑐᓕᖅᑎᑦᑎᓂᕐᒧᑦ ᕿᓚᒻᒥᐅᔪᒨᖓᔪᓂᑦ, ᐊᑯᓐᓈᕿᔪᒨᖓᔪᓂᑦ ᓯᕕᑐᔪᒨᖓᔪᓂᓪᓗ ᖃᓄᖅᑑᕈᑎᔅᓴᓂᑦ ᑲᒪᒋᕙᓪᓕᐊᔭᕗᑦ ᑲᔪᓯᑎᑕᐅᔪᓐᓇᓂᐊᕐᖓᑕ ᑲᒪᒋᔭᐅᔪᓐᓇᓂᐊᕐᖓᑕᓗ.