Sunaungmata?
Inuit Nunanganni Niqigijaksaminnik Pisimaliqattarunnarnirmut Parnautiit sivulliqpaullutik naukkuurviksaliangusimavut piliriaqalirnirmi aaqqiksugausimaliqtunit piusigiaqtittisimaliriarnirmi Inuit niqigijaksaminnik pisimaliqattarunnarninginnut Inuit Nunanganni, Canadamiut Inungita nunagijatuqanganni.
Sunaungmat Inuit Niqigijaksaminnik Pisimaliqattarungnannginniq?
Inuk kinatuinnaq niqigijaksaminik pisimaliqattarunnanngittuuvammat atuinnauvviunngikkuni naammaktunik, qanuinngittiaqtunik niqigijariaq ammalu niqittiavannik niqigivagiaqaqtaminnik annaumajjutiginiarlugit ammalu niqigijumavaktaminnik inuusirminni qanuiliuruluujarunnarniaramik ammalu aanniaqaliqtailimanirillugit. Tamanna tukiqarunnarmijuq niuvirutiksaminnik naammautijunnaqpannginninginnut niqittiavannik niqiqarutiksaminnik, nirinnautillugu nirinngiqattarniminnik uvvaluunniit ullunut amisunut nirijaksaqanngippannirminnit niriqattannginnirminnut. Inungnut, tamanna tukiqarunnarmijuq atuinnauvviunnginirmik Inuit niqigivaktanginnut nunaminngaaqtunik niqigijauniqpaanguvaktunit piusituqarijavut ammalu inuusivut maliklugit.
Sunatigut Taakkua Parnautiit Ajjigijaunngippat?
Parnautiit tunngavviqaqtitaummata Inuit niriunniqarvigijanginnut kaaliqsimaqattarniq nirijaksaqanngimut isulititausimaliqullugu ammalu sivummuktitausimaliqullugit niqilirivannirnut aulatsijiujunnarniq.
Parnautiit nalunaijaisimavut piliriangujunik pigiaqtitsijjutiksanik nangminiq isumaliurutiliurunnarnirmut ammalu kajusiinnaqtitaujunnaqsutik niqilirinirmi pilirijjutiksanik Inuit Nunanganni imannaititaujunik:
- Takuksautitsillutik Inuit inuuqatigiiktut aturniqaqtitanginik.
- Ikajuqtuiniqaqtut Inuit qanuinngitsiariaqarninginnik.
- Pitaqaliqtittisimajunik inunnut atuinnautitaullutik akituluanngittunik, niqittiavannik, qanuinngittunik niqigijariaq niqinik, ammalu piusituqaminni niqigijaungaarumavaktunut niqinik.
Parnautiit pigiaqtitsisimavut aaqqiisimalirnikkut kanatalimaami tukisiumanirnik makununga pijjutiqaqtunik:
- Quttiluammariktuunginnarningita Inuit niqigijaksaminnik pisimaliqattarunnanngininut.
- Ilagijauqataullutik pijjutiujunut Inuit niqigijaksaminnik pisimaliqattarunnannginninginni.
- Aaqqiksuqtausimajutigut inungnit pilirianguliqtitausimallutik aaqqiigiarutiksait piliriangusimaliqullugit niqigijaksaminnik pisimaliqattarunnannginniujut Inuit Nunanganni.
Qanuimmat Taimannaittunik Parnautinik Pisimaliriaqaqpat?
- Canadamiut Inuit quttingniqpaujumik niqigijaksaminnik pisimaliqattarunnannginningit quttingniqarniqsauvut asinginnit nunaqaqqaarsimajuni inuuqatigiingujunit sanalirviksaqauqtuullutik nunarjuarijaujunit.
- Inuit niqigijaksaminnik pisimaliqattarunnannginningit ilagijauqatauvut akuniuniqpaangullutik kikkutuinnait aanniaqaliqtailimajulirinirmi tuaviurnaqsisimaniqarninginni Canadamiuni inuuqatigiiktuni.
- Niqigijaksaminnik pisimaliqattarunnannginniujut nalunaimmariktumik naammanngittutigut aanniaqaliqtailimavanniujut aktuqtausimalirunnarmata.
- Maannaujuq gavamatuqakkut maligaqutiqanngimmata isulititausimaliqullugu Inuit niqigijaksaminnik pisimaliqattarunnannginningit.
- Kiinaujaliurningit atsiktuutillugit Inuit kiinaujaliurutingit anginiqpaujumik atuqtauvammata qautamaat niqigijaksauniaqtunut ammalu igluqarutiksauniaqtunut.
- Inuit nunaligijanginnirmiut quttiktummaringmik annaumanasuarutiksanginnut akiliqtuivagiaqarpaktut ammalu akłuluarniujut quttingnirijangitigut..
- Quttiktualuuningita Inuit niqiginiaqtaminnik pisimaliqattarunnannginninginni quttingnirijaujut piusigiaqtitaujunnarniarmata kisiani piliriqatiqalirniqtigut inungnik sivummugiaqtitausimalirunnarniaqpata inungnit pilirianguliqtitausimallutik aaqqigiarutiksauniaqtunik.
Qanuq Aaqqigiaqtausimalirunnaqpat?
Sanngiktigiaqsimalirlugit Inuit Nunanganni niqilirinirmi pilirijjutiujut piliriaqaqatigiingniqtigut inungnik makuninga:
Angigligiaqtisimalirlugit Inuit nangminiq isumaliurutiliurunnarningit pijjutiqaqtut Inuit Nunanganni niqilirinirmi pilirijjutinut.
- Tukisiumalirlugit qanuq tukiqaqtitaummangaata niqilirinirmi aulatsijiujunnarniq ammalu nangminiq isumaliurutiliurunnarniq Inungnut.
- Aaqqiksuisimalirlutik Inungnik sivuliqtiqarlutik aaqqigiarutiksaliangusimajunik aturlugit ajjigiinngittuuninginnut tunngavviqaqtitausimajunik Inuit Nunanganni maligaqutinik takunnarusiuvanniaqtunut.
- Aturniqaqtisimalutik Inuit niqigivaktanginik angunasuaqpannirmit kiinaujaliurutiqaqpanniujut ammalu uumajulirinirmi aulatsinirmut isumaliurutiliuqpannirnut.
- Qaujisainiuvaktut ammalu qaujigiarniuvartut niqilirinirmi pilirijjutinik ammalu niqigijaksaminnik pisimaliqattarunnarniujut tunngavviqaqtitauliqtillugit Inuit sivulliqpautitauqujanginnut ammalu sivuliqtiuninginnut Inuit.
Mikigligiaqtitausimalirlutik Inuit akłuluaqtuuninginik ammalu atuliqtitsilutik akigijauvaktunut piliriniujut.
- Qaujigiaqsimalirlugit naammaktuugaluarmangaata inuusilirijikkutigut ikajuqtaujjutitaanguvaktunut piliriangujut ammalu aaqqiksuisimalirlutik akłuluarniujunik mikigligiarutiksaullutik piliriniulirajaqtunik.
- Piliriarilugit annaumajjutiksait akituluaqtuuningit ammalu niqigijaksait Inuit Nunanganni piliriniqtigut atuliqtittisimallutik kiinaujatigut nangminiq ajunngilirutiujunnaqtunik.
Pitaqaliqtitsilutik ikajurutiksanik ilagiingujunut ammalu surusirnut, turaangatitausimallutik aktuqtausarainniqpaujunut.
- Piusigiaqtisimalirlugit ilinnialisaaqtunut ilinniarutiksat ammalu piliriniuvaktut ilinniarvingni nirijaksaqaqtitsivannirmut piliriangujutigut.
- Nalunaijaqsimalirlugit anginiqpaujumik aktuqtausaraittut ammalu aaqqiksuisimalirlugit pitsiaqtuulutik atuinnautittisimalirlugit niqittiavannik niqiqaqattaqtitauliqullugit tamarmik Inuit.
- Piliriarisimalirlugit akuniinngittumut ammalu akuniiqtumut aktuisimalirniujut piluammariktumik niqigijaksaminnik pisimaliqattarunnannginniujut inungni.
Kiinaujanik qiturngiuliqtitsiniq niqigijaksaminnik pisimaliqattarnirmut pilirianut ammalu sapujjigiarutiuvaktunut.
- Tautturiniaqtanginik aaqqiksuisimalirlutik ikajurniqarajaqłutik maligalirinirmi pilirianik, niqigijaksaminnik pisimaliqattarunnarnirmut pilirianik, ammalu sapujjigiarutiuvaktunik qaujigiaqtaujunnarniarlutik qanuilingalirninginnut.
- Qaujisaqtausimalirlutik nunaliujumi niqilirivannirmut asingitigut piliriniuvagunnaqtut maliktitausimalutik Inuit pisimaliriaqaqtanginnut ammalu aturniqaqtitanginnut.
- Ilitsisimalirvigilugit ammalu piruqsimalirvigigiarlugit piliriangujut naammaktutigut aktuisimaniqaqtut Inuit niqinik niuviaqaqattarunnarnirmut pijungnautiujunit.
- Pitaqaliqtitsilutik niqittiavannik pisimalirutiksanik ikajurutiullarilirajaqtunut nalunaiqtausimallutik ikajurutiksatigut aktuqtausaraittuullutik Inuit ilagiinut.
Ikajuqtuiniq angunasuaqpanniujunik ammalu amiqqarutiqaqattarnirni pilirijjutiksait.
- Ikajuqtuisimalirlutik nunaliujumi ammalu aviktuqsimanirmi niqiliriniuvaktunik ammalu siammaktirivallianirmi piliriaqaqtiujunik.
- Piliriniqaqataullariktut niqilirinirmi pilirijjutigijaujunut kiinaujaliurningitigut annaumajjutiksaliurunnaliqtillugit.
- Kiinaujanik qiturngiuliqtitsinikkut pilirianut pilirijjutiuvaktunik aaqqiksuivanninginnut Inuit angunasuarnirmut qaujimajatuqanginnik ammalu ajunnginnirijanginik.
Piliriangulirlutik Inuit niqilirinirmi pilirijjutinginnut aaqqiktausimajuni kiinaujatigut qaangiutisimajjutigijangit.
- Piliriangulirlutik qanuilingalirunnaqtuullutik niqitaqaqtitsivagutiujut angiglivalliajumik aktaqtauvallianiqaqtut silaup asijjiqpallianinganit.
- Kiinaujanik qiturngiuqtittisimalirlutik nunaliujumi niqinut sirluaqtaarutiksanik ammalu niqilirivviksanik piusigiaqtitausimaliqullugit nunaliujumi niqiliriniuvaktut ammalu tuaviurnaqtuqaliqpat niqitigut ikajurutiksauniarlutik piliriniujunut.
- Ilitarijausimalirlutik ukiuqtaqtumi qangatasuuqtigut pijitsirarutiuvaktut taimaujariaqallaringningita Inuit niqinik pisimaliqtittiniuvaktuni.
Parnautiit
Taakkua miksaanut nalunairiarutinik tusaqtitausimalirumajut, qaujigiarunnaqput iluikkaullugit Inuit Nunanganni Niqigijaksaminnik Pisimaliqattarunnarnirmut Parnautiliangusimajut atuinnautitaullutik Qallunaatitut, Inuktut Qaliujaaqpaiqtut, Inuktut Qaniujaaqpaiqtut, ammalu French-tuuliqsimajut titiraqtausimaningit.
Parnautiit amisuilingajuullutik titiraqtausimavut iluliqaqsutik pijjutigijaujunik ammalu piliriangusimajunut Inuit niqiginiaqtaminnik pisimaliqattarnirnut piliriangujunik Inuit Nunanganni ammalu nalunaijaisimallutik qanigijangani 24-ngujut pilirianguliqsimajut aaqqiksuangusimallutik Inungnit Inuit pijjutigisimallugit.
