ᐃᓄᒃᑐᑦ ᖃᓕᐅᔮᖅᐸᐃᑦ

ᐃᓄᒃᑐᑦ ᖃᓕᐅᔮᖅᐸᐃᑦ ᑭᐳᑦᑎᔾᔪᑦ

ᓴᓇᕐᕈᑎᒃᓴᑦ ᐊᑐᕐᓗᒋᑦ

ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑎᒍᓯᔪᑦ ᐃᓄᒃᑐᑦ ᖃᓕᐅᔮᖅᐸᐃᑦ ᐊᑕᐅᓯᕈᖅᑎᑕᐅᓂᖓᓂᒃ ᑎᑎᕋᐅᓯᖅ

ᑕᑯᓗᒋᑦ ᑐᓴᖅᑎᑦᑎᔾᔪᑏᑦ

ᑲᑎᑕᐅᓯᒪᓕᕐᓂᖏᑦ ᐃᓗᐃᒃᑲᕈᖅᑎᑕᐅᓪᓗᑎᒃ ᐃᓄᒃᑐᑦ ᐅᖃᐅᓯᖓᑕ ᑎᑎᕋᐅᓯᖏᑦ

ᑕᐃᒪᖖᒐᓂᑦ 1970 ᐅᑭᐅᖓᓂᑦ ᐅᖃᓪᓚᐅᓯᕆᔭᐅᕙᓐᓂᖓ ᖁᕝᕙᖅᑎᑕᐅᒋᐊᖅᓯᒪᓕᖁᓪᓗᒍ ᐊᒻᒪᓗ ᐃᑲᔪᖅᑐᒐᐅᓯᒪᓕᖁᓪᓗᒍ ᐊᑐᖅᑕᐅᕙᓐᓂᖓ ᐃᓄᒃᑐᑦ (ᐃᓄᐃᑦ ᐅᖃᐅᓯᖓᑦᑕ) ᐃᓕᓐᓂᐊᕐᕕᖕᓂ ᑲᓇᑕᓕᒫᒥ ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᖏᓐᓂ ᐃᓚᖃᖃᑦᑕᖅᓯᒪᕗᑦ ᐱᒋᐊᕐᕕᓪᓚᑦᑖᖓᓂ ᐊᐃᕙᔾᔪᑎᒋᔭᐅᖃᑦᑕᖅᓯᒪᓂᖓᓄᑦ ᖃᓄᖅ ᓴᖅᑭᑕᐅᓯᒪᓕᕋᔭᕐᓂᖓᑕ ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖏᑕ ᖁᕝᕙᖅᑎᒋᐊᖅᑕᐅᓯᒪᓕᖁᓪᓗᒍ ᑐᓴᐅᒪᖃᑦᑕᐅᑎᓕᕆᓂᐅᕙᒃᑐᑦ ᐅᖃᕈᓯᕆᔭᐅᔪᑎᒍᑦ ᐊᒻᒪᓗ ᐋᖅᑭᒃᓱᐃᓯᒪᓕᕐᓂᕐᒧᑦ ᐃᓕᓐᓂᐊᖅᑎᑦᓯᔾᔪᑎᐅᕙᓕᕋᔭᖅᑐᓄᑦ.

ᐅᖃᐅᓯᑦᑎᓐᓄᑦ ᑎᑎᕋᕈᓯᕆᔭᖅᐳᑦ ᓇᖕᒥᓂᕆᓕᕐᓗᑎᒍ ᐱᓯᒪᓕᕈᓐᓇᕋᑦᑎᒍ. ᐅᓪᓗᒥᐅᔪᒥ ᑎᑎᕋᕈᓯᕆᕙᒃᑕᕗᑦ ᐃᓄᒃᑐᑦ ᓴᖅᑭᑕᐅᖃᑦᑕᖅᓯᒪᒻᒪᑕ ᐊᐅᓚᑦᓯᓂᐅᓕᖅᓯᒪᔪᑎᒍᑦ. ᐊᑕᐅᓯᖅ ᐃᓄᒃᑐᑦ ᑎᑎᕋᕈᐅᓯᖅ ᓯᕗᓪᓕᖅᐸᐅᓗᓂ ᑎᑎᕋᕈᓯᐅᖃᑦᑕᓕᕐᓂᐊᕐᒪᑦ ᐋᖅᑭᒃᓱᐊᖑᓯᒪᓪᓗᓂ ᐃᓄᖕᓂᑦ ᐃᓄᖕᓄᑦ ᑲᓇᑕᒥᐅᑕᐅᔪᓄᑦ.

ᓱᒻᒪᑦ ᐋᖅᑭᒃᓱᐃᓯᒪᓕᕋᔭᖅᐱᑕ ᐊᑕᐅᓯᖅ ᑎᑎᕋᐅᓯᕐᓂᒃ?

ᐱᔾᔪᑎᐅᓗᐊᕐᓂᐊᕐᒪᑦ ᓄᑖᖑᓪᓗᓂ ᒪᕐᕈᐃᑎᒍᑦ ᐅᖃᕈᓯᖅᑎᒍᑦ ᐃᓕᓐᓂᐊᖅᑎᑦᑎᕙᓕᕐᓂᕐᒥ ᐋᖅᑭᒃᓱᐃᓯᒪᓕᕈᓐᓇᕆᐊᖃᕐᓂᕐᒥᒃ, ᐅᖃᓕᒫᒐᖖᒍᖅᑎᑦᑎᓯᒪᓕᕈᓐᓇᕐᓂᕐᒥᒃ ᐊᒻᒪᓗ ᓯᐊᒻᒪᒃᑎᑦᑎᕙᒍᓐᓇᕐᓂᕐᒥᒃ ᐃᓄᒃᑐᑦ ᐋᖅᑭᒃᓱᐊᖑᓯᒪᓪᓗᑎᒃ ᑎᑎᕋᖅᑕᐅᓯᒪᔪᓂᒃ. ᐊᑕᐅᓯᖅ ᑎᑎᕋᐅᓯᖅ ᐃᓄᒃᑐᑦ ᐅᖃᐅᓯᕐᒧᑦ ᐅᖃᕈᓯᐅᕙᒃᑐᓂ, ᑎᑎᕋᖅᑕᐅᕙᓐᓂᖏᓐᓂ ᐊᒻᒪᓗ ᑐᑭᒋᔭᖏᓐᓂᒃ ᐃᓚᖃᖅᑐᓂᒃ, ᑐᑭᒧᐊᒍᑎᐅᖃᑦᑕᕋᔭᕐᒪᑦ ᐋᖅᑭᒃᓱᐃᖃᑦᑕᓕᕐᓂᕐᓂᒃ ᑕᒪᒃᑯᓂᖓ ᑎᑎᕋᖅᑕᐅᓯᒪᔪᓂᒃ ᐊᒻᒪᓗ ᓴᖖᒋᒃᑎᒋᐊᕈᑎᐅᓗᓂ ᐃᓄᒃᑐᑦ ᐅᖃᐅᓯᑦᑎᓐᓄᑦ. ᐱᐅᓯᒋᐊᕈᑎᐅᓇᔭᕐᒪᑦ ᐃᖏᕐᕋᕙᓪᐊᑎᑕᐅᔪᓐᓇᕐᓂᖏᓐᓄᑦ ᐊᒻᒪᓗ ᐊᑐᓕᖅᑎᑦᑎᕙᓐᓂᕐᓄᑦ ᐊᔾᔨᒌᒃᑎᑦᑎᓗᑎᒃ ᐋᖅᑭᒃᓱᐃᕙᓐᓂᕐᓄᑦ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ ᐃᓕᓐᓂᐊᕈᑎᖃᖅᑐᓄᑦ, ᑕᐃᒪᓗ ᐱᐅᓯᒋᐊᖅᓯᒪᓕᕋᔭᕐᒪᑕ ᐅᖃᓕᒫᕈᓐᓇᖅᑑᓂᖏᑦ ᐊᒻᒪᓗ ᐃᓕᓐᓂᐊᕈᑎᖃᖅᐸᓪᓕᐊᓂᖏᑦ ᐃᓄᐃᑦ ᓄᓇᓗᒃᑖᖓᓂ.

ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅ ᓴᖖᒋᒃᑎᒋᐊᕈᑎᐅᓂᐊᕐᒥᔪᖅ ᐃᓄᐃᑦ ᑲᑎᓐᓂᖃᖅᓯᒪᓂᖏᓐᓂᒃ ᐊᒻᒪᓗ ᐱᐅᓯᑐᖃᕆᔭᖏᓐᓄᑦ ᑲᓇᑕᒥ, ᐱᔾᔪᑎᒋᓪᓗᒍ ᐃᓚᒋᔭᐅᖃᑕᐅᒻᒪᑕ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓐᓄᑦ.

ᓱᓇᐅᖕᒪᑕ ᐃᓄᒃᑐᑦ ᖃᓕᐅᔮᖅᐸᐃᑦ?

ᐃᓄᒃᑐᑦ ᖃᓕᐅᔮᖅᐸᐃᑦ ᐊᑕᐅᓯᖅ ᐃᓄᒃᑐᑦ ᑎᑎᕋᕈᓯᐅᒻᒪᑦ ᐱᔾᔪᑎᖃᖅᓱᓂ ᑕᒪᐃᓐᓂᒃ ᖃᓄᖅ ᐅᖃᕈᓯᕆᔭᐅᔪᓄᑦ ᐅᖃᖅᑕᐅᕙᖕᓂᖏᓐᓄᑦ. ᐅᖃᓪᓚᒃᑎᐅᔪᑦ ᐊᑐᖅᓱᑎᒃ ᓇᓕᑐᐃᓐᓇᖏᓂᒃ ᐃᓄᒃᑐᑦ ᐅᖃᕈᓯᕐᒥᓐᓂᒃ ᐊᑐᕈᓐᓇᕐᒪᑕ ᐃᓄᒃᑐᑦ ᖃᓕᐅᔮᖅᐸᐃᑎᑑᖅᓗᒋᑦ ᒪᓕᒃᓗᒋᑦ ᐅᖃᕈᓯᕐᒥᖕᓂ ᑐᓴᖅᓴᐅᑎᑦᑎᔪᓂᒃ ᑐᕌᖓᓪᓗᑎᒃ ᐅᖃᕈᓯᕆᔭᒥᓐᓂᒃ.

ᐊᑕᐅᓯᖅ ᐃᓄᒃᑐᑦ ᑎᑎᕋᕈᓯᖅ ᐊᑐᓕᖁᔭᐅᓪᓗᓂ ᐃᓱᒪᓕᐅᕈᑎᐅᓚᐅᕐᒪᑦ ᑲᓇᑕᒥ ᐃᓄᐃᑦ ᐃᓕᓐᓂᐊᕐᓂᓕᕆᓂᕐᒧᑦ ᐸᕐᓇᐅᑎᖏᓐᓂᑦ (2011-ᒥ), ᐱᐅᓯᒋᐊᕈᑎᐅᓂᐊᕐᓗᑎᒃ ᐊᒥᖅᑲᕈᑎᐅᕙᒃᑐᓂᒃ ᐃᓕᓐᓂᐊᕐᓂᓕᕆᓂᕐᒥ ᐃᑲᔪᕈᑎᒃᓴᓄᑦ ᐃᓄᐃᑦ ᓄᓇᓗᒃᑖᖓᓐᓂ, ᑐᑭᒧᐊᒃᑎᐅᕙᓐᓂᐊᕐᓂᕐᒧᑦ ᑐᓴᐅᒪᖃᑦᑕᐅᑎᓕᕆᔾᔪᑎᐅᔪᓂᒃ ᐊᕕᒃᑐᖅᓯᒪᓂᓕᒫᓂ ᐊᒻᒪᓗ ᐱᐅᓯᒋᐊᕈᑎᐅᓗᑎᒃ ᐃᓕᓴᐃᔨᐅᔪᑦ ᐊᒻᒪᓗ ᐃᓕᓐᓂᐊᖅᑐᐃᑦ ᐱᓕᕆᓂᖃᕈᓐᓇᖅᑎᑕᐅᓂᖏᓐᓄᑦ.

ᐋᖅᑭᒃᓱᐊᖑᕙᓪᓕᐊᓚᐅᖅᐳᑦ 8-ᓄᑦ ᐅᑭᐅᓄᑦ ᐱᓕᕆᓂᖃᕐᕕᐅᓪᓗᑎᒃ ᐃᓄᐃᑦ ᐅᖃᐅᓯᓕᕆᓂᕐᒥ ᖃᐅᔨᒪᔨᒻᒪᕆᒋᔭᖏᓐᓂᑦ ᐊᒻᒪᓗ ᑖᒃᑯᐊᑐᐊᖑᓪᓗᑎᒃ ᑎᑎᕋᕈᓯᐅᓕᖅᑐᓄᑦ ᐃᓄᒃᑐᑦ ᐋᖅᑭᒃᓱᐊᕆᔭᐅᓯᒪᔪᓂᑦ ᐃᓄᖕᓂᑦ.

ᖃᓄᖅ ᐃᓄᒃᑐᑦ ᖃᓕᐅᔮᖅᐸᐃᑦ ᐊᑐᖅᑕᐅᕙᓐᓂᐊᕐᓂᖏᑦ

  • ᑎᑎᕋᖅᑕᐅᕙᓪᓗᑎᒃ ᑕᑭᓂᖅᓴᒥᒃ ᑐᓴᖅᓴᐅᕙᓐᓂᐅᔪᑦ ᐄ/ᐆ/ᐋ-ᓄᑦ ᖃᓕᐅᔮᖅᐸᐃᑎᑐᑦ, ᒪᕐᕈᐃᖖᒍᕐᓗᒋᑦ aa, ii, uu
  • ᓄᖅᑲᖅᑕᕈᑦ ᐊᑐᖅᑕᐅᓂᐊᖅᐸᑦ ᑎᑎᕋᕈᓯᕐᒥ (ᐃ, ᐅ, ᐅᕝᕙᓘᓐᓃᑦ ᐊ)-ᓂ, ᓇᓗᓇᐃᖅᓯᑦᔪᑎᐅᒻᒪᑦ ᐅᖃᓪᓚᒡᓗᓂ ᐅᖃᓕᒫᕐᓗᓂᓘᓐᓃᑦ ᖃᓄᖅ ᐅᖃᖅᑕᐅᓲᖑᓂᖓᓄᑦ, ᐃᒡᒋᐊᒥ ᓄᖅᑲᖅᑕᕈᑎ” ᑐᓴᖅᓴᐅᕙᒃᓱᓂ ᐃᓚᖏᓐᓂ ᐃᓄᒃᑐᑦ ᐅᖃᕈᓯᕐᓂ ᓲᕐᓗ ᒪ’ᓇ, ᐊ’ᐋ ᐅᕝᕙᓘᓐᓃᑦ ᖃᒪᓂ’ᑐᐊᖅ
  • ᓄᖅᑲᖅᑕᕈᑦ ᐊᑐᖅᑕᐅᔭᕌᖓᑦ ᖃᓕᐅᔮᖅᐸᐃᓂ ᑭᖑᓂᐊᓂ ᓐ (n), ᑐᑭᖃᕐᐸᒻᒪᑦ ᑐᓴᖅᓴᐅᑎᑕᐅᓂᐊᕐᓂᖓᓄᑦ ᐃᓛᒃᑰᖓᑎᑕᐅᓗᓂ ᑐᓴᖅᓴᐅᕙᓐᓂᖏᑕ ᖏ, ᖑ, ᐊ-ᓂᑦ (ᓲᕐᓗ ᐊᕕᓐ’ᖓᖅ ᐅᖃᖅᑕᐅᕙᒻᒪᑦ ᐃᓚᖏᓐᓂ ᐅᖃᕈᓯᕐᓂ ᐃᓄᒃᑐᑦ)
  • ᓄᖅᑲᖅᑕᕈᑦ ᐊᑐᖅᑕᐅᔭᕌᖓᑦ ᖃᓕᐅᔮᖅᐸᐃᓂ ᑭᖑᓂᐊᓂ ᕐ (r), ᑐᑭᖃᕐᐸᒻᒪᑦ ᐃᓛᒃᑰᖓᑎᑕᐅᓗᓂ ᑐᓴᖅᓴᐅᕙᓐᓂᖏᑕ ᕐᕈᒃ (ᓲᕐᓗ ᖃᕐ’ᕈᒃ ᐃᓚᖏᓐᓂ ᐅᖃᕈᓯᕐᓂ ᐃᓄᒃᑐᑦ)

ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅ

ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅ (AIT) ᕿᒥᕐᕈᔨᖏᑦ ᐃᓚᖃᖅᐳᑦ ᐅᖃᐅᓯᓕᕆᓂᕐᒥ ᖃᐅᔨᒪᔨᒻᒪᕆᒋᔭᐅᔪᓂᒃ ᐊᑐᓂᑦ ᐃᓄᐃᑦ ᐊᕕᒃᑐᖅᓯᒪᓂᖏᓐᓂ. ᐱᓕᕆᐊᒃᓴᖃᖅᑎᑕᐅᓯᒪᓪᓗᑎᒃ ᖃᐅᔨᓴᐃᓂᖃᕐᓂᕐᒥᒃ ᐊᒻᒪᓗ ᓇᓗᓇᐃᔭᐃᔨᐅᓂᕐᒥᒃ ᐅᖃᕈᓯᐅᕙᒃᑐᓄᑦ ᐃᓚᒋᔭᐅᕙᒃᑐᓂᒃ ᐃᓄᒃᑐᑦ ᐊᒻᒪᓗ ᐅᓪᓗᒥᐅᓕᖅᑐᒥ ᐃᓄᒃᑐᑦ ᑎᑎᕋᐅᓯᕐᓂᒃ ᐊᑐᖅᑕᐅᕙᒃᑐᓂᒃ, ᐊᒻᒪᓗ ᐊᑐᓕᖅᑎᑕᐅᖁᔭᐅᔪᓂᒃ ᓴᖅᑮᓯᒪᓕᕐᓂᐊᕐᓱᑎᒃ ᐃᓄᒃᑐᑦ ᑎᑎᕋᐅᓯᐅᕙᓕᕐᓂᐊᖅᑐᓄᑦ ᐱᐅᓂᖅᐹᑎᒍᑦ ᓯᕗᒻᒧᒋᐊᕈᑎᐅᔪᓐᓇᕋᔭᖅᑐᓂᒃ ᐃᓄᒃᑐᑦ ᐅᖃᐅᓯᕐᒥᒃ ᑕᐅᕗᖓᑲᓪᓚᒃ ᓯᕗᓂᒃᓴᕆᓂᐊᖅᑕᑦᑎᓐᓄᑦ.

ᐃᓄᐃᑦ ᑎᑎᕋᕈᓯᕆᕙᒃᑕᖏᓄᑦ ᐊᑐᖅᑕᐅᖃᑦᑕᖅᓯᒪᔪᕕᓃᑦ

ᐃᓄᒃᑐᑦ ᐅᖃᐅᓯᒥᒃᑎᒍᑦ ᑭᓯᐊᓂᐅᕙᒃᑐᑐᖃᐅᕗᑦ ᐅᑭᐅᖅᑕᖅᑐᓕᒫᒥᐅᓂ ᐊᒥᓱᑲᓪᓚᓄᑦ ᐅᑭᐅᓄᑦ ᑎᑎᕋᕈᓯᕐᓂᒃ ᐊᑐᖅᐸᓐᓂᐊᓵᕐᓂᕐᒥᓐᓂ. ᐊᑦᔨᒌᖖᒋᐅᖅᓱᑎᒃ ᑎᑎᕋᕈᓯᕆᔭᐅᕙᓕᖅᑐᑦ ᐃᓄᖕᓂᑦ ᐊᑐᖅᑕᐅᕙᒃᓱᑎᒃ ᐊᖏᓂᖅᓴᒥᒃ ᓴᖅᑭᑕᐅᖃᑦᑕᖅᓯᒪᓂᑰᕗᑦ ᑕᕆᐅᕐᔪᐊᑉ ᐊᑭᐊᓂᑦ ᐅᒃᐱᖕᓂᓕᕆᔨᐅᔪᓂᑦ, ᑭᓯᐊᓂᓗ ᐊᒥᓱᑦ ᐃᓄᐃᑦ ᑎᑎᕋᕆᐅᖅᓴᓯᒪᓂᑰᓪᓗᑎᒃ ᐃᓅᖃᑎᒋᔭᒥᓐᓂᑦ ᑎᑭᑕᐅᓯᒪᓕᕌᖓᒥᒃ ᐊᓯᖏᓐᓂᖖᒑᖅᓯᒪᔪᓂᑦ ᐊᕕᒃᑐᖅᓯᒪᓂᐅᔪᓂᑦ ᐊᒻᒪᓗ ᑎᑎᕋᕈᓯᖅ ᕿᓚᒻᒥᐊᓗᒃ ᐃᓕᑕᐅᓯᒪᓕᓚᐅᖅᓱᓂ. ᐃᓄᐃᑦ ᐱᐅᓯᒋᐊᖅᑎᑦᑎᓯᒪᓕᖅᐳᑦ ᐊᒻᒪᓗ ᐋᖅᑮᒋᐊᖃᑦᑕᖅᓯᒪᓕᖅᓱᒋᑦ ᑎᑎᕋᕈᓯᕆᔭᐅᓕᓚᐅᖅᑐᓂᒃ ᐅᒃᐱᕐᓂᓕᕆᔨᐅᔪᓂᑦ ᐋᖅᑭᒃᓱᐊᖑᓯᒪᔪᕕᓂᕐᓂᒃ ᓯᐊᒻᒪᒃᑎᖅᑕᐅᓯᒪᓕᖁᓪᓗᒍ ᑯᕋᐃᔅᑑᓯᒥᐅᑦ ᐅᒃᐱᕐᓂᕆᔭᖓᓂᒃ ᐅᑭᐅᖅᑕᖅᑐᕐᒥᐅᓕᒫᓄᑦ.

  • ᐅᑭᐅᖏᑦ 1700 ᐊᑐᓕᓵᖅᑎᓪᓗᒋᑦ ᐊᑯᑭᑦᑐᕐᒥᐅᑦ ᐅᖃᐅᓯᖓᑦ ᑎᑎᕋᖅᑕᐅᕙᓪᓕᐊᖃᑦᑕᓕᓚᐅᖅᓯᒪᔪᖅ ᑏᓂᔅ (ᑎᓐᒫᒃᒥᐅᑦ) ᐅᒃᐱᕐᓂᓕᕆᔨᖏᓐᓂᑦ ᐊᑐᖅᐸᒃᓱᑎᒃ ᖃᓕᐅᔮᖅᐸᐃᓂᒃ (1750-ᒥ ᓯᕗᓪᓕᖅᐹᑦ ᐊᑯᑭᑦᑐᕐᒥᐅᑎᑐᑦ ᐅᖃᕈᓰᑦ ᑐᑭᖏᑦ ᐋᖅᑭᒃᓱᐊᖑᓯᒪᓕᖅᓱᑎᒃ, 1760-ᒥ ᓯᕗᓪᓕᖅᐹᑦ ᐊᑯᑭᑦᑐᕐᒥᐅᑦ ᐅᖃᕈᓯᖏᑦ ᐋᖅᑭᒃᓱᖅᑕᐅᓯᒪᓕᖅᓱᑎᒃ).
  • ᐅᑭᐅᖏᑦ 1790-ᖏᑦ ᐊᑐᓕᖅᑎᓪᓗᒋᑦ: ᓛᐸᑐᐊᕆᒥ ᐃᓄᒃᑎᑐᑦ ᑎᑎᕋᖅᑕᐅᖃᑦᑕᓕᓚᐅᖅᑐᑦ ᐊᒻᒪᓗ ᐃᓕᓐᓂᐊᕐᕕᖕᒥ ᐃᓕᓐᓂᐊᕈᑎᐅᕙᓕᖅᓱᑎᒃ ᐊᑐᖅᐸᒃᓱᑎᒃ ᖃᓕᐅᔮᖅᐸᐃᓂᒃ ᐋᖅᑭᒃᓱᐊᖑᓯᒪᔪᓂᒃ ᒧᕌᕕᐊᓐ ᐅᒃᐱᕐᓂᓕᕆᔨᖏᓐᓂᑦ.
  • ᐅᑭᐅᖏ 1850-ᖏᑦ ᐊᑐᓕᖅᑎᓪᓗᒋᑦ: ᐅᒃᐱᕐᓂᓕᕆᔨᐅᔫᒃ ᔮᓐ ᕼᐅᐊᕐᑎᓐ ᐊᒻᒪᓗ ᐃᑦᕕᓐ ᕚᑦᑭᓐᔅ ᐋᖅᑮᒋᐊᖅᓯᒪᓕᓚᐅᖅᑑᒃ ᐅᓇᓖᑦ ᐃ, ᐅ, ᐋ-ᑎᑐᑦ ᑎᑎᕋᕈᓯᖏᓐᓂᒃ ᑎᑎᕋᕈᑎᓕᐅᖅᓱᑎᒃ ᐃᓄᒃᑎᑑᖅᑐᓂᒃ ᔭᐃᒻᔅ ᐸᐃ ᐊᕙᑎᒋᔭᖓᓂᕐᒥᐅᓄᑦ.
  • ᐅᑭᐅᖏᑦ 1870-ᖏᑦ ᐊᒻᒪᓗ-1890-ᖏᑦ ᐊᑐᖅᑎᓪᓗᒋᑦ: ᐃᑦᒪᓐᑦ ᐱᐊᒃ ᐅᖃᓕᒫᒐᓕᐅᖅᓯᒪᓕᓚᐅᕐᑐᖅ ᐃᓄᒃᑎᑐᑦ ᑐᑭᓕᐅᖅᑕᐅᓯᒪᔪᓂᒃ ᑐᒃᓯᐅᑎᑦ ᑎᑎᕋᖅᑕᐅᓯᒪᓂᖏᓂᒃ ᖃᓂᐅᔮᖅᐸᐃᑎᑑᖅᑐᓂᒃ ᓄᓇᕕᐅᑉ ᐊᒻᒪᓗ ᕿᑭᖅᑖᓘᑉ ᐊᕕᒃᑐᖅᓯᒪᓂᖏᓐᓂ. ᖃᓂᐅᔮᖅᐸᐃᑦ ᐊᑐᖅᑕᐅᕙᓐᓂᖏᑦ ᓯᐊᒻᒪᒃᑎᖅᓯᒪᓕᓚᐅᕐᐳᑦ ᑖᒃᑯᓇᓂ ᐊᕕᒃᑐᖅᓯᒪᓂᐅᔪᓂ.
  • ᐃᓱᓕᑉᐸᓪᓕᐊᓕᖅᑎᓪᓗᒋᑦ ᐅᑭᐅᖏᑦ 1800-ᖏᑕ: ᐅᒃᐱᕐᓂᓕᕆᔩᑦ ᐅᐊᓕᓂᕐᒥᐅᓂ ᐅᑭᐅᖅᑕᖅᑐᒥ ᓴᖅᑮᓯᒪᓕᓚᐅᖅᑐᑦ ᖃᓕᐅᔮᖅᐸᐃᑎᑐᑦ ᑎᑎᕋᕈᓯᕐᒥᒃ ᐃᓄᕕᐊᓗᒃᑐᓐ ᐊᒻᒪᓗ ᐃᓄᐃᓐᓇᖅᑐᓐ.
  • ᐅᑭᐅᖏᑦ 1900 ᐊᑐᓕᖅᑎᓪᓗᒋᑦ: ᐅᔭᖁᖅ, ᔫᑉ’ᐱᐅᓪᓗᓂ ᐊᓛᔅᑲᒥᐅᑕᖅ, ᐋᖅᑭᒃᓱᐃᓯᒪᓕᓚᐅᕐᑐᖅ ᑎᑎᕋᐅᔭᖅᑕᐅᓯᒪᓪᓗᒋᑦ ᑎᑎᕋᕈᓯᕐᓂᒃ ᑎᑎᕋᖅᑕᐅᓯᒪᔪᓂᒃ ᔪᒡᑐᓐ ᐅᖃᕈᓯᖓᓐᓂᒃ; ᐊᑕᐅᑦᓯᒃᑰᖃᑎᒋᒡᓚᒃᓱᓂᒋᑦ ᐅᒃᐱᕐᓂᓕᕆᔨᐅᔪᑦ ᐊᓛᔅᑲᒥ ᓴᖅᑮᓯᒪᓕᓚᐅᕐᓂᖏᑕ ᖃᓕᐅᔮᖅᐸᐃᑎᑐᑦ ᑎᑎᕋᕈᓯᕐᓂᒃ ᔫᑉ’ᐱᑦ ᐊᒻᒪᓗ ᐃᓄᐱᐊᖅ ᐅᖃᕈᓯᖏᓐᓄᑦ.
  • ᐅᑭᐅᖏᑦ 1950-ᖏᑦ ᐊᒻᒪᓗ 1960-ᖏᑦ ᐊᑐᓕᖅᑎᓪᓗᒋᑦ: ᒋᓕᔅ ᓚᕖᑉ (1950-ᖏᓂ) ᐊᒻᒪᓗ ᕇᒪᓐᑦ ᒐᐃᒡᓃ (1960-ᖏᓂ) ᐃᖅᑲᓇᐃᔭᖅᑎᑖᕆᔭᐅᓯᒪᓕᓚᐅᖅᐳᑦ ᑲᓇᑕᒥ ᒐᕙᒪᒃᑯᖓᓂᑦ ᐊᑦᔨᒌᓕᖅᑎᑦᑎᖁᔭᐅᓪᓗᑎᒃ ᑎᑎᕋᕈᓯᕐᓂᒃ ᖃᓕᐅᔮᖅᐸᐃᑎᑐᑦ.
  • ᐅᑭᐅᖓᓂ 1973: ᓄᑖᖑᓪᓗᑎᒃ ᐊᔾᔨᒌᓕᖅᑎᑕᐅᓯᒪᓪᓗᑎᒃ ᖃᓕᐅᔮᖅᐸᐃᑦ ᓴᖅᑭᑕᐅᓯᒪᓕᓚᐅᖅᐳᑦ ᐊᑯᑭᑦᑐᓂ.
  • ᐅᑭᐅᖓᓂ 1976: ᐃᓄᒻᒪᕆᓕᕆᔨᒃᑯᑦ (ICI) ᐊᔾᔨᒌᒃᑎᑕᐅᓕᖅᑎᓯᒪᓗᑎᒃ ᒪᕐᕈᐃᑎᒍᑦ ᑎᑎᕋᕈᓯᓕᐅᖅᓯᒪᔭᖏᑦ ᓴᖅᑭᑕᐅᓯᒪᓕᓚᐅᖅᐳᑦ ᖃᓂᐅᔮᖅᐸᐃᑎᑐᑦ ᐊᒻᒪᓗ ᖃᓕᐅᔮᖅᐸᐃᑎᑐᑦ, ᐊᒻᒪᓗ ᐊᖏᖅᑕᐅᓯᒪᓕᓚᐅᖅᓱᑎᒃ ᐃᓄᐃᑦ ᑕᐱᕇᒃᓴᒃᑯᓐᓂᑦ ᑲᓇᑕᒥ.
  • ᐅᑭᐅᖓᓂ 1980: ᓛᐸᑐᐊᕆᒥ ᐃᓄᐃᑦ ᐊᔾᔨᒌᒃᑎᓕᖅᓯᒪᔭᖏᑦ ᑎᑎᕋᕈᓯᖏᑦ ᓴᖅᑭᑕᐅᓯᒪᓕᓚᐅᖅᐳᑦ ᐋᖅᑭᒋᐊᖅᑕᐅᓯᒪᔫᓕᖅᓱᒋᑦ ᓛᐸᑐᐊᕆᒥᐅᑦ ᖃᓕᐅᔮᖅᐸᐃᑎᑐᑦ ᑎᑎᕋᕈᓯᖏᓐᓂᑦ.
  • ᐅᑭᐅᖓᓂ 1980: ᓄᓇᕕᐅᑉ ᐊᕙᑕᖅ ᐱᐅᓯᑐᖃᓕᕆᕝᕕᖓᑦ ᐱᒋᐊᖅᑎᑕᐅᓯᒪᓕᓚᐅᕐᐳᖅ.
  • ᐅᑭᐅᖓᓂ 1984: ᑲᑎᒪᔨᕋᓛᖏᑦ ᓯᕗᓪᓕᖅᐸᐅᓪᓗᑎᒃ ᐃᓄᐃᑦ ᐱᓯᒪᓕᕈᓐᓇᕐᓂᖏᓐᓄᑦ ᐊᔾᔨᒌᒃᑎᓕᖅᓯᒪᓕᖅᑕᖏᑦ ᖃᓕᐅᔮᖅᐸᐃᑎᑐᑦ ᑎᑎᕋᕈᓯᖏᑕ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ (ᐊᔾᔨᒋᖖᒋᑕᖏᑦ ᐃᓄᒻᒪᕆᓕᕆᔨᒃᑯᑦ ᖃᓕᐅᔮᖅᐸᐃᑦ ᑎᑎᕋᕈᓯᓕᐊᕆᓯᒪᔭᖏᓐᓄᑦ).
