May 24, 2023 – Inuvik, Nunatsiaq
Ilagijaujut Inuit Qaujisaqatigiiktit Piliriaqaqtinginnut Inuit Nunalilimaanginnit upagutisimalutik sivulliqpaamik tavvani pinasuarusirmi katinnganiqarniaqput piruqtittisimaliriarlutik tunngavviqutiksauniaqtunik aaqqiksuivvigivanniaqtaminnut ammalu ikajuqtuiniqarnirnut aanniaqarnanngittulirinirmi qaujisainiujunut Inunnit , ammalu qaujisarutjiniujunut, pijjutigillugit Inuit.
Taakkua IRN-ngujut, kiinaujaqutiksaqtaalauqtut $6.4 miliantaalanik ukiunut pingasunut pititauvallianiaqsutik Canadami Aanniaqarnanngittulirinirmi Qaujisarnilirijikkut Iqqanaijarvingannit 2022-mi, ikajuqtuiniqaqput atuliqtitauniksangita Canadami Inuit Qaujisaiqattarnirnut Parnautinik sivummuktittigiaqsimanirmiktigut inuit ilagijauqatauvanninginnik qaujisainiujunut ammalu qaujisainirnut aulatsijiujunnarnirnut. Inuit Tapiriit Kanatami IRN-kunut aulatsijigijauvut.
Tavvani pinasuarusirmi, pijjutiqaqtigijaujuit sitamaullutik aviktuqsimaninginnit Inuit Nunangannit katimaqatigiingniaqput Inuvikmi qaujigiarniarlugit ukiunga sivullingani piliriangujup pigiaqtitausimalaurvinganit ammalu uqallausiriniarlugit niriungniqarvigijaujunut ammalu aaqqiumanirijangitta piliriaqatigiingujut sivummugiaqtitausimalirunnarmangaat akuniiqtumi, kajusiinnaqtitaujunnarajarningata ikajuqtuiniujunut nunaliujuni qaujisaijiujunik ammalu piliriarikainnaqtanginnik.
Ilagijauqatautillugu katimaniqarnirminnut, IRN-ngujut piliriaqaqatigiiktingit takujaqtuisimajumagivut amisurlaullutik qaujisainirmi piliriangukainnaqtunik Inuvialuit Aviktuqsimaningani ammalu suruqpallianinganik nautsiqtuiniujumik Tuktoyaktukmi. Taimannaittut piliriangukainnaqtut, saqqippalliajut Inuit Nunaluktaanganni, ikajuqtausimalirunnarniarmata amisuitigut aviktuqsimaniujumi piliriniqarvigijanginnit IRN-ngujut, nunaliujumi qaujimanirijaujunit ammalu ajunnginnirijaujunit amiqqarutigijauniaqtut, ammalu kiinaujaqutiksait saqqititauvallialirniaqsutik tamakkutiguunaq.
IRN-gijaujut piliriangit ikajurutiulirniarmmata tamainnut Canadamiungujunut qaujisainiqaqtittinirmiktigut Inuit Nunangatta iluani – pijjutigillugu 40%-gijanganik anginiqarningata Canadaup nunangata anginirijanganit, 72%-nganik tariut sigjagijanginnik ammalu sukkalijummaringmik inuusiliriniujut ammalu avatiliriniujut asitjiqpallianiqaliqsimaningat – piliriniqarviuvammata maliktitaullutik Canadami Inuit Qaujisaiqattarnirnut Parnautiliangusimajunik.
Tamakkununga tusaqtitaugiakkannirumajut, uvanngngat qaujigiarviqarunnaqput: