May 23, 2023 – Ottawa, Ontario
Akuniunngittumik nuqqangatitaulauqsuni, Inuit ammalu piqatialugiit katinniqaqtitauvanningat kajusititausimanialirmijuq Ottawa-mi angunasuktilimaat Inuit Nunaluktaanginni ilitarijausimaningannut, quviasuglutik pinasuksimajanginnit niriqatigiililutik ammalu quviasuqatigiiktitaulutik Inuit titagusinginnik ammalu piusituqarijangannik.
Inuit Tapiriit Kanatami katisimaliqtittiniaqtut inuuqatigiinit turaangatitausimajunut ujjirusuliqtittigiarnirmik May 29-mi 6-muaqpat unnukkut 10-mut unnukkut Canadami Sanaugalirivvingani. Nutaamik atsiqtausimalirtuq taanna quviasuqatigiiktittiniuvaktuq – Tapiriit – tukiqaqsuni katinniqarnirmik uqausittigut, Inuktut. iqqaumajaujuksauvuq taijauvalaurninganik Ikhlisaariniq.
Niriqatigiiktittilutik katinniqaqtittinirmut qanuiliuqtittiniuvaktumi nirijaksaqaqtittiniaqput Inuit niqigivaktanginik angunasuaqtausimajuvinirnik angunasuktinit Inuit Nunaluktaangannit. Mikittuullutik allirarnut nirijaksaqaqtittiniuvaktut saqqitausimaniaqput maliktitauvallialutik sitamaullutik ajjigiiktuunatik aviktuqsimaniujunit nunagijatuqattinni ammalu ilaqaqtitausimalutik niqinik, iqalunnik ammalu piruqtuqutigijauvaktunit nirivaktunit niqiunngittunik. Taanna qanuiliuqtittiningat pitaqaqtittiniarmijuq piusituqakkut ammalu ullumiuliqtumi takunnaagaksaqaqtittinirnik turaangatitaullutik Inuit piusituqamiktigut nalunaiqsijjutigivaktanginik ilaqaqtitaulutik quviagijauluaqpaktuullutik amirnit aannuraaliangusimajunik aturlutik ajjiliuqtauvimmik.
“Katiqatigiingniq Inuit nirigivaktanginik niriqatigiikpanniq piusituqattinnut ilagijauqataummat,” uqaqsuni Inuit Tapiriit Kanatami Angijuqqaangat Natan Obed. “Niriuginiaqpara takukkannirunnarniarakkit piqatialuktaarisimajakka, ammalu asingiktauq piqatialuktaarisimalirniarmijakka, niriqatigiiktilluta pitaqtausimajuvinirnik Inuit Nunangannit.”
Inuulluni Igajimmarik Sheila Flaherty ammalu Kanatami Sanaugalirivvingani Igajimmarik Kenton Leier takujaksaqaqtittiniaqpuk pitagauqattaqsimajunit nirijaksaliangusimajunik ilaqaqtillugit Iqalukpik, nirliq, maktaaq ammalu tuktut niqinginnik. Upagutisimaqataujut niriungniqarunnarivut takunnaagaksaqaqtittiniarningita Inuit suurlu Terry Uyarak, Nancy Mike, Geronimo Inutiq ammalu Deantha Edmunds.
Taakkununga Tapiriit pijjutigilugit tusaqtitaugiakkannirumajut, uvani qaujigiarunnaqput.