  • ᐅᑭᐅᖏᑦ 2000-ᖏᑦ ᐊᑐᓕᖅᑎᓪᓗᒋᑦ: ᓯᑕᒪᒋᔭᖓᓂ ᑎᑎᕋᖅᑕᐅᓯᒪᓂᖏᑦ ᑲᑎᓐᓂᖃᖅᑎᑕᐅᓯᒪᓂᖏᓐᓂ ᖃᓂᐅᔮᖅᐸᐃᑎᑐᑦ ᑎᑎᕋᕈᓯᕐᓂ (ᐊᐃ-ᐸᐃ-ᑕᐃ) ᓴᖅᑭᑕᐅᓯᒪᓕᒃᑲᓐᓂᓚᐅᖅᐳᑦ ᓄᓇᕕᖕᒥ.
  • ᐅᑭᐅᖓᓂ 2009: ᐃᓚᖏᑦ ᓄᑖᖑᓪᓗᑎᒃ ᖃᓂᐅᔮᖅᐸᐃᑦ ᑎᑎᕋᕈᓯᖅ ᓴᖅᑭᑕᐅᓯᒪᓕᓚᐅᖅᐳᑦ ᓇᑦᓯᓕᐅᑉ ᐊᕕᒃᑐᖅᓯᒪᓂᖓᓂ ᐱᔾᔪᑎᖃᖅᑐᓄᑦ ᐅᖃᖅᑕᐅᕙᓐᓂᐅᔪᓄᑦ ᐊᑐᖅᑕᐅᕙᒃᓱᑎᒃ ᓇᑦᓯᓕᖕᒥᐅᑦ ᐅᖃᐅᓯᖓᑎᑐᑦ ᑭᓯᐊᓂᓗ ᐃᓚᒋᔭᐅᖃᑕᐅᓚᐅᖖᒋᓚᑦ ᐅᓪᓗᒥᐅᓕᖅᑐᒥ ᖃᓂᐅᔮᖅᐸᐃᑎᑑᕐᑐᓄᑦ ᐱᔾᔪᑎᖃᖅᑐᓂ ᕼᐃ, ᕼᐅ, ᕼᐊ, ᕐᕆ,ᕐᕈ, ᕐᕋ, ᔅᕆ, ᔅᕈ, ᕐᕋ ᐅᖃᕈᓯᐅᕙᒃᑐᓄᑦ (h, rh, shr).
  • ᐅᑭᐅᖓᓂ 2010: ᓄᓇᕗᑦ ᐱᒋᐊᖅᑎᑦᑎᓯᒪᓕᓚᐅᖅᑐᑦ ᐃᓄᐃᑦ ᐅᖃᐅᓯᖏᓐᓂᒃ ᑕᐅᒎᓯᓕᐅᖅᑎᓂᒃ ᐅᖃᐅᓯᓕᕆᓂᕐᒥ ᐱᔪᓐᓇᐅᑎᖃᖅᑎᓂᒃ ᐊᔾᔨᒌᓕᖅᑎᑦᑎᔨᐅᓂᐊᖅᑐᓂᒃ ᐃᓄᒃᑐᑦ ᐅᖃᐅᓯᕐᓄᑦ ᑐᑭᒋᔭᐅᔪᓂᒃ ᐊᒻᒪᓗ ᖃᓄᖅ ᑎᑎᕋᖅᑕᐅᕙᒋᐊᖃᕐᓂᖏᓐᓂᒃ ᓄᓇᕗᒻᒥ.
  • ᐅᑭᐅᖓᓂ 2011: ᐃᓄᐃᑦ ᑕᐱᕇᑦ ᑲᓇᑕᒥ ᐋᖅᑮᓯᒪᓕᓚᐅᖅᑐᑦ ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅ ᕿᒥᕐᕈᔨᓂᒃ ᐱᓕᕆᐊᖃᖅᑎᐅᓂᐊᖅᑐᓂᒃ ᐋᖅᑭᒃᓱᐃᓂᕐᒧᑦ ᐊᑕᐅᓯᕐᒥᒃ ᐃᓄᐃᑦ ᑎᑎᕋᕈᓯᖏᓂᒃ ᐃᓄᓕᒫᓄᑦ ᑲᓇᑕᒥ.
  • ᐅᑭᐅᖓᓂ 2019: ᐃᓄᐃᑦ ᑕᐱᕇᑦ ᑲᓇᑕᒥ  ᐃᓕᑕᕆᔭᐅᓯᒪᔪᑎᒍᑦ ᐊᑐᓕᖅᑎᑦᑎᓚᐅᖅᐳᑦ ᐃᓄᒃᑐᑦ ᖃᓕᐅᔮᖅᐸᐃᑦ ᑎᑎᕋᕈᓯᖏᓂᒃ ᐋᖅᑭᒃᓱᐊᖑᓯᒪᓕᖅᑐᓂᒃ ᐊᑕᐅᓯᖅ ᐃᓄᒃᑐᑦ ᑎᑎᕋᐅᓯᖅ ᕿᒥᕐᕈᔨᖏᓐᓂᑦ.