ᑲᓇᑕᐅᑉ ᒐᕙᒪᖏᑦ ᐊᖏᖅᓯᒪᓕᖅᑐᑦ ᐱᕙᓪᓕᐊᖃᑎᖃᕐᓗᑎᒃ ᐃᓄᖕᓂᒃ, ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᐊᓪᓚᖓᔪᓂᒃ ᐊᑐᓕᖅᑎᑦᑎᓇᓱᐊᖅᑎᓪᓗᒋᑦ ᓄᓇᕐᔪᐊᒥᑦ ᐱᓕᕆᖃᑎᒌᑦ ᐅᖃᐅᓯᕆᓚᐅᖅᑕᖏᓐᓂᒃ ᑕᒪᑐᒧᖓ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑲᓇᑕᒥᑦ.
ᐃᓄᐃᑦ ᐃᑲᔪᖅᓱᑦᑎᐊᖅᑐᑦ ᑕᒪᑐᒥᖓ.
ᑭᓯᐊᓂᓕ, ᐃᓱᒫᓘᑎᖃᕐᔪᐊᖅᑐᒍᑦ ᒐᕙᒪᑐᖃᒃᑯᑦ ᐊᑐᕋᓱᐊᖅᑕᖏᓐᓂᒃ ᑎᑭᐅᑎᓯᒪᖁᓪᓗᒋᑦ ᐱᒻᒪᕆᐅᔪᒥᒃ ᑐᕌᖅᑕᐅᔪᒥᒃ.
ᑕᐃᑲᙵᓂᑦ 2017, ᐃᓄᐃᑦ ᑕᐱᕇᑦ ᑲᓇᑕᒥᑦ ᐱᓕᕆᔾᔪᔾᔨᔪᒪᔪᑦ ᒪᓕᒐᒃᓴᒥᒃ ᐊᑐᓕᖅᑎᕆᑎᓪᓗᒋᑦ ᓄᓇᕐᔪᐊᒥᑦ ᐱᓕᕆᖃᑎᒌᑦ ᐅᖃᐅᓯᕆᓚᐅᖅᑕᖏᓐᓂᒃ ᐃᓚᐅᑎᑦᑎᔭᕆᐊᖃᕐᓂᖏᓐᓄᑦ ᓴᖅᑮᓗᑎᒃ ᐃᒻᒥᒧᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᒥᓴᓐᑯᓐᓄᑦ.
ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᒥᓴᓐ ᐱᓕᕆᐊᖃᕋᔭᖅᑐᖅ ᖃᐅᔨᓴᐃᓐᓇᕐᓂᕐᒧᑦ ᒐᕙᒪᑐᖃᒃᑯᑦ ᒪᓕᖕᓂᖏᓐᓄᑦ ᐱᔪᓐᓇᐅᑎᓂᒃ ᓇᓗᓇᐃᖅᑕᐅᓯᒪᔪᓂᒃ ᓄᓇᕐᔪᐊᒥᑦ ᐱᓕᕆᖃᑎᒌᑦ ᐅᖃᐅᓯᕆᓚᐅᖅᑕᖏᓐᓂᒃ, ᐊᒻᒪᓗ ᑲᒪᓗᑎᒃ ᐱᔪᒥᓴᐃᓗᑎᒃ ᑕᐃᒃᑯᓂᖓ ᐱᔪᓐᓇᐅᑎᓂᒃ ᑲᓇᑕᓗᒃᑖᒥᑦ.
ᐊᔾᔨᐸᓗᒋᓪᓗᓂᐅᒃ ᑲᓇᑕᒥᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᒥᓴᓐᖓᑕ, ᐱᓕᕆᔪᓐᓇᕆᐊᖃᕋᔭᖅᑐᑦ ᖃᐅᔨᓴᖃᑦᑕᕐᓗᑎᒃ ᒐᕙᒪᑐᖃᒃᑯᑦ ᓴᓇᕝᕕᖏᓐᓂᒃ ᐊᒻᒪᓗ ᐃᖅᑲᓇᐃᔭᕐᕕᖏᓐᓂᒃ, ᐊᒻᒪ ᓇᒃᓯᐅᔾᔨᕙᒡᓗᑎᒃ ᐃᓚᐃᓐᓈᖅᑕᐅᓂᕐᒧᑦ−ᐊᒃᑐᐊᔪᑦ ᐅᓐᓂᕐᓘᑕᐅᔪᑦ ᑕᐃᑯᖓ ᑲᓇᑕᒥᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᓄᑦ ᖄᒃᑲᓐᓂᐊᒍᑦ ᖃᐅᔨᓴᖅᑕᐅᖁᓪᓗᒋᑦ